16 tiʼ noviembre tiʼ 2022
UCRANIA
Informe 13 | Kex jach yaj baʼax ku yúuchul Ucraniaeʼ le sukuʼunoʼoboʼ maʼ tu xuʼulul u yeʼeskoʼob yaabilaj
Ku kaʼa jóokʼloʼob predicar joonaj joonajil
Tu mesil agosto tiʼ 2022, tiʼ le sukuʼunoʼob kajaʼanoʼob Ucraniaoʼ aʼalaʼabtiʼobeʼ jeʼel u páajtal u kaʼa jóokʼloʼob predicar teʼ tuʼuxoʼob maʼ jach afectartaʼan tumen le guerraoʼ. Le sukuʼunoʼoboʼ jach taak u jóokʼloʼob predicar kaʼachi yéetel tsʼoʼok u yilkoʼobeʼ yaʼab máakoʼob taak u yuʼubikoʼob baʼax ku yaʼalik le Bibliaoʼ. Por ejemploeʼ juntúul máax tu kʼamaj junpʼéel xook yéetel le Bibliaoʼ tu yaʼalaj: «Le ka tin wilaj bukaʼaj u sufrir máak yoʼolal le guerraoʼ tin tsʼáaj cuenta mix máak jeʼel u páajtal u yutskíintik le baʼaxoʼob kʼaastak ku yúuchloʼ, jach chéen Dios jeʼel u páajtal u yutskíintikeʼ». Koʼoneʼex ilik jujunpʼéel experienciaʼob tsʼoʼok u yantal tiʼ le sukuʼunoʼob úuchik u káajal u kaʼa jóokʼloʼob predicar joonaj joonajiloʼ.
Ruslán, yaan tu múuchʼulil Lanivtsieʼ, jach nerviosochaj ka tu yojéeltaj yaan u kaʼa jóokʼol máak predicar joonaj joonajil. Letiʼ yéetel u yataneʼ tu sen kʼáatoʼob tiʼ Jéeoba ka áantaʼakoʼob utiaʼal maʼ u sajaktaloʼob yéetel ka páajchajak u kaxtikoʼob máaxoʼob u kʼáatoʼob kaanbal tiʼ u promesaʼob Dios. Letiʼobeʼ jach jaʼakʼ u yóoloʼob tumen chéen ichil dos horaseʼ tsikbalnajoʼob yéetel ocho u túulal máakoʼob, tu ochoiloʼobeʼ tu yóotoʼob ka tsʼaʼabak xook tiʼob yéetel le Bibliaoʼ.
Olgaeʼ tiaʼan tu múuchʼulil Kremenetseʼ. Juntéenjeakeʼ letiʼ yéetel uláakʼ kiikeʼ táan u predicaroʼob ka náatsʼ u yáalkab juntúul máak tu yiknaloʼobeʼ ka tu kʼáatajtiʼob wa táan u kaʼanskoʼob u Tʼaan Dios. Le máakoʼ tu yaʼalajtiʼobeʼ jach ku tsʼuʼutsʼik chamal yéetel ku píitmáan u yukʼik, tu yaʼalaj xan: «In wojel Dioseʼ yaan u juzgarken maʼ kun xáantal, le kéen kʼuchuk le kʼiin jeʼeloʼ maʼ in kʼáat ka u yil wa kʼaas in kuxtaliʼ». Ka tsʼoʼokeʼ kaxtaʼab máax jeʼel u tsʼáaik xook tiʼeʼ.
Vasileʼ, tiaʼan tu múuchʼulil Lviv-Riasne-Skhidnyi. Letiʼ yéetel uláakʼ sukuʼunoʼobeʼ binoʼob predicar tiʼ junpʼéel chan kaaj. Le ka kʼuchoʼob tu jool u yotoch juntúul señoraeʼ kʼaʼajtiʼeʼ walajki wa jaypʼéel añoseʼ le señoraoʼ tu yaʼalajtiʼobeʼ maʼ u kʼáat u yojéelt mix baʼal yoʼolal le Testigoʼoboʼ. Kex beyoʼ tu chʼaʼtuklaj u kaʼa predicariʼ, jach jaʼakʼ u yóol yoʼolal le baʼax tu yaʼalaj le señora ka jóokʼoʼ. Tu yaʼaleʼ taak u kanik baʼax ku yaʼalik le Bibliaoʼ, le oʼolal tu yóotaj ka tsʼaʼabak xook tiʼ. Le sukuʼunoʼ tu kaxtaj máax jeʼel u seguer u yáantik le koʼoleloʼ.
Serguíeʼ tiaʼan tu múuchʼulil Illintsieʼ, letiʼeʼ okjaʼanaj tu añoil 2021 yéetel mix juntéen kaʼach jóokʼok predicar joonaj joonajil. Jach nervioso kaʼachi, le oʼolal xáanchaj táan u sen prepararkuba utiaʼal u jóokʼol predicar. Letiʼeʼ ku yaʼalik: «Yaʼab juntéenel tin chaʼantaj le videoʼob ku yeʼesik bix jeʼel in káajsik in tsikbaloʼ, kex beyoʼ láayliʼ chan saajkeneʼ». Le ka káaj u tsikbaltik baʼax ku yaʼalik le Biblia tiʼ uláakʼ máakoʼoboʼ jach kiʼimakchaj u yóol, hasta tuʼubtiʼ wa sajak kaʼachi.
Óoliʼ bey xan úuchik tiʼ Níkoloʼ, letiʼeʼ tiaʼan tu múuchʼulil Rozdileʼ. Kex maʼ okjaʼanajaʼaneʼ letiʼeʼ tu káajsaj u beetik u publicadorail tu mesil agosto tiʼ 2022. Chéen baʼaleʼ jach sajak kaʼach u jóokʼol predicar joonaj joonajil. Letiʼeʼ ku yaʼalik: «Teneʼ jach saajken kaʼachi, pero tin wileʼ maas jatsʼuts bakáan u kaʼansaʼal u Tʼaan Dios tiʼ le máakoʼob joonaj joonajiloʼ».
Kaʼatúul kiikoʼob táan u predicaroʼob joonaj joonajil
Tak tu kʼiinil 11 tiʼ noviembre tiʼ 2022, tsʼaʼab junpʼéel informe yoʼolal le baʼax táan u yúuchul Ucraniaoʼ. Le informeaʼ tsʼaʼab tumen le sukuʼunoʼob yanoʼob teʼeloʼ. Chéen baʼaleʼ como istikyaj u comunicarkubaʼob yéetel u maasil sukuʼunoʼobeʼ maʼ xaaneʼ maas yaʼab le sukuʼunoʼob tsʼoʼok u afectartaʼaloʼoboʼ.
Bix afectartaʼabik le sukuʼunoʼoboʼ
46 u túulal u testigoʼob Jéeoba tsʼoʼok u kíimloʼob.
97 u túulal Testigoʼob úuch wa baʼax loobil tiʼob.
12,569 Testigoʼobeʼ kex maʼ tu pʼatoʼob u luʼumoʼobeʼ tu kaxtoʼob tuʼux u binoʼob utiaʼal u taʼakikubaʼob.
590 najoʼob jach júutoʼob.
645 najoʼob jach kʼaschajoʼob.
1,722 najoʼob yaan baʼax kʼaskúuntaʼab tiʼob.
Seis salónoʼob jach júuti.
19 salónoʼob jach kʼaschajoʼob.
63 salónoʼob yaan baʼax kʼaschaj tiʼob.
Bix áantaʼabik le sukuʼunoʼoboʼ
27 Comitéʼob tiʼ Socorro táan u yáantajoʼob tu luʼumil Ucrania.
53,948 u testigoʼob Jéeoba tsʼoʼok u yáantaʼaloʼob tumen le comitéʼob utiaʼal u kaxtikoʼob tuʼux u pʼáatloʼoboʼ.
25,983 Testigoʼob tsʼoʼok u binoʼob táanxel luʼumil yéetel táan u yáantaʼaloʼob tumen u maasil sukuʼunoʼob.