12 TIʼ AGOSTO TIʼ 2022
UCRANIA
Informe 12 | Kex jach yaj baʼax ku yúuchul Ucraniaeʼ le sukuʼunoʼoboʼ maʼ tu xuʼulul u yeʼeskoʼob yaabilaj
«Mix le guerra jeʼel u xuʼulsik u beetaʼal discípuloʼoboʼ»
Teʼ asamblea «¡Yanaktech jeetsʼelil!», yanchaj tu kʼiinil 23 tak 31 tiʼ julio tiʼ 2022, yaʼab tiʼ le máaxoʼob yanoʼob Ucrania bey xan le púutsʼoʼob tiʼ uláakʼ luʼumiloʼoboʼ okjaʼanajoʼob. Ka tu tsʼáaj u kʼiinil 2 tiʼ agostoeʼ tsʼokaʼaniliʼ u yokjaʼ 1,113 túumben sukuʼunoʼob Ucraniailoʼobeʼ. Juntúul sukuʼun Ucraniaileʼ tu yaʼalaj: «Mix le guerra jeʼel u xuʼulsik u beetaʼal discípuloʼobeʼ tumen Jesúseʼ tu yaʼalaj tiʼ le máaxoʼob meyajtikoʼ: ‹Tiʼ yanen ta wéeteleʼex tak teʼ kʼiinoʼob táan u tsʼoʼokol tiʼ le yóokʼol kaabaʼ›» (Mateo 28:20).
Koʼoneʼex ilik jujunpʼéel baʼaloʼob jatsʼutstak úuch tiʼ le sukuʼunoʼoboʼ.
Nataliaeʼ yaantiʼ 63 años, tiʼ u taal tiʼ u kaajil Kreminna. Letiʼ yéetel kaʼatúul u hijaseʼ káaj u xokikoʼob le Biblia yéetel u testigoʼob Jéeobaoʼ óoliʼ tu añoil 1990. U hijaseʼ tu kʼexaj u kuxtaloʼob ka okjaʼanajoʼob, pero letiʼeʼ maʼ okjaʼanajiʼ. Ka káaj le guerraoʼ juntúul sukuʼun yéetel u familiaeʼ binoʼob tiʼ junpʼéel lugar maas seguroeʼ ka tu bisoʼob Natalia. Ka kʼuchoʼob tu kaajil Ivano-Frankivskeʼ Nataliaeʼ pʼáat tiʼ junpʼéel Salón.
Nataliaeʼ ku yaʼalik: «Yoʼolal le bukaʼaj bombaʼob wáakʼ teʼ tuʼux kajaʼanenoʼ, hasta pʼáat mix baʼal beetik u kiʼimaktal in wóol. Chéen baʼaleʼ le sukuʼunoʼoboʼ jach tu yeʼesoʼobten yaabilaj yéetel tu kanáantenoʼob. Yoʼolal leloʼ káaj in yaabiltik Jéeoba, tin wilaj xan in sen xokik le Bibliaoʼ tsʼoʼoleʼ juntúul kiikeʼ tu yaʼalajten jeʼel u tsʼáaikten xook yéetel le libro: ¡Disfrutart le kuxtaloʼ! In wojel Jéeoba túuxt le kiikoʼ. Beoraaʼ jach kiʼimak in wóol tumen tsʼoʼok in wokjaʼ bey u testigo Jéeobaeʼ. Teneʼ tak in beetik le baʼax ku yaʼalik le mandamiento maas nojoch yanaʼ: ‹Kʼaʼabéet a yaabiltik Jéeoba yéetel tuláakal a puksiʼikʼal, yéetel tuláakal a kuxtal bey xan yéetel tuláakal a tuukul›» (Mateo 22:37).
Tu luʼumil Poloniaeʼ Oliaeʼ u machmaj junpʼéel juʼun tuʼux tsʼíibtaʼan u kʼaabaʼ le asamblea: «¡Yanaktech jeetsʼelil!»
Oliaeʼ kajaʼan kaʼach Cherkassi, le ka káaj le guerraoʼ letiʼeʼ maʼ okjaʼanajaʼan kaʼachiʼ pero publicadora. Tu kʼiinil 6 tiʼ marzoeʼ anchaj u púutsʼul tak Polonia yéetel u hija bey xan yéetel u yáabil. Letiʼeʼ ku yaʼalik: «Le ka kʼuchoʼoneʼ chéen k-mochila de emergencia k-kuchmaj. Chéen baʼaleʼ le sukuʼunoʼob yanoʼob teʼ múuchʼuliloʼ jach tu yáantoʼonoʼob. Lelaʼ tu yáanten in wileʼ junmúuchʼ u meyaj u kaajal Jéeoba yéetel letiʼ nuʼuktik yéetel u espíritu santo. Tuláakal le baʼaxoʼob úuchtenoʼ tu beetaj in tsʼáaik cuenta minaʼan uláakʼ baʼax maas maʼalob ke in kʼubik in kuxtal tiʼ Jéeoba. Letiʼeʼ maʼ tu pʼaten tin juunaliʼ le oʼolaleʼ jach in kʼáat in meyajte yéetel in agradecertik tiʼ le baʼax tu beetaj tin woʼolaloʼ».
Yuliaeʼ 18 años yaantiʼ, kajaʼan kaʼach Donetsk. U familiaeʼ u testigoʼob Jéeoba chéen baʼaleʼ letiʼeʼ maʼ okjaʼanak kaʼachiʼ. Yuliaeʼ ku tsikbaltik baʼax úuchtiʼ le táant u káajal le guerraoʼ. Letiʼeʼ ku yaʼalik: «Kʼajaʼanteneʼ pekekbalen kaʼach teʼ luʼumoʼ, jach tin tuklaj tsʼoʼokten beyoʼ. Le najoʼob yanoʼob teʼ calle tuʼux kajaʼanenoʼ láaj júutoʼob pero toʼoneʼ maʼ kíimoʼoniʼ. Yoʼolal le baʼaxoʼob úuchtenoʼ káaj in orar tiʼ Jéeoba yéetel in tuukul tiʼ u jatsʼuts modos, leloʼ tu maas natsʼen tu yiknal le oʼolal tin chʼaʼtuklaj in kʼubik in kuxtal tiʼ letiʼ. Jéeobaeʼ u yaabiltmen tumen tu núukaj in oraciónoʼob. Kaʼacheʼ chéen in wojel yaan Dios pero bejlaʼeʼ kin wuʼuyik jach in yaabiltmaj». Yuliaeʼ okjaʼanaj tu kʼiinil 24 tiʼ julio.
David táanil tiʼ u yokjaʼ tu luʼumil Alemania
Davideʼ yaan 11 años tiʼ. Letiʼ yéetel u familiaeʼ anchaj u binoʼob Alemania le ka káaj le guerraoʼ. Letiʼeʼ nueve años yaan tiʼ ka káaj u beetik u publicadoril yéetel yaʼab metas u tsʼaamaj ichil u kuxtal. Letiʼeʼ ku yaʼalik: «Tin chʼaʼtuklaj in wokjaʼ tumen in yaabiltmaj Jéeoba yéetel in kʼáat in maas bisinba tu yéetel. Le ka okjaʼanajeneʼ hasta okʼolnajen tumen kiʼimak in wóol úuchik in wokol ichil u kaajal Jéeoba. Jach jatsʼuts in wilik in kaʼansik tiʼ le máakoʼob le baʼaxoʼob ken u beet Jéeobaoʼ, le oʼolal taak in beetik in precursoril. In kʼáat xan in wáant le sukuʼunoʼob teʼ múuchʼuliloʼ, le oʼolal taak in beetik in siervo ministerialil. Tsʼoʼoleʼ desde ka binen in xíimbalt u sucursalil Leópolis [Lviv] tu añoil 2018, jach kin tsʼíiboltik in bin meyaj Betel».
Olenaeʼ kajaʼan Kiev, letiʼeʼ káaj u predicar yéetel u testigoʼob Jéeoba tu añoil 2011. Chéen baʼaleʼ ka tsʼoʼokeʼ pʼáat inactivail diez años. Tu añoil 2020, le ancianoʼoboʼ tʼaanajoʼob yéetel Olenaeʼ ka tu tsʼáajoʼobtiʼ le folleto Jéeobaeʼ u kʼáat ka suunakech. Letiʼeʼ ku yaʼalik: «Káaj in kaʼa xokik le Bibliaoʼ yéetel in bin teʼ muchʼtáambaloʼoboʼ chéen baʼaleʼ maʼ xáanchajeʼ ka tin pʼataj tu kaʼatéen. Le táan le guerraoʼ tin wilaj bix úuchik u núukik Jéeoba in oraciónoʼob. Tin tsʼáaj cuenta xan bix úuchik u kanáantken, bix tu yeʼesilten yaabilaj yéetel bix tu tsʼáajten u jeetsʼelil. Teneʼ anchaj in púutsʼul tak Rumania, teʼeloʼ tin wilaj uláakʼ Testigoʼobiʼ. Le sukuʼunoʼoboʼ tu kanáantenoʼob yéetel tu yeʼesoʼobten yaabilaj. Yoʼolal le baʼax tu beetoʼobaʼ hasta tin wuʼuyaj bey Jéeoba tepʼken tumen jach keʼeleneʼ». Olenaeʼ okjaʼanaj tu kʼiinil 24 tiʼ julio. Letiʼeʼ ku yaʼalik xan: «Jach kin tsʼáaik u graciasil tiʼ Jéeoba úuchik u yeʼesikten paciencia. Bejlaʼeʼ ‹Yaanten u muukʼil utiaʼal in beetik tuláakal baʼal, tu yoʼolal le máax tsʼáaikten u páajtalil in beetkoʼ›» (Filipenses 4:13).
Tak tu kʼiinil 2 tiʼ agosto tiʼ 2022, tsʼaʼab junpʼéel informe yoʼolal le baʼax táan u yúuchul Ucraniaoʼ. Le informeaʼ tsʼaʼab tumen le sukuʼunoʼob yanoʼob teʼeloʼ. Chéen baʼaleʼ como istikyaj u comunicarkubaʼob yéetel u maasil sukuʼunoʼobeʼ maʼ xaaneʼ maas yaʼab le sukuʼunoʼob tsʼoʼok u afectartaʼaloʼoboʼ.
Bix afectartaʼabik le sukuʼunoʼoboʼ
43 u túulal u testigoʼob Jéeoba tsʼoʼok u kíimloʼob.
97 u túulal Testigoʼob úuch wa baʼax loobil tiʼob.
22,568 Testigoʼobeʼ kex maʼ tu pʼatoʼob u luʼumoʼobeʼ tu kaxtoʼob tuʼux u binoʼob utiaʼal u taʼakikubaʼob.
586 najoʼob jach júutoʼob.
613 najoʼob jach kʼaschajoʼob.
1,632 najoʼob yaan baʼax kʼaskúuntaʼab tiʼob.
Cinco salónoʼob jach júuti.
Diez salónoʼob jach kʼaschajoʼob.
37 salónoʼob yaan baʼax kʼaschaj tiʼob.
Bix áantaʼabik le sukuʼunoʼoboʼ
27 Comitéʼob tiʼ Socorro táan u yáantajoʼob tu luʼumil Ucrania.
53,836 u testigoʼob Jéeoba tsʼoʼok u yáantaʼaloʼob tumen le comitéʼob utiaʼal u kaxtikoʼob tuʼux u pʼáatloʼoboʼ.
24,867 Testigoʼob tsʼoʼok u binoʼob táanxel luʼumil yéetel táan u yáantaʼaloʼob tumen u maasil sukuʼunoʼob.