Le Bibliaoʼ u yaʼalmiliʼeʼ teʼ kʼiinoʼob kuxlikoʼonaʼ yaan u yilaʼal guerraʼob, yaan u tíitkuba le luʼumoʼ, yaan u yantal jejeláas kʼojaʼaniloʼob bey xan uláakʼ «baʼaloʼob ken u beet u sen jaʼakʼal u yóol máak» (Lucas 21:10, 11). Tu añoil servicio 2022 a jach claro ilaʼabik bix u seguer u béeytal le profecíaaʼ. Por ejemploeʼ u millonesil máakoʼob afectartaʼaboʼob yoʼolal le guerra yaan tu luʼumil Ucraniaoʼ. Tsʼoʼoleʼ yaʼab máakoʼobeʼ táan u chan chʼaʼik u yóoloʼob yoʼolal le pandemia tiʼ le COVID-19. Yaʼab máakoʼob xaneʼ jach muʼyajnajoʼob yoʼolal le nukuch loobiloʼob jeʼex por ejemplo le ka tu tíituba u luʼumil Haitíoʼ, le ciclónoʼob anchaj Centroaméricaoʼ, Filipinas yéetel u noojil-lakʼinil África. Chéen baʼaleʼ, ¿bix úuchik u yáantaj u testigoʼob Jéeoba teʼ tuʼuxoʼob anchaj le nukuch loobiloʼobaʼ?

 Tu añoil servicio 2022, u testigoʼob Jéeobaeʼ tu tsʼáajoʼob áantaj kex tiʼ 200 u pʼéelal lugaroʼob. Tiʼ tuláakal le áantaj tu tsʼáajoʼoboʼ tu xupoʼob óoliʼ 12 millones de dólares. b Koʼox ilik bix úuchik u meyajtiʼob le donaciónoʼob utiaʼal u yáantkoʼob le máakoʼob tu luʼumil Haití, Malaui yéetel Mozambiqueoʼ.

 Tu kʼiinil 14 tiʼ agosto tiʼ 2021, anchaj junpʼéel terremoto de 7.2 grados tu noojolil Haití. Jach triste baʼax úuchi tumen kaʼatúul kiikoʼob yéetel juntúul sukuʼuneʼ kíimoʼob. Le terremotooʼ tu pʼataj cicatrizoʼob tiʼ le sukuʼunoʼoboʼ yéetel mix bikʼin ken u tuʼubsoʼob tumen jach muʼyajnajoʼob. Juntúul u testigo Jéeoba ku kʼaabaʼtik Stephaneeʼ ku yaʼalik: «Jach yaʼab máakoʼob kíimoʼob teʼ kaajoʼ, tu yáamil dos meseseʼ cada semanaeʼ jach yaʼab máakoʼob ku muʼukloʼobiʼ». Uláakʼ juntúul Testigo ku kʼaabaʼtik Éliézereʼ ku yaʼalik: «Yaʼab u testigoʼob Jéeobaeʼ pʼáat minaʼan u yotochoʼob, nookʼ utiaʼal u búukintoʼob, u xaanboʼob mix uláakʼ baʼaloʼob kʼaʼabéettiʼob. Tsʼoʼoleʼ como xáanchaj yaʼab meses láayliʼ táan u tíitkuba le luʼumoʼ le máakoʼoboʼ pʼáatoʼob jach saajkoʼob».

 U kaajal Jéeobaeʼ tu séebaʼanil tu yilaj u tsʼáaik le áantaj kʼaʼabéetoʼ. U sucursalil Haitíeʼ tu tʼoxaj tiendas de campaña, lonaʼob, colchonoʼob, páneles solares utiaʼal u cargartaʼal le celularoʼoboʼ bey xan maas tiʼ 53 toneladas baʼal utiaʼal jaantbil. Tsʼoʼoleʼ utskíintaʼab wa jel beetaʼab maas tiʼ 100 u pʼéelal najoʼob. Maas tiʼ junpʼéel millón de dólares xuʼup utiaʼal u tsʼaʼabal le áantajoʼ.

 Le sukuʼunoʼoboʼ jach ku tsʼáaikoʼob u graciasil le áantaj tsʼaʼabtiʼoboʼ. Loretteeʼ ku yaʼalik: «Le terremotooʼ jach tu kʼaskúuntaj k-otoch bey xan le chan negocio yaantoʼonoʼ. Pʼáat hasta minaʼan baʼal k-jaante, chéen baʼaleʼ u kaajal Jéeobaeʼ tu tsʼáajtoʼon le áantaj teʼ súutukil jach kʼaʼabéettoʼonoʼ». Micheline ku yaʼalik: «Teen yéetel kaʼatúul in paalaleʼ tiʼ kajaʼanoʼon kaʼach tiʼ junpʼéel chan x-laʼ najeʼ, le oʼolal chéen chʼaʼabil kʼaskúuntaʼabik tumen le terremotooʼ. Teʼ súutukoʼ chéen béeychaj in orar tiʼ Jéeoba, letiʼeʼ tu séebaʼanil tu yáanten yéetel u kaajal. Yoʼolal le áantaj tu tsʼáajten le sukuʼunoʼoboʼ bejlaʼeʼ maas maʼalob in wotoch. Jéeobaeʼ yaʼab baʼaxoʼob tsʼoʼok u beetik tin woʼolal, le beetik sáamsamal kin wilik in tsʼáaik u graciasil tiʼ».

 Tak le autoridadoʼob tu yiloʼob bix úuchik u yáantaʼal le sukuʼunoʼoboʼ. U directoril u ayuntamientoil LʼAsileeʼ ku yaʼalik: «In kʼáat in felicitarteʼex tumen séebaʼan úuchik a péekeʼex utiaʼal a tsʼáaikeʼex le áantajoʼ. Tsʼoʼoleʼ teʼexeʼ ka respetarkeʼex le autoridadoʼoboʼ. Tsʼoʼok in wilkeʼ maʼ letiʼe taakʼin péeksikeʼex a wáanteʼex u maasiloʼ, baʼaxeʼ letiʼe yaabilaj ka wuʼuyikeʼex tu yoʼolaloʼoboʼ».

 Tu kʼiinil 24 tiʼ enero tiʼ 2022, le ciclón Anaoʼ tu woʼoltaj Mozambique yéetel Malaui. Le ciclónoʼ tu beetaj u jach kʼáaxal cháak, tsʼoʼoleʼ jach kʼaʼamchaj u yiikʼal (100 kilómetros por hora). Yoʼolal leloʼ bin le corrienteoʼ, kʼaschaj le puenteʼoboʼ yéetel jach búuli.

 Maas tiʼ 30,000 u testigoʼob Jéeoba afectartaʼaboʼob tumen le ciclón máan tu luʼumil Malaui yéetel Mozambiqueoʼ. Charles, juntúul sukuʼun ku yáantaj ichil le Comité tiʼ Socorrooʼ ku yaʼalik: «Jach yaachaj tin wóol tumen láaj kʼaschaj tuláakal baʼax yaan tiʼ le sukuʼunoʼoboʼ». Le tuʼux ku líiʼsik u yoʼochoʼoboʼ láaj kʼaschaji bey xan tuláakal le baʼax u pakʼmoʼoboʼ. Yaʼabeʼ tu perdertaj u yotochoʼob. Junpʼéel baʼal jach triste úucheʼ letiʼe úuchik u kíimil u yatan yéetel u kaʼatúul mejen paalal juntúul sukuʼunoʼ. Letiʼobeʼ kíimoʼob le ka walkʼaj le lancha tuʼux ku bisaʼaloʼoboʼ.

 Jach yaʼab jaʼ tu taasaj le ciclónoʼ. Le familia Sengeredooʼ kajaʼanoʼob kaʼach tu kaajil Nchalo, Malaui. Letiʼobeʼ tu yuʼuboʼob junpʼéel kʼaʼamkach ruido ku taal tu tojil u yotochoʼob, jeʼel bakáanaʼ u ruido le jaʼ ku taal tu tojil u yotochoʼoboʼ. Lelaʼ úuchi tumen kaʼapʼéel ríoʼobeʼ tuulnaj u jaʼiloʼob. Le familiaaʼ tu séebaʼanil tu chʼaʼtuklaj u pʼatik u yotochoʼob. Yaaske séeb jóokʼoʼob tumen le jaʼoʼ tu bisaj junjaats tiʼ u yotochoʼob yéetel yaʼab baʼaxoʼob tu kʼaskúuntaj xaniʼ. Letiʼobeʼ binoʼob teʼ salónoʼ, u suukileʼ media hora ku bisiktiʼob u kʼuchloʼobiʼ, pero teʼ vezaʼ dos horas tu bisajtiʼob. Le ka kʼuchoʼobeʼ póoʼchʼuul u nookʼoʼob yéetel kaʼanaʼanoʼob, pero yaaske mix baʼal úuchtiʼob.

 U sucursalil Malaui yéetel Mozambiqueeʼ tu séebaʼanil tu yiloʼob bix ken u yáantil le sukuʼunoʼoboʼ. Tu yaʼaloʼob tiʼ le superintendenteʼob tiʼ circuito yéetel tiʼ le ancianoʼob ka u yiloʼob jach baʼax kʼaʼabéet tiʼ le sukuʼunoʼoboʼ yéetel ka u líiʼs u yóoloʼob. Formartaʼab yaʼab Comitéʼob tiʼ Socorro utiaʼal u tsʼáaikoʼob le áantaj kʼaʼabéetoʼ. Yoʼolal le meyaj tu beetoʼoboʼ maʼ xáanchaj ka joʼopʼ u tsʼaʼabal baʼax kʼaʼabéet tiʼ le sukuʼunoʼoboʼ. Xuʼup maas tiʼ 33.000 dólares utiaʼal u tsʼaʼabal despensa tiʼ le sukuʼunoʼoboʼ, xuʼup xan maas tiʼ 300.000 dólares utiaʼal u yutskíintaʼal wa u jel beetaʼal u yotochoʼob.

 Le Comité tiʼ Socorrooʼ jach maʼalob bix úuchik u meyajtiʼob le donaciónoʼoboʼ, leloʼ jach maʼalob tumen jach koʼojchaj u tojol tuláakal baʼal. Por ejemploeʼ tu luʼumil Malauieʼ le sukuʼunoʼoboʼ jach suuk u jaantikoʼob waaj tu yorail u janaloʼob, chéen baʼaleʼ le baʼax ku meyaj utiaʼal u beetaʼaloʼ jach koʼojchaji. Tsʼoʼoleʼ naʼak xan u tojol le gasolinaoʼ. Le sukuʼunoʼob tiʼ le Comitéoʼ directo úuchik u maanoʼob tiʼ le j-koonoloʼoboʼ, le oʼolal maas barato úuchik u túuxtaʼaltiʼob le baʼax tu manoʼoboʼ.

 Jach ku kʼuchul tu puksiʼikʼal le sukuʼunoʼob ken u yiloʼob bix u yáantaʼaloʼoboʼ. Felisberto, juntúul sukuʼun kajaʼan Mozambiqueeʼ, ku yaʼalik: «Mix juntéen in wil junpʼéel organización jach uts: maʼ chéen ku tsʼáaik le baʼaxoʼob kʼaʼabéet tiʼ máak utiaʼal u beetik u yotochoʼ, baʼaxeʼ ku túuxtik le nuʼukuloʼoboʼ, ku túuxtik máaxoʼob kun beetik, ku túuxtik janal, tsʼoʼoleʼ ku nuʼuktik máak yéetel yaabilaj. Jach tu jaajil ku yeʼeskoʼob le yaabilaj tu yaʼalaj Jesús teʼ Juan 13:34, 35». Ester, juntúul kiik kajaʼan Malauieʼ, kimen u yíicham yéetel tu perdertaj u yotoch. Letiʼeʼ ku yaʼalik: «¡Junpuliʼ maʼ tin kaxtik baʼax in beete tumen minaʼanten taakʼin utiaʼal in jel beetik in wotoch! Le oʼolal le ka kʼuch le sukuʼunoʼob yéetel le ka tu jel beetoʼob in wotochoʼ hasta tin wuʼuyaj bey tiaʼanen teʼ Paraísooʼ».

 Mientras maʼ kʼuchuk le túumben luʼumoʼ yaan u seguer u yantal nukuch loobiloʼob (Mateo 24:7, 8). Pero yoʼolal le donaciónoʼoboʼ u kaajal Jéeobaeʼ ku béeytal u tsʼáaik áantaj tiʼ le máaxoʼob kʼaʼabéettiʼoboʼ. Teʼ donate.pr418.com jeʼel u páajtal a wilik bix jeʼel a tsʼáaik a donacióneʼ. ¡Jach diosboʼotik yoʼolal le donación ka tsʼáaikoʼ!