Tu kʼiinil 24 tiʼ febrero tiʼ 2022, Rusiaeʼ tu atacartaj Ucrania. Tu luʼumil Ucraniaeʼ yaan maas tiʼ 129,000 u testigoʼob Jéeoba kajaʼanoʼobiʼ, tsʼoʼoleʼ yaʼabeʼ yaan u paalaloʼob. Le sucursal yaan teʼeloʼ tsʼoʼok u beetik 27 Comitéʼob tiʼ Socorro utiaʼal u tsʼaʼabal áantaj tiʼ le sukuʼunoʼoboʼ. Le sukuʼunoʼoboʼ táan xan u líiʼsik u yóoloʼob yéetel táan u paklan áantkubaʼob, tsʼoʼoleʼ táan xan u yáantkoʼob uláakʼ máakoʼob maʼ Testigoʼobiʼ.

Jujuntúul sukuʼunoʼobeʼ tu chʼaʼtuklaj u pʼatkoʼob le luʼumoʼ, chéen baʼaleʼ u maas yaʼabileʼ láayliʼ tiaʼanoʼob Ucraniaeʼ. Le máaxoʼob púutsʼoʼoboʼ anchaj u beetkoʼob cola utiaʼal u jóokʼloʼob. Tsʼoʼoleʼ anchaj u páaʼtik u turnoʼob tumen jach chowak le colaoʼ, yaan tuʼuxoʼobeʼ tu chukaj tak 30 kilómetros u chowakil. Le oʼolal yanoʼobeʼ anchaj u páaʼtkoʼob 3 wa 4 días utiaʼal u kʼuchloʼob tuláakʼ luʼumiloʼ. Teʼ tuʼux binoʼoboʼ le sukuʼunoʼob kajaʼanoʼob teʼeloʼ bin u yiloʼob le sukuʼunoʼob táan u beetkoʼob cola utiaʼal u biskoʼob tiʼob baʼaloʼob jeʼex janal, jaʼ yéetel uláakʼ baʼaloʼob. Tsʼoʼoleʼ le kéen ookkoʼob teʼ luʼum tuʼux ku binoʼoboʼ yaan xan sukuʼunoʼob páaʼtkoʼob yéetel letreroʼob tuʼux ku yaʼalik jw.org. Letiʼobeʼ listoʼob xan utiaʼal u tsʼáaikoʼob le áantaj kʼaʼabéet tiʼ le sukuʼunoʼoboʼ.

• Tu kʼiinil 1 tiʼ marzo tiʼ 2022, juntúul sukuʼun kóok kajaʼan tu kaajil Járkoveʼ kíim le ka puʼul bombaʼob teʼ lugaroʼ, tsʼoʼoleʼ u yataneʼ úuch xan loob tiʼ.

• Uláakʼ óoxtúul kiikoʼobeʼ úuch loob tiʼob.

• Maas tiʼ 5,000 sukuʼunoʼobeʼ anchaj u pʼatik u yotochoʼob.

• Kaʼapʼéel najoʼobeʼ jach júutoʼobi.

• Óoxpʼéel najoʼobeʼ jach kʼaschajoʼob.

• 35 najoʼobeʼ yaan baʼax kʼaskúuntaʼab tiʼob.

• Kaʼapʼéel salónoʼobeʼ yaan xan baʼax kʼaskúuntaʼab tiʼob.

• Yaʼab sukuʼunoʼobeʼ minaʼantiʼob corriente, jaʼ, señal tiʼ teléfono mix calefacción.

• Tsʼoʼok u beetaʼal 27 Comitéʼob tiʼ Socorro tu luʼumil Ucrania.

• Le comitéʼobaʼ tsʼoʼok u yáantkoʼob 867 sukuʼunoʼob utiaʼal u yantaloʼob tiʼ lugar seguroʼob.

• Le comitéʼobaʼ táan u yilkoʼob u tsʼáaikoʼob tiʼ le sukuʼunoʼob le baʼaxoʼob jach kʼaʼabéet tiʼob jeʼex janal yéetel jaʼoʼ.

Le baʼaxoʼob tsʼoʼok k-aʼalikoʼ letiʼe baʼax tsʼoʼok u tsʼaʼabal k-ojéelt tumen le sukuʼunoʼob tak beoraaʼ.

Táan k-kʼáatik tiʼ Jéeoba ka u tsʼáa naʼat tiʼ le sukuʼunoʼoboʼ utiaʼal u aktáantkoʼob le baʼax ku yúuchloʼ yéetel utiaʼal maʼ u xuʼulul u paklan eʼeskoʼob yaabilaj (Proverbios 9:10; 1 Tesalonicenses 4:9).