Le sukuʼunoʼob kajaʼanoʼob Ucraniaoʼ jach kiʼimak u yóoloʼob úuchik u kaʼa káajal u predicaroʼob yéetel le carritoʼoboʼ bey xan teʼ tuʼux yaʼab u máan máakoʼ. Letiʼobeʼ tsʼoʼok u yantaltiʼob jatsʼuts experienciaʼob. Le superintendenteʼob tiʼ circuito yéetel le ancianoʼob yanoʼob teʼ luʼumiloʼ ku yaʼalikoʼobeʼ le máakoʼoboʼ jach kiʼimak u yóoloʼob úuchik u kaʼa káajal u predicar le sukuʼunoʼoboʼ. Yanoʼobeʼ hasta tu yaʼaloʼobeʼ úuch maʼ u yiloʼob kaʼach u predicar le Testigoʼob teʼ tuʼuxoʼob kajaʼanoʼoboʼ.

Tatiana, juntúul kiik kajaʼan tu luʼumil Odesaeʼ, tiaʼan tu múuchʼulil Serhiivkaeʼ. Letiʼeʼ jach kiʼimak u yóol úuchik u béeytal u kaʼa suut u xíimbalt le máakoʼob suuk u tsikbal kaʼach tu yéeteloʼob antes tiʼ u káajal le pandemiaoʼ. Letiʼeʼ ku yaʼalik: «Desde le ka joʼopʼ k-kaʼa xíimbaltik le máakoʼoboʼ t-ilaj bix táan u bendecirtaʼal le meyaj tumen Jéeobaoʼ». Antes tiʼ u káajal le pandemiaoʼ letiʼeʼ tsikbalnaj yéetel juntúul koʼolel maʼ u kʼáat kaʼach u kan mix baʼal tiʼ le Bibliaoʼ. Chéen baʼaleʼ le ka béeychaj u kaʼa bin u xíimbalteʼ le koʼoleloʼ jach taak kaʼach u kaanbal tiʼ le Bibliaoʼ yéetel tu kʼamaj junpʼéel xook. Tatianaeʼ ku seguer u yaʼalik: «Bejlaʼeʼ táan in wilik in xíimbaltik le máaxoʼob tsʼoʼok in yáax tsikbal tu yéeteloʼoboʼ yéetel táan in wilik wa jeʼel u kʼamkoʼob ka in tsʼáa xook tiʼobeʼ».

Yevheniy yéetel Liliaeʼ kajaʼanoʼob kaʼach Mariúpol, letiʼobeʼ tu pʼataj u yotochoʼob utiaʼal u binoʼob kajtal tuʼux maas seguro tu luʼumil Ucrania. Le sukuʼunoʼobaʼ mantatsʼ táan u predicaroʼob yéetel ku yaʼalikoʼobeʼ letiʼe baʼax áantkoʼob utiaʼal maʼ u sen tuukuloʼob tiʼ u problemaʼoboʼ. Letiʼobeʼ ku yaʼalikoʼob: «Maʼ chéen chʼaʼabil t-ilil k-pʼatik k-otoch utiaʼal k-bin kajtal yaanal tuʼuxiʼ. Chéen baʼaleʼ k-ojel Jéeobaeʼ mantatsʼ ku yáantik le máaxoʼob meyajtikoʼ. Letiʼeʼ u tsʼaamajtoʼon u espíritu santo. Tsʼoʼoleʼ le sukuʼunoʼoboʼ mantatsʼ ku yáantkoʼonoʼob yéetel le baʼaxoʼob kʼaʼabéettoʼon utiaʼal ka séeb suukchajkoʼon teʼ tuʼux binoʼonoʼ».

Tuláakʼ tuʼuxoʼob xaneʼ le sukuʼunoʼoboʼ yéetel le baʼaxoʼob ku beetkoʼoboʼ táan u tsʼáaikoʼob kʼaj óoltbil u Tʼaan Jéeoba. Por ejemploeʼ u jaats sukuʼunoʼob kajaʼanoʼob tu kaajil Mykolaiveʼ múul meyajnajoʼob yéetel junpʼéel organización internacional ku tsʼáaik baʼaxoʼob kʼaʼabéet tiʼ le máakoʼoboʼ. Le sukuʼunoʼoboʼ áantajnajoʼob utiaʼal u yutskíintaʼal junpʼéel bodega tuʼux ku tsʼaʼabal le despensaʼoboʼ. Tsʼoʼoleʼ tu yutskíintoʼob xan u tubosil le jaʼoʼ, tu armartoʼob le anaqueloʼoboʼ yéetel tu armartoʼob le despensaʼob ku siʼibil tiʼ le máakoʼoboʼ. Le ka bin juntúul u encargadail le organización u yil le meyaj beetaʼaboʼ jach péeknaj u yóol ka káaj u yokʼol. Letiʼeʼ tu yaʼalaj: «Maʼ tin tuklaj wa bey jatsʼutsil kun pʼáatlaʼ».

Le sukuʼunoʼob kajaʼanoʼob Ucraniaoʼ kex talam bix kuxlikoʼobeʼ láayliʼ kiʼimak u yóoloʼobeʼ tumen maʼ tu xuʼulul u beetkoʼob «baʼax maʼalob» (Gálatas 6:9).

Tak tu kʼiinil 13 tiʼ julio tiʼ 2022, tsʼaʼab junpʼéel informe yoʼolal le baʼax táan u yúuchul Ucraniaoʼ. Le informeaʼ tsʼaʼab tumen le sukuʼunoʼob yanoʼob teʼeloʼ. Chéen baʼaleʼ como istikyaj u comunicarkubaʼob yéetel u maasil sukuʼunoʼobeʼ maʼ xaaneʼ maas yaʼab le sukuʼunoʼob tsʼoʼok u afectartaʼaloʼoboʼ.

• 42 u túulal u testigoʼob Jéeoba tsʼoʼok u kíimloʼob.

• 97 u túulal Testigoʼob úuch wa baʼax loobil tiʼob.

• 28,683 Testigoʼobeʼ kex maʼ tu pʼatoʼob u luʼumoʼobeʼ tu kaxtoʼob tuʼux u binoʼob utiaʼal u taʼakikubaʼob.

• 524 najoʼob jach júutoʼob.

• 588 najoʼob jach kʼaschajoʼob.

• 1,554 najoʼob yaan baʼax kʼaskúuntaʼab tiʼob.

• Cinco salónoʼob jach júuti.

• Diez salónoʼob jach kʼaschajoʼob.

• 36 salónoʼob yaan baʼax kʼaschaj tiʼob.

• 27 Comitéʼob tiʼ Socorro táan u yáantajoʼob tu luʼumil Ucrania.

• 52,947 u testigoʼob Jéeoba tsʼoʼok u yáantaʼaloʼob tumen le comitéʼob utiaʼal u kaxtikoʼob tuʼux u pʼáatloʼoboʼ.

• 23,863 Testigoʼob tsʼoʼok u binoʼob táanxel luʼumil yéetel táan u yáantaʼaloʼob tumen u maasil sukuʼunoʼob.