Toʼon u testigoʼon Jéeobaeʼ jach k-preocupartikba yoʼolal k-sukuʼunoʼob (1 Pedro 2:17). K-uʼuyikba jeʼex Tannis, juntúul kiik kajaʼan Kenia. Letiʼeʼ ku yaʼalik: «Jach ku kiʼimaktal in wóol kéen in wojéelt bix yanil le sukuʼunoʼob tiʼ tuláakal yóokʼol kaaboʼ». Pero ¿bix k-ojéeltik bix yanil le sukuʼunoʼob tiʼ tuláakal yóokʼol kaaboʼ? Yoʼolal le baʼaxoʼob ku publicartaʼal teʼ jaats «Noticiaʼob» yaan teʼ sitio jw.org, lelaʼ káaj u jóoʼsaʼal tu añoil 2013.

 Le noticiaʼobaʼ ku tsolkoʼob bix u bin le meyajoʼob ku beetaʼal tiʼ construcciónoʼ, bix u yáantaʼal le sukuʼunoʼob tuʼux ku yúuchul nukuch loobiloʼoboʼ yéetel ku yaʼalaʼal xan táan u jóoʼsaʼal bibliaʼob ichil uláakʼ idiomaʼob. Ku tsʼaʼabal ojéeltbil xan yoʼolal le sukuʼunoʼob kʼalaʼanoʼoboʼ, ku páajtal xan k-xokik le jatsʼuts experienciaʼob ku yantal tiʼ le sukuʼunoʼob le táan le campañaʼoboʼ bey xan tu temporadail le Kʼaʼajsajiloʼ. Pero ¿bix u beetaʼal le noticiaʼobaʼ? ¿Máax yéeyik baʼax noticiail kun publicarbil? ¿Máaxoʼob investigartik?

 Le Oficina de Información Pública yaan teʼ Central Mundialoʼ letiʼ yéeyik le noticiaʼob kun publicarbil teʼ sitiooʼ. Le departamentoaʼ ku nuʼuktaʼal tumen le Comité de Coordinadores tiʼ le Cuerpo Gobernanteoʼ yéetel ku yáantaj maas tiʼ 100 sukuʼunoʼobiʼ, yanoʼobeʼ desde tu yotochoʼob. Letiʼob tsʼíibtik le noticiaoʼ, letiʼob investigartik, ku traducirkoʼob yéetel ku diseñarkoʼob bix kun chíikpajal teʼ sitiooʼ. Yaan hora xaneʼ ku kʼaʼabéetchajal u kʼáatkoʼob wa baʼax tiʼ le autoridadoʼoboʼ, tiʼ le noticieroʼoboʼ wa tiʼ le profesoroʼob ku kaʼansajoʼob teʼ universidadoʼoboʼ. Tsʼoʼoleʼ ku yáantaʼaloʼob tumen le maas tiʼ 80 departamentoʼob tiʼ Información Pública yaan tiʼ le jejeláas sucursaloʼob tiʼ tuláakal yóokʼol kaaboʼ.

 Utiaʼal u jóoʼskoʼob junpʼéel noticiaeʼ ku kʼaʼabéettal u múul meyajoʼob, kéen u yiloʼob jeʼel u páajtal u publicartaʼal junpʼéel historiaeʼ ku investigarkoʼob tubeel. Utiaʼal leloʼ ku kʼaʼabéettal u beetkoʼob entrevistaʼob wa u tʼaanoʼob yéetel máax u yojel le baʼax úuchoʼ. Kéen tsʼoʼokok u láaj investigarkoʼobeʼ ku tsʼíibtikoʼob yéetel ku yilkoʼob ka pʼáatak maʼalobil, ku yéeyikoʼob le foto kun tsʼaabiloʼ yéetel ku túuxtikoʼob tiʼ le Comité de Coordinadores utiaʼal ka aprobartaʼakoʼ.

 ¿Bix u yuʼubikuba le sukuʼunoʼob kéen u xokoʼob le noticiaʼoboʼ? Cheryl, juntúul kiik kajaʼan Filipinaseʼ ku yaʼalik: «Antes in káajsik in meyajeʼ uts tin tʼaan in xokik le noticiaʼob ku publicartaʼal teʼ sitiooʼ. Jach ku kiʼimaktal in wóol in wojéeltik baʼax ku yúuchul ichil u kaajal Jéeoba yéetel bix yanik le sukuʼunoʼoboʼ».

 Yaʼabeʼ jach ku líikʼil u yóol kéen u xok le noticiaʼob ku publicartaʼal teʼ sitiooʼ ke le ku máansaʼal teʼ noticieroʼoboʼ. Tatiana, kajaʼan Kazajistáneʼ ku yaʼalik: «Uts tin wich in xokik le noticiaʼob ku publicartaʼal teʼ sitiooʼ tumen in wojel jach jaaj tuláakal le baʼax ku yaʼalaʼaloʼ». Alma, juntúul kiik kajaʼan Méxicoeʼ ku yaʼalik: «Le baʼaxoʼob ku yaʼalaʼal teʼ noticieroʼoboʼ maʼatech u líiʼsik u yóol máak, pero le baʼaxoʼob ku publicartaʼal teʼ sitiooʼ jach ku líiʼsik in wóol».

 Le noticiaʼob yaan teʼ sitiooʼ ku yáantkoʼon k-ojéelt baʼax ku yúuchul yéetel jach ku muʼukʼaʼankúuntik k-fe. Bernard, kajaʼan Keniaeʼ ku yaʼalik: «Le noticiaʼoboʼ tsʼoʼok u yáantken in wileʼ kex jeʼel tuʼuxak kajaʼan le sukuʼunoʼoboʼ parteʼob tiʼ in familia. Le oʼolaleʼ le kéen orarnakeneʼ kin chʼaʼchiʼitik u kʼaabaʼob yéetel kin kʼáatik ka áantaʼakoʼob». Bybron, juntúul kiik kajaʼan Keniaeʼ ku yaʼalik: «Jach ku kiʼimaktal in wóol kéen in xok tsʼoʼok u jóoʼsaʼal junpʼéel túumben Biblia, leloʼ ku yeʼesikten Jéeobaeʼ jach u yaabiltmaj tuláakal máak».

 Le noticiaʼob ku jóoʼsaʼal yoʼolal le sukuʼunoʼob kʼalaʼanoʼob cárceloʼ jach jeʼel u líiʼskoʼob k-óoleʼ. Jackline, juntúul kiik kajaʼan Keniaeʼ ku yaʼalik: «Kéen in wil maʼ sajak le sukuʼunoʼob kʼalaʼanoʼoboʼ jach ku muʼukʼaʼantal in fe. Kéen in xok u historiaʼobeʼ kin wilik baʼax áantkoʼob u aguantartoʼob baʼax ku beetaʼaltiʼob. Tsʼoʼok in wilkeʼ le baʼax áantkoʼoboʼ letiʼe u oraroʼoboʼ, u xokikoʼob le Bibliaoʼ yéetel u kʼaayoʼob».

 Beatriz, juntúul kiik kajaʼan Costa Ricaeʼ ku tsʼáaik u graciasil yoʼolal le noticiaʼob ku tʼaanoʼob yoʼolal bix u yáantaʼal le sukuʼunoʼob tuʼux ku yúuchul junpʼéel nojoch loobiloʼ. Letiʼeʼ ku yaʼalik: «Tsʼoʼok in wilkeʼ le áantaj ku túuxtik u kaajal Jéeobaoʼ jach séebaʼan u kʼuchul tiʼ le sukuʼunoʼoboʼ, tsʼoʼoleʼ ku beetkoʼob tumen u yaabiltmoʼob le sukuʼunoʼoboʼ. Leloʼ ku yáantken in wileʼ Jéeoba nuʼuktik u kaajal».

 Jach k-tsʼáaik u graciasil yoʼolal le jaats «Noticiaʼob» yaan teʼ sitiooʼ tumen ku yáantkoʼon k-ojéelt bix yanik le sukuʼunoʼob tiʼ tuláakal yóokʼol kaaboʼ. Tuláakal lelaʼ ku béeytal yoʼolal le donaciónoʼob ka túuxtikeʼex teʼ donate.pr418.com. Jach k-tsʼáaikteʼex u gracias yoʼolal a wutsileʼex.