Juntúul kiik kajaʼan Colombia ku kʼaabaʼtik Nicoleeʼ, tu yaʼalaj: «¡Jach jatsʼuts in wilik le salón tuʼux k-muchʼikbaoʼ!». ¿Baʼaxten jach uts tu yich? Letiʼeʼ ku yaʼalik: «Tumen tiaʼan le máaxoʼob in yaabiltmoʼ». ¿Bey wa xan a wuʼuyikabaoʼ?

 Tiʼ tuláakal yóokʼol kaabeʼ yaan 63,000 u pʼéelel salónoʼob tuʼux ku muchʼkuba u testigoʼob Jéeoba. Le lugaroʼobaʼ maʼ chéen ku meyaj utiaʼal k-adorartik Diosiʼ. ¿Baʼaxten k-aʼalik beyoʼ? Koʼoneʼex ilik baʼax tu yaʼalaj David, juntúul precursor kajaʼan Colombia. Tu yaʼalaj: «Le jatsʼuts salónoʼobaʼ ku beetkoʼob u yúuchul tʼaan maʼalobil tiʼ u kʼaabaʼ Jéeoba, tumen le kéen taalak le máakoʼob u xíimbaltoʼonoʼoboʼ yéetel kéen u yiloʼob bix jatsʼuts kanáantaʼanileʼ ku jaʼakʼal u yóoloʼob». Jach jatsʼuts u yilaʼal le lugaroʼobaʼ tumen jach k-tsʼáaik k-óol utiaʼal k-pʼatik limpioil, k-kanáantik yéetel k-tsʼáaik mantenimiento tiʼ. Pero ¿baʼax túun áantkoʼon?

 Le congregaciónoʼoboʼ suuk u organizarkubaʼob utiaʼal u limpiokíintkoʼob, u tsʼáaikoʼob mantenimiento tiʼ le salónoʼ yéetel u jáan utskíintikoʼob le baʼax ku kʼastaloʼ.

 Utiaʼal u yáantaʼal le congregaciónoʼobaʼ u departamentoil LDC, ku yéeyik sukuʼunoʼob bey capacitadores de mantenimientoeʼ, letiʼobeʼ ku kaʼanskoʼob le sukuʼunoʼoboʼ. Cada capacitadoreʼ kʼubéentaʼan seis wa diez salónoʼob tiʼ. Letiʼobeʼ ku xíimbaltikoʼob le múuchʼuliloʼoboʼ yéetel ku kaʼanskoʼob le sukuʼunoʼob u tsʼáaʼob mantenimiento teʼ salónoʼoboʼ. Cada tres añoseʼ ku bin u checartoʼob bix yanil le salónoʼoboʼ utiaʼal u yilkoʼob wa yaan baʼax kʼaʼabéet u yutskíintaʼal yéetel wa yaan baʼax jeʼel u tsʼáaik en peligroil u kuxtal le máaxoʼob ku muchʼkubaʼoboʼ.

 Tuláakal le sukuʼunoʼob tsʼoʼok u kaʼansaʼal u beetoʼob le meyajaʼ jach kiʼimak u yóoloʼob yéetel ku tsʼáaikoʼob u diosboʼotikil. Juntúul kiik kajaʼan India ku kʼaabaʼtik Indhumathieʼ ku yaʼalik: «Jach táaj jatsʼuts le capacitación tsʼaʼabtoʼonoʼ, jach kiʼimak k-óol úuchik k-kaʼansaʼal k-kanáant le salón tuʼux k-muchʼikbaoʼ». Juntúul sukuʼun kajaʼan Kenia ku kʼaabaʼtik Evanseʼ, ku yaʼalik xan: «T-kaneʼ jach importante k-utskíintik le baʼaloʼob mejentakoʼ antes u maas kʼastal uláakʼ baʼaloʼobiʼ, beyoʼ k-kanáantik bix u meyaj le donaciónoʼoboʼ».

 Ichil junpʼéel añoeʼ u usartaʼal yéetel u kanáantaʼal junpʼéel salóneʼ jeʼel u beetik u xuʼupul u milesil dólaroʼobeʼ. a Le bukaʼaj ku xuʼupuloʼ ku depender tuʼux lugaril yaan le salónoʼ, jaypʼéel años beetaʼak yéetel jaypʼéel congregaciónoʼob ku muchʼkubaʼobiʼ. ¿Bix u boʼotaʼal le xuupoʼob ku yantaloʼ?

 Ku boʼotaʼaloʼob yoʼolal le donaciónoʼob ku tsʼaʼabaloʼ. Alexander, kajaʼan Kazajistáneʼ ku yaʼalik: «Le taakʼinaʼ ku meyaj utiaʼal u boʼotaʼal Internet, jaʼ yéetel luz. Ku meyaj xan utiaʼal u maʼanal juʼun utiaʼal u choʼobol kʼab, guantes, baʼaloʼob utiaʼal u beetaʼal limpieza yéetel pintura». Le donaciónoʼob ku pʼáatloʼ ku túuxtaʼal tiʼ le obra mundial utiaʼal u tsʼaʼabal mantenimiento tiʼ le lugaroʼob tuʼux k-muchʼikba yaan tiʼ tuláakal yóokʼol kaaboʼ.

 Yaan kʼiineʼ le bukaʼaj taakʼin ku xuʼupul utiaʼal u tsʼaʼabal mantenimiento tak chéen juntéen tiʼ junpʼéel salónoʼ maas yaʼab ke le bukaʼaj ku xuʼupul ikil u usartaʼal le salón ichil dos wa tres mesesoʼ. Wa le múuchʼulil maʼ tu tsaʼayal yéetel le gastooʼ ku kʼáatkoʼob áantaj tiʼ le sukuʼun ku meyaj tiʼ LDC capacitarkoʼoboʼ. U suukileʼ le taakʼinoʼ ku chʼaʼabal tiʼ le donaciónoʼob yaan tiʼ le obra mundialoʼ. Tu añoil servicio 2023, tsʼaʼab mantenimiento tiʼ 8,793 u pʼéelel edificioʼob, tuláakal le xuup beetaʼaboʼ tu chukaj 76,6 millones de dólares. Koʼoneʼex ilik kaʼapʼéel tiʼ le meyajoʼob beetaʼaboʼobaʼ.

 Tu luʼumil Angolaeʼ yaan junpʼéel salón tsʼoʼok 15 años beetaʼakeʼ kʼaʼabéet kaʼach u yutskíintaʼal u corrienteil bey xan u pakʼiloʼob. Tsʼoʼoleʼ le vecinoʼoboʼ ku quejarkubaʼob tumen ku yaʼalikoʼobeʼ le jaʼ ku taal teʼ salónoʼ ku bulik bin u yotochoʼob. Le oʼolal u departamentoil LDC, tu chʼaʼtuklaj u séeb utskíintik le problemaoʼ. Tuláakal le xuup beetaʼaboʼ tu chukaj 9,285 dólares. Le vecinoʼoboʼ jach jaʼakʼ u yóoloʼob yoʼolal le meyaj beetaʼaboʼ yéetel jach kiʼimakchaj u yóoloʼob.

 Tiʼ junpʼéel salón yaan tu luʼumil Poloniaeʼ káaj u yokol jaʼ tu techoil yéetel u alfombraileʼ tsʼoʼok u kʼastal. Le oʼolal u departamentoil LDC, tu aprobartaj ka utskíintaʼak le techooʼ yéetel ka kʼeʼexek le alfombraoʼ. Tuláakal le xuup beetaʼaboʼ tu chukaj 9,757 dólares. Pero yoʼolal le baʼax beetaʼabaʼ maʼ kun kʼaʼabéettal u jáan utskíintaʼal tu kaʼatéen.

 Le meyajoʼob ku beetaʼal teʼ salónoʼobaʼ ku yáantaj utiaʼal maʼ u xuʼuxupaʼal le donaciónoʼoboʼ, pero u maas kʼaʼanaʼanileʼ ku beetik u alabartaʼal u kʼaabaʼ Jéeoba. Juntúul sukuʼun ku kʼaabaʼtik Shaun kajaʼan Tongaeʼ, ku yaʼalik: «Yoʼolal le mantenimiento ku tsʼaʼabal teʼ salónoʼoboʼ jach kiʼimak k-óol k-adorartik Jéeoba tiʼ junpʼéel lugar limpio yéetel jatsʼuts, lelaʼ ku yáantaj xan utiaʼal ka alabartaʼak Jéeoba teʼ tuʼux kajaʼanoʼonoʼ. Le oʼolal toʼoneʼ kiʼimak k-óol k-invitartik jeʼel máaxak utiaʼal ka taalak teʼ salónoʼ».

 Tuláakloʼon jeʼel u páajtal k-áantaj utiaʼal u kanáantaʼal yéetel u jatsʼutskíintaʼal le salónoʼ. Marino, juntúul sukuʼun ku tsʼáaik capacitación utiaʼal u tsʼaʼabal mantenimiento teʼ salónoʼob yaan Australiaoʼ, ku yaʼalik: «K-áantaj utiaʼal u tsʼaʼabal mantenimiento teʼ salónoʼoboʼ junpʼéel nojoch privilegio, yéetel tuláakloʼon jeʼel u páajtal k-áantajeʼ. Kéen k-beeteʼ k-áantaj utiaʼal u kanáantaʼal bix u meyaj le donaciónoʼoboʼ, beyoʼ jeʼel u páajtal u usartaʼal teʼ tuʼuxoʼob maas kʼaʼabéet áantajoʼ».

 Joel, juntúul sukuʼun kajaʼan Indiaeʼ, jatsʼuts u yilik u yáantaj utiaʼal a tsʼaʼabal mantenimiento teʼ salónoʼoboʼ. Ku yaʼalik: «In múul meyaj yéetel le sukuʼunoʼoboʼ ku yáantken in wil bix jatsʼutsil koʼon meyaj teʼ túumben luʼumoʼ». Nicole, le kiik tsʼoʼok k-yáax chʼaʼchiʼitikeʼ, ku yaʼalik: «Maʼ sen úucheʼ le sukuʼunoʼoboʼ yanchaj u yutskíintikoʼob junpʼéel fuga yanchaj teʼ bañooʼ, teneʼ áantajnajen utiaʼal u choʼobol le piso chʼuuloʼ. U jaajileʼ maʼ teen utskíint le baʼax kʼaschajoʼ pero áantajnajen utiaʼal maʼ u lúubul mix máakiʼ».

 Wa a kʼáat áantaj utiaʼal u tsʼaʼabal mantenimiento teʼ salón tuʼux yanechoʼ tʼaanen yéetel le ancianoʼoboʼ. Kʼaʼajaktecheʼ le donaciónoʼob ka tsʼáaikoʼ maʼ chéen ku meyaj utiaʼal u tsʼaʼabal mantenimiento teʼ salón tuʼux yanechoʼ, baʼaxeʼ ku meyaj xan utiaʼal u kanáantaʼal le salónoʼob yaan tiʼ tuláakal yóokʼol kaaboʼ. Jeʼel u páajtal a tsʼáaik a donación teʼ mejen cajas yaan teʼ salónoʼoboʼ bey xan tiʼ donate.pr418.com. Jach k-tsʼáaikteʼex u graciasil yoʼolal a donacióneʼexoʼ.