Toʼoneʼ maʼ tu xuʼulul k-orar yoʼolal le sukuʼunoʼob yéetel le kiikoʼob yanoʼob Mariúpoloʼ. Teʼeloʼ maʼ tu xuʼulul u paklan baʼateʼel le máakoʼoboʼ yéetel u sen wáakʼal le bombaʼoboʼ. Yaj t-óol k-aʼalik, pero seis u túulal k-sukuʼunoʼobeʼ kíimoʼob le táan u wáakʼal le bombaʼoboʼ. Yéetel leloʼ tsʼoʼok u chukik 10 u túulal sukuʼunoʼob kíimkoʼob Ucraniaoʼ. Tsʼoʼoleʼ teʼ noticiaʼoboʼ aʼalaʼabeʼ teʼ semana máanoʼ puʼul bombaʼob tiʼ junpʼéel teatro tuʼux táan kaʼach u taʼakikuba maas tiʼ 1,000 u túulal máakoʼobiʼ. Mix juntúul sukuʼun kíimiʼ, chéen tiʼ jujuntúul úuch wa baʼax loobil tiʼob.

Kex 750 sukuʼunoʼobeʼ jóokʼoʼob tiʼ u kaajil Mariúpol, yéetel kex uláakʼ 1,600 u túulaleʼ láayliʼ tiaʼanoʼob teʼ kaajoʼ. Yaʼab tiʼ le sukuʼunoʼobaʼ tiaʼanoʼob tu lakʼinil le kaajoʼ. Le parte jeʼeloʼ tsʼoʼok u chʼaʼabal tumen Rusia.

Jeʼex t-aʼalil teʼ informe máanoʼ yaan kex 200 sukuʼunoʼob u taʼakmubaʼob tu sótanoil junpʼéel terreno. Teʼ terrenoaʼ yaan junpʼéel salón yéetel junpʼéel u salónil Asamblea. Le sukuʼunoʼob yanoʼob ichil le sótanooʼ chéen junsúutuk páajchaj u comunicarkubaʼob, pero tu tsʼáajoʼob ojéeltbil lelaʼ:

«Le táan u wáakʼal le bombaʼoboʼ yaʼab tiʼ le sukuʼunoʼoboʼ jach sen sajakchajoʼob, hasta yaneʼ joʼopʼ tak u yokʼol. T-tuklaj yaan k-kíimil tu yoʼolal le bombaʼoboʼ wa tu yoʼolal u kʼáakʼil. Juntúul tiʼ le ancianoʼoboʼ tu yaʼalaj ka kʼaaynakoʼon tiʼ Jéeoba. Le oʼolal t-kʼayaj kex 10 wa 15 u pʼéelal kʼaayoʼob. Mientras táan u maas wáakʼal le bombaʼob yéetel tu maas tíitkuba le tuʼux yanoʼonoʼ ku maas kʼaʼamtal k-kʼaay. Ka tsʼoʼokeʼ t-xokaj le Salmo 27, ka joʼopʼ k-tsikbal tu yoʼolal. U maasileʼ joʼopʼ u yaʼalik baʼax tekstoil uts tu yich yéetel bix tsʼoʼok u muʼukʼaʼankúuntaʼal u fe tumen le tekstooʼ. Jach tu jaajil t-ileʼ Jéeobaeʼ bey juntúul ‹Taatatsil jach nojoch u chʼaʼ óotsilal yéetel ku líiʼsik k-óol tiʼ tuláakal baʼaxoʼob k-muʼyajtik›» (2 Corintios 1:3, 4).

Le ancianoʼoboʼ yéetel le sukuʼunoʼob yanoʼob ichil le Comité tiʼ Socorrooʼ tu kaxtoʼob tsʼaak yéetel janal utiaʼal le sukuʼunoʼob kʼaʼabéettiʼoboʼ kex anchaj u tsʼáaik u kuxtaloʼob tu chiʼ kíimil. Hasta yaan horaeʼ le sukuʼunoʼoboʼ ku kʼaʼabéettal u jíiltikubaʼob teʼ luʼumoʼ utiaʼal u kanáantkubaʼob maʼ u kíimsaʼaloʼob tumen le máakoʼob ku baʼateloʼoboʼ. Jach k-apreciartik le sukuʼunoʼobaʼ tumen ‹letiʼobeʼ táan u tsʼáaikoʼob u kuxtal tu táan kíimil› tu yoʼolal u maasil sukuʼunoʼob (Romanos 16:4).

Como teʼ kaajoʼ minaʼan gas mix corrienteeʼ, le kiikoʼoboʼ táankab ku tʼabkoʼob u kʼáakʼ utiaʼal u cocinaroʼob. Le janaloʼ ku tʼoʼoxol tiʼ le publicadoroʼob tsʼoʼok u yantal u jaʼabiloʼoboʼ bey xan tiʼ le discapacitadoʼoboʼ. Yaʼab tiʼ le sukuʼunoʼoboʼ tsʼoʼok u perderkoʼob u yotochoʼob, u camiónoʼob yéetel uláakʼ baʼaxoʼob yaantiʼob. Chéen baʼaleʼ letiʼobeʼ jach ku tsʼáaikoʼob u graciasil tumen ku yeʼesaʼaltiʼob yaabilaj yéetel ku kanáantaʼaloʼob tumen u maasil sukuʼunoʼob.

Le sukuʼunoʼob u taʼakmubaʼoboʼ maʼ tu xuʼulul u xokikoʼob le Bibliaoʼ yéetel tak tuʼux ku páajtaleʼ ku tsikbaltikoʼob tiʼ u maasil le baʼaxoʼob tsʼoʼok u kankoʼoboʼ.

Tak tu kʼiinil 22 tiʼ marzo tiʼ 2022, tsʼaʼab junpʼéel informe yoʼolal le baʼax táan u yúuchul Ucraniaoʼ. Le informeaʼ tsʼaʼab tumen le sukuʼunoʼob yanoʼob teʼeloʼ, chéen baʼaleʼ como istikyaj u comunicarkubaʼob yéetel u maasil sukuʼunoʼobeʼ, maʼ xaaneʼ maas yaʼab le sukuʼunoʼob tsʼoʼok u afectartaloʼoboʼ.

• 10 Testigoʼob tsʼoʼok u kíimloʼob.

• 27 u túulal Testigoʼob úuch wa baʼax loobil tiʼob.

• 33,180 Testigoʼobeʼ kex maʼ tu pʼatoʼob u luʼumoʼobeʼ tu kaxtoʼob tuʼux u binoʼob utiaʼal u taʼakikubaʼob.

• 78 najoʼob jach júutoʼob.

• 102 najoʼob jach kʼaschajoʼob.

• 484 najoʼob yaan baʼax kʼaskúuntaʼab tiʼob.

• Junpʼéel salón jach júuti.

• Kanpʼéel salónoʼob jach kʼaschajoʼob.

• 18 salónoʼob yaan baʼax kʼaschaj tiʼob.

• 27 Comitéʼob tiʼ Socorro táan u yáantajoʼob tu luʼumil Ucrania.

• 25,069 u testigoʼob Jéeoba tsʼoʼok u yáantaʼaloʼob tumen le comitéʼob utiaʼal u kaxtikoʼob tuʼux u pʼáatloʼoboʼ.

• 14,308 Testigoʼob tsʼoʼok u binoʼob táanxel luʼumil yéetel táan u yáantaʼaloʼob tumen u maasil sukuʼunoʼob.