Teʼ kaajoʼob tuʼux táan le guerra, jeʼex u kaajil Mariúpoloʼ, minaʼan corriente, calefacción, Internet mix u señalil teléfono. Tsʼoʼoleʼ tsʼoʼok u kʼaskúuntaʼal u ventanail yaʼab najoʼob yéetel óoliʼ minaʼan baʼal jaantbil mix jaʼ utiaʼal ukʼbil. Maas tiʼ 2,500 sukuʼunoʼob tsʼoʼok u lukʼloʼob Mariúpol. Tiʼ jujunpʼéel kaajoʼob jeʼex Bucha, Chernígov, Hostómel, Irpín, Kiev yéetel Sumieʼ tsʼoʼok u chaʼabal u jóokʼol le máakoʼob utiaʼal u binoʼob yaanal tuʼuxoʼ. Yoʼolal lelaʼ yaʼab sukuʼunoʼob tsʼoʼok u páajtal u jóokʼloʼob tiʼ le kaajoʼobaʼ.

Juntúul sukuʼun táan u beetik u ancianoil yéetel u precursorileʼ kajaʼan kaʼach Hostómel. Letiʼeʼ yaan 36 años tiʼ yéetel anchaj u púutsʼul yéetel u yatan bey xan yéetel u taataʼob. Le sukuʼunaʼ tu tsikbaltaj le baʼax úuchtiʼob le ka káaj le guerra teʼ tuʼux kajaʼanoʼoboʼ:

«T-uʼuyaj bix u máan le helicópteroʼob yóokʼol t-otochoʼ, tsʼoʼoleʼ tuláakal tuʼux yaan u camiónoʼob le soldadoʼob kaʼachoʼ. Le tiaʼanoʼon teʼ sótanooʼ le soldadoʼoboʼ ookoʼob t-otoch, juntúul tiʼ letiʼobeʼ joʼopʼ u tsʼoon teʼ sótano tuʼux yanoʼonoʼ. U yóol le tsʼoonoʼ tsaʼay tu bulto in maama, pero toʼoneʼ maʼ úuchtoʼon loobiʼ. Le táan u tsʼoʼontsʼonkuba le máakoʼoboʼ xáanchaj kex tres wa cuatro horas maʼ péeknajoʼon teʼ tuʼux yanoʼonoʼ yéetel t-ilaj maʼ k-beetik xan mix junpʼéel ruidoiʼ. Ka píikʼ tuláakʼ kʼiineʼ le táan k-lukʼul teʼ tuʼux yanoʼon kaʼachoʼ joʼopʼ u kaʼa tsʼoʼontsʼonkuba le máakoʼoboʼ, chuup kaʼach le carretera yéetel u tanqueʼob le soldadoʼoboʼ bey xan yéetel u camiónoʼoboʼ. Jach táaj peligroso kaʼachi, pero maas peligroso wa ka pʼáatkoʼoniʼ».

«Le baʼaxoʼob ku yúuchlaʼ jach tsʼoʼok u yáantkoʼon utiaʼal k-maas tsʼáaik ichil k-kuxtal le baʼaxoʼob ku yaʼalik le Bibliaoʼ. Por ejemploeʼ tsʼoʼok u yáantkoʼon utiaʼal maʼ k-jach chiʼichnaktal yoʼolal baʼax kun úuchul sáamaliʼ, u kiʼimaktal k-óol yéetel le junpʼíit baʼaxoʼob yaantoʼonoʼ yéetel k-confiar tiʼ Jéeoba teʼ súutukiloʼob jach yaj baʼax ku aktáantik máakoʼ».

Toʼoneʼ k-ojleʼ Jéeobaeʼ jach táan u yilik le yaayaj baʼax ku aktáantik le sukuʼunoʼob yanoʼob Ucraniaoʼ. Letiʼeʼ mix bikʼin kun xuʼulul u yáantkoʼob (2 Pedro 2:9).

Tak tu kʼiinil 10 tiʼ marzo tiʼ 2022, letiʼe baʼax tsʼoʼok u informartaʼal desde tu luʼumil Ucraniaoʼ.

• 2 u testigoʼob Jéeoba tsʼoʼok u kíimloʼob.

• 8 Testigoʼob úuch wa baʼax loobil tiʼob.

• 25,407 Testigoʼob tsʼoʼok u pʼatik u yotochoʼob utiaʼal u binoʼob yaanal tuʼux.

• 25 najoʼob jach júutoʼobi.

• 59 najoʼob jach kʼaschajoʼobi.

• 222 najoʼob yaan baʼax kʼaskúuntaʼab tiʼob.

• 7 salónoʼob yaan baʼax kʼaschaj tiʼob.

• 27 Comitéʼob tiʼ Socorro táan u yáantajoʼob tu luʼumil Ucrania.

• 10,566 u testigoʼob Jéeoba tsʼoʼok u yáantaʼaloʼob tumen le comitéʼob utiaʼal u kaxtikoʼob tuʼux u pʼaatloʼob.

• 9,635 Testigoʼob tsʼoʼok u binoʼob yaanal luʼumil yéetel táan xan u yáantaʼaloʼob tumen u maasil sukuʼunoʼob.