Le máaxoʼob nuʼuktik u meyaj u testigoʼob Jéeobaoʼ sáamsamal táan u yilkoʼob bix u bin u kʼiʼitpajal le coronavirus wa COVID-19. K-ojleʼ le Bibliaoʼ ku yaʼalikeʼ tu tsʼook kʼiinoʼobeʼ yaan u sen antal kʼaakʼas kʼojaʼaniloʼob (Lucas 21:11). Le kéen yanak pakʼbeʼen kʼojaʼaniloʼobeʼ kʼaʼabéet u yilik máak bix jeʼel u kanáantkubaeʼ yéetel bix jeʼel u kanáantik u maasileʼ (Proverbios 22:3).

Maʼ xaaneʼ yaan tiʼ teʼexeʼ taak u yojéeltik bix yanil le sukuʼunoʼob yéetel le kiikoʼob tuʼux jach yaan le kʼojaʼanilaʼ. Le coronavirusoʼ tsʼoʼok u jach afectartik u najiloʼob Betel bey xan le múuchʼuliloʼob yanoʼob Italia, Japón, Corea del Sur yéetel uláakʼ luʼumiloʼoboʼ. Tiʼ jujunpʼéel u najiloʼob Beteleʼ maʼatech u tsʼaʼabal gira mix tech u kʼaʼamal uʼulabiʼ. Yaan tuʼuxoʼobeʼ le gobiernooʼ tsʼoʼok u yaʼalik maʼ u beetaʼal nukuch muchʼtáambaloʼob, le oʼolaleʼ tsʼoʼok u cancelartaʼal yaʼab asambleaʼob. Yaan tuʼuxoʼob xaneʼ le sukuʼunoʼoboʼ maʼ tu páajtal u jóokʼloʼob kʼaʼaytaj mix u muchʼkubaʼob. Kex beyoʼ u tsʼaamaj u yóol u meyajtoʼob Dios yéetel táan xan u paklan líiʼsik u yóoloʼob (Judas 20, 21).

Yoʼolal le kʼojaʼanilaʼ yaan jujunpʼéel baʼaloʼob tsʼoʼok u yilik le sukuʼunoʼob jach ku yáantajoʼoboʼ. Le baʼaloʼobaʼ jach jeʼel u yáantkech xan a kanáantaba teʼ tuʼux kajaʼanechoʼ. Koʼox ilik máakalmáakoʼobiʼ.

• Maʼ a sen sajaktal. Maʼ kʼaas ka a wojéelt bix u bin le kʼojaʼanilo’ yéetel bix jeʼel a kanáantkabaeʼ. Chéen baʼaleʼ maʼ unaj u píitmáan a chʼaʼik saajkiliʼ mix a creertik tuláakal baʼax ku yaʼalaʼaliʼ (Proverbios 14:15; Isaías 30:15).

• Beet baʼax ku yaʼalik le autoridadoʼoboʼ. Letiʼobeʼ ku yaʼalikoʼob baʼax jeʼel u beetik máak utiaʼal u kanáantik u toj óolaleʼ. Le oʼolal maʼalob ka u beet máak baʼax ku yaʼalikoʼob (Romanos 13:1).

• Bix jeʼel a kanáantkabaeʼ. Kʼaʼabéet a pʼoʼik a kʼab láalaj hora yéetel jabón wa a jiʼik gel antibacterial ta kʼab. Unaj xan a wilik a pʼoʼik wa a choʼik le nuʼukuloʼob ku maʼachal láalaj hora ta wotoch wa teʼ tuʼux ku beetaʼal le muchʼtáambaloʼoboʼ. Tsʼoʼoleʼ le doctoroʼoboʼ ku yaʼalikoʼobeʼ utiaʼal maʼ u maas kʼiʼitpajal le kʼojaʼaniloʼ maʼ unaj u saludarkuba máakiʼ. Le Organización Mundial de la Salud bey xan le autoridadoʼob yaan teʼ tuʼux kajaʼanoʼonaʼ ku yaʼalikoʼob bix jeʼel u kanáantkuba máakeʼ.

• Eʼes yaabilaj tiʼ u maasil. Tuláakloʼon kʼaʼanaʼan k-ilik le muchʼtáambaloʼob bey xan le kʼaʼaytajoʼ. Chéen baʼaleʼ wa kʼojaʼanecheʼ maas maʼalob ka pʼáatkech ta wotoch, beyoʼ maʼ ten a pakʼ tiʼ u maasil. Tsʼoʼoleʼ ka weʼesik a yaabiltmaj le sukuʼunoʼoboʼ bey xan a vecinoʼob (Mateo 22:39).

• Beet baʼax ku yaʼalik u kaajal Jéeoba. Teʼ tuʼuxoʼob sen yaan le kʼojaʼanilaʼ maʼ xaaneʼ u najil Beteleʼ yaan u yaʼalik bix kun beetbil le muchʼtáambaloʼoboʼ, le asambleaʼoboʼ bey xan uláakʼ nukuch muchʼtáambaloʼob. Lelaʼ bey táan u yúuchul teʼ luʼumiloʼob tuʼux tsʼoʼok u sen tsaʼayal le coronavirusoʼ, jeʼex Italia, Japón yéetel Corea del Suroʼ. Yaan tuʼuxoʼobeʼ le ancianoʼoboʼ ku tsʼáaikoʼob tiʼ le sukuʼunoʼob u grabaciónil le muchʼtáambaloʼob utiaʼal ka u chaʼantoʼoboʼ. Le sukuʼunoʼoboʼ utiaʼal u kʼaʼaytajoʼobeʼ ku meyajtiʼob celular, ku túuxtikoʼob mensaje, correo electrónico wa carta.

Lelaʼ jujunpʼéel xookoʼob yéeyaʼan jeʼel u yáantkech a kanáantaba tiʼ pakʼbeʼen kʼojaʼaniloʼobeʼ.

• «Cómo defenderse del contagio», (¡Despertad! número 6 tiʼ 2016, táan juʼun 4 tak 6).

• «Mejore su salud. ¿Cómo?», (¡Despertad! junio tiʼ 2015, táan juʼun 2 tak 7).

• «Clave 4: Proteja su salud», (¡Despertad! marzo tiʼ 2011, táan juʼun 7).