Durante le año de servicio 2021, a le coronavirusoʼ tu sen beetaj u sufrir yaʼab máak. Jeʼex tsoʼolik teʼ xook «Ku yáantaʼal u testigoʼob Jéeoba tu kʼiiniloʼob le pandemiaoʼ», tsʼoʼok u xuʼupul u millonesil dólares b yoʼolal le kʼojaʼanilaʼ yéetel tsʼoʼok u formartaʼal maas tiʼ 950 Comitéʼob tiʼ Socorro.

 Tu kʼiiniloʼob le pandemiaoʼ yanchaj xan uláakʼ nukuch loobiloʼob, tsʼoʼoleʼ como líikʼ le máakoʼob tu contra le gobiernooʼ tu beetoʼob u sen muʼyaj yaʼab máak. Tuláakal le baʼax úuchaʼ tu afectartaj xan le sukuʼunoʼoboʼ. Tu añoil 2021, anchaj maas tiʼ 200 nukuch loobiloʼob le oʼolaleʼ le Comité tiʼ Coordinadores tiʼ le Cuerpo Gobernanteoʼ tu yaʼalaj ka meyajnak 8 millones de dólares utiaʼal u yáantaʼal le sukuʼunoʼoboʼ. Koʼox ilik bix áantaʼabik le sukuʼunoʼoboʼ.

 Tu kʼiinil 22 tiʼ mayo tiʼ 2021, le volcán Nyiragongo yaan República Democrática del Congooʼ káaj u wáakʼal . Le kʼáakʼ ku pulkoʼ tu kʼaskúuntaj najoʼob, escuelaʼob yéetel tu kʼaskúuntaj le jaʼ yaan teʼ cisterna ku meyaj tiʼ le máakoʼoboʼ. U kaajil Gomaeʼ sen afectartaʼab xan yoʼolal le taʼan ku sen pulik le volcánoʼ, tsʼoʼoleʼ teʼ kʼiinoʼob xanoʼ tu sen tíituba le luʼumoʼ. Maas tiʼ táanchumuk tiʼ le kaajoʼ bisaʼaboʼob yaanal tuʼux. Tsʼoʼoleʼ u milesil máakoʼobeʼ púutsʼoʼob, yanoʼobeʼ hasta kʼuchoʼob tak Ruanda.

 Ichil le máaxoʼob bisaʼaboʼoboʼ yaan maas tiʼ 5,000 sukuʼunoʼobiʼ. Yanoʼobeʼ eel u yotochoʼob yoʼolal le volcánoʼ, uláakʼoʼob xaneʼ como mix máak yaneʼ oklaʼab tuláakal u nuʼukuloʼob. Le Comité tiʼ Socorro yaan Ruandaoʼ múul meyajnaj yéetel le Comité tiʼ Socorro yaan República Democrática del Congooʼ utiaʼal u yáantaʼal le sukuʼunoʼoboʼ. U sucursalil Congoeʼ ku tsikbaltik baʼax tu beetaj junpʼéel tiʼ le comitéʼoboʼ: «Antes u yaʼalaʼal yaan u bisaʼal yaanal tuʼux le máakoʼoboʼ le comitéoʼ tsʼokaʼaniliʼ u bisik janal, jaʼ, teepʼ yéetel nookʼ. Jach kʼaas bix pʼáatik le kaajoʼ yéetel táan u muʼyaj le máakoʼoboʼ». Tiʼ junpʼéel kaaj tuʼux bin maas tiʼ 2000 sukuʼunoʼobeʼ le Comité tiʼ Socorrooʼ tu beetaj najoʼob de nookʼ, tʼoʼoxtiʼob cubrebocas yéetel tsoʼoltiʼob baʼax unaj u beetkoʼob utiaʼal maʼ u tsaʼayaltiʼob coronavirus yéetel cólera.

 Chéen ich tres meseseʼ le sukuʼunoʼoboʼ tu tʼoxoʼob maas tiʼ 6 toneladas arroz, 6 toneladas harina, maas tiʼ 8,000 litros aceite yéetel maas tiʼ 8,000 u litrosil jaʼ. Utiaʼal u ahorrartaʼal taakʼineʼ le comitéoʼ teʼ kaaj tu manaj le baʼax tʼoʼox tiʼ le sukuʼunoʼoboʼ.

 Juntúul kiikeʼ ku yaʼalik: «Jach yaj baʼax úuchtoʼon». Le volcánoʼ tu kʼaskúuntaj u yotoch le kiikaʼ. Pero letiʼ yéetel u láakʼtsiloʼobeʼ líiʼsaʼab u yóoloʼob yéetel le Bibliaoʼ yéetel tsʼaʼabtiʼob le baʼax kʼaʼabéettiʼoboʼ. Letiʼeʼ ku yaʼalik: «Gracias tiʼ Jéeobaeʼ yaantoʼon baʼax kʼaʼabéettoʼon, tsʼoʼok k-ilik bix u yáantkoʼon teʼ kʼiinoʼob táan k-muʼyajoʼ».

 Tsʼoʼok u máan yaʼab años táan u yilaʼal óotsilil Venezuela, ku pʼáatal minaʼan baʼal jaantbil yéetel ku sen oklaʼal máak. Yoʼolal lelaʼ jach yaj bix u kuxtal le sukuʼunoʼob kajaʼanoʼob teʼeloʼ, chéen baʼaleʼ tsʼoʼok u yáantaʼaloʼob tumen u kaajal Jéeoba.

 Teʼ año de servicio 2021, xuʼup maas tiʼ junpʼéel millón y medio dólares utiaʼal u maʼanal janal yéetel jabón utiaʼal u bisaʼal tiʼ le familiaʼob maas óotsiloʼoboʼ. Le sucursal yaan Venezuelaoʼ ku yaʼalik: «Cada meseʼ ku tʼoʼoxol 130 toneladas janal teʼ Venezuelaoʼ, pero u jaajileʼ maʼ fácil u bisaʼal tiʼ le sukuʼunoʼoboʼ. Le oʼolal ku bisaʼaltiʼob chéen le janal maʼ tu séeb kʼastaloʼ». Ku yaʼalik xan: «Le baʼaloʼob k-manikoʼ k-manik por sacosil yéetel k-ilik k-manik teʼ kʼiinoʼob barato u koʼonoloʼ. Tsʼoʼoleʼ k-ilik bix jeʼel u bisaʼal tiʼ le sukuʼunoʼob sin ke u xuʼupul yaʼab taakʼinoʼ».

 Leonel, ku yáantaj tiʼ junpʼéel Comité tiʼ Socorro yaan Venezuelaeʼ, jach kiʼimak u yóol yoʼolal le meyaj ku beetkoʼ. Letiʼeʼ ku yaʼalik: «In wáantik u maasileʼ jach tsʼoʼok u yáantken utiaʼal u kiʼimaktal in wóol, tumen in wataneʼ kíim yoʼolal coronavirus. Ku yáantken xan utiaʼal maʼ in chʼíikil tuukul tiʼ le baʼax úuchtenoʼ. Jach tsʼoʼok in wilik bix u kanáantik Jéeoba u kaajal».

 Juntúul sukuʼun meyajnaj tiʼ junpʼéel Comité tiʼ Socorroeʼ ku yaʼalik: «Beoraeʼ tiʼ teen tsʼaʼab le áantajoʼ. Le sukuʼunoʼoboʼ maʼ chéen tu tsʼáajoʼob tiʼ teen yéetel tiʼ in watan le baʼaxoʼob kʼaʼabéettoʼonoʼ, tu líiʼsoʼob k-óol yéetel tu kanáantoʼonoʼob yéetel yaabilaj».

 Jach junsúutuk u yúuchul le nukuch loobiloʼoboʼ, kex beyoʼ yoʼolal le donaciónoʼob ku tsʼaʼabaloʼ u kaajal Jéeobaeʼ jach séebaʼan u tsʼáaik le baʼaxoʼob kʼaʼabéet tiʼ le sukuʼunoʼoboʼ. Teʼ donate.pr418.com jeʼel u páajtal a wilik bix jeʼel a tsʼáaik a donacióneʼ. K-tsʼáaikteʼex u graciasil tu yoʼolal a wutsileʼex.