Yaj t-óol aʼalikteʼexeʼ kaʼatúul kiikoʼob kíimoʼob le táan u wáakʼal le bombaʼob tu kaajil Mariúpoloʼ. Tak beoraaʼ yaan maas tiʼ 2,000 sukuʼunoʼob maʼ páajchajak u púutsʼloʼob tiʼ le kaajoʼ, chéen 150 tsʼoʼok u páajtal u púutsʼloʼob teʼ kʼiinoʼob tsʼoʼok u máanaʼ. Le sukuʼunoʼob táakaʼanoʼob ichil junpʼéel Comité tiʼ Socorrooʼ táan kaʼach u biskoʼob áantaj tiʼ le sukuʼunoʼob yaan tu kaajil Mariúpoloʼ. Chéen baʼaleʼ anchaj u kaʼa suutoʼob junmúuchʼ yéetel uláakʼ máaxoʼob táan kaʼach u biskoʼob áantaj xan tumen atacartaʼaboʼobi. Tiʼ junpʼéel terreno tuʼux yaan junpʼéel salón yéetel junpʼéel u salónil asambleaeʼ wáakʼ junpʼéel bomba. Teʼ súutuk ka wáakʼo kex 200 u túulal sukuʼunoʼob yanoʼob kaʼach tu sótanoil le salónoʼ, kex beyoʼ tiʼ mix juntúul úuch loobiʼ. Pero le cocheʼob yaan kaʼach teʼeloʼ láaj kʼaskúuntaʼaboʼobi. Leloʼ tu maas talamkúuntaj u jóokʼloʼob tiʼ le kaajoʼ.

Juntúul sukuʼun ancianoeʼ (foto yaan kabal) páajchaj u jóokʼol tiʼ u kaajil Mariúpol yéetel u familia. Letiʼeʼ ku yaʼalik: «T-perdertaj k-otoch, k-meyaj yéetel maʼ páajchaj k-comunicartikba yéetel k-amigoʼobiʼ. Le viaje t-beetoʼ u suukileʼ ku bisiktoʼon junpʼéel kʼiin, chéen baʼaleʼ teʼ vezaʼ seis kʼiinoʼob tu bisajtoʼon. Le táan k-viajaroʼ chéen táan k-ilik bix u kúulul u buutsʼil le bombaʼob maʼ wáakʼoʼob ka puʼuloʼoboʼ. Teʼ kʼiinoʼob táan k-viajaroʼ le sukuʼunoʼoboʼ tu kaxtoʼob tuʼux k-jeʼelel yéetel tu tsʼáajoʼobtoʼon baʼal k-jaante. Jach k-tsʼáaik gracias tiʼ Jéeoba tumen tu kanáantoʼon jeʼex u beetik juntúul taatatsileʼ. Leloʼ ku beetik k-maas confiar tiʼ letiʼ».

Le Testigoʼob ku jóokʼloʼob Ucraniaoʼ tsʼoʼok u binoʼob tiʼ jejeláas u luʼumiloʼob Europa. Por ejemploeʼ juntúul sukuʼun ku meyaj bey siervo ministerialeʼ bin tu luʼumil Portugal yéetel u yatan, bey xan yéetel u paalal de siete, once yéetel dieciséis años. Teʼ luʼumoʼ yaan u láakʼtsiloʼob u testigoʼob Jéeobaiʼ. Le sukuʼun yéetel u familiaoʼ anchaj u páaʼtkoʼob once horas utiaʼal u pʼatkoʼob u luʼumil Ucrania, tsʼoʼoleʼ viajarnajoʼob cuatro kʼiinoʼob utiaʼal u kʼuchloʼob yiknal u láakʼtsiloʼoboʼ. Cuatro mil kilómetros anchaj u yáalkabtikoʼob. Letiʼobeʼ kʼuchoʼob yiknal u láakʼtsiloʼob le jach taʼaytak u káajal le reuniónoʼ, kex maʼatech u tʼankoʼob portuguéseʼ táakpajoʼob teʼ reuniónoʼ. Tuláakal le sukuʼunoʼob teʼ múuchʼuliloʼ jach líikʼ u yóoloʼob úuchik u yilkoʼob kiʼimak u yóol le sukuʼunoʼob kex jach yaj le baʼax ku aktáantkoʼoboʼ.

Juntúul kiik púutsʼ tu luʼumil Ucrania utiaʼal u bin Alemaniaeʼ ku yaʼalik: «K-xokik le Bibliaoʼ, k-tuukul tiʼ le baʼaloʼob maʼalobtak ku yúuchultoʼonoʼ yéetel k-tuukul tiʼ le jatsʼuts esperanza yaantoʼonoʼ jach tsʼoʼok u yáantkoʼon yéetel tsʼoʼok u líiʼsik k-óol. Tsʼoʼok k-ilik bix u yáantkoʼon Jéeoba ikil u beetik k-áantaʼal tumen le sukuʼunoʼoboʼ. Le sukuʼunoʼob yanoʼob Ucraniaoʼ, Hungría yéetel le yanoʼob Alemaniaoʼ jach tsʼoʼok u kʼamkoʼonoʼob yéetel utsil».

K-ojleʼ Jéeobaeʼ jach táan u yáantik tuláakal le sukuʼunoʼob yanoʼob Ucraniaoʼ (Salmo 145:14).

Tak 16 tiʼ marzo tiʼ 2022, tsʼaʼab junpʼéel informe yoʼolal le baʼax táan u yúuchul Ucraniaoʼ. Le informeaʼ tsʼaʼab tumen le sukuʼunoʼob yanoʼob teʼeloʼ, chéen baʼaleʼ como istikyaj u comunicarkubaʼob yéetel u maasil sukuʼunoʼobeʼ maʼ xaaneʼ maas yaʼab le sukuʼunoʼob tsʼoʼok u afectartaʼaloʼoboʼ.

• Kantúul Testigoʼob tsʼoʼok u kíimloʼob.

• 19 u túulal Testigoʼob úuch wa baʼax loobil tiʼob.

• 29,789 Testigoʼob tsʼoʼok u pʼatik u yotochoʼob.

• 45 najoʼob jach júutoʼob.

• 84 najoʼob jach kʼaschajoʼob.

• 366 najoʼob yaan baʼax kʼaskúuntaʼab tiʼob.

• 16 salónoʼob yaan baʼax kʼaschaj tiʼob.

• 27 Comitéʼob tiʼ Socorro táan u yáantajoʼob tu luʼumil Ucrania.

• 20,981 u testigoʼob Jéeoba tsʼoʼok u yáantaʼaloʼob tumen le comitéʼob utiaʼal u kaxtikoʼob tuʼux u pʼáatloʼoboʼ.

• 11,973 Testigoʼob tsʼoʼok u binoʼob yaanal luʼumil yéetel táan u yáantaʼaloʼob tumen u maasil sukuʼunoʼob.