Jesúseʼ tu yaʼalaj tiʼ u discípuloʼob: «Yaan a tʼaaneʼex tin woʼolal [...] tak tu maas náachil le luʼumaʼ» (Hechos 1:8). U testigoʼob Jéeobaeʼ u tsʼaamaj u yóol u beetoʼob le baʼax tu yaʼalaj Jesúsoʼ. Kex beyoʼ yaan jujunpʼéel tuʼuxoʼobeʼ maʼ tsikbaltaʼak u tʼaan Dios tiʼ le máakoʼoboʼ, jeʼex teʼ kaajoʼob tuʼux jach yaʼab máakoʼob kajaʼanoʼoboʼ. Tsʼoʼoleʼ tiʼ jujunpʼéel luʼumiloʼobeʼ maʼ yaʼab u testigoʼob Jéeoba yaniʼ (Mateo 9:37, 38). ¿Baʼaxoʼob táan u beetaʼal tumen u kaajal Jéeoba utiaʼal u tsikbaltaʼal u tʼaan Dios tiʼ tuláakal máak?

 Utiaʼal u béeychajal le baʼax tu yaʼalaj Jesúsoʼ le Comité tiʼ Servicio ku nuʼuktaʼal tumen le Cuerpo Gobernante tiʼ u testigoʼob Jéeobaoʼ ku túuxtik misioneroʼob tuʼux maas kʼaʼabéet áantaj. Tak teʼ kʼiinoʼobaʼ 3,090 u túulal misioneroʼob táan u tsikbaltikoʼob u tʼaan Dios tiʼ tuláakal yóokʼol kaab. a U maas yaʼabil tiʼ le misioneroʼoboʼ tsʼoʼok u kaʼansaʼaltiʼob bix ken u beetil u meyajoʼob, yanoʼobeʼ tsʼoʼok u binoʼob teʼ Escuela utiaʼal Máaxoʼob Kʼaʼaytik le Reinooʼ. Le misioneroʼoboʼ tsʼoʼok tak u pʼatik u yotochoʼob utiaʼal ka xiʼikoʼob kajtal táanxel luʼumil. Letiʼobeʼ tsʼoʼok u jach kaanbaloʼob yéetel yaʼab baʼax u yojloʼob, le oʼolal jach ku yáantajoʼob utiaʼal ka tsikbaltaʼak u Reino Dios tiʼ uláakʼ máakoʼob. Tsʼoʼoleʼ tsʼoʼok xan u yáantkoʼob u maasil utiaʼal ka u tsʼáa u yóoloʼob u tsikbaltoʼob u tʼaan Dios.

 Tiʼ cada junpʼéel u najil Beteleʼ, le Departamento de Serviciooʼ ku múul meyaj yéetel le Comité tiʼ Sucursal utiaʼal u tsʼáaikoʼob baʼax kʼaʼabéet tiʼ le misioneroʼoboʼ. Ichil le Departamento de Serviciooʼ tiaʼan le Sección de Ministros en el Campo, letiʼobeʼ ku yáantajoʼob utiaʼal u kaxtaʼal tuʼux kun kajtal le misioneroʼoboʼ, u kanáantaʼal u toj óolaloʼob yéetel u tsʼaʼabal junpʼíit taakʼin tiʼob utiaʼal u manikoʼob le baʼax kʼaʼabéettiʼoboʼ. Ichil le año de servicio 2020, u testigoʼob Jéeobaeʼ tu xupoʼob óoliʼ 27 millones de dólares utiaʼal u yáantaʼal le misioneroʼoboʼ. Ikil u beetaʼal beyaʼ, le misioneroʼoboʼ ku béeytal u maas tsʼáaik u yóoloʼob u tsikbaltoʼob u tʼaan Dios yéetel ku béeytal u maas áantkoʼob le sukuʼunoʼob yanoʼob teʼ múuchʼuliloʼoboʼ.

 ¿Baʼax utsil ku taasik le meyaj ku beetkoʼoboʼ? Le sukuʼun Frank Madsen táakaʼan ichil le Comité tiʼ Sucursal yaan Malauioʼ ku yaʼalik: «Le misioneroʼoboʼ como noʼojaʼanoʼob utiaʼal u kaʼanskoʼob u tʼaan Dios yéetel maʼ saajkoʼob u tsikbaltoʼob tiʼ u maasil máakoʼobeʼ jach tsʼoʼok u yáantkoʼob le múuchʼuliloʼob utiaʼal u tsikbaltikoʼob u tʼaan Dios tak teʼ lugaroʼob maʼ fácil u kʼuchul máakoʼ. Tsʼoʼok tak u kʼuchloʼob teʼ mejen kaajoʼob tuʼux maʼ tu chaʼabal u yokol chéen jeʼel máaxakoʼ yéetel jelaʼan le idioma ku tʼankoʼoboʼ. Letiʼobeʼ tsʼoʼok u kankoʼob kuxtal jeʼex u máakiloʼob le kaajoʼoboʼ yéetel tsʼoʼok xan u kankoʼob le idioma ku tʼanik le máakoʼoboʼ. Le baʼax ku beetkoʼobaʼ ku yáantik u maasil utiaʼal ka u beetoʼob xan beyoʼ. Tsʼoʼoleʼ yaʼab táankelmoʼob yéetel x-lóoʼbayanoʼobeʼ tsʼoʼok xan u chʼaʼtuklikoʼob u meyajtikoʼob Jéeoba jeʼex u beetik le misioneroʼoboʼ. Jach k-tsʼáaik gracias tiʼ Jéeoba yoʼolal le meyaj ku beetik le misioneroʼoboʼ».

 Juntúul sukuʼun táakaʼan tiʼ junpʼéel Comité tiʼ Sucursal tiʼ yaanal luʼumileʼ ku yaʼalik: «Le bix u kuxtal le misioneroʼoboʼ ku yeʼesik jach jatsʼuts bix u biskuba yéetel bix u múul meyaj u testigoʼob Jéeoba yanoʼob tiʼ tuláakal yóokʼol kaaboʼ. Tak le máaxoʼob maʼ Testigoʼoboʼ ku tsʼáaikoʼob cuenta tiʼ leloʼ. Le baʼax k-kanik teʼ Bibliaoʼ ku yáantaj utiaʼal k-múul meyaj bey junpʼéel nojoch familiaeʼ».

 Le misioneroʼoboʼ, ¿bix u yáantkoʼob le sukuʼunoʼob yanoʼob tu múuchʼuliloʼoboʼ? Paulo, kajaʼan Timor Orientaleʼ, ku sen tsʼáaik u graciasil yoʼolal le meyaj ku beetik le misioneroʼob yanoʼob tu múuchʼuliloʼ. Letiʼeʼ ku yaʼalik: «Teʼ tuʼux kajaʼanoʼonaʼ jach ku sen beetik ooxol, kex beyoʼ le misioneroʼoboʼ maʼ tu yaʼalik u suutoʼob tu luʼumoʼob. Letiʼobeʼ mantatsʼ ku kʼuchloʼob xan utiaʼal u muchʼtáambalil le kʼaʼaytajoʼ, yéetel kex jach ooxoleʼ yaan kʼiineʼ ku chukik tak medio día láayliʼ táan u beetik u revisitaʼobeʼ. Tsʼoʼoleʼ tak de tarde xaneʼ ku kaʼa jóokʼloʼob kʼaʼaytaj. Tsʼoʼok u yáantkoʼob yaʼab máakoʼob u meyajtoʼob Dios, ichiloʼobeʼ teen. Le misioneroʼoboʼ jach ku xupkubaʼob u meyajtoʼob Jéeoba, le baʼax ku beetkoʼobaʼ ku péeksik u maasil utiaʼal ka u meyajtoʼob Jéeoba yéetel u jaajil u yóoloʼob».

 Ketti, juntúul precursora regular kajaʼan Malauieʼ, ku tsikbaltik bix áantaʼabik u familia tumen juntúul misionero yéetel u yatan. Letiʼeʼ ku yaʼalik: «Le ka kʼuchoʼob teʼ múuchʼuliloʼ chéen teen Testigoen ichil in familia, letiʼobeʼ jach tu yáantenoʼob yéetel jach tu bisubaʼob xan yéetel tuláakal in familia. Yoʼolal bix u kuxtaloʼobeʼ in paalaloʼobeʼ tu tsʼáajoʼob cuentaeʼ jach ku taasik kiʼimak óolal u meyajtaʼal Jéeoba. Ka máan kʼiineʼ tu yóoxtúulal in hijaʼobeʼ tu beetaj u precursora regulariloʼob, in wíichameʼ tsʼoʼok xan u káajal u bin teʼ muchʼtáambaloʼoboʼ».

 ¿Tuʼux ku chʼaʼabal le taakʼin ku meyaj utiaʼal u yáantaʼal le misioneroʼoboʼ? Ku chʼaʼabal tiʼ le donaciónoʼob ku tsʼáaik u testigoʼob Jéeoba utiaʼal u tsʼaʼabal kʼaj óoltbil u tʼaan Dios tiʼ tuláakal yóokʼol kaaboʼ bey xan le ku tsʼaʼabal teʼ donate.pr418.com. K-tsʼáaikteʼex u diosboʼotikil ikil a weʼeskeʼex a wutsileʼex.