U testigoʼob Jéeoba teʼ kʼiinoʼobaʼ maases ich Internet ku yéemsikoʼob le publicaciónoʼob yéetel le videoʼob ku meyajtiʼoboʼ, chéen baʼaleʼ yaʼab tuʼuxoʼobeʼ le sukuʼunoʼoboʼ óotsiloʼob le oʼolal maʼ tu páajtal u máankoʼob le Internetoʼ. Uláakʼoʼob xaneʼ kajaʼanoʼob tuʼux maʼ jach maʼalob u señalil le Internetoʼ wa jach junpuliʼ minaʼan.

 Kex beyoʼ yaʼab tiʼ le sukuʼunoʼoboʼ yaantiʼob le publicaciónoʼob ku tsʼaʼabal ich Internet kex minaʼantiʼob Internetoʼ. ¿Bix túun u beetkoʼob?

 Tumen ku túuxtaʼaltiʼob junpʼéel chan cajita JW Box utiaʼal ka u yéemsoʼob le publicaciónoʼoboʼ. Le chan cajitaoʼ ku túuxtaʼal tiʼ le múuchʼuliloʼob tuʼux minaʼan Internet wa istikyaj u kʼuchloʼ. U Najil Betel manik le chan cajitaoʼ, kéen tsʼoʼokkeʼ le Departamento de Computación yaan Beteloʼ ku tsʼáaik le videoʼob yéetel le publicaciónoʼob kʼaʼabéet tiʼ le sukuʼunoʼoboʼ. Cada junpʼéel cajitaeʼ ku tojoltik kex 1,500.

 Utiaʼal u descargarkoʼob le videoʼob yéetel le publicaciónoʼoboʼ, le sukuʼunoʼoboʼ ku conectartikubaʼob tiʼ JW Box, u maʼalobileʼ kex maʼ jach túumben u celular máakeʼ jeʼel u páajtal u conectarcuba tiʼ le chan cajitaaʼ. Chéen baʼaleʼ, ¿bix túun u tsʼaʼabal le publicaciónoʼob maas túumbenoʼob tiʼ le chan cajita wa minaʼan Internet tuʼux yaan le sukuʼunoʼoboʼ? U Najil Beteleʼ cada táan u túuxtik USB tiʼ le sukuʼunoʼob utiaʼal ka yanaktiʼob le publicaciónoʼob yéetel le videoʼob maas túumbenoʼob yaan teʼ jw.org. Le USB ku túuxtaʼaloʼoboʼ ku conectartaʼaloʼob teʼ chan cajita utiaʼal ka béeychajak u yéemsaʼal le túumben publicaciónoʼob tumen le sukuʼunoʼoboʼ.

 ¿Bix tsʼoʼok u yáantaj JW Box? Nathan Adruandra, kajaʼan República Democrática del Congoeʼ, ku yaʼalik: «Yaʼab u téenel tsʼoʼok in wóotik in descargart le video Jéeoba in kʼubmaj in wóol tiʼ teech bey xan Kʼaʼajakteʼex u yatan Lot, chéen baʼaleʼ maʼ páajchaj in beetkiʼ. Lelaʼ jach ku beetik in tristetal kaʼachi, pero bejlaʼeʼ ku béeytal in wéemsik le videoʼoboʼ. Lelaʼ jach ku meyajtoʼon utiaʼal k-kaʼansik k-paalal».

 Juntúul sukuʼun ku yáantaj utiaʼal u instalartaʼal JW Box tu luʼumil Nigeriaeʼ ku yaʼalik: «Utiaʼal le sukuʼunoʼoboʼ JW Boxeʼ junpʼéel nojoch siibal ku taal tiʼ Jéeoba. Le sukuʼunoʼoboʼ jach kiʼimak u yóoloʼob tumen chéen chʼaʼabil u yéemsikoʼob le videoʼob yéetel le publicaciónoʼob ku meyaj utiaʼal u kaʼansaʼal máakoʼ.

 Tsʼoʼok u túuxtaʼal maas tiʼ 1,700 JW Box teʼ múuchʼuliloʼob yaan África, Oceanía yéetel Sudaméricaoʼ, tsʼoʼoleʼ táan xan u tuklaʼal u túuxtaʼal tiʼ le múuchʼuliloʼob tuʼux jach kʼaʼabéetoʼ. ¿Tuʼux ku chʼaʼabal u taakʼinil tuláakal le baʼax ku beetaʼaloʼ? Lelaʼ maases ku chʼaʼabal ichil le donaciónoʼob ku tsʼáaik u testigoʼob Jéeoba utiaʼal u tsʼaʼabal kʼaj óoltbil u Tʼaan Dios tiʼ tuláakal yóokʼol kaaboʼ. Yaʼab tiʼ lelaʼ ku tsʼaʼabal donate.pr418.com. Jach yaʼabkach diosboʼotik yoʼolal tuláakal le baʼax ka síikeʼexoʼ.