Cada añoeʼ yaʼab sukuʼunoʼob yéetel kiikoʼob ku xupkubaʼob u meyajtoʼob Jéeoba bul semanaeʼ ku binoʼob teʼ Escuela Bíblica tiʼ Galaad tiʼ le Watchtoweroʼ. Lelaʼ ku beetaʼal teʼ Centro Educativo tiʼ le Watchtower yaan tu kaajil Patterson, Nueva Yorkoʼ. a Le máaxoʼob ku binoʼob teʼ escuelaoʼ ku kaʼansaʼaltiʼob u beetoʼob tubeel le meyaj ku tsʼaʼabaltiʼob ichil u kaajal Jéeobaoʼ. Le baʼax ku kaʼansaʼaltiʼoboʼ ku meyaj xan utiaʼal u yáantaʼal le sukuʼunoʼob yanoʼob teʼ múuchʼuliloʼoboʼ bey xan le yanoʼob tu Najiloʼob Betel tiʼ tuláakal yóokʼol kaaboʼ.

 Tiʼ u Escuelail Galaadeʼ ku bin sukuʼunoʼob jejeláas tuʼux u taaloʼob. Por ejemploeʼ le xook 147 tiʼ u Escuelail Galaad beetaʼab tu añoil 2019, bin 56 u túulal sukuʼunoʼob ku taaloʼob tiʼ 29 jejeláas luʼumiloʼob. Le máaxoʼob ku binoʼob teʼ xookaʼ letiʼe sukuʼunoʼob ku xupkubaʼob u meyajtoʼob Jéeoba bul semanaoʼ, jeʼex le betelitaʼoboʼ, le precursor especialoʼoboʼ yéetel superintendenteʼob tiʼ circuitooʼ.

 Desde antes u káajal le xookaʼ ku yilaʼal u láaj listokíintaʼal le baʼax kʼaʼabéetoʼ. U Departamentoil Viajes tiʼ le Central Mundialoʼ ku yilik u manik tuláakal le boletoʼob kʼaʼabéet tiʼ le sukuʼunoʼob invitartaʼanoʼoboʼ. Jeʼex le ka beetaʼab le xook 147, maʼan u boleto le sukuʼunoʼob ku taaloʼob táanxel luʼumiloʼ, cada boleto maʼan utiaʼal le viajeoʼ tu tojoltaj kex 1,075 dólares. Le sukuʼunoʼob kajaʼanoʼob tu islail Salomónoʼ viajarnajoʼob maas tiʼ 35,400 kilómetros yéetel kanpʼéel aviónoʼob tu chʼaʼajoʼob utiaʼal u kʼuchloʼob tak Patterson. Utiaʼal xan u suutoʼobeʼ tu chʼaʼajoʼob uláakʼ óoxpʼéel aviónoʼob, u boleto cada juntúuleʼ tu tojoltaj 2,300 dólares. Utiaʼal u kanáantaʼal le donaciónoʼoboʼ le Departamento de Viajesoʼ ku meyajtiʼ junpʼéel programa utiaʼal u kaxtik le boletoʼob maas baratoʼoboʼ, yéetel kex tsʼoʼok u separartaʼal le boletoʼoboʼ ku seguer u kaxtik wa yaan u maas baratoil. Tiʼ u Departamentoil Viajeseʼ ku meyaj xan le puntos ku siʼibil tiʼ máak ikil u sen viajaroʼ bey xan uláakʼ descuentoʼob ku siʼibil tiʼ le máaxoʼob suuk u viajaroʼoboʼ.

 Yaʼab tiʼ le sukuʼunoʼob ku invitartaʼaloʼob teʼ xookoʼ minaʼan u visa’ob utiaʼal u yookloʼob Estados Unidos, le oʼolal utiaʼal ka yanak u visaʼobeʼ ku yáantaʼaloʼob tumen u Departamentoil Asuntos Legales tiʼ le Central Mundialoʼ. Le visa de estudiante ku tsʼaʼabaltiʼoboʼ ku tojoltik kex 510 dólares.

 ¿Baʼax utsil ku taasik tiʼ le múuchʼuliloʼob u beetaʼal u Escuelail Galaadoʼ? Hendra Gunawaneʼ ku beetik u ancianoil tiʼ junpʼéel múuchʼulil yaan teʼ Sureste Asiáticooʼ ku yaʼalik: «Kaʼacheʼ minaʼan precursor regularoʼob teʼ múuchʼulilaʼ. Pero desde ka kʼuch le sukuʼun yéetel u yatanaʼ tu yáantoʼob le sukuʼunoʼob utiaʼal ka u beetoʼob xan u precursoriloʼoboʼ. Ka máan kʼiin xaneʼ juntúul kiik yaan teʼ múuchʼuliloʼ bin teʼ Escuela utiaʼal Máaxoʼob Kʼaʼaytik le Reinooʼ».

 Sergio Paijantan ku múul meyaj yéetel jujuntúul sukuʼunoʼob bijaʼanoʼob tu xookil Galaad tu Betelil Sureste Asiáticoeʼ ku yaʼalik: «Le baʼax tu kanaj le sukuʼunoʼoboʼ maʼ chéen letiʼob jóoʼsik u yutsiliʼ, baʼaxeʼ tak toʼon. ¡Jach yaʼab baʼaloʼob tu kanoʼob! Kex beyoʼ letiʼobeʼ maʼ tu tuklikoʼob wa maas yaʼab baʼax u yojloʼob, baʼaxeʼ ku yilik u yáantkoʼob u maasil. Le baʼax ku beetkoʼobaʼ jach ku líiʼsik k-óol yéetel ku yáantkoʼon xan utiaʼal k-líiʼsik u yóol u maasil».

 ¿Tuʼux ku chʼaʼabal le taakʼin ku meyaj utiaʼal u beetaʼal le xookoʼobaʼ? Ku chʼaʼabal tiʼ le donaciónoʼob ku tsʼáaik u testigoʼob Jéeoba utiaʼal u tsʼaʼabal kʼaj óoltbil u Tʼaan Dios tiʼ tuláakal yóokʼol kaaboʼ bey xan le ku tsʼaʼabal donate.pr418.com. K-tsʼáaikteʼex u graciasil tu yoʼolal a wutsileʼex, le baʼax ka síikeʼexoʼ ku yáantaj utiaʼal ka beetaʼak u Escuelail Galaad.