Tu kaajiloʼob Latinoaméricaeʼ u cientosil u millonesil máakoʼob yaniʼ, yaʼabeʼ kajaʼan tiʼ mejen kajtaliloʼob, yaan u idiomaʼob yéetel yaʼab baʼaxoʼob suukaʼan u beetkoʼob. Yaʼab tiʼ k-sukuʼunoʼobeʼ tiʼ kajaʼanoʼob teʼ mejen kajtaliloʼobaʼ. Utiaʼal u yáantaʼal le máakoʼob kajaʼanoʼob Latinoamérica u kʼaj óoltoʼob le baʼax ku kaʼansik le Bibliaoʼ u testigoʼob Jéeobaeʼ tsʼoʼok u traducirkoʼob yéetel tsʼoʼok u tʼoxkoʼob publicaciónoʼob ich maas tiʼ 130 idiomaʼob. a Yaʼab sukuʼunoʼobeʼ kiʼimak u yóoloʼob yoʼolal bix u kuxtaloʼob, pero yaʼabeʼ tsʼoʼok u aktáantik chʼaʼpachtajil ikil u meyajtik Jéeoba yéetel tumen maʼ tu táakpajal tiʼ le baʼaxoʼob suukaʼan u beetaʼal ku bin tu contra le baʼax ku yaʼalik le Bibliaoʼ. ¿Bix tsʼoʼok u meyajtoʼon le donaciónoʼob utiaʼal k-áantkoʼoboʼ?

 Tiʼ junpʼéel chan kaaj yaan tu montañailoʼob Jalisco México tuʼux ku tʼaʼanal huicholeʼ, le sukuʼunoʼoboʼ yéetel tsiikil tu yaʼaloʼob maʼ tun táakpajloʼob tiʼ le baʼaxoʼob suukaʼan u beetaʼal ku bin tu contra le baʼax ku yaʼalik le Bibliaoʼ. b Lelaʼ tu beetaj u jach pʼuʼujul jujuntúul tiʼ u yéet kaajaloʼob, le oʼolal tu kʼiinil 4 tiʼ diciembre tiʼ 2017, junpʼéel grupo máakoʼobeʼ tu tsʼáajubaʼob tu contra jujuntúul Testigoʼob bey xan tu contra le máakoʼob u muchʼmubaʼob tu yéeteloʼoboʼ. Le máakoʼobaʼ como jach pʼujaʼanoʼobeʼ tu jóoʼsoʼob le Testigoʼob teʼ chan kaajoʼ, tu kʼaskúuntoʼob tuláakal le baʼaxoʼob yaantiʼoboʼ yéetel tu yaʼaloʼob yaan u kíimskoʼob jeʼel máaxak ka u yóot suuteʼ.

 Le Testigoʼob yanoʼob tiʼ uláakʼ kaajoʼob yaan naatsʼ tiʼ u kaajal le sukuʼunoʼoboʼ tu tsʼáajoʼob tuláakal le baʼax kʼaʼabéettiʼoboʼ. Chéen baʼaleʼ, ¿baʼax jeʼel u páajtal u beetaʼal utiaʼal ka suunakoʼob tu yotochoʼobeʼ? Juntúul sukuʼun ku kʼaabaʼtik Agustíneʼ tu yaʼalaj: «Minaʼantoʼon taakʼin utiaʼal k-boʼotik juntúul abogado yéetel maʼ k-ojel baʼax autoridadil jeʼel u páajtal u yáantkoʼoneʼ».

 Le ka ilaʼab táan u prohibirtaʼal tiʼ le sukuʼunoʼob u adorarkoʼob Diosoʼ, u sucursalil Centroaméricaeʼ tu séebaʼanil tu yilaj bix jeʼel u yáantkoʼobeʼ. Yáaxeʼ tu kʼáatoʼob tiʼ le autoridadoʼob yanoʼob teʼ chan kaaj ka u investigartoʼob le baʼaxoʼob úuchoʼ. Le Comité tiʼ Coordinadores tiʼ le Cuerpo Gobernante tiʼ u testigoʼob Jéeobaoʼ tu yaʼalaj ka múul meyajnak u sucursalil Centroamérica yéetel le Departamento tiʼ Asuntos Legales yaan tu Betelil Estados Unidosoʼ yéetel ka u denunciartoʼob le baʼax beetaʼab tiʼ le sukuʼunoʼobaʼ. Ka máan kʼiineʼ le baʼax úuchaʼ kʼuch tu táan le Suprema Corte de Justicia de la Naciónoʼ, lelaʼ letiʼe tribunal maas yaan u páajtalil tu luʼumil Méxicooʼ.

 U jaats abogadoʼob kajaʼanoʼob tiʼ jejeláas luʼumileʼ tu preparartoʼob le baʼax ken u yaʼaloʼoboʼ. Tu tsoloʼobeʼ ku páaʼtaʼal ka respetartaʼak tumen tuláakal máak le baʼax suukaʼan u beetaʼaloʼ, le oʼolal ku páaʼtaʼal xan ka respetartaʼak le derecho yaan tiʼ le sukuʼunoʼoboʼ. Tiʼ jeʼel baʼalak luʼumileʼ unaj u respetartaʼal u derechos máak.

 Tu kʼiinil 8 tiʼ julio tiʼ 2020, le abogadoʼob yanoʼob teʼ Suprema Corte de Justiciaoʼ tu tsʼáajubaʼob tu favor u testigoʼob Jéeoba yéetel tu yaʼaloʼob ka chaʼabak u suut le sukuʼunoʼob tu kaajaloʼoboʼ. Agustín, le máax tsʼoʼok k-yáax chʼaʼchiʼitikeʼ, tu yaʼalaj: «Tuláakloʼon jach kiʼimakchaj k-óol yéetel jach k-tsʼáaik u diosboʼotikil tiʼ le sukuʼunoʼob yoʼolal tuláakal le baʼax tsʼoʼok u beetkoʼob t-oʼolaloʼ. Maʼ k-ojel kaʼach baʼax kun úuchultoʼon wa maʼ u yáantkoʼonoʼobiʼ».

 Óoliʼ bey úuchik xan tiʼ le sukuʼunoʼob yanoʼob San Juan de Ilumán tu luʼumil Ecuador, junpʼéel chan kaaj yaan tu táax luʼumil Otavalo. Teʼeloʼ yaʼab mejen kajtaliloʼob yaniʼ. Tu añoil 2014 le ka tsʼoʼok u jóoʼsaʼal le permisoʼob kʼaʼabéetoʼ káaj u beetkoʼob junpʼéel naj utiaʼal u adorarkoʼob Dios, chéen baʼaleʼ juntúul sacerdoteeʼ tu beetaj u líikʼil kex 100 máakoʼob tu contra le sukuʼunoʼoboʼ yéetel tu jeʼelsoʼob le meyajoʼ. Tsʼoʼoleʼ le máakoʼob kajaʼanoʼob teʼeloʼ tu yaʼaloʼob tiʼ u testigoʼob Jéeoba ka xuʼuluk u muchʼkubaʼob u adorartoʼob Dios.

 Le departamento tiʼ Asuntos Legales yaan tu sucursalil Ecuador bey xan le yaan tu Betelil Estados Unidosoʼ múuchʼ meyajnajoʼob utiaʼal u defenderkoʼob le derecho yaan tiʼ le sukuʼunoʼob utiaʼal u muchʼkubaʼob u adorartoʼob Diosoʼ. Kaxtaʼab xan u yáantaj le tribunaloʼoboʼ le oʼolal le máakoʼoboʼ tu pʼatoʼob tranquiloil le sukuʼunoʼoboʼ. Tsʼoʼoleʼ tu chaʼajoʼob u kaʼa muchʼkubaʼob u adorartoʼob Dios bey xan u tsʼoʼoksik u beetkoʼob le naj tuʼux ken u muchʼubaʼoboʼ. Utiaʼal u seguer u respetartaʼal u derecho le sukuʼunoʼoboʼ, le abogadoʼob áantkoʼoboʼ tu kʼáatoʼob tiʼ le tribunaloʼob wa unaj u beetaʼal lelaʼ: «¿Le máaxoʼob kajaʼanoʼob teʼ mejen kaajoʼoboʼ unaj wa u respetarkoʼob le derechos yaan tiʼ tuláakal máakoʼ?».

 Tu kʼiinil 16 julio tiʼ 2020, beetaʼab le juicio tumen le Corte Constitucionaloʼ, lelaʼ letiʼe tribunal maas nojoch yaan tu luʼumil Ecuadoroʼ. Le máaxoʼob áant le múuchʼuliloʼ sukuʼunoʼob ku meyajoʼob bey abogadoʼob tu luʼumil Ecuadoreʼ. Áantaʼaboʼob xan tumen uláakʼ cuatro sukuʼunoʼob abogadoʼob, letiʼobeʼ jach u yojloʼob bix ken u yáantiloʼob u maasil kex tiʼ kajaʼanoʼob tiʼ yaanal luʼumileʼ. Baʼaleʼ tumen maʼ tu chaʼabal u muchʼkubaʼob tu yoʼolal le coronavirusoʼ le reuniónaʼ beetaʼab tiʼ videoconferencia yéetel tu conectartuba máakoʼob tiʼ jejeláas luʼumiloʼob. Le tribunaloʼ yáax u chaʼik tiʼ u testigoʼob Jéeoba ka u defendertoʼob tiʼ videoconferencia le derecho yaantiʼob utiaʼal u adorarkoʼob Diosoʼ. c Le abogadoʼob defendert le sukuʼunoʼoboʼ tu yaʼaloʼobeʼ kex chéen tiʼ junpʼéel chan kaaj kajaʼan máakeʼ láayliʼ unaj respetartaʼal u derechoseʼ.

 Le sukuʼunoʼob yanoʼob tu táax luʼumil Otavalooʼ chéen táan u páaʼtkoʼob baʼax ken u yaʼal le Corte Constitucionaloʼ yéetel jach ku tsʼáaikoʼob u diosboʼotikil yoʼolal le áantaj tsʼaʼabtiʼoboʼ. César, juntúul máax ku meyaj bey anciano tu múuchʼulil Ilumán Quichuaeʼ, tu yaʼalaj: «Chéen tiʼ Jéeoba jeʼel u meyaj u kaajal utiaʼal u yáantkoʼoneʼ, tumen kex chéen junpʼíitoʼoneʼ jach yaʼab bix úuchik k-áantaʼal».

 Le abogadoʼob áant le sukuʼunoʼobaʼ u testigoʼob Jéeoba, letiʼobeʼ yéetel kiʼimak óolal tu tsʼáajoʼob le áantajoʼ tsʼoʼoleʼ maʼ tu cobrartoʼobiʼ. Tu bisaj tiempo u prepararkubaʼob utiaʼal u defenderkoʼob u derechos le sukuʼunoʼob tu táan le tribunaloʼoboʼ, tsʼoʼoleʼ yaʼab taakʼin xuʼupi. Tuláakal le sukuʼunoʼob táakpajoʼob utiaʼal u yáantaʼal le sukuʼunoʼob way Méxicoaʼ tu bisajtiʼob 380 horas u líiʼskubaʼob yéetel uláakʼ 240 horas utiaʼal u traducirkoʼob le documentoʼob meyajnajtiʼoboʼ. Utiaʼal u defendertaʼal xan le sukuʼunoʼob yanoʼob Ecuadoroʼ kʼaʼabéetchaj u yáantaj kex 40 abogadoʼob kajaʼanoʼob tiʼ jejeláas luʼumiloʼob yéetel u cientosil horaʼob tu bisajtiʼob tuláakal le meyaj tu beetoʼoboʼ. ¿Tuʼux chʼaʼab u taakʼinil u boʼotaʼal le xuupoʼob beetaʼaboʼ? Chʼaʼab tiʼ le donaciónoʼob ka túuxtikeʼex teʼ donate.pr418.com. K-tsʼáaikteʼex u diosboʼotikil ikil a weʼeskeʼex a wutsileʼex.