Yaʼab máakoʼob táan u muʼyajoʼob yoʼolal le guerra yaan Ucraniaoʼ, le oʼolaleʼ le sucursaloʼ táan u yilik u líiʼsik u yóol le u milesil sukuʼunoʼob tsʼoʼok u kʼaʼabéettal u binoʼob kajtal táanxel luʼumiloʼ. Le baʼax ku beetaʼalaʼ jach tsʼoʼok u yáantik yaʼab sukuʼunoʼob. Juntúul sukuʼun ku meyaj tu Comitéil le Sucursaloʼ bin u xíimbalt u jats sukuʼunoʼob binoʼob kajtal tu chikʼinil Ucrania. Juntúul tiʼ le kiikoʼob xíimbaltaʼaboʼ tiʼ pʼaatal yéetel uláakʼ 30 Testigoʼob tiʼ junpʼéel salón tu kaajil Úzhgorodeʼ. Le kiikoʼ tu yaʼalaj: «Hasta tin wuʼuyaj bey táan u méekʼiken Jéeobaeʼ».

Tu lu’umil Ucraniaeʼ kex 100 u túulal u testigoʼob Jéeobaeʼ táakaʼanoʼob ichil le 27 Comitéʼob tiʼ Socorrooʼ. Le sukuʼunoʼob yanoʼob teʼ sucursaloʼ táan xan u yilkoʼob u yáantkoʼob le sukuʼunoʼoboʼ. Ígor, juntúul sukuʼun ku meyaj teʼ Comité tiʼ Socorrooʼ, tu yaʼalaj: «Le ka invitartaʼaben meyaj teʼ Comité tiʼ Socorrooʼ, teen yéetel in wataneʼ, tsʼokaʼaniliʼ k-pʼatik k-otoch utiaʼal k-bin táanxel tuʼuxeʼ. Juntéenjeak jach kaʼanaʼanoʼoneʼ juntúul sukuʼun ku meyaj teʼ Comité tiʼ Sucursaloʼ, kex jach yaan baʼax u beeteʼ, tu jóoʼsaj tiempo utiaʼal u taal u yil bix yaniloʼon. Jach t-tsʼáaj cuenta u yaabiltmoʼon. Yaan kʼiineʼ k-uʼuyikba bey mejen paalaloʼoneʼ tumen maʼ t-kaxtik bix jeʼel k-utskíintik le problemas ku yantaltoʼonoʼ. Le kéen úuchuktoʼon beyaʼ k-kʼáatik u nuʼuktaj Jéeoba. Yaʼab u téenel tsʼoʼok k-ilik bix u núukik k-oraciónoʼob jach teʼ súutuk kʼaʼabéetoʼ».

Tiʼ tuláakal le salónoʼob yanoʼob teʼ tuʼux ku yúuchul le guerraoʼ, 4 u pʼéelaleʼ jach júuti, 8 u pʼéelaleʼ jach kʼaschajoʼob yéetel 33 u pʼéelaleʼ yaan baʼax kʼaschaj tiʼob.

Tak tu kʼiinil 17 tiʼ mayo tiʼ 2022, tsʼaʼab junpʼéel informe yoʼolal le baʼax táan u yúuchul Ucraniaoʼ. Le informeaʼ tsʼaʼab tumen le sukuʼunoʼob yanoʼob teʼeloʼ. Chéen baʼaleʼ como istikyaj u comunicarkubaʼob yéetel u maasil sukuʼunoʼobeʼ maʼ xaaneʼ maas yaʼab le sukuʼunoʼob tsʼoʼok u afectartaʼaloʼoboʼ.

• 37 u túulal u testigoʼob Jéeoba tsʼoʼok u kíimloʼob.

• 74 u túulal Testigoʼob úuch wa baʼax loobil tiʼob.

• 45,253 Testigoʼobeʼ kex maʼ tu pʼatoʼob u luʼumoʼobeʼ tu kaxtoʼob tuʼux u binoʼob utiaʼal u taʼakikubaʼob.

• 418 najoʼob jach júutoʼob.

• 466 najoʼob jach kʼaschajoʼob.

• 1,213 najoʼob yaan baʼax kʼaskúuntaʼab tiʼob.

• cuatro salónoʼob jach júuti.

• ocho salónoʼob jach kʼaschajoʼob.

• 33 salónoʼob yaan baʼax kʼaschaj tiʼob.

• 27 Comitéʼob tiʼ Socorro táan u yáantajoʼob tu luʼumil Ucrania.

• 48,806 u testigoʼob Jéeoba tsʼoʼok u yáantaʼaloʼob tumen le comitéʼob utiaʼal u kaxtikoʼob tuʼux u pʼaatloʼoboʼ.

• 21,786 Testigoʼob tsʼoʼok u binoʼob táanxel luʼumil yéetel táan u yáantaʼaloʼob tumen u maasil sukuʼunoʼob.