Teʼ año 2020, jach yaʼab nukuch loobiloʼob úuchi, tsʼoʼoleʼ káaj xan le coronavirusoʼ. ¿Baʼax tu beetaj u testigoʼob Jéeoba utiaʼal u yáantkoʼob le máaxoʼob afectartaʼaboʼob yoʼolal le baʼax úuchoʼ?

 Ichil le año de servicio 2020, a le Comité tiʼ Coordinadores tiʼ le Cuerpo Gobernanteoʼ tu yaʼalaj ka meyajnak 28 millones de dólares b utiaʼal u yáantaʼal le sukuʼunoʼoboʼ. Le bukaʼaj taakʼinaʼ meyajnaj utiaʼal u yáantaʼal le sukuʼunoʼob afectartaʼaboʼob tumen le maas tiʼ 200 nukuch loobiloʼob yanchajoʼoboʼ, jeʼex le coronavirusoʼ, le chak ikʼaloʼoboʼ, u búulul África yéetel u pʼáatal minaʼan baʼal jaantbil Venezuela bey xan Zimbabue. Le taakʼinoʼ meyajnaj utiaʼal u maʼanal janal, nookʼ, jaʼ, tsʼaak yéetel utiaʼal u tsʼaʼabal tuʼux u yantal le sukuʼunoʼoboʼ. Maʼan xan baʼaloʼob jach kʼaʼanaʼantak utiaʼal u beetaʼal limpieza bey xan le baʼaloʼob kʼaʼabéetoʼob utiaʼal u yutskíintaʼal yéetel u jel líiʼsaʼal le najoʼoboʼ. Koʼoneʼex ilik bix tsʼoʼok u yáantaʼal le sukuʼunoʼoboʼ.

 COVID-19. Le coronavirusoʼ tsʼoʼok u afectartik le sukuʼunoʼob tiʼ tuláakal yóokʼol kaaboʼ. Yanoʼobeʼ tsʼoʼok u tsaʼayaltiʼob, uláakʼoʼobeʼ tsʼoʼok u pʼaatal minaʼan taakʼin tiʼob yéetel yanoʼobeʼ jach tsʼoʼok u lúubul u yóoloʼob. Yoʼolal lelaʼ tsʼoʼok u beetaʼal maas tiʼ 800 Comitéʼob tiʼ Socorro utiaʼal u yáantaʼaloʼob. Le comitéʼobaʼ letiʼob ilik baʼax kʼaʼabéet tiʼ le sukuʼunoʼoboʼ, tsʼoʼoleʼ ku yaʼalikoʼob tiʼ le Comité tiʼ Coordinadoresoʼ, beyoʼ le comitéaʼ ku túuxtik le áantaj kʼaʼabéet tiʼ le sukuʼunoʼoboʼ.

 Ichil le año 2020, le Comité tiʼ Socorrooʼ yaʼab máaxoʼob tsʼoʼok u yáantik utiaʼal ka yanaktiʼob janal, jaʼ, tsʼaak yéetel uláakʼ baʼaloʼob jach kʼaʼabéettiʼob. Yaan jujunpʼéel tuʼuxoʼobeʼ tu nuʼuktoʼob le ancianoʼob utiaʼal ka páajchajak u yáantkoʼob le sukuʼunoʼob utiaʼal u kʼamkoʼob le áantaj ku tsʼáaik le Gobiernooʼ.

 Tak le máaxoʼob maʼatech u meyajtikoʼob Jéeobaoʼ ku tsʼáaikoʼob cuenta bix k-áantik u maasil máakoʼob. Jeʼex tu kaajil Nakonde Zambiaeʼ, Field Simwinga, juntúul u nojchil le policíaoʼ tu yaʼalaj tiʼ le sukuʼunoʼoboʼ: «Jach diosboʼotik teʼex úuchik a séeb áantkeʼex le familiaʼob jach kʼaʼabéettiʼoboʼ».

 Ku pʼáatal minaʼan baʼal jaantbil Angola. Tu yoʼolal le coronavirusoʼ pʼáat maʼ yaʼab baʼal yaan jaantbil tu luʼumil Angolaiʼ, le oʼolal xan yaʼab baʼax koʼojchajiʼ. Le baʼax úuchoʼ tu beetaj u jach difíciltal u kaxtik u kuxtal le sukuʼunoʼoboʼ.

 Ka túun aʼalaʼabeʼ u Betelil Brasil kun túuxtik u despensa le sukuʼunoʼoboʼ. Utiaʼal u meyaj tubeel le donaciónoʼoboʼ le sukuʼunoʼoboʼ tu yiloʼob baʼax jeʼel u páajtal u beetkoʼob utiaʼal u jóokʼol barato le baʼaxoʼob kun túuxtbiloʼ, ka túun tu yiloʼobeʼ maas maʼalob ka u manoʼob de yaʼabil. U maʼanal yéetel u bisaʼal cada junpʼéel despensaeʼ tu tojoltaj 22 dólares yéetel kex 20 kilos u aalil, ichil le baʼaxoʼob túuxtaʼaboʼ yaan arroziʼ, buʼul yéetel aceiteiʼ. Tak beoraeʼ tsʼoʼok u túuxtaʼal 33,544 despensas, u aalil tuláakal le baʼax túuxtaʼaboʼ 654 toneladas. Yéetel le bukaʼaj baʼaloʼob túuxtaʼab bey xan le uláakʼ baʼaloʼob maʼan tu luʼumil Angolaoʼ áantaʼab maas tiʼ 50,000 máakoʼob.

 ¿Bix u yuʼubikuba le sukuʼunoʼoboʼ? Alexandre, juntúul sukuʼun náach tuʼux kajaʼaneʼ tu yaʼalaj: «Jach chíikaʼan in wilik bukaʼaj u yaabiltmilen Jéeoba, kin wuʼuyik maʼ tin juunal yaneniʼ yéetel kin wilik jach yaabiltaʼanen tumen u kaajal». Mariza, juntúul maamatsil ku líiʼsik tu juunal u paalaleʼ ku yaʼalik: «Jéeobaeʼ tu yuʼubaj in oración. Jach kin tsʼáaik gracias tiʼ letiʼ yéetel tiʼ u kaajal».

 Ku pʼáatal minaʼan baʼal jaantbil Zimbabue. Ichil le año de servicio 2020, pʼáat maʼ tu kʼáaxal jaʼ tu luʼumil Zimbabue, tu yoʼolal lelaʼ u millonesil máakoʼobeʼ óolak kíimkoʼob yoʼolal wiʼij. U milesil sukuʼunoʼob xaneʼ pʼáat minaʼan baʼal u jaantoʼob.

 Utiaʼal u yáantaʼal le sukuʼunoʼoboʼ formartaʼab 5 Comitéʼob tiʼ Socorro. Jach yaʼab publicadoroʼob áantajnajoʼob utiaʼal u jaʼatsal le mercancía túuxtaʼaboʼ, uláakʼoʼobeʼ áantajnajoʼob utiaʼal u naʼaksaʼal teʼ camiónoʼoboʼ yéetel uláakʼoʼobeʼ tu majáantoʼob u camiónoʼob utiaʼal u bisaʼal. c Ichil le año de servicio 2020, xuʼup 691,561 dólares utiaʼal u tsʼaʼabal baʼax u jaant maas tiʼ 22,700 u túulal sukuʼunoʼob.

 Jach tu yorail ka kʼuch le áantaj tiʼ le sukuʼunoʼoboʼ, yaan tiʼ letiʼobeʼ tsʼoʼok u xuʼupul le baʼaxoʼob yaantiʼob kaʼach utiaʼal u jaantoʼoboʼ. Le sukuʼunoʼobaʼ tu sen tsʼáajoʼob gracias tiʼ Jéeoba, yaan tak tiʼ letiʼobeʼ tumen jach kiʼimak u yóoloʼobeʼ káaj tak u kʼaykoʼob u kʼaayiloʼob le Reinooʼ.

 Kaʼatúul kiikoʼob kimen u yíichamoʼobeʼ binoʼob u yuʼuboʼob junpʼéel junta beetaʼab teʼ kaaj utiaʼal u yáantaʼaloʼoboʼ. Chéen baʼaleʼ teʼeloʼ káaj u yúuchul tʼaan tiʼ políticaiʼ, ka tu tsʼáajoʼob cuenta maʼ letiʼe gobierno túuxt le áantaj ku yaʼalaʼal u tsʼaʼabaloʼ. Le kiikoʼob túunoʼ tu chʼaʼtukloʼob maʼ ten u beetoʼob le baʼax ku kʼáataʼaltiʼoboʼ. Le máakoʼoboʼ káaj u yaʼalikoʼob baʼal le ka tu yiloʼob táan u lukʼul le kiikoʼoboʼ, hasta tu yaʼaloʼobtiʼob: «Bik wal taakeʼex a kʼáateʼextoʼon áantaj kéen kʼaʼabéetchajakteʼexeʼ». Chéen baʼaleʼ kaʼapʼéel semana úuchuk lelaʼ tiʼ le kiikoʼoboʼ kʼuch le áantaj tu túuxtaj u kaajal Jéeobaoʼ, hasta kʼuch antes tiʼ le áantaj tu yaʼalaj le máakoʼob ken u tsʼáaʼob teʼ kaajoʼ.

 Le áantaj tsʼaʼab tu luʼumil Zimbabueoʼ tu beetaj u yúuchul tʼaan maʼalob tiʼ Jéeoba. Koʼoneʼex ilik baʼax úuch tiʼ kiik Prisca, letiʼeʼ kajaʼan tiʼ junpʼéel chan kaaj. Kex minaʼan yaʼab baʼal u jaantoʼob tu yoʼolal le yáaxkʼiin ku beetkoʼ, Priscaeʼ ku jóokʼol predicar miércoles yéetel viernes, kex tsʼoʼok u kʼuchul u tiempoil u meyajtaʼal le luʼumoʼ. U yéet kaajaloʼobeʼ ku burlarkubaʼob tiʼ yéetel tu yaʼaloʼobtiʼ: «¡Chéen táan a perdertik a tiempo ikil a máan predicar, yaan a beetik u kíimil a familia yéetel wiʼij!». Pero letiʼeʼ tu núukajtiʼob: «Jéeobaeʼ mix juntéen u xúumpʼat le máaxoʼob meyajtikoʼ». Maʼ sen úuch tiʼ leloʼ tiʼ Priscaeʼ kʼuch le áantaj tu túuxtaj u kaajal Jéeobaoʼ. U vecinoʼobeʼ jach jaʼakʼ u yóoloʼob ka tu yiloʼob tsʼoʼok u kʼuchul le áantaj tiʼ Priscaoʼ, ka tu yaʼaloʼobtiʼ: «A Dioseʼ mix juntéen u pʼatech, k-kʼáat ka a tsikbalttoʼon tu yoʼolal». Bejlaʼeʼ siete u túulal tiʼ u vecinoʼobeʼ ku yuʼubikoʼob tiʼ radio le reunión ku beetaʼaloʼ.

 Mientras táan u maas náatsʼal u kʼiinil le xuʼulsajiloʼ yaʼab baʼaloʼob xan ken k-muʼyajte (Mateo 24:3, 7). K-tsʼáaikteʼex u graciasil tu yoʼolal a wutsileʼex, bey xan tu yoʼolal le jejeláas donaciónoʼob ka túuxtikeʼex teʼ donate.pr418.com. Jach yaʼab bix u meyaj utiaʼal u yáantaʼal le sukuʼunoʼob maas jach kʼaʼabéettiʼoboʼ.