U testigoʼob Jéeobaeʼ ku kaʼanskoʼob u Tʼaan Dios yéetel ku yáantkoʼob máak tiʼ maas tiʼ 200 luʼumiloʼob. Baʼaleʼ chéen 35 u najiloʼob Betel ku béeytal u boʼotkoʼob le xuupoʼob ku yantaltiʼoboʼ. ¿Bix túun u beetik le uláakʼ lugaroʼob tuʼux maʼ yaʼab donaciónoʼob ku tsʼaʼabaloʼ?

 Le Cuerpo Gobernante tiʼ u testigoʼob Jéeobaoʼ letiʼ nuʼuktik tuláakal le meyaj ku beetaʼal utiaʼal u tsʼaʼabal le kaʼansaj kʼaʼabéet tiʼ le sukuʼunoʼob yanoʼob tiʼ tuláakal yóokʼol kaaboʼ. Letiʼobeʼ jach ku kanáantkoʼob le bix u xuʼupul le donaciónoʼoboʼ. Wa junpʼéel u Najil Betel ku kʼamik yaʼab donaciónoʼobeʼ, le taakʼin ku sobraroʼ ku túuxtaʼal tiʼ uláakʼ u najiloʼob Betel maas kʼaʼabéet tiʼoboʼ. Lelaʼ bey u beetaʼaloʼ tumen bey xan tu beetil le cristianoʼob teʼ yáax siglooʼ. Letiʼobeʼ tu yáantoʼob le sukuʼunoʼob maas óotsiloʼoboʼ le oʼolal tiʼ tuláakal yanchaj le baʼaxoʼob kʼaʼabéetchajtiʼoboʼ (2 Corintios 8:14).

 ¿Bix u yuʼubikuba le sukuʼunoʼob kéen áantaʼakoʼoboʼ? Tu lu’umil Tanzaniaeʼ u maas yaʼabil le máaxoʼob kajaʼanoʼoboʼ jach óotsiloʼob, menos tiʼ kaʼapʼéel dolar yaantiʼob sáamsamal utiaʼal u manikoʼob le baʼaxoʼob kʼaʼabéettiʼoboʼ. Le oʼolal u Najil Beteleʼ tu túuxtaj taakʼin tiʼ u múuchʼulil Mafinga utiaʼal ka u yutskíintoʼob le tuʼux ku muchʼkubaʼoboʼ. Le sukuʼunoʼoboʼ tu yaʼaloʼob: «Desde ka utskíintaʼab le tuʼux k-muchʼikbaoʼ tsʼoʼok u yaʼabtal le máaxoʼob ku taal u muchʼubaʼob t-éeteloʼ. Jach k-tsʼáaik gracias tiʼ u kaajal Jéeoba bey xan tiʼ tuláakal le sukuʼunoʼob ku tsʼáaik u donaciónoʼoboʼ. Bejlaʼeʼ yaantoʼon junpʼéel jatsʼuts lugar utiaʼal k-adorartik Jéeoba».

 Tu yoʼolal le coronavirusoʼ jujuntúul sukuʼunoʼob kajaʼanoʼob Sri Lankaeʼ pʼáat maʼ jach yaan baʼal u jaantoʼobiʼ. Bey úuchik tiʼ Imara Fernando yéetel Enosh, u hijooʼ. Letiʼobeʼ béeychaj u yáantaʼaloʼob yoʼolal le donaciónoʼob ku tsʼaʼabal tumen le sukuʼunoʼob yanoʼob tuláakʼ luʼumiloʼoboʼ. Ka máan kʼiineʼ tu beetoʼob junpʼéel chan tarjeta tuʼux ku yaʼalikoʼob: «Jach k-tsʼáaik gracias tiʼ le sukuʼunoʼob ikil u yeʼesik u nojoch yaabilajoʼob tiʼ toʼon maases teʼ kʼiinoʼob jach talam yaniloʼonaʼ. Jach kiʼimak k-óol k-antal ichil le máaxoʼob meyajtik Jéeobaoʼ, yaan u seguer k-kʼáatik tiʼ Jéeoba ka u tsʼáa tuláakal baʼax kʼaʼabéet tiʼ le sukuʼunoʼob kuxaʼanoʼob teʼ tu tsʼook kʼiinoʼobaʼ».

 Kex jeʼel tuʼuxak kajaʼanoʼobeʼ le sukuʼunoʼoboʼ uts tu tʼaan u yáantkoʼob u maasil yéetel le baʼaxoʼob yaantiʼoboʼ. Tuukulnakoʼon tiʼ Enosh, letiʼeʼ tu beetaj junpʼéel chan cajita utiaʼal u tsʼáaik u donación. Le taakʼin ku juntarkoʼ ku meyajtiʼ utiaʼal u yáantik le máaxoʼob jach kʼaʼabéettiʼoboʼ. Guadalupe Álvarez, kajaʼan Méxicoeʼ, jach uts tu tʼaan xan u yáantik u maasil. Teʼ tuʼux kajaʼanoʼ maʼ yaʼab meyaj yaniʼ yéetel junpʼíit u boʼotaʼal, kex beyoʼ letiʼeʼ ku tsʼáaik u donación. Guadalupeeʼ ku yaʼalik : «Jach kin tsʼáaik gracias tiʼ Jéeoba yoʼolal bix u yeʼesikten u yutsil yéetel u yaabilaj. In wojel de ke le donación kin tsʼáaikoʼ, bey xan le ku tsʼaʼabal tumen u maasiloʼ, jach yaan u meyaj utiaʼal u yáantaʼal le máaxoʼob maʼ jach yaantiʼoboʼ».

 Tuláakal u najiloʼob Betel jach uts tu tʼaan u yáantajoʼob. Anthony Carvalho, táakaʼan ichil le Comité de Sucursal yaan tu Betelil Brasiloʼ, ku yaʼalik: «Xáanchaj táan k-áantaʼal tumen uláakʼ u najiloʼob Betel. Bey úuchik u béeytal tuláakal le meyaj ku beetaʼal teʼ luʼumilaʼ. Bejlaʼeʼ tsʼoʼok u yaʼabtal le donaciónoʼob k-kʼamkoʼ le oʼolal táan xan k-áantik uláakʼ u najiloʼob Betel. Le sukuʼunoʼoboʼ u yojloʼob kʼaʼabéet u tsikbaltaʼal u Tʼaan Dios tiʼ tuláakal yóokʼol kaab jeʼex tu yaʼalil Jesúsoʼ, letiʼobeʼ jach uts tu tʼaan u yáantajoʼob yéetel le nojoch meyaj táan u beetaʼalaʼ».

 ¿Bix jeʼel u yáantaʼal le máaxoʼob meyajtik Jéeoba maʼ jach yaantiʼoboʼ? Maas maʼalob ka u túuxt u donaciónoʼob tu Najil Betel teʼ luʼumil tuʼux kajaʼanoʼoboʼ, maʼ a túuxtikeʼex donaciónoʼob tiʼ u najiloʼob Betel yanoʼob yaanal luʼumiloʼ. Wa ku páajtaleʼ maas maʼalob ka u síiʼob wa bajux teʼ chan caja tuʼux ku muchʼkubaʼoboʼ wa ka u túuxtoʼob donate.pr418.com. Jach k-tsʼáaikteʼex u graciasil yoʼolal le donaciónoʼob ka tsʼáaikeʼexoʼ.