U testigoʼob Jéeobaeʼ maas tiʼ 130 años káajak u muchʼkubaʼob tiʼ nukuch asambleaʼob. Teʼ kʼiinoʼobaʼ teʼ asambleaʼoboʼ ku máansaʼal maas tiʼ 40 discursoʼobiʼ, ku yuʼubaʼal xan paaxiʼ, ku chaʼantaʼal videoʼob yéetel ku beetaʼal entrevistaʼob. Pero utiaʼal u jóoʼsaʼal u yutsil yéetel u líiʼsaʼal u yóol le máaxoʼob kun uʼuyikoʼ unaj u yilaʼal yéetel u yuʼubaʼal tubeel (Lucas 2:20). ¿Bix jeʼel u meyajtoʼon le donaciónoʼob utiaʼal u jóoʼsaʼal u yutsil le asambleaʼob ku beetaʼaloʼ?

 Tiʼ le luʼumiloʼob yaan chikʼinoʼ le lugaroʼob ku majáantaʼal utiaʼal u beetaʼal le asambleaʼoboʼ instalartaʼan le equipo kʼaʼabéet utiaʼal u chaʼantaʼal yéetel u yuʼubaʼal le asambleaʼoboʼ. Pero ¿baʼaxten yaan kʼiineʼ u kaajal Jéeobaeʼ ku túuxtik yaanal equipo de sonido? Juntúul sukuʼun ku kʼaabaʼtik David, ku meyaj tu Departamentoil Broadcasting teʼ sede mundialoʼ, ku yaʼalik: «U maas yaʼabil le lugaroʼob k-majáantik utiaʼal u beetaʼal le asambleaʼoboʼ le equipo de sonido yaantiʼoʼ maʼ beetaʼan utiaʼal u meyaj maas tiʼ seis horasiʼ mix utiaʼal u chaʼantaʼal tubeel le videoʼoboʼ bey xan u yuʼubaʼal le discursoʼoboʼ».

 Cada lugareʼ jelaʼan bix beetaʼanik, le oʼolal unaj u tsʼaʼabal le equipo de audio yéetel video kun kʼaʼabéettaloʼ. Le kéen yéeyaʼak tuʼux kun beetbil le asambleaʼoboʼ le Departamento tiʼ Broadcastingoʼ ku yilik bix kun yantal le auditoriooʼ yéetel kex jaytúul máaxoʼob kun biniʼ. Le sukuʼunoʼob xanoʼ ku yilkoʼob tuʼux kun instalarbil le bocinaʼob yéetel le pantallaʼoboʼ. Utiaʼal leloʼ ku beetkoʼob junpʼéel mapa ku yeʼesik bix kun conectarbil yéetel ku beetkoʼob junpʼéel lista tiʼ tuláakal le baʼaxoʼob kun meyajoʼ, beyoʼ le sukuʼunoʼoboʼ jach yaan u disfrutarkoʼob le asambleaoʼ.

 Le equipo de sonidooʼ maases ku kʼaʼabéettal teʼ asambleaʼob ku beetaʼal ich jejeláas idiomaʼoboʼ. Wa yaan u interpretartaʼal le discursoʼob tiʼ yaanal idiomaoʼ kʼaʼabéet xan u equipo le máax kun interpretaroʼ. Tsʼoʼoleʼ yaan xan u máansaʼal tiʼ radio utiaʼal u yuʼubik le máaxoʼob tʼanik le idiomaoʼ. Como jach maʼalob le programaʼob ku usartik u kaajal Jéeobaoʼ kex ka u muchʼuba sukuʼunoʼob ku tʼankoʼob ocho idiomaʼobeʼ ku béeytal u láaj naʼatkoʼob le asambleaoʼ. Davideʼ ku yaʼalik: «Le programaʼobaʼ jach kʼaʼabéetoʼob, le oʼolal unaj u capacitartaʼal le máaxoʼob manejartikoʼ».

 U Najiloʼob Beteleʼ ku tsʼáaikoʼob le equipo de audio yéetel video ku kʼaʼabéettal tiʼ cada asambleaoʼ. Wa ku túuxtaʼal le equipooʼ le sukuʼunoʼoboʼ ku yilkoʼob ka kʼuchuk tuláakal le baʼax kun meyaj tiʼ cada asamblea ku beetaʼaloʼ. Chéen u Najil Betel yaan Estados Unidosoʼ cada añoeʼ ku xupik maas tiʼ $200,000 dólares a ikil u túuxtaʼal le equipoʼob tiʼ cada asambleaoʼ. U beetaʼal lelaʼ ku yáantaj utiaʼal maʼ u maʼanal láalaj hora le equipo ku kʼaʼabéettaloʼ, yéetel ku yáantaj xan utiaʼal u kanáantaʼal le equipo de audio yéetel videooʼ. Steveneʼ tu supervisartaj le equipo de sonido meyajnaj tiʼ junpʼéel asamblea tu luʼumil Canadáoʼ, letiʼeʼ ku yaʼalik: «Le sukuʼunoʼob áantajnajoʼoboʼ tu yiloʼob maʼ u saʼatal mix junpʼéel pieza tiʼ le baʼaloʼob túuxtaʼaboʼoboʼ. Beyoʼ kéen kʼuchuk tiʼ uláakʼ lugareʼ listo utiaʼal instalarbil».

 Jach koʼoj u rentartaʼal junpʼéel equipo de audio yéetel video, tsʼoʼoleʼ u maas yaʼabileʼ jach bajo u calidad yéetel maʼatech u tsʼaʼabal mantenimiento tiʼ, le oʼolal k-manik le equipo de sonido kun kʼaʼabéettaltoʼonoʼ. Bejlaʼeʼ u tojol junpʼéel pantalla LED de 5 metros u kaʼanlil yéetel 3 metros u kóochileʼ ku tojoltik kex 24,000 dólares, 15 metros u cableil le micrófonooʼ kex 20 dólares xan u tojol. U departamentoil Broadcastingeʼ ku meyaj yéetel u Departamentoil Compras utiaʼal ka u yiloʼob bukaʼaj ken u tojolt tuláakal le baʼax taak u maʼanloʼ (Lucas 14:28). Por ejemploeʼ antes u maanoʼobeʼ ku yilkoʼob lelaʼ: ¿Jaytúul ken u jóoʼs u yutsiliʼ? ¿Jach wa tu jaajil kʼaʼabéet u maʼanal junpʼéel túumben equipo? ¿Yaan wa junpʼéel maʼalob lugar tuʼux u taʼakaʼal le equipooʼ? ¿Yaan wa suficiente voluntarioʼob utiaʼal u yáantajoʼob kéen kʼaʼabéetchajak u armartaʼal le equipo de audio yéetel videooʼ?

 Utiaʼal xan u kanáantaʼal yéetel utiaʼal u meyaj tubeel le equipo de audio yéetel videooʼ k-ilik u yutskíintaʼal le baʼaxoʼob kʼaʼabéettiʼoʼ. Kéen k-túuxt xan le equipo tuʼux kun beetbil le asambleaʼoboʼ k-tsʼáaik tiʼ cajaʼob wa nuʼukuloʼob chichtak utiaʼal maʼ u yúuchul loob tiʼ, tsʼoʼoleʼ wa ku kʼóolol le cajaʼob wa ku yúuchul uláakʼ baʼal tiʼeʼ k-utskíintik.

 Le máaxoʼob maʼ Testigoʼoboʼ ku impresionaroʼob le kéen u yiloʼob de calidad le videoʼob ku chaʼantaʼal teʼ asambleaʼoboʼ. Tiʼ junpʼéel asambleaeʼ juntúul locutor ku meyaj tiʼ junpʼéel radio jach kʼaj óolaʼaneʼ tu yaʼaleʼ jach maʼalob u calidadil le videoʼob ku chaʼantaʼaloʼ. Jonatan, máax suuk u instalartik le equipo de audio yéetel videooʼ, tu yaʼalaj: «[Le locutoroʼ] sorprendernaj xan ka tu yojéelteʼ le máaxoʼob beetik le meyajoʼ chéen voluntarioʼob, maʼ máakoʼob xooknajaʼanoʼobiʼ». Tu yaʼalaj xaneʼ le empresa tuʼux ku meyajoʼ jeʼel u bisiktiʼ cinco días u beetik tuláakal le instalación kʼaʼabéetoʼ, mientras toʼoneʼ chéen día y medio k-beetik. Tiʼ uláakʼ asambleaeʼ u gerenteil le lugar tuʼux beetaʼaboʼ, tu yaʼalaj: «Yaʼab tiʼ le máaxoʼob jach u yojloʼob tiʼ audio yéetel videooʼ tsʼoʼok u taaloʼob wayeʼ, pero mix juntéen u beetoʼob junpʼéel maʼalob meyaj jeʼex le ka beetkeʼex teʼexoʼ. Chíikaʼan jach a wojel a beeteʼex tubeel a meyajeʼex».

 ¿Baʼax utsil tsʼoʼok u yantaltech ikil u yantal maʼalob equipo de sonido teʼ asambleaoʼ? Maʼ xaaneʼ ka wuʼuyikaba jeʼex David kajaʼan Inglaterraeʼ. Letiʼeʼ tu yaʼalaj: «Yaanten 88 años, óoliʼ tiʼ tuláakal in kuxtal tsʼoʼok in bin tiʼ asambleaʼob, pero bejlaʼeʼ maas kin concentrarkinba yoʼolal le videoʼob ku tsʼaʼabaloʼ. Tsʼoʼoleʼ séeb in naʼatik tuláakal le baʼax ku kaʼansaʼaloʼ». Michell, kajaʼan Nigeriaeʼ, ku yaʼalik xan: «Como claro u chaʼantaʼal yéetel u yuʼubaʼal le videoʼob ku tsʼaʼabaloʼ le sukuʼunoʼoboʼ maʼatech u náayal u yóoloʼob yéetel ku disfrutarkoʼob tuláakal le asambleaoʼ».

 Teʼ añoaʼ le kéen xiʼikech teʼ asamblea «¡Tsʼáaʼex ojéeltbil le maʼalob noticiaʼoboʼ!», ilawil a tuukul tiʼ tuláakal le meyaj anchaj u beetaʼal utiaʼal u disfrutartaʼal le videoʼob yéetel le discursoʼob ku máansaʼaloʼ. K-tsʼáaikteʼex u graciasil yoʼolal le donaciónoʼob ka tsʼáaikeʼexoʼ, bey xan le ku tsʼaʼabal tiʼ donate.pr418.com, tumen tsʼoʼok u yáantaj utiaʼal u disfrutartaʼal le asambleaʼoboʼ.