Le asamblea regional 2020, yáax u grabartaʼal utiaʼal ka u chaʼant le sukuʼunoʼob yanoʼob tiʼ tuláakal yóokʼol kaaboʼ. Ka tsʼoʼok u grabartaʼaleʼ naʼaksaʼab Internet utiaʼal u chaʼantaʼal. Chéen baʼaleʼ u maas yaʼabil le sukuʼunoʼob yanoʼob Malaui yéetel Mozambiqueoʼ béeychaj u disfrutarkoʼob le asamblea kex minaʼantiʼob Internetoʼ. ¿Bix úuchik u béeytal?

 Le Comité tiʼ Coordinadores yéetel le Comité tiʼ Enseñanza tiʼ le Cuerpo Gobernanteoʼ tu yaʼaloʼob jeʼel u páajtal u máansaʼal le asamblea regional tiʼ radio yéetel tiʼ televisión tu luʼumil Malaui yéetel Mozambiqueoʼ. ¿Baʼaxten bey beetaʼabikoʼ? Tumen u luʼumil Malauieʼ tiaʼan ichil junpʼéel tiʼ le kaajoʼob jach koʼoj u cobrartaʼal le Internetoʼ, le oʼolal chéen tiʼ junpʼíit u testigoʼob Jéeoba ku páajtal u meyajtiʼob. William Chumbi, juntúul tiʼ le sukuʼunoʼob táakaʼanoʼob ichil le Comité yaan tu Sucursalil Malauioʼ tu yaʼalaj: «Utiaʼal u béeytal u disfrutarkoʼob le asamblea le sukuʼunoʼoboʼ máansaʼabtiʼob tiʼ radio yéetel tiʼ televisión, chéen bey jeʼel u béeytal u yantal u asambleaʼoboʼ». Luka Sibeko, uláakʼ juntúul sukuʼun táakaʼan ichil le Comité yaan Malauioʼ tu yaʼalaj: «Wa maʼ u máansaʼal tiʼ radio yéetel tiʼ televisión le asambleaoʼ, bejlaʼa chéen junpʼíit sukuʼunoʼob kun yantal u asambleaʼobeʼ». U maas yaʼabil xan le sukuʼunoʼob yanoʼob Mozambiqueoʼ maʼ tu páajtal u manikoʼob junpʼéel celular wa junpʼéel tablet utiaʼal u meyajtiʼob, mix u boʼotkoʼob Internet.

 Yoʼolal u pandemiail le coronavirusoʼ yanchaj u contratartaʼal difusoraʼob tiʼ radio yéetel canaloʼob tiʼ televisión utiaʼal u máansaʼal le muchʼtáambaloʼob ku beetaʼal cada semanaoʼ. a Chéen baʼaleʼ utiaʼal u máansaʼal le asamblea regionaloʼ le sukuʼunoʼoboʼ tu kʼáatoʼob ka tsʼaʼabaktiʼob u maasil horaʼob.

 Tu luʼumil Malauieʼ le máaxoʼob ilik le programaʼob ku máansaʼal tiʼ radio yéetel tiʼ televisiónoʼ u suukileʼ chéen ku tsʼáaikoʼob junpʼéel hora utiaʼal u máansaʼal wa baʼax, tumen beyoʼ maʼ tu náakal u yóol le máaxoʼob uʼuyik wa chaʼantikoʼ. Chéen baʼaleʼ le sukuʼunoʼoboʼ tu tsoloʼobeʼ le baʼax taak u máanskoʼoboʼ jach jeʼel u yáantik yaʼab máakoʼobeʼ. Tu yaʼaloʼob xaneʼ kex tiaʼanoʼon tiʼ junpʼéel pandemiaeʼ k-áantik le máakoʼob u kanoʼob le jatsʼuts baʼaloʼob ku kaʼansik le Bibliaoʼ. Lelaʼ jeʼel u yáantaj utiaʼal u maʼalobtal u kuxtaloʼobeʼ wa u yantal kiʼimak óolal ichil u familiaʼob. Le ka tu yuʼuboʼob baʼax aʼalaʼabtiʼobeʼ le máakoʼoboʼ tu yaʼaloʼob jeʼel u tsʼáaikoʼob u maasil horaʼob tiʼ le sukuʼunoʼoboʼ.

 Tu luʼumil Malauieʼ le asambleaoʼ máansaʼab tiʼ junpʼéel difusora tiʼ radio yéetel tiʼ junpʼéel u canalil televisión. U señalil le radio yéetel le televisiónoʼ ku kʼuchul tiʼ u millonesil máakoʼob kajaʼanoʼob teʼ luʼumiloʼ. Tu luʼumil Mozambiqueeʼ contratartaʼab 85 difusoraʼob tiʼ radio yéetel junpʼéel u canalil televisión utiaʼal u máansaʼal le asambleaoʼ.

 Utiaʼal u máansaʼal le asamblea tu canalil le televisiónoʼoboʼ xuʼup 28,227 dólares b yéetel kex 20,000 dólares utiaʼal u máansaʼal teʼ difusoraʼob tiʼ radioʼoboʼ. Le asamblea máansaʼab tiʼ radiooʼ yaan tuʼuxeʼ boʼotaʼab 15 dólares yéetel uláakʼoʼobeʼ 2.777 dólares, según tak tuʼux ku náakal u señalil le difusoraoʼ.

 Le sukuʼunoʼoboʼ jach tu kanaj u usartoʼob le donaciónoʼoboʼ. Tu luʼumil Malauieʼ le difusoraʼoboʼ tu luʼsoʼob u 30% tiʼ le suuk u cobrarkoʼoboʼ. Yoʼolal le baʼax tu beetoʼoboʼ le sukuʼunoʼoboʼ tu ahorrartoʼob 1,711 dólares. Tu luʼumil Mozambique xaneʼ éemsaʼab u tojol le bajux ku cobrartaʼaloʼ chéen tumen kʼaj óolaʼan le sukuʼunoʼoboʼ, ojéelaʼan maʼatech u yookoloʼob yéetel puntual u boʼoloʼob.

 Le sukuʼunoʼoboʼ tu tsʼáajoʼob u diosboʼotikil úuchik u béeytal u chaʼantikoʼob yéetel u yuʼubikoʼob le asambleaoʼ. Patrick, juntúul máax ku beetik u ancianoil tu múuchʼulil Malauieʼ tu yaʼalaj: «K-tsʼáaik u graciasil tiʼ le Cuerpo Gobernante úuchik u tuukul t-oʼolaloʼ tumen kex tiaʼanoʼon tiʼ junpʼéel pandemiaeʼ béeychaj k-disfrutartik le asambleaoʼ». Isaak, uláakʼ juntúul sukuʼun kajaʼan Malauieʼ tu yaʼalaj: «Toʼoneʼ minaʼantoʼon mix baʼal kaʼach utiaʼal k-chaʼantik le asambleaoʼ le oʼolal k-tsʼáaik u diosboʼotikil úuchik u máansaʼal tiʼ radio. Jach kiʼimak k-óol tumen u kaajal Jéeobaeʼ yaʼab baʼaxoʼob tu beetaj utiaʼal ka k-disfrutart le asambleaoʼ. Yoʼolal le baʼax tu beetoʼoboʼ tuláakal in familia béeychaj u yuʼubikoʼob le asambleaoʼ, chíikaʼan jach u yaabiltmoʼon Jéeoba».

 Juntúul publicador kajaʼan Mozambique yéetel yáax u chaʼantik le asambleaoʼ tu yaʼalaj: «In chaʼantik le asamblea regionaloʼ tu yeʼesajten mix baʼal imposible tiʼ Jéeoba. Mix junpʼéel pandemia beet maʼ u yantaltoʼon le asambleaoʼ. Toʼoneʼ desde t-otoch t-chaʼantaj. Tin wilaj bukaʼaj u yaabiltmiluba le sukuʼunoʼoboʼ yéetel in wojel tiaʼanen ichil u jaajil religióneʼ».

 Wyson, juntúul sukuʼun ku beetik u ancianoileʼ tu yaʼalaj: «In kʼáat in tsʼáa u graciasil tiʼ le esclavo chúukaʼan u yóoloʼ tumen tuukulnaj t-oʼolal yéetel yaʼab baʼax tu beetaj t-oʼolal tu kʼiiniloʼob le pandemiaaʼ. Le tuʼux kajaʼanoʼonoʼ jach yaan óotsilil le oʼolal maʼ yaʼab baʼax yaantoʼoniʼ pero jach t-disfrutartaj le asambleaoʼ yéetel yaʼab baʼax t-kaniʼ. Yaʼab tiʼ toʼoneʼ uʼuybil tu beetaj tiʼ radio yéetel uláakʼoʼobeʼ tu chaʼantoʼob tiʼ televisión».

 Le Comité tiʼ Coordinadores yéetel le Comité tiʼ Enseñanzaoʼ tu yaʼalaj xaneʼ yaan tuʼuxoʼobeʼ yaan u máansaʼal tiʼ radio yéetel tiʼ televisión le asamblea regional 2021. ¿Bix u boʼotaʼal tuláakal le xuupoʼob ku beetaʼaloʼ? Ku béeytal yoʼolal le jejeláas donaciónoʼob ka túuxtikeʼex teʼ donate.pr418.com. K-tsʼáaikteʼex u graciasil tu yoʼolal a wutsileʼex.