Tak tu kʼiinil 29 tiʼ marzo tiʼ 2022, tsʼoʼok u kíimil uláakʼ 7 sukuʼunoʼob yéetel kiikoʼob tu kaajil Mariúpol. Tak beoraeʼ tsʼoʼok 17 u túulal sukuʼunoʼob kíimik Ucrania.

Le Comitéʼob tiʼ Socorro yaan Ucraniaoʼ jach táan u tsʼáaik u yóoloʼob u yáantoʼob le sukuʼunoʼoboʼ, yaan tak tiʼ letiʼobeʼ tsʼoʼok u yantal u arriesgartik u kuxtaloʼob utiaʼal u kaxtikoʼob le sukuʼunoʼoboʼ.

Le sukuʼunoʼob xan ku meyajoʼob yéetel le Comitéʼob tiʼ Socorrooʼ tsʼoʼok u biskoʼob tsʼaakoʼob, janal yéetel uláakʼ baʼaloʼob ku kʼaʼabéettal tiʼ le sukuʼunoʼob teʼ lugaroʼob tuʼux táan le baʼateloʼ, jeʼex Járkov, Kramatorsk yéetel Mariúpol. Juntúul sukuʼun ku meyaj teʼ Comité tiʼ Socorrooʼ sáamsamal ku viajar maas tiʼ 500 kilómetros utiaʼal u bisik tsʼaak yéetel janal tiʼ óoliʼ 2,700 Testigoʼob. Tsʼoʼoleʼ le táan u binoʼ ku yantal u máan tuʼux yaan u retén le soldadoʼoboʼ.

Le Comitéʼob tiʼ Socorro xanoʼ tu yiloʼob ka yanak camiónoʼob utiaʼal u jóoʼsaʼal le sukuʼunoʼob teʼ tuʼux táan le baʼateloʼ. Juntúul sukuʼun ku meyaj teʼ Comité tiʼ Socorro yaan Chernígovoʼ ku yaʼalik: «Le ka t-ilaj tsʼoʼok u káajal u puʼulul le bombaʼob teʼ najoʼoboʼ t-tsʼáaj cuenta jach táaj sajbeʼentsil ka pʼáatak máak teʼ kaajoʼ. Como minaʼan corriente mix Interneteʼ le ancianoʼoboʼ tu séeblakil bin u kaxtoʼob le sukuʼunoʼob u taʼakmubaʼob tu sótanoil u yotochoʼoboʼ utiaʼal u yaʼaliktiʼob yaan camiónoʼob utiaʼal u jóokʼloʼob teʼ kaajoʼ.

Tu kaajil Chernígoveʼ u yuumil junpʼéel empresa ku rentartik camiónoʼobeʼ tu yaʼalaj u tsʼáaik vagonetaʼob yéetel autobúsoʼob utiaʼal u jóoʼsaʼal le 254 sukuʼunoʼob kajaʼanoʼob teʼeloʼ. Letiʼ xan beet le nueve viajeʼob kʼaʼabéetchaj u beetaʼal utiaʼal u jóoʼsaʼal le sukuʼunoʼoboʼ. Tsʼoʼoleʼ juntéeneʼ yéetel junpʼéel nuxiʼ maquinariaeʼ tu yutskíintaj le bej utiaʼal u páajtal u máan le camiónoʼoboʼ. Le sukuʼunoʼoboʼ jach kiʼimakchaj u yóoloʼob yoʼolal le áantaj tsʼaʼabtiʼoboʼ.

Yaʼab sukuʼunoʼobeʼ tsʼoʼok u kíimil u láakʼtsiloʼob le táan le baʼateloʼ, leloʼ ku beetik u jach yaatal k-óol. K-tsʼíiboltik yéetel tuláakal k-puksiʼikʼal ka séeb béeychajak u promesa Dios yaan teʼ Bibliaoʼ, le promesaaʼ ku yaʼalikeʼ maʼ tun kaʼa antal kíimil mix okʼol (Apocalipsis 21:3, 4).

Tak tu kʼiinil 29 tiʼ marzo tiʼ 2022, tsʼaʼab junpʼéel informe yoʼolal le baʼax táan u yúuchul Ucraniaoʼ. Le informeaʼ tsʼaʼab tumen le sukuʼunoʼob yanoʼob teʼeloʼ. Chéen baʼaleʼ como istikyaj u comunicarkubaʼob yéetel u maasil sukuʼunoʼobeʼ maʼ xaaneʼ maas yaʼab le sukuʼunoʼob tsʼoʼok u afectartaʼaloʼoboʼ.

• 17 u túulal u testigoʼob Jéeoba tsʼoʼok u kíimloʼob.

• 35 u túulal Testigoʼob úuch wa baʼax loobil tiʼob.

• 36,313 Testigoʼobeʼ kex maʼ tu pʼatoʼob u luʼumoʼobeʼ tu kaxtoʼob tuʼux u binoʼob utiaʼal u taʼakikubaʼob.

• 114 najoʼob jach júutoʼob.

• 144 najoʼob jach kʼaschajoʼob.

• 612 najoʼob yaan baʼax kʼaskúuntaʼab tiʼob.

• Junpʼéel salón jach júuti.

• Siete salónoʼob jach kʼaschajoʼob.

• 23 salónoʼob yaan baʼax kʼaschaj tiʼob.

• 27 Comitéʼob tiʼ Socorro táan u yáantajoʼob tu luʼumil Ucrania.

• 34,739 u testigoʼob Jéeoba tsʼoʼok u yáantaʼaloʼob tumen le comitéʼob utiaʼal u kaxtikoʼob tuʼux u pʼaatloʼoboʼ.

• 16,175 Testigoʼob tsʼoʼok u binoʼob táanxel luʼumil yéetel táan u yáantaʼaloʼob tumen u maasil sukuʼunoʼob.