Junpʼéel tiʼ le baʼax táan kaʼach u sen páaʼtik u testigoʼob Jéeoba teʼ añoaʼ letiʼe u jóoʼsaʼal le yáax jaats tiʼ le video U kuxtal yéetel u kaʼansaj Jesúsoʼ. U millonesil máakoʼob tsʼoʼok u chaʼantikoʼob le yáax jaats tiʼ le 18 videoʼob kun jóoʼsbiloʼ. ¿Baʼaxoʼob kʼaʼabéetchaj u beetaʼal utiaʼal u grabartaʼal le videoaʼ yéetel bix jeʼel u seguer k-áantajeʼ?

 Tu sucursalil Australasia ku grabartaʼal u maas yaʼabil tiʼ le video U kuxtal yéetel u kaʼansaj Jesúsoʼ. Utiaʼal u grabartaʼal junpʼéel chan videoeʼ ku kʼaʼabéettal u yáantaj kex 50 wa 80 sukuʼunoʼob. a Tiʼ tuláakloʼobeʼ ku siʼibil u yoʼochoʼob yéetel ku tsʼaʼabal baʼal u jaantoʼob kéen u jeʼelsubaʼob. Yoʼolal leloʼ con tiempo ku yilaʼal u maʼanal le baʼaxoʼob kun kʼaʼabéettal utiaʼal le janaloʼ. Ester, juntúul kiik ku meyaj teʼ departamento tuʼux ku beetaʼal janaloʼ, ku yaʼalik: «Jejeláas tuʼuxoʼob k-manik le baʼaxoʼob ku kʼaʼabéettal utiaʼal u beetaʼal le janaloʼ beyoʼ maʼ sen koʼoj u jóokʼoliʼ yéetel kiʼ kun uʼuybil. K-ilik xan bukaʼaj baʼax ken k-cocinarteʼ utiaʼal maʼ u sen sobrar». Chéen cuatro dólares ku tojoltik u janal cada sukuʼun.

 Chéen baʼaleʼ le actoroʼob yéetel le máaxoʼob grabarkoʼoboʼ maʼ chéen kʼaʼabéet u yoʼochoʼobiʼ kʼaʼabéet xan u kanáantaʼaloʼob. Tumen kex maʼalob le clima Australiaoʼ yaan kʼiineʼ jach ku chujik máak le Kʼiinoʼ. Utiaʼal maʼ u jach chuʼujul le sukuʼunoʼoboʼ le máaxoʼob ku yáantajoʼoboʼ ku beetkoʼob mejen najoʼob utiaʼal u síiskuntik u yóol le sukuʼunoʼoboʼ, ku yilkoʼob xan ka yanak protector solar, sombrías yéetel jaʼ utiaʼal ukʼbil. Kevin, ku meyaj tiʼ Audio yéetel Videoeʼ, ku yaʼalik: «U maas yaʼabil tiʼ le sukuʼunoʼobaʼ ku yáantajoʼob Betel. Letiʼobeʼ humildeʼob le oʼolal yéetel kiʼimak óolal ku beetkoʼob le meyaj ku tsʼaʼabaltiʼoboʼ. Wa maʼ yoʼolal u yáantajoʼobeʼ maʼ tu jóokʼol le meyajoʼ».

 Úuchjeakileʼ como minaʼan u cablesil corriente, carreteraʼob wa najoʼob jeʼex le yanoʼob bejlaʼaʼ yaan escenaʼobeʼ maʼ tu béeytal u grabartaʼaloʼob teʼ sucursaloʼ, le beetik ku kʼaʼabéettal u bin grabarbil táanxel tuʼux. Yoʼolal leloʼ le actoroʼob yéetel le máaxoʼob ku grabaroʼoboʼ unaj u biskoʼob le nookʼoʼob bey xan le baʼaxoʼob kun meyajtiʼob utiaʼal le grabaciónoʼ. Antes tiʼ u káajal le grabaciónoʼoboʼ le sukuʼunoʼob nuʼuktikoʼ ku yilkoʼob ka yanak u plantail luz, jaʼ yéetel baños. Le actoroʼob yéetel le máaxoʼob ku grabaroʼoboʼ ku kʼubéentkubaʼob tu yotoch le sukuʼunoʼob kajaʼanoʼob naatsʼoʼ, uláakʼoʼobeʼ ku pʼáatloʼob tiʼ remolqueʼob wa tiʼ hoteloʼob.

 U grabar máak táanxel lugareʼ jach koʼoj u jóokʼol, ku bisik yaʼab tiempo yéetel kaʼanaʼantsil. Le oʼolal tu añoil 2023, le Cuerpo Gobernanteoʼ tu aprobartaj ka maʼanak junpʼéel nuxiʼ pantalla tu tojoltaj dos millones y medio dólares utiaʼal u grabartaʼal le videoʼoboʼ. Le pantallaaʼ jach maʼalob tumen beyoʼ maʼ kʼaʼabéet u bin máak grabar yaʼab tuʼuxiʼ yéetel ku yáantaj utiaʼal maʼ u sen xuupul taakʼin utiaʼal le grabaciónoʼoboʼ. Darren, juntúul sukuʼun ku meyaj tu Comitéil u Sucursalil Australasiaeʼ, ku yaʼalik: «U grabar máak yéetel le pantallaaʼ ku yáantaj utiaʼal maʼ u sen kaʼanal le actoroʼoboʼ bey xan le máaxoʼob ku yáantajoʼoboʼ. Tsʼoʼoleʼ ku béeytal u grabartaʼal le escenaʼob le jaytéen ku kʼaʼabéettaʼaleʼ. Por ejemploeʼ wa yaan k-grabartik bix u tʼúubul le Kʼiinoʼ maʼ ten u tsʼáatoʼon tiempo k-grabartik yaʼab u téenel, chéen baʼaleʼ yéetel le pantallaaʼ jeʼel k-grabartik le jaytéen ku kʼaʼabéettaleʼ».

 Utiaʼal u grabartaʼal le videoʼob U kuxtal yéetel u kaʼansaj Jesúsoʼ kʼaʼabéet u yáantaj yaʼab sukuʼunoʼob. ¿Bix u yuʼubikuba le sukuʼunoʼobaʼ?

 Amber, kajaʼan Melbourneʼ, kʼaʼabéetchaj u viajar 700 kilómetros utiaʼal u apoyartik le proyectoaʼ. Letiʼeʼ tu yaʼalaj: «Desde ka kʼuchen teʼ aeropuertooʼ le sukuʼunoʼoboʼ jach tu kanáantenoʼob. Yaan tiʼ letiʼobeʼ tu invitartenoʼob janal wa in wukʼ té, tsʼoʼoleʼ teʼ tuʼux ku yúuchul le grabaciónoʼ tin wuʼuyaj jach yaabiltaʼanen. Junpuliʼ maʼ junpʼéel sacrificioiʼ baʼaxeʼ jach tin disfrutartaj».

 Derek, ku meyaj tu equipoil produccióneʼ, ku yaʼalik: «Yaʼab sukuʼunoʼob yéetel kiikoʼob ku meyajoʼob tiʼ uláakʼ departamentoʼobeʼ tsʼoʼok u yáantkoʼonoʼob utiaʼal u béeytal le meyajaʼ. Ku tsʼáaikoʼob u tiempoʼob, u taakʼinoʼob yéetel u muukʼoʼob. Kin tsʼáaik u diosboʼotikil tiʼob yoʼolal le sacrificioʼob ku beetkoʼoboʼ. Le sukuʼunoʼobaʼ jach utsoʼob yéetel jach taak u meyajoʼob, le oʼolal Jéeobaeʼ jach tsʼoʼok u bendecirtik le meyaj k-beetkoʼ. Jach seguroʼen de ke Jéeobaeʼ maʼ chéen kiʼimak u yóol yoʼolal le meyaj k-beetkoʼ baʼaxeʼ kiʼimak u yóol yoʼolal bix k-meyaj».

 Sukuʼuneʼex jach diosboʼotik yoʼolal le donaciónoʼob ka tsʼáaikeʼex utiaʼal u beetaʼal le videoʼobaʼ bey xan le ka tsʼáaikeʼex tiʼ donate.pr418.com.