Desde tu kʼiinil 26 tiʼ diciembre tiʼ 2022, káaj u kaʼa beetaʼal le Escuela utiaʼal Precursor regularoʼob yéetel especialoʼob tu luʼumil Ucraniaoʼ. Le escuelaaʼ káaj u beetaʼal teʼ lugaroʼob maʼ jach peligrosoʼoboʼ. Yanoʼobeʼ béeychaj u muchʼkubaʼob, yéetel uláakʼoʼobeʼ tu conectartubaʼob tiʼ videoconferencia. Jujuntúul tiʼ le sukuʼunoʼobaʼ pʼáat minaʼan taakʼin tiʼob, corriente mix Internet. Tsʼoʼoleʼ u yojloʼob jeʼel tak u puʼulul junpʼéel bomba teʼ tuʼux yanoʼoboʼ, kex beyoʼ jach kʼaʼanaʼan tu yililoʼob le xook tsʼaʼaboʼ. Bejlaʼeʼ maas muʼukʼaʼan u fejoʼob yéetel maas u yaabiltmoʼob Jéeoba.

Nataliaeʼ kajaʼan Krivói Rog, letiʼeʼ ku yaʼalik: «Le escuelaoʼ tin wilaj bey junpʼéel salvavidaseʼ tumen tu yáanten utiaʼal maʼ in jach sajaktal yéetel in jach preocuparkinba». Anastasiaeʼ kajaʼan Chernovtsi, yéetel óoliʼ bey xan tu yuʼubilubaoʼ, ku yaʼalik: «Le escuelaaʼ tu yáanten in wileʼ Jéeobaeʼ jach tu jaajil u yaabiltmen. Teʼ tu tsʼook añoaʼ tsʼoʼok u yúuchul yaʼab baʼaloʼob kʼaastak, le baʼaxoʼob kaʼansaʼabtoʼon teʼ escuelaoʼ jach letiʼe baʼax kʼaʼabéettoʼon kaʼachoʼ. Jach tu líiʼsaj in wóol yéetel tu tsʼáajten u muukʼil utiaʼal u seguer in meyajtik Jéeoba».

Svitlanaeʼ juntúul precursora kajaʼan Kitsman, letiʼeʼ jach nerviosachaj le ka invitartaʼab teʼ escuelaoʼ. Letiʼeʼ ku yaʼalik: «Tin waʼalaj tiʼ Jéeobaeʼ jach preocupadaen tumen minaʼantoʼon taakʼin. Chéen baʼaleʼ junpuliʼ maʼ tin arrepentir úuchik in confiar tiʼ tumen bejlaʼeʼ jach in wojleʼ Jéeobaeʼ jach u yaabiltmen yéetel ku kanáantken». Yoʼolal le baʼaxoʼob tu beetaj le kiikaʼ u yíicham maʼ Testigoeʼ káaj u bin reunión tu yéetel.

Mientras táan le escuela tu kaajil Zhitómiroʼ, le sukuʼunoʼoboʼ kaʼatéen anchaj u taʼakikubaʼob tiʼ junpʼéel naj beetaʼan yáanal luʼum tumen káaj u juum le alarma eʼesik naatsʼ yanil le aviónoʼob pulik le bombaʼoboʼ. Le tiaʼanoʼob teʼ najoʼ tu tʼaboʼob junpʼéel kʼáakʼ utiaʼal u kʼíintaloʼob yéetel u seguerkoʼob le xookoʼ. Jach peligroso le baʼax tu aktáantoʼoboʼ. Valentinaeʼ juntúul kiik maʼ úuch kʼuchuk teʼ kaajoʼ, letiʼeʼ ku yaʼalik: «Mix bikʼin ken in tuʼubs le escuelaaʼ tumen jach tin wilaj bix u kanáantken Jéeoba, bey ka yanaken yáanal u xiikʼoʼobeʼ».

Le precursoroʼob yanoʼob Ucraniaoʼ láayliʼ jach kiʼimakchaj u yóoloʼob le ka tu yojéeltoʼob tsʼoʼok u menoskíintaʼal le horas ku kʼáataʼal tiʼ le precursoroʼoboʼ. Ka tsʼoʼok u yuʼubik le anuncioaʼ Yuliaeʼ tu yaʼalaj: «¡Jach in yaabiltmaj Jéeoba! Tumen maʼ sen sáameʼ tin kʼáatajtiʼ ka u chaʼa in seguertik in beetik in precursorail. Jach in wojel yaan u núukik in oración, pero maʼ in wojel bix ken u beetiʼ. Ka tin wuʼuyaj le anuncioaʼ jach tin tsʼáaj u graciasil tiʼ Jéeobaʼ yoʼolal le baʼaxoʼob ku beetik tin woʼolaloʼ. Le noticiaaʼ bey junpʼéel jatsʼuts regalo tsʼaʼabten le ka tsʼoʼok le escuelaoʼ».

Tak tu kʼiinil 24 tiʼ enero tiʼ 2023, tsʼaʼab junpʼéel informe yoʼolal le baʼax táan u yúuchul Ucraniaoʼ. Le informeaʼ tsʼaʼab tumen le sukuʼunoʼob yanoʼob teʼeloʼ. Chéen baʼaleʼ como istikyaj u comunicarkubaʼob yéetel u maasil sukuʼunoʼobeʼ maʼ xaaneʼ maas yaʼab le sukuʼunoʼob tsʼoʼok u afectartaʼaloʼoboʼ.

• 47 u túulal u testigoʼob Jéeoba tsʼoʼok u kíimloʼob.

• 97 u túulal Testigoʼob úuch wa baʼax loobil tiʼob.

• 8,953 Testigoʼobeʼ kex maʼ tu pʼatoʼob u luʼumoʼobeʼ tu kaxtoʼob tuʼux u binoʼob utiaʼal u taʼakikubaʼob.

• 590 najoʼob jach júutoʼob.

• 645 najoʼob jach kʼaschajoʼob.

• 1,722 najoʼob yaan baʼax kʼaskúuntaʼab tiʼob.

• Ocho salónoʼob jach júuti.

• 17 salónoʼob jach kʼaschajoʼob.

• 76 salónoʼob yaan baʼax kʼaschaj tiʼob.

• 26 Comitéʼob tiʼ Socorro táan u yáantajoʼob tu luʼumil Ucrania.

• 46 najoʼob tsʼoʼok u yutskíintaʼaloʼob.

• 5 salónoʼob tsʼoʼok u yutskíintaʼaloʼob.

• 54,445 u testigoʼob Jéeoba tsʼoʼok u yáantaʼaloʼob tumen le comitéʼob utiaʼal u kaxtikoʼob tuʼux u pʼáatloʼoboʼ.

• 27,655 Testigoʼob tsʼoʼok u binoʼob táanxel luʼumil yéetel táan u yáantaʼaloʼob tumen u maasil sukuʼunoʼob.