Tu kʼiinil15 tak 31 tiʼ diciembre tiʼ 2022, u testigoʼob Jéeobaeʼ táakpajoʼob tiʼ le Feria Internacional ku beetaʼal tu kaajil Dakaroʼ (FIDAK). Le feriaaʼ cada año ku beetaʼal tu luʼumil Senegal. Táan kaʼach u beetaʼal u 30 aniversario le feriaoʼ, teʼeloʼ ku jóoʼsaʼal artesaníasiʼ, ku promocionartaʼal baʼaloʼob jeʼel u yáantik le máakoʼoboʼ yéetel ku yeʼesaʼal le baʼaxoʼob suuk u beetaʼal teʼ luʼumiloʼ. U milesil máakoʼob ku binoʼob teʼ feriaaʼ, ku taaloʼob tiʼ jejeláas luʼumiloʼob yaan África yéetel tiʼ tuláakal yóokʼol kaab.

Le sukuʼunoʼoboʼ tu instalartoʼob junpʼéel puesto teʼ feria utiaʼal u yeʼeskoʼob le sitio jw.org. Tu tsʼáajoʼob publicaciónoʼob jeʼel u yáantik le familiaʼoboʼ, videoʼob tiʼ le serieʼob «Beetaba u amigo Jéeoba», «Dibujoʼob ku péekoʼob» bey xan le entrevista ku beetaʼal tiʼ le paalaloʼob tiʼ le serie «Baʼax ku yaʼalik uláakʼ paalaloʼob».

Yaan tiʼ le máakoʼob maʼ u kʼaj óoloʼob le sitiooʼ tu jáan kaxtoʼob tu celularoʼob. Jach jaʼakʼ u yóoloʼob le ka tu yiloʼobeʼ le sitio jw.org, disponible ich maas tiʼ 1,000 idiomaʼob, tak ich uolof, le idioma ku tʼaʼanal teʼ kaajoʼ. Tʼoʼox maas tiʼ 3,000 publicaciónoʼob tiʼ le máaxoʼob taak u kaanbaloʼoboʼ.

Juntúul máak bin teʼ feriaoʼ tu yaʼalaj: «Le baʼax maas jatsʼuts tin wilil teʼ feriaoʼ letiʼe lugar yaanteʼexaʼ». Uláakʼ juntúuleʼ tu yaʼalaj: «Wa ka tsʼaʼabak junpʼéel premio tiʼ le lugar maas jatsʼuts yaan tiʼ le feriaaʼ, ¡seguro teʼex kan ganartik!».

Juntúul sukuʼun ku kʼaabaʼtik Martin Laud, áantajnaj utiaʼal u colocartaʼal le exhibidoroʼoboʼ, tu yaʼalaj: «Jach kiʼimakchaj k-óol ka t-ilaj bix u náatsʼal le máakoʼoboʼ. Yaʼabeʼ hasta tu tsʼáajoʼobtoʼon u graciasil úuchil k-tsʼáaik informaciónoʼob chʼaʼan teʼ Biblia jach jeʼel u yáantik máakoʼ, tsʼoʼoleʼ gratis».

¡Jach kiʼimak k-óol tumen jach maʼalob úuchik u bintoʼon teʼ feriaaʼ! Lelaʼ chéen uláakʼ ejemplo tiʼ bix u kaajal Jéeobaeʼ táan u yáantik u maasil máakoʼob utiaʼal ka yanaktiʼob le ‹naʼat› ku taal tiʼ u Tʼaan Diosoʼ (Proverbios 3:21, 22).