Tu káajbal u mesil marzo tiʼ 2022, naʼaksaʼab jw.org le anuncioaʼ: «Kiʼimak k-óol k-aʼalikteʼexeʼ le Cuerpo Gobernanteoʼ tsʼoʼok u yaʼalikeʼ wa maʼ tu yaʼalaʼal uláakʼ baʼal tumen le autoridadoʼoboʼ tuláakal le múuchʼuliloʼoboʼ jeʼel u páajtal u káajal u muchʼkubaʼob teʼ salónoʼob desde 1 tiʼ abrileʼ». Jach táaj kiʼimakchaj u yóol tuláakal u testigoʼob Jéeoba yéetel le noticiaaʼ. Pero como láayliʼ táan le pandemiaoʼ a kʼaʼabéetchaj u beetaʼal jejeláas baʼaloʼob utiaʼal maʼ u contagiar mix máak. ¿Bix túun kun séeb listokíintbil le salónoʼob wa tsʼoʼok maas tiʼ dos años maʼatech u meyajtoʼonoʼ?

 U jaajileʼ le sukuʼunoʼoboʼ tsʼokaʼaniliʼ u káajal u prepararkoʼob tuláakal le baʼaxoʼob kun kʼaʼabéettal le kéen kaʼa suunakoʼon teʼ salónoʼoboʼ.

 Chéen u mes káajak le pandemia tu añoil 2020, le Departamento tiʼ Diseño yéetel Construcción yaan Warwick (Nueva Yorkoʼ), káaj u yilkoʼob bix kun afectarbil le salónoʼob tumen le pandemiaoʼ yéetel káaj u yilkoʼob xan baʼaxoʼob kun kʼaʼabéettal le kéen u kaʼa muchʼuba le sukuʼunoʼoboʼ. Cada luʼumileʼ jejeláas baʼax kʼaʼabéetchaj u beetkoʼob.

 Matthew De Sanctis, ku meyaj teʼ Departamento Local tiʼ Diseño yéetel Construcciónoʼ ku yaʼalik: «Yaan luʼumiloʼobeʼ difícil u yantal le baʼaxoʼob kʼaʼabéet utiaʼal u pʼoʼik u kʼab le sukuʼunoʼoboʼ, le oʼolal wa minaʼan jaʼ teʼ salónoʼoboʼ ku kaxtaʼal tuʼux u chʼaʼabal wa ku maʼanal. Tiʼ jujunpʼéel luʼumiloʼob xaneʼ le gobiernoʼoboʼ tu yaʼaloʼobeʼ utiaʼal u kanáantik u toj óolal máakeʼ maas maʼalob maʼ u meyaj aire acondicionado yéetel tu yaʼaloʼob xan ka tsʼaʼabak letreroʼob utiaʼal u yojéeltik máak baʼax unaj u beetik».

 ¿Baʼax túun tu beetaj le sukuʼunoʼoboʼ? Mattheweʼ ku seguer u yaʼalik: «Tiʼ yaʼab salónoʼobeʼ kaxtaʼab u formail u kanáantaʼal le sukuʼunoʼob sin ke u jach talamtal mix u sen tojoltik tiʼoboʼ». Jeʼex teʼ Papúa Nueva Guineaoʼ le sukuʼunoʼoboʼ tu kaxtoʼob junpʼéel nuʼukul ku bisik 20 litros jaʼ yéetel tu conectartoʼob junpʼéel llave tiʼ utiaʼal u pʼoʼik u kʼab le sukuʼunoʼoboʼ. Teʼ lugaroʼob tuʼux maʼ jach yaan taakʼin tiʼ le sukuʼunoʼoboʼ maases chéen 40 dólares xuʼup utiaʼal u listokíintaʼal le salónoʼoboʼ. Tsʼoʼoleʼ tiʼ junpʼéel empresa yaan Asiaeʼ maʼan maas tiʼ 6,000 u pʼéelal nuʼukuloʼob utiaʼal u pʼoʼobol kʼab yéetel túuxtaʼaboʼob teʼ salónoʼob yanoʼob Áfricaoʼ.

 Yaan tuʼuxoʼobeʼ tsʼaʼab túumben ventiladoroʼobiʼ yéetel yanoʼobeʼ chéen utskíintaʼaboʼob. Tiʼ uláakʼ salónoʼob xaneʼ adaptartaʼab nuʼukuloʼob utiaʼal u aprovechartaʼal le iikʼoʼ. Uláakʼ tuʼuxoʼob xaneʼ maʼan u yook le micrófonoʼob utiaʼal maʼ u maʼachal tumen le sukuʼunoʼob ken comentarnakoʼoboʼ, maʼan xan nuʼukuloʼob utiaʼal u desinfectartaʼal le tuʼuxoʼob ku maʼachal láalaj horaoʼ, jeʼex le joonajoʼ wa le tuʼux ku pʼoʼik u kʼab máakoʼ. Tiʼ jujunpʼéel múuchʼuliloʼobeʼ tsʼaʼab xan u sensoril u llaveil le lavaboʼoboʼ. Tu luʼumil Chileeʼ tu tojoltaj kex 1,400 dólares u listokíintaʼal cada junpʼéel tiʼ le salónoʼoboʼ.

 Kex jach kʼaʼabéet u yilaʼal ka listochajak le salónoʼoboʼ le sukuʼunoʼoboʼ tu kanáantoʼob xan bix u xupikoʼob le donaciónoʼoboʼ. Tiʼ jujunpʼéel luʼumiloʼobeʼ le sukuʼunoʼoboʼ maʼ kʼaʼabéetchaj u boʼotkoʼob u impuestoil le lavaboʼob mix u yook le micrófonoʼob tu máanoʼoboʼ. Tsʼoʼoleʼ jujunpʼéel sucursaloʼobeʼ tu muchʼubaʼob utiaʼal u múul manikoʼob junpuul tuláakal le baʼaxoʼob kʼaʼabéetchajoʼ, úuchik u beetaʼal beyoʼ maʼ xuʼup yaʼab taakʼiniʼ. Le sucursaloʼob yéetel le Departamento tiʼ Comprasoʼ tratarnajoʼob directo yéetel le máaxoʼob beetik le nuʼukuloʼoboʼ, úuchik u beetkoʼob xan beyoʼ áantajnajoʼob utiaʼal maʼ sen xuʼupul yaʼab taakʼin yéetel ka séeb kʼuʼubuk le nuʼukuloʼoboʼ.

 Le baʼaxoʼob beetaʼab utiaʼal u kanáantaʼal le sukuʼunoʼoboʼ tsʼoʼok u yáantaj utiaʼal maʼ u sajaktal mix u chiʼichnaktaloʼob ken xiʼikoʼob teʼ salónoʼoboʼ. Dulcine, juntúul kiik kajaʼan Perúeʼ ku yaʼalikeʼ chan sajakchaj le ka tu yuʼubaj yaan k-kaʼa suut teʼ salónoʼ. Letiʼeʼ ku yaʼalik: «Tu tsʼáajten COVID-19 le jach káajal ku beetik le pandemiaoʼ le oʼolal ka tin wuʼuyaj yaan k-kaʼa muchʼikba teʼ salónoʼ jach nerviosachajen, pero le ka ookeneʼ tin wileʼ le ancianoʼoboʼ u listokíintmoʼob tuláakal utiaʼal maʼ k-jáan contagiar, yaan gel utiaʼal k-desinfectartik k-kʼab yéetel tsʼaʼan xan u yook le micrófonoʼoboʼ. Tsʼoʼoleʼ aʼalaʼab xaneʼ yaan u desinfectartaʼal le salónoʼob antes yéetel le kéen tsʼoʼokok le muchʼtáambaloʼoboʼ, le baʼaxoʼob beetaʼab utiaʼal k-kanáantaʼaloʼ tu yáanten utiaʼal maʼ in sajaktal». b

 Yaanal xan bix tu yuʼubiluba le kiik Sara kajaʼan Zambiaoʼ, letiʼeʼ ku yaʼalik: «In wíichameʼ kíim yoʼolal COVID-19, le oʼolal kin sen máansik tin tuukul kaʼach bix ken in wuʼuyilinba le kéen kaʼa xiʼiken teʼ salónoʼ». ¿Bix u yuʼubikuba beoraaʼ? Letiʼeʼ ku yaʼalik: «Le kéen xiʼiken teʼ muchʼtáambaloʼoboʼ kin wuʼuyik jach bix u kanáantken Jéeoba teʼ tu tsʼook kʼiinoʼobaʼ, kin wuʼuyik xan bix u yaabiltmilen le ancianoʼob yéetel u maasil sukuʼunoʼoboʼ».

 Le sukuʼunoʼob tiʼ tuláakal yóokʼol kaaboʼ jach kiʼimak u yóoloʼob úuchik u kaʼa suutoʼob teʼ salónoʼ. Jach k-tsʼáaikteʼex u diosboʼotikil yoʼolal a donacióneʼex, yaʼab tiʼ le donaciónoʼobaʼ ku túuxtaʼal teʼ donate.pr418.com. Tu yoʼolal le donaciónoʼoboʼ béeychaj u maʼanal le baʼaxoʼob kʼaʼabéetchaj utiaʼal u kanáantaʼal le sukuʼunoʼoboʼ.