Le videoʼob ku beetaʼal utiaʼal le asamblea regionaloʼoboʼ jach jatsʼutstakoʼob yéetel ku yáantkoʼob máak u naʼat baʼax ku kaʼansik le Bibliaoʼ. Le asamblea regional 2020 «¡Kiʼimakchajak a wóol mantatsʼoʼ!», ku taasik 114 videoʼob, 43 tiʼ leloʼobaʼ u videoiloʼob tuʼux ku tsoʼolol baʼax ku kaʼansik le Biblia tumen le sukuʼunoʼob yanoʼob ichil le Cuerpo Gobernanteoʼ bey xan le máaxoʼob áantkoʼoboʼ. ¿Tsʼoʼok wa a máansik ta tuukul bukaʼaj meyaj ku beetaʼal yéetel bukaʼaj taakʼin ku xuʼupul utiaʼal u jóoʼsaʼal le videoʼoboʼ?

 Kex 900 sukuʼunoʼob tiʼ tuláakal yóokʼol kaab táakpajoʼob utiaʼal u beetaʼal le asamblea regionaloʼ. Tu bisaj kex dos años u tsʼoʼoksaʼal yéetel xáanchaj kex 100 mil horaʼob táan u beetaʼal. Tiʼ le 100 mil horaʼoboʼ, 70 mil horaʼob meyajnaj utiaʼal u beetaʼal le drama Nehemías: Le kiʼimak óolal ku taal tiʼ Jéeobaoʼ ku tsʼáaiktoʼon muukʼ. Le dramaaʼ ku xáantal 76 minutos.

 Jach yaʼab taakʼin xuʼup utiaʼal u yáantaʼal le sukuʼunoʼob yéetel le kiikoʼob táakpajoʼob teʼ meyajoʼ bey xan utiaʼal u maʼanal tuláakal le baʼaxoʼob kʼaʼabéetchajoʼ.

 Jared Gossman, ku meyaj tiʼ Audio yéetel Videoeʼ, ku yaʼalik: «Le Comité de Enseñanza tiʼ le Cuerpo Gobernanteoʼ uts tu tʼaan ka eʼesaʼak jejeláas máakoʼob yéetel jejeláas lugaroʼob teʼ videoʼoboʼ. U beetaʼal beyaʼ ku yáantaj utiaʼal u kʼaj óoltaʼal uláakʼ máaxoʼob meyajtik Jéeoba tiʼ tuláakal yóokʼol kaab. Utiaʼal ka béeyak u grabartaʼal le videoʼobaʼ múul meyajnaj 24 equipoʼob tiʼ 11 luʼumiloʼob. Yaʼab baʼaxoʼob yanchaj u maʼanal yéetel u beetaʼal utiaʼal ka jóoʼsaʼak le videoʼoboʼ».

 Yaʼab baʼaxoʼob ku beetaʼal utiaʼal ka eʼesaʼak jach bix le lugaroʼob ku yaʼalik le Bibliaoʼ. Tuláakal le baʼaxoʼob meyajnaj utiaʼal u grabartaʼal u videoil Nehemías: Le kiʼimak óolal ku taal tiʼ Jéeobaoʼ ku tsʼáaiktoʼon muukʼoʼ beetaʼab tu estudioil Mount Ebo, náatsʼ tiʼ Patterson (Nueva York). Utiaʼal u kanáantaʼal maʼ u sen xuʼupul le donaciónoʼoboʼ le sukuʼunoʼoboʼ tu manoʼob baʼaloʼob maʼ jach koʼojtak u tojoloʼob utiaʼal u beetkoʼob u baʼpakʼiloʼob u kaajil Jerusalén. U estructurail le pakʼ beetaʼaboʼ seis metros u kaʼanlil, lelaʼ beetaʼab yéetel tablaʼob, tsʼoʼoleʼ forrartaʼaboʼob utiaʼal ka chíikpajak tiʼ u tuunichiloʼob Jerusalén póolanoʼoboʼ. Le estructura beetaʼaboʼ jejeláas bix úuchik u meyaj utiaʼal u grabartaʼal uláakʼ jatsoʼob kʼaʼabéetchaj teʼ videooʼ. Utiaʼal u maʼanal tuláakal le baʼaxoʼob meyajnajoʼ xuʼup kex óoliʼ 100 mil dólaroʼob. a

 Jeʼex túun k-ilkoʼ jach yaʼab baʼaxoʼob beetaʼab utiaʼal ka k-disfrutart le asamblea regionaloʼ. Tuláakal lelaʼ yaan u yáantaj utiaʼal ka maas alabartaʼak Jéeoba tiʼ tuláakal yóokʼol kaab. K-tsʼáaikteʼex u graciasil yoʼolal le jejeláas bix a túuxtik a donacióneʼexoʼ bey xan le ka túuxtikeʼex donate.pr418.com.