Agostinho kajaʼan Brasileʼ ku yaʼalik: «Líikʼen tiʼ junpʼéel chan kaaj tiʼ junpʼéel granja, jach óotsiloʼon kaʼachi le oʼolal utiaʼal in wáantik in familiaeʼ tin pʼataj tak in xook». Agostinhoeʼ 33 años yaantiʼ ka tu kanaj xook yéetel tsʼíib. Letiʼeʼ ku yaʼalik xan: «In kanik xook yéetel tsʼíibeʼ tu yáanten in wuʼuyinba maʼalobil yéetel tu beetaj u kiʼimaktal in wóol».

 Agostinhoeʼ chéen juntúul tiʼ le maas tiʼ 250,000 máakoʼob tsʼoʼok u yáantaʼal tumen u testigoʼob Jéeoba u kanoʼob xook yéetel tsʼíib ichil le 70 años tsʼoʼok u máanoʼ. ¿Baʼaxten u testigoʼob Jéeobaeʼ ku yáantkoʼob le máakoʼoboʼ? ¿Bix u yáantik le máakoʼob le baʼax ku beetkoʼobaʼ?

 Kex tu añoiloʼob 1935, u testigoʼob Jéeobaeʼ táan kaʼach u biskoʼob u Tʼaan Dios tiʼ 115 luʼumiloʼob. Le misioneroʼoboʼ utiaʼal u kaʼanskoʼob le máakoʼoboʼ ku meyajtiʼob kaʼach discursoʼob grabartaʼan ichil le idioma ku tʼanik le máakoʼoboʼ. Yaan kʼiineʼ ku pʼatkoʼob xan publicaciónoʼob tiʼob. Yaʼab máakoʼob taak kaʼach u kaanbaloʼob tiʼ le Bibliaoʼ chéen baʼaleʼ chan difícil u beetaʼal tumen maʼ u yojloʼob xook yéetel tsʼíibiʼ.

 Wa maʼ u yojloʼob xookeʼ, ¿bix ken u yojéeltoʼob bix u kʼáat Dios ka kuxlak máak? ¿Bix ken u beetiloʼob le baʼax ku kankoʼoboʼ? (Josué 1:8; Salmo 1:2, 3). Wa le taatatsiloʼob maʼ u yojloʼob xookoʼ yaan u maas difíciltal tiʼob u kaʼanskoʼob tiʼ u paalaloʼob baʼax uts tu tʼaan Dios (Deuteronomio 6:6, 7). Le máaxoʼob xan maʼ úuch káajak u meyajtikoʼob Diosoʼ wa maʼ u yojloʼob xookeʼ maʼ tu páajtal u kaʼanskoʼob tiʼ u maasil baʼax ku yaʼalik le Bibliaoʼ.

 Ichil u añoiloʼob 1940 yéetel 1950, Nathan Knorr yéetel Milton Henschel, kaʼatúul tiʼ le sukuʼunoʼob nuʼuktik kaʼach le meyaj ku beetaʼal ichil u káajal Diosoʼ binoʼob tiʼ jejeláas luʼumiloʼob utiaʼal u kaʼanskoʼob tiʼ le sukuʼunoʼob bix ken u kaʼansoʼob u Tʼaan Dios tiʼ le máakoʼoboʼ. Teʼ luʼumiloʼob tuʼux u maas yaʼabil le máakoʼob maʼ u yojloʼob xookoʼ tu yaʼaloʼob ka kaʼansaʼak le sukuʼunoʼob xook yéetel tsʼíiboʼ.

 U Najil Betel aʼalik bix kaʼach kun tsʼaabil le xookoʼ. Tiʼ jujunpʼéel luʼumiloʼobeʼ le sukuʼunoʼoboʼ páajchaj u kankoʼob xook yéetel le programa u tsʼaamaj le gobiernooʼ. Jeʼex u sucursalil Brasileʼ tu túuxtaj tiʼ le sukuʼunoʼob le libroʼob tsʼaʼabtiʼob tumen le gobiernooʼ. Tuláakʼ luʼumiloʼobeʼ letiʼe sukuʼunoʼob il bix kun kaʼansbil u maasiloʼ.

 Tuláakal máak jeʼel u páajtal kaʼach u kanik xook yéetel tsʼíibeʼ: xiiboʼob, koʼoleloʼob, táankelmoʼob, paalaloʼob yéetel tak le tsʼoʼok u chʼíijloʼoboʼ. U tuukulileʼ letiʼe ka u kanoʼob xook ichil le idioma ku tʼankoʼoboʼ, utiaʼal lelaʼ kʼaʼabéetchaj u kaʼansaʼal le sukuʼunoʼob yanoʼob teʼ múuchʼulil kex jejeláas tuʼux u taaloʼoboʼ.

 ¿Baʼax utsiloʼob tsʼoʼok u taasik tiʼ le máakoʼob u yáantaʼaloʼob u kanoʼob xookoʼ? Juntúul kiik kajaʼan Méxicoeʼ, ku yaʼalik: «Bejlaʼeʼ maas kin naʼatik baʼax ku yaʼalik le Bibliaoʼ, jach ku kʼuchul tin puksiʼikʼal. Úuchik in kanik xookeʼ maas maʼ saajken in tsikbalt u Tʼaan Dios tiʼ le máakoʼoboʼ».

 ¿Baʼax uláakʼ utsiloʼob tsʼoʼok u taasik u kaʼansaʼal máak xook yéetel tsʼíib? Isaac, kajaʼan Burundieʼ, ku yaʼalik: «In kanik xook yéetel tsʼíibeʼ tu yáanten in maas maʼalobkíint bix in meyaj. Bejlaʼeʼ ku béeytal tak in nuʼuktik le u beetaʼal nukuch najoʼoboʼ».

 Jesusa, kajaʼan Perúeʼ, 49 años yaantiʼ ka tu kanaj xook yéetel tsʼíib. Letiʼeʼ ku yaʼalik: «Le kéen xiʼiken maaneʼ ku kʼaʼabéettal in wilik u mejen letrerosil le baʼax ku koʼonoloʼ bey xan bajux u koʼonol, baʼaleʼ leloʼ ku difíciltal ten kaʼach tumen maʼ in wojel xookiʼ. Beora tsʼoʼok in kanik xookeʼ maas chéen chʼaʼabil in wilik in bin in man le baʼaxoʼob kʼaʼabéettenoʼ».

 Tiʼ jejeláas luʼumiloʼobeʼ le gobiernoʼoboʼ tsʼoʼok u yaʼalikoʼob jach maʼalob le meyaj ku beetik le Testigoʼoboʼ tumen táan u yáantkoʼob u maasil u kanoʼob xook yéetel tsʼíib. Teʼ kʼiinoʼobaʼ láayliʼ táan u beetkoʼobeʼ yéetel tsʼoʼok u maas maʼalobkíintkoʼob bix u beetkoʼob. Utiaʼal u kaʼanskoʼob le máakoʼob xook yéetel tsʼíiboʼ tsʼoʼok u beetkoʼob óoliʼ 224 millones folletoʼob ich 720 idiomaʼob. Tuláakal lelaʼ ku beetaʼal utiaʼal u yáantaʼal le máaxoʼob maʼ béeychaj u kankoʼob xook yéetel tsʼíiboʼ. a