Le paaxoʼob yéetel le kʼaayoʼoboʼ junpʼéel jatsʼuts regalo ku taal tiʼ Jéeoba, ku beetkoʼob k-tuukul tiʼ baʼaloʼob jatsʼutstak yéetel ku beetkoʼob u kiʼimaktal k-óol. Le kʼaayoʼob tsʼaʼan teʼ JW Broadcasting® xanoʼ ku kiʼimakkúuntik k-óol yéetel ku yáantkoʼon k-maas yaabilt Jéeoba.

 Le kʼaayoʼobaʼ káaj u jóoʼsaʼaloʼob tu añoil 2014, yéetel tsʼoʼok 70 u pʼéelal beetaʼakiʼ. Junpʼéel tiʼ le kʼaayoʼobaʼ jóoʼsaʼan ich maas tiʼ 500 idiomaʼob. Maʼ xaaneʼ tsʼoʼok a tuklik: «¿Bix túun u beetaʼal le kʼaayoʼobaʼ yéetel máaxoʼob beetik?».

 Le Cuerpo Gobernanteoʼ u kʼubéentmaj tiʼ le Comité tiʼ Enseñanza ka u nuʼukt le Equipo de Música de Servicios de Audio y Video utiaʼal ka beetaʼak le kʼaayoʼoboʼ. Letiʼob beetik le kʼaayoʼob ku jóoʼsaʼal JW Broadcasting bey xan le u maasiloʼoboʼ. Trece u túulal le máaxoʼob ku meyajoʼob Betel utiaʼal u beetaʼal u letrail le kʼaayoʼoboʼ, u beetaʼal u paaxil, u grabartaʼal bey xan uláakʼ baʼaxoʼob kʼaʼabéet u beetaʼal. Tsʼoʼoleʼ le Comité tiʼ Enseñanzaoʼ u aprobarmaj ka áantaʼakoʼob tumen uláakʼ sukuʼunoʼob tiʼ tuláakal yóokʼol kaab. Le sukuʼunoʼobaʼ desde tu yotochoʼob ku yáantajoʼob. Yanoʼobeʼ ku beetkoʼob u letrail, uláakʼoʼobeʼ ku beetkoʼob u paaxil yéetel yaan xan máaxoʼob kʼayik. Letiʼobeʼ maʼatech u creerkubaʼob yéetel maʼatech u máan u tsikbaltoʼob baʼaxoʼob ku beetkoʼob.

 ¿Bix u beetaʼal junpʼéel kʼaay? Yáaxeʼ le Comité tiʼ Enseñanzaoʼ ku yéeyik tiʼ baʼax tekstoiloʼob kun jóoʼsbil le kʼaayoʼ yéetel ku tuukul tiʼ bix ken u yáantil le máaxoʼob kun uʼuyikoʼ. Tsʼoʼoleʼ le Equipo de Músicaoʼ ku yéeyik máaxoʼob kun beetik u letrail yéetel máaxoʼob kun beetik u paaxil. Kéen tsʼoʼokok u grabartaʼal le bix u tuklaʼal kun jóokʼoloʼ, le Comité tiʼ Enseñanzaoʼ ku revisartik yéetel ku yaʼalik wa yaan baʼax kʼaʼabéet u yutskíintaʼal. Tu tsʼook túuneʼ ku grabartaʼal jeʼex aʼalaʼabik kun pʼaatloʼ. Yaan kʼaayoʼobeʼ ku grabartaʼaloʼob tu Najil Betel yéetel yanoʼobeʼ ku grabartaʼal tu yotoch le sukuʼunoʼob ku yáantajoʼoboʼ.

 Jejeláas baʼaxoʼob ku meyaj tiʼ le sukuʼunoʼob utiaʼal u beetkoʼob u letrail le kʼaayoʼoboʼ, utiaʼal u beetkoʼob u notasil yéetel utiaʼal u mezclarkoʼob u paaxil. Tsʼoʼoleʼ jejeláas instrumentoʼob ku meyaj utiaʼal u beetaʼal le paaxoʼ, ku meyaj xan mezcladoraʼob, amplificadoroʼob, bocinaʼob yéetel micrófonoʼob. Cada micrófonoeʼ jeʼel u tojoltik 100 wa tak maas tiʼ 1,000 dólareseʼ. Tu añoil 2020, xuʼup 116,000 dólares utiaʼal u maʼanal le baʼaxoʼob kʼaʼabéetoʼob utiaʼal u yúuchul grabaroʼ.

 ¿Baʼax ku beetaʼal utiaʼal u kanáantaʼal le donaciónoʼoboʼ? Tu lugar u invitartaʼal yaʼab sukuʼunoʼob ka xiʼikoʼob Beteleʼ ku invitartaʼal le sukuʼunoʼob utiaʼal ka áantajnakoʼob desde tu yotochoʼoboʼ. Tu lugar u bisaʼal le orquesta utiaʼal ka grabarnak Beteloʼ ku kʼáataʼal tiʼ le sukuʼunoʼob ka grabarnakoʼob desde tu yotochoʼob yéetel ka u túuxtoʼob tu Najil Betel le baʼax tu grabartoʼoboʼ.

 Le sukuʼunoʼoboʼ jach uts tu tʼaan u yuʼubikoʼob le paaxoʼob yaan JW Broadcastingoʼ. Tara, kajaʼan Alemaniaeʼ, ku yaʼalik: «Como yaanten ansiedadeʼ jach ku líikʼil in wóol kéen in wuʼuy le paaxoʼoboʼ. Le kéen in wuʼuy le kʼaayoʼob ichil le idioma kin tʼankoʼ kin wuʼuyik bey táan u yaʼalikten Jéeoba jach u yaabiltmeneʼ». Dimitri, kajaʼan Kazajistáneʼ, ku yaʼalik: «Uts tin tʼaan in wuʼuyik le kʼaayoʼoboʼ tumen in wojel tuláakal le baʼax ku yaʼalikoʼ teʼ Biblia chʼaʼabaʼanoʼ. Le kʼaayoʼoboʼ hasta ku yáantken in maas tsʼáa in wóol in meyajt Jéeoba».

 Delia, kajaʼan Sudáfricaeʼ, ku yaʼalik xan: «Le kʼaayoʼoboʼ jach ku yáantken. Wa táan in máansik problemas bey xan wa lubaʼan in wóoleʼ in wojel yaan junpʼéel kʼaay jach jeʼel u yáantkeneʼ. Yaan horaeʼ tak chéen in wuʼuyik u paaxileʼ kin wuʼuyik bix u líikʼil in wóol».

 Yaʼab sukuʼunoʼobeʼ jach uts tu tʼaan u yuʼubikoʼob jujunpʼéel kʼaayoʼob yaan teʼ sitio JW Broadcastingoʼ. Lerato, kajaʼan xan Sudáfricaeʼ, ku yaʼalik: «Le kʼaay Jach naatsʼ yanil u kʼiinil yéetel Junpʼéel jatsʼuts kuxtal ku beetik in imaginartik tsʼoʼok u kaʼa kuxkíintaʼal in maama teʼ Paraísooʼ. Cada kéen in wuʼuyoʼobeʼ kin imaginartik bey táan u taal u yáalkab u méekʼeneʼ».

 Juntúul x-chʼúupal kajaʼan Sri Lankaeʼ jach áantaʼab xan tumen junpʼéel kʼaay, letiʼeʼ ku yaʼalik: «Le maestra ku kaʼansikten cienciasoʼ jach tu ofenderten tu táan in wéet xookoʼob tumen teneʼ u testigoʼen Jéeoba. Teʼ súutukoʼ maʼ tin kaxtaj baʼax in waʼaltiʼiʼ. Le ka kʼuchen tin wotocheʼ in maamaeʼ tu yaʼalajten ka in wuʼuy le kʼaay ich español Fuerte tú serás. Le kʼaayoʼ tu yáanten in wileʼ kʼaʼabéet in maas xook utiaʼal in kanik baʼax ken in núuk tiʼ le maestraoʼ. Tuláakʼ kʼiineʼ tsikbalnajen yéetel in maestra, letiʼ túuneʼ tu tsʼáajten u graciasil úuchik in tsoliktiʼ baʼaxoʼob kin creertik. Kin tsʼáaik u graciasil tiʼ u kaajal Jéeoba tumen ku beetik kʼaayoʼob jach ku yáantik máak».

 ¿Tuʼux ku chʼaʼabal u taakʼinil utiaʼal u beetaʼal le kʼaayoʼoboʼ? Yaʼab tiʼ lelaʼ ku chʼaʼabal ichil le donaciónoʼob ka túuxtikeʼex teʼ donate.pr418.com. Jach k-tsʼáaikteʼex u graciasil tu yoʼolal a wutsileʼex.