Enero tiʼ 2021, le Cuerpo Gobernanteoʼ tu presentartaj junpʼéel túumben libro ku kʼaabaʼtik ¡Disfrutart le kuxtaloʼ! a ¿Bix ta wuʼuyilaba le ka ta wuʼuyaj le anuncioaʼ? Matthew, canadáileʼ ku yaʼalik: «Jach kiʼimakchaj in wóol ka tin wuʼuyaj le discursoʼob yéetel le videoʼob tu tsoloʼob baʼaxten beetaʼab le publicaciónaʼ yéetel bix úuchik u probartaʼal yéetel jejeláas sukuʼunoʼob. Jach taak kaʼach in wilik yéetel in tsʼáaik xook tu yéetel».

 Yéetel le túumben libro ¡Disfrutart le kuxtaloʼ! yaan u kʼexpajal bix k-tsʼáaik xook yéetel le Bibliaoʼ. Pero maʼ chéen le bix ken k-tsʼáa xook yaan u kʼexpajloʼ, baʼaxeʼ tak le bix beetaʼanil le libroaʼ tumen tak kéen a macheʼ yaan a wuʼuyikeʼ maʼ bey jeʼex le u maasil libroʼoboʼ. Utiaʼal k-ilik baʼaxten k-aʼalik beyoʼ koʼox ilik jach bix beetaʼanil le librooʼ.

 Piim u juʼunil. ¿Baʼaxten kʼaʼabéetchaj junpʼéel juʼun beyoʼ? Le túumben libroaʼ yaan maas tiʼ 600 dibujoʼob ichil. Leloʼ u kʼáat u yaʼaleʼ diez u téenel u maas yaʼabil u dibujoiloʼob tiʼ le libro ¿Baʼax k-kanik teʼ Bibliaoʼ? U páginaʼob le túumben libroaʼ maʼ chuup yéetel letraʼob mix yéetel dibujoʼobiʼ, yaʼab espacio ku taasik utiaʼal u tsʼíib máak. Chéen baʼaleʼ leloʼ ku beetik u yantal junpʼéel problema, tumen wa jach sáaskʼaleʼen u juʼunileʼ le dibujoʼoboʼ chíikaʼan kun ilbiloʼob tiʼ tuláakʼ páginaoʼ. Utiaʼal maʼ u yantal le problemaaʼ, le sukuʼunoʼob ku meyajoʼob teʼ Departamento Internacional de Impresión yaan Wallkill Nueva Yorkoʼ (Estados Unidos) tu probartoʼob kanpʼéel clase juʼun ku meyaj teʼ imprentaʼoboʼ. Tiʼ le kanpʼéel clase juʼunoʼ le Comité tiʼ Redacción tiʼ le Cuerpo Gobernanteoʼ tu yéeyaj junpʼéel maʼ jach sáaskʼaleʼeniʼ. U tojol le clase juʼunaʼ kex 16 por ciento u maas koʼojil tiʼ le juʼun suuk u meyaj utiaʼal u maasil publicaciónoʼoboʼ. Chéen baʼaleʼ beyoʼ le j-xoknáaloʼoboʼ maʼ kun náayal u yóoloʼob tumen u dibujoiloʼob le túumben libroaʼ maʼ kun chíikpajal tiʼ tuláakʼ páginaoʼ.

 U pastaileʼ jach maʼalob beetaʼanil. U pasta le túumben librooʼ maʼ bey jeʼex u pasta le u maasil libroʼoboʼ tumen le jeʼelaʼ ku taasik junpʼéel chan plástico tu yóokʼol utiaʼal u kanáantik. Maʼatech u léetsʼbal jeʼex u pastail u maasil libroʼoboʼ, bey úuchik u beetaʼaloʼob utiaʼal u maas jatsʼutstal u yilaʼal le dibujo ku taaskoʼ. Le bix beetaʼaniloʼ ku yáantaj xan utiaʼal u kanáantaʼal le libro kex ka sen usartaʼakoʼ. Chéen baʼaleʼ u materialileʼ cinco u téenel maas koʼojil tiʼ le suuk u tsʼaʼabal tiʼ u pastail u maasil libroʼoboʼ. Yaʼab sukuʼunoʼob tiʼ jejeláas sucursaloʼobeʼ áantajnajoʼob utiaʼal maʼ u jach koʼojtal u maʼanal le materialaʼ.

 ¿Baʼaxten túun maas koʼoj tuláakal le material meyajnaj utiaʼal u beetaʼal le túumben libroaʼ? Juntúul sukuʼun ku meyaj teʼ Departamento Internacional de Impresióno’ ku yaʼalik: «K-páaʼtikeʼ kex ka sen meyajnak le libroaʼ maʼ u séeb kʼastal». Eduardo, ku meyaj teʼ sucursal yaan Brasiloʼ, ku yaʼalik: «Kiʼimak in wóol in wilkeʼ u kaajal Jéeobaeʼ tu yéeyaj maʼalob materialoʼob utiaʼal u beetaʼal le libroaʼ. Beyoʼ le libroaʼ jatsʼuts u yilaʼal, yaan u xáantal yéetel tak chéen u maʼachleʼ ku yuʼubaʼal u jelaʼanil yéetel u maasil. Tsʼoʼoleʼ beyoʼ táan u meyaj tubeel le donaciónoʼob ku tsʼaʼabaloʼ».

 Le libro ¡Disfrutart le kuxtaloʼ! káaj u imprimirtaʼal marzo tiʼ 2021. Yoʼolal le pandemiaoʼ jach istikyaj úuchik u beetaʼal. Úuchik u kʼaʼalal Beteleʼ le voluntarioʼoboʼ pʼáat maʼ tu páajtal u binoʼob áantaj teʼ imprentaoʼ. Tsʼoʼoleʼ maʼ tu páajtal xan u invitartaʼal uláakʼ sukuʼunoʼob utiaʼal u meyajoʼob bey betelitaʼobeʼ. Yoʼolal leloʼ jujunpʼéel imprentaʼobeʼ kʼaʼaloʼob tumen pʼáat óoliʼ minaʼan mix máak utiaʼal u yáantajiʼ yéetel uláakʼoʼobeʼ kʼaʼaloʼob tumen bey tu yaʼalil le gobiernooʼ.

 ¿Bix túun béeychajik u beetaʼal le meyajoʼ? Le maʼ kʼaʼalak le imprentaoʼ le sukuʼunoʼob ku meyajoʼob Betel tiʼ yaanal departamentooʼ máansaʼaboʼob junpʼéel tiempo teʼ imprenta utiaʼal u yáantajoʼobiʼ. Joel, juntúul máax ku meyaj teʼ Departamento Internacional de Impresióno’, ku yaʼalik: «Úuchik u yóotkoʼob u kanoʼob u beetoʼob junpʼéel meyaj mix juntéen u beetoʼobeʼ jach áantajnaj utiaʼal ka páajchajak u tsʼoʼoksaʼal le meyajoʼ».

 Kex maʼ chéen chʼaʼabileʼ tsʼoʼok u imprimirtaʼal u millonesil le túumben librooʼ. Utiaʼal u beetaʼal le libroʼobaʼ ku kʼaʼabéettal yaʼab material jeʼex por ejemplo le planchaʼob ku meyaj utiaʼal u imprimirtaʼaloʼoboʼ, le plástico ku bin yóokʼol u pastailoʼ, u juʼunil, u tintail yéetel u pegamentoil. Chéen tu yáamil cinco meses táan u imprimirtaʼaleʼ xuʼup maas tiʼ 2.3 millones dólares chéen yoʼolal le materialoʼob meyajnajoʼ. Utiaʼal u kanáantaʼal le taakʼinoʼ chéen ku imprimirtaʼal le libroʼob kʼaʼabéet tiʼ le múuchʼuliloʼoboʼ.

 ¿Bix u yuʼubikuba le máaxoʼob ku tsʼáaikoʼob xook bey xan le j-xoknáaloʼob yéetel le túumben libroaʼ? Paul, juntúul sukuʼun australiaileʼ, ku yaʼalik: «Jach maʼalob beetaʼanil le libroaʼ, le oʼolal jach jatsʼuts in wilik in tsʼáaik xook tu yéetel. Le libroaʼ beetaʼan utiaʼal u taaktal u xoʼokol yéetel ku taasik xookoʼob yéetel videoʼob utiaʼal u maas tsikbal le j-xoknáaloʼ. Tsʼoʼoleʼ ku taasik preguntaʼob jach maʼalobtak, videoʼob, dibujoʼob yéetel junpʼéel jaats tuʼux ku yeʼesik bey baʼax uláakʼ jeʼel u páajtal u beetik le j-xoknáaloʼ. Le libroaʼ jach maʼalob bix beetaʼanil, leloʼ ku péeksiken utiaʼal in maas maʼalobkíintik bix in kaʼansaj».

 Juntúul máak ku tsʼaʼabal xook tiʼ kajaʼan Estados Unidoseʼ ku yaʼalik: «Jach uts tin wich le túumben libroaʼ. U dibujoiloʼobeʼ ku yáantkenoʼob in naʼat baʼax táan in kanik. Le videoʼoboʼ ku kʼuchloʼob tin puksiʼikʼal yéetel ku péeksikenoʼob in beet baʼax kin kanik». Tiʼ le máakaʼ cada semanaeʼ kaʼatéen u tsʼaʼabal xook tiʼ, tsʼoʼoleʼ tsʼoʼok u káajal u bin teʼ reuniónoʼoboʼ.

 Le túumben libroaʼ yaʼab u bin utiaʼal u imprimirtaʼal ichil uláakʼ idiomaʼob. Tak beoraaʼ le Cuerpo Gobernanteoʼ tsʼoʼok u yaʼalikeʼ le libroaʼ yaan u imprimirtaʼal ich 710 idiomaʼob. Leloʼ u kʼáat u yaʼaleʼ yaan u imprimirtaʼal ichil uláakʼ 340 ke tiʼ le anchaj utiaʼal le libro ¿Baʼax k-kanik teʼ Bibliaoʼ?

 ¿Tuʼux túun ku chʼaʼabal taakʼin utiaʼal u imprimirtaʼal? Ku beetaʼal yéetel le taakʼin ku síik u testigoʼob Jéeobaoʼ, yaʼabeʼ ku síik le taakʼin teʼ donate.pr418.com. Jach k-tsʼáaikteʼex u graciasil ikil a síikeʼex junpʼíit taakʼin tumen beyoʼ ku páajtal k-beetik áantajoʼob utiaʼal u xoʼokol le Bibliaoʼ yéetel u maasil máakoʼobeʼ ku páajtal u kaanbaloʼob yoʼolal Jéeoba. Tsʼoʼoleʼ jeʼel xan u páajtal u disfrutarkoʼob «u kuxtaloʼob utiaʼal manta[tsʼeʼ]» (Salmo 22:26).