Cada mes k-tsʼíiboltik k-chaʼantik le jatsʼuts videoʼob ku naʼaksaʼal JW Broadcastingo’. Chéen baʼaleʼ yaʼab tiʼ le sukuʼunoʼob yanoʼob Áfricaoʼ maʼ tu páajtal u chaʼantikoʼob le programa tiʼ Internetoʼ. ¿Baʼaxten?

 Teʼ Áfricaoʼ yaʼab tuʼux minaʼan Internet, tsʼoʼoleʼ wa yaneʼ jach koʼoj yéetel maʼ jach maʼalob u señaliliʼ. Juntéenjeakeʼ juntúul superintendente tiʼ circuito yaan Madagascareʼ bin tiʼ junpʼéel ciber utiaʼal u yéemsik junpʼéel u programail JW Broadcasting, letiʼeʼ yanchaj u boʼotik 16 dólaroʼob yoʼolal le Internet meyajnajtiʼoʼ. a Le bajux tu boʼotoʼ maas yaʼab tiʼ le ku náajaltik le máakoʼob ichil junpʼéel semanaoʼ.

 Kex teʼ África maʼ tuláakal máak jeʼel u páajtal u yantal Internet tiʼeʼ, u millonesil máakoʼob teʼ kʼiinoʼobaʼ jeʼel u páajtal u chaʼantikoʼob cada mes u programail JW Broadcastingoʼ. ¿Bix túun u beetkoʼob?

 Desde tu añoil 2017, le máaxoʼob kajaʼanoʼob tu noojolil Áfricaoʼ jeʼel u páajtal u chaʼantikoʼob JW Broadcasting tiʼ junpʼéel u canalil televisióneʼ. Le canalaʼ gratis yéetel jeʼel u béeytal u chaʼantaʼal tiʼ jeʼel baʼalak hora bul semanaeʼ, tsʼoʼoleʼ ku béeytal xan u chaʼantaʼal ich 16 idiomaʼob.

 Utiaʼal u béeytal u chaʼantaʼaleʼ u kaajal Jéeobaeʼ ku rentartik junpʼéel u canalil televisión, beyoʼ yéetel u señalil junpʼéel satéliteeʼ ku béeytal u tsʼáaikoʼob le videoʼoboʼ. U señalil le satéliteoʼ ku kʼuchul tiʼ 35 luʼumiloʼob yaan tu noojolil África. U tojol u rentaileʼ 12,000 dólaroʼob cada mes. Yaan kʼiin xaneʼ wa yaan u chaʼantaʼal junpʼéel programa en vivoeʼ ku kʼaʼabéettal u boʼotaʼal uláakʼ junpʼéel canal. Beyoʼ u milesil máakoʼobeʼ jeʼel u páajtal u chaʼantikoʼob le asamblea regionaloʼ bey xan le discursoʼob ku máansaʼal tumen le máax xíimbaltik le sucursaloʼ.

 Yaʼab máakoʼob jeʼel u béeytal u chaʼantikoʼob tu televisiónoʼob le canaloʼ, kex maʼ Testigoʼobiʼ. Chéen baʼaleʼ yaʼab tiʼ u testigoʼob Jéeobaeʼ maʼ tu páajtal u manikoʼob le baʼaxoʼob kʼaʼabéet utiaʼal u chaʼantikoʼob le canaloʼ. Utiaʼal túun u béeytal u chaʼanoʼobeʼ tsʼoʼok u instalartaʼal 3,670 antenaʼob ku kóolikoʼob le señaloʼ. Beyoʼ le sukuʼunoʼoboʼ jeʼel u páajtal u chaʼantikoʼob u programail JW Broadcasting teʼ tuʼuxoʼob ku muchʼkubaʼob adoraroʼ. Jujunpʼéel tuʼux ku muchʼkubaʼobeʼ como yaan televisión wa proyectoreʼ chéen ku túuxtaʼal le antenaoʼ, lelaʼ jeʼel u tojoltik kex 70 dólaroʼobeʼ, táakaʼan tak u bisaʼaliʼ. Baʼaleʼ yaan tuʼuxoʼobeʼ ku kʼaʼabéettal u túuxtaʼal tuláakal le baʼax kʼaʼabéetoʼ, lelaʼ jeʼel u tojoltik kex 530 dólaroʼobeʼ.

 Le sukuʼunoʼoboʼ jach kiʼimak u yóoloʼob yoʼolal le canalaʼ. Juntúul anciano yaan Camerúneʼ tu yaʼalaj: «Utiaʼal in familiaeʼ lelaʼ bey jeʼex le maná tu tsʼáaj Jéeoba teʼ desiertooʼ». Odebode, juntúul sukuʼun kajaʼan Nigeriaeʼ, tu yaʼalaj: «Teen yéetel in familiaeʼ k-muchʼikba óoxtéen ichil le semana utiaʼal k-chaʼantik le videoʼob ku máansaʼal teʼ canaloʼ. In paalaloʼobeʼ jach ku tsʼíiboltkoʼob u kʼuchul u kʼiinil k-chaʼan, yaan kʼiineʼ hasta letiʼob kʼáatik». Kiik Rose, kajaʼan xan Nigeriaeʼ, tu yaʼalaj: «¡Jach kiʼimak in wóol! Kaʼacheʼ jach uts tin wich in chaʼantik u canalil le noticiaʼoboʼ, pero beoraeʼ maas uts tin wich in chaʼantik le canal JW. Le kéen in chaʼant kaʼach le noticiaʼoboʼ jach ku beetik in pʼuʼujul, ku naʼakal in presión yéetel kin sen chiʼichnaktal, pero maʼ bey u yúuchulten le kéen in chaʼant le canal JW. Le baʼaxoʼob kin chaʼantik teʼ canalaʼ jach ku kiʼimakkúuntik in wóol yéetel ku beetik in wuʼuyikinba tranquilaen. Letiʼe canal maas uts tin wichoʼ, junpʼéel u siibal Jéeoba».

 Juntúul superintendente tiʼ circuito yaan Mozambiqueeʼ ku yaʼalikeʼ tu circuitoeʼ yaʼab tiʼ le najoʼob tuʼux ku muchʼkuba le sukuʼunoʼob adoraroʼ tsʼoʼok u tsʼaʼabal le nuʼukuloʼob kʼaʼabéet utiaʼal u chaʼantaʼal le canal JW. Le sukuʼunoʼoboʼ uts tu tʼaan u kʼuchloʼob junpʼéel hora antes wa maas tiʼ utiaʼal u chaʼantikoʼob JW Broadcasting antes u káajal le reuniónoʼ.

 Le ka beetaʼab le asamblea internacional Johannnesburgo Sudáfrica tu añoil 2019, le canaloʼ meyajnaj utiaʼal u máansaʼal tiʼ nueve lugaroʼob le discursoʼob máansaʼab tumen juntúul tiʼ le sukuʼunoʼob yaan ichil le Cuerpo Gobernanteoʼ. Sphumalele, juntúul máax ku meyaj tu Departamentoil Broadcasting yaan tu sucursalil Sudáfricaeʼ, ku yaʼalik: «Kaʼacheʼ ku meyajtoʼon Internet utiaʼal u yilaʼal le discursoʼoboʼ, pero utiaʼal u chaʼantaʼal tubeeleʼ kʼaʼabéet maʼalob le señaloʼ yéetel k-manik datos. Chéen baʼaleʼ desde ka anchaj le canal tiʼ televisiónoʼ maas barato yéetel maas maʼalob le señaloʼ».

 Jach k-tsʼáaikteʼex u diosboʼotikil yoʼolal le donaciónoʼob ka síikeʼexoʼ, lelaʼ ku meyaj utiaʼal u béeytal u chaʼantaʼal JW Broadcasting tumen le sukuʼunoʼob yanoʼob Áfricaoʼ. Diosboʼotik yoʼolal le donaciónoʼob ka túuxtikeʼex teʼ donate.pr418.com.