Teen, in kiik yéetel in sukuʼuneʼ nojochchajoʼon tiʼ junpʼéel chan naj u alquilarmaj in papá tu kaajil Bicester, Reino Unido. Le yáanten 19 añosoʼ káaj in beetik in precursoril jeʼex in sukuʼunoʼobeʼ, tsʼoʼoleʼ ka máan kʼiineʼ túuxtaʼaben bey precursor especial tu luʼumil Escociaeʼ. Tu añoil 1970, le yaanten 23 añosoʼ invitartaʼaben meyaj tu Betelil Londres. Teʼeloʼ tin kanaj le lenguaje de señasoʼ. Leloʼ tu tsʼáaj tuʼux in maas meyajtik Jéeoba yéetel tu taasajten yaʼab bendiciónoʼob.

Kin kanik señas

 Le tiaʼanen Beteloʼ asignartaʼaben tiʼ junpʼéel congregación yaan Mill Hill, teʼeloʼ tin kʼaj óoltaj yaʼab sukuʼunoʼob kóokoʼobiʼ. Kex maʼ in wojel señaseʼ kin kutal tu tséel le sukuʼunoʼob teʼ reuniónoʼoboʼ tumen taak in maas biskinba tu yéeteloʼob.

 Teʼ kʼiinoʼob jeʼeloʼ tu luʼumil Gran Bretañaeʼ minaʼan congregaciónoʼob ich señas, le oʼolal le sukuʼunoʼob kóokoʼoboʼ ku binoʼob teʼ reuniónoʼob ich inglésoʼ. Teʼeloʼ yaan sukuʼunoʼob yéetel kiikoʼob ku interpretarkoʼob le reuniónoʼoboʼ, pero como maʼ u yojloʼob señaseʼ palabra por palabra u beetkoʼob. Le sukuʼunoʼob kóokoʼoboʼ jach tu yeʼesoʼobten paciencia le táan u kaʼanskoʼobten señasoʼ. Beyoʼ tin tsʼáaj cuentaeʼ le señasoʼ yaan u gramaticail yéetel yaan u ordenil le tʼaanoʼob jeʼex tiʼ uláakʼ idiomaʼobeʼ. Le sukuʼunoʼoboʼ kex maʼ tu naʼatkoʼob le inglesoʼ láayliʼ ku binoʼob teʼ reuniónoʼoboʼ yéetel jach u tsʼaamaj u yóoloʼobi’. Leloʼ tu beetaj in maas yaabiltikoʼob yéetel u maas taaktal in kanik señas.

 Tu luʼumil Gran Bretañaeʼ u idioma le máaxoʼob kóokoʼoboʼ letiʼe lenguaje de señas británicooʼ wa BSL. Ka máan kʼiineʼ le sukuʼunoʼob ku interpretaroʼob teʼ reuniónoʼoboʼ xuʼul u beetkoʼob palabra por palabra. Kex maʼ fácileʼ anchaj u kankoʼob lenguaje de señas británico tumen letiʼe idioma ku naʼatik le kóokoʼoboʼ. Lelaʼ jach yaʼab utsiloʼob tu taasaj tumen le sukuʼunoʼob kóokoʼoboʼ káaj u maas naʼatkoʼob le reuniónoʼoboʼ yéetel u maas biskubaʼob yéetel le sukuʼunoʼoboʼ. Chíikaʼan in wilkeʼ Jéeobaeʼ tsʼoʼok u sen bendecirtik le meyaj ku beetik le sukuʼunoʼob kóokoʼob durante le 50 años tsʼoʼok u máanoʼ. Paʼatik in tsikbaltikteʼex jujunpʼéel bix tsʼoʼok in wáantaj.

Ku maas úuchul kaʼansaj ich señas

 Tu añoil 1973, casi junpʼéel año káajak in beetik in ancianoileʼ juntúul sukuʼun ku kʼaabaʼtik Michael Eagerseʼ tu yaʼalajten baʼaxten maʼ t-beetik reuniónoʼob ich señas británico. Le sucursaloʼ tu aprobartaj, le oʼolaleʼ teen yéetel uláakʼ ancianoeʼ káaj k-beetik junpʼéel reunión cada mes tu kaajil Detford, tu noojol-lakʼinil Londres.

 Jach maʼalob úuchik u bintoʼon. Yaʼab sukuʼunoʼob kóokoʼob yanoʼob Londres yéetel tiʼ uláakʼ kaajoʼob yanoʼob tu noojol-lakʼinil Inglaterraeʼ taal u yuʼuboʼob le yáax reunión anchaj ich lenguaje de señas británicooʼ. Le sukuʼunoʼob yéetel le kiikoʼob kóokoʼob bey xan le uláakʼ máaxoʼob ku taaloʼob reunióno’ yáax úuchik u kʼamkoʼob le kaʼansaj ku taal tiʼ Jéeoba ichil u idiomaʼoboʼ. Ka tsʼoʼok le reuniónoʼ mientras táan k-jaantik junpʼíit baʼaleʼ t-tsikbaltaj jujunpʼéel experienciaʼob tu yéeteloʼob, páajchaj xan in beetik junpʼéel visita de pastoreo.

 Ka maan kʼiineʼ káaj xan u beetaʼal reuniónoʼob ich señas tu kaajiloʼob Birmingham yéetel Sheffield. Yaʼab sukuʼunoʼob yéetel kiikoʼob taaloʼob teʼ reuniónoʼ tumen taak u kankoʼob señas, yaʼab tiʼ le sukuʼunoʼobaʼ áantajnajoʼob utiaʼal u maas yaʼabtal le kʼaʼaytaj ku beetaʼal ich señasoʼ.

Le kʼiin ka tsʼoʼok k-beeloʼ

 Tu añoil 1974, tin kʼaj óoltaj juntúul kiik jach kiʼichpan ku kʼaabaʼtik Stella Barker. Letiʼeʼ precursora especial yéetel táan u servir tiʼ junpʼéel múuchʼulil yaan naatsʼ Betel. Káaj k-bisikbaeʼ ka tsʼoʼok k-beel tu añoil 1976. Teen yéetel Stellaeʼ káaj k-meyaj bey precursor especialeʼ. Stellaeʼ káaj xan u apoyartik señas tin wéetel teʼ múuchʼulil ku kʼaabaʼtik Hackney, tu xamanil Londresoʼ. Jeʼel u páajtal in waʼalikeʼ u káajsik u beetik u precursoril máak desde kéen tsʼoʼokok u beeloʼ jach ku taasik kiʼimak óolal yéetel ku taasik yaʼab utsiloʼob.

 Ka máan kʼiineʼ teen yéetel in wataneʼ tsʼaʼabtoʼon u privilegioil k-meyaj Betel bey voluntarioʼon externoeʼ. Tin beetaj xan in sustitutoil tiʼ circuito yéetel tin beetaj in instructoril teʼ Escuela utiaʼal u Meeyjil le Reino utiaʼal le ancianoʼoboʼ, tsʼoʼoleʼ áantajnajen xan utiaʼal u interpretartaʼal ich señas le asamblea regionaloʼob de inglésoʼ. U jaajileʼ kex yaʼab meyaj yaan k-beet yéetel kex k-kaʼanaleʼ jach t-disfrutartaj le meyajoʼobaʼ (Mateo 11:28-30).

 Ichil u añoiloʼob 1979 tak 1982, síij k-hijoʼob Simón yéetel Mark. ¡Jach kiʼimakchaj k-óol! Pero k-ojel yanchajtoʼon uláakʼ responsabilidadoʼob. ¿Bix túun ken k-beetil? Junpʼéel baʼax t-beeteʼ kéen tsʼaʼabaktoʼon junpʼéel asignación naatsʼ t-otocheʼ k-láaj bin, tsʼoʼoleʼ k-ilik náaysik k-óol yéetel le paalaloʼoboʼ tumen k-kʼáat ka u yiloʼobeʼ jach jatsʼuts u meyajtaʼal Jéeoba. K-beetik leloʼ jach tu taasaj yaʼab utsiloʼob tumen le táan u nojochtal k-paalaloʼobeʼ tu kanoʼob señas yéetel tu beetoʼob xan u precursoriloʼob. Jach kiʼimakchaj k-óol tumen ka máan 40 años siʼibik le chan vaca tumen in papá utiaʼal «servir» Beteloʼ in hijo Simón yéetel Markeʼ invitartaʼaboʼob servir xan Betel.

Ku tsʼaʼabal uláakʼ áantaj tiʼ le máaxoʼob kóokoʼoboʼ

 Tak tu añoil 1990, minaʼan mix juntúul anciano kóok tu luʼumil Gran Bretaña pero yaan jujuntúul siervo ministerialoʼob. Yoʼolal leloʼ le ancianoʼob maʼ kóokoʼoboʼ letiʼob aʼalik wa yaan juntúul tiʼ le sukuʼunoʼob noʼojaʼan utiaʼal kaʼansajoʼ yéetel jeʼel u páajtal u beetik u ancianoiloʼ (1 Timoteo 3:2). Juntúul tiʼ le siervo ministerialoʼob kóokoʼoboʼ Bernard Austin, letiʼeʼ tiaʼan ichil junpʼéel congregación ich ingléseʼ. Jach yaabiltaʼan tumen letiʼeʼ ku kanáantik le sukuʼunoʼoboʼ. Jach kiʼimakchaj in wóol ka tin wojéeltaj tsʼoʼok u tsʼaʼabal u beet u ancianoil. Hasta letiʼ le yáax anciano kóok yanchaj Gran Bretañaoʼ.

 Tu añoil 1996, úuch junpʼéel baʼal jach tu taasajtoʼon kiʼimak óolal: le sucursaloʼ tu aprobartaj ka yanak le yáax múuchʼulil ich señas tu luʼumil Gran Bretañaoʼ. Lelaʼ tiaʼan Ealing tu chikʼinil Londresoʼ. Pero ka máan kʼiineʼ yanchaj uláakʼ múuchʼuliloʼob.

Le kóokoʼoboʼ ku maas jóoʼskoʼob u yutsil le kaʼansaj ku tsʼaʼabaltiʼoboʼ

 Tu añoiloʼob 1980 yéetel 1990, meyajnajen desde tin wotoch yéetel u Departamentoil Servicio. In meyajeʼ letiʼ in núukik le preguntas ku yantal yoʼolal le lenguaje de señasoʼ. Yaan horaeʼ le sukuʼunoʼoboʼ ku tsʼíiboʼob teʼ sucursal utiaʼal u yojéeltikoʼob bix jeʼel u yáantkoʼob le sukuʼunoʼob kóokoʼob utiaʼal ka u naʼatoʼob le reuniónoʼob yéetel le asambleaʼob ku beetaʼal ich inglésoʼ. Lelaʼ istikyaj tumen tu káajbaleʼ maʼ jach yaʼab áantaj yaan utiaʼal le kóokoʼoboʼ, tsʼoʼoleʼ mix publicaciónoʼob yaan. Le oʼolaleʼ ku animartaʼal le sukuʼunoʼob kóokoʼob yéetel maʼ kóokoʼob utiaʼal ka u yeʼesoʼob paciencia.

 Jach kiʼimakchaj k-óol tumen maʼ xáanchaje’ le sucursaloʼ tu yaʼalaj ka interpretartaʼak le reuniónoʼob yéetel le asambleaʼob ich señasoʼ. Tsʼoʼoleʼ le sukuʼunoʼob kóokoʼoboʼ jeʼel u páajtal u kutaloʼob aktáan tiʼ le plataformaoʼ utiaʼal u yilkoʼob le máax ku discursaroʼ bey xan le máax ku interpretaroʼ. Le sukuʼunoʼob yéetel le kiikoʼob kóokoʼoboʼ jach kiʼimakchaj u yóoloʼob, tu yuʼuboʼob tiaʼanoʼob ichil junpʼéel familiaeʼ tumen yaabiltaʼanoʼob yéetel ku chʼaʼabloʼob en cuentail.

 Tu kʼiinil 1 tiʼ abril tiʼ 1995, beetaʼab le yáax asamblea de junpʼéel kʼiin ich señas teʼ Salón tiʼ Asambleas yaan Dudley, West Midlands. Teneʼ tin wáantaj le sukuʼun David Merry, juntúul superintendente tiʼ circuito utiaʼal ka u organizart le asambleaoʼ. Le sukuʼunoʼob kóokoʼob binoʼob teʼ asambleaaʼ náach tuʼux lukʼoʼob, desde tu xamanil Escocia tak tu noojol-lakʼinil Cornualles. Jach maʼ tu tuʼubulten le asambleaaʼ tumen taal maas tiʼ 1,000 máakoʼobiʼ.

 Teʼ año 2001, aʼalaʼab tiʼ sukuʼun Merry yéetel tiʼ teen ka k-organizart junpʼéel asamblea regional ich señas británico kun beetbil tu añoil 2002. Kex jach yaʼab u meyajileʼ, Jéeobaeʼ jach tu bendecirtaj le meyajoʼ, le asambleaoʼ jach jatsʼutschaji. Mix bikʼin kun tuʼubulten. Desde teʼ kʼiin jeʼeloʼ anchajten u privilegioil in organizartik uláakʼ asambleaʼob tak le de señasoʼ. Ich yaʼab años tin beetaj le meyajaʼ, hasta ka yanchaj uláakʼ sukuʼunoʼob maas táankelmoʼob beetik le meyajoʼ.

Videoʼob utiaʼal máaxoʼob kóokoʼob

 Jach kiʼimakchaj k-óol tumen tu añoil 1998, u kaajal Jéeobaeʼ tu jóoʼsaj le yáax publicación ich señas británico, le folleto ich videocaset: ¿Baʼax u kʼáat Dios ka k-beete? Lelaʼ jach meyajnajtoʼon utiaʼal k-tsʼáaik xookoʼob. Ka máan kʼiineʼ jóoʼsaʼab uláakʼ publicaciónoʼob.

 Tiʼ junpʼéel asamblea tu añoil 2002, tiʼ yáax interpretartaʼab u kʼaayiloʼob le Reino ich señas británicooʼ. Le sukuʼunoʼob yéetel le kiikoʼob kóokoʼoboʼ béeychaj u kʼaykoʼob u kʼaayiloʼob le Reinooʼ, todavía kʼajaʼanteneʼ juntúul sukuʼun kóokeʼ hasta táan u yokʼol le táan u kʼaayoʼ.

 Teʼ asamblea yanchaj 2002, invitartaʼab xan le congregación ich señas yaan Londres utiaʼal ka u grabartoʼob junpʼéel drama. Pero, ¿bix túun kun beetil si mix juntéen yáax beetaʼak? Juntéen maaseʼ t-ilaj u kʼab Jéeoba. Letiʼeʼ tu yaantoʼon utiaʼal ka k-kaxt sukuʼunoʼob u yojloʼob u beetoʼob yéetel u editartoʼob películaʼob. ¡Jach maʼalob úuchik u bintoʼon yéetel jach jatsʼutschaj le dramaoʼ! Tsʼoʼoleʼ le baʼax t-kanoʼ jach tu yaantoʼon tumen teʼ año 2003 tak 2008, tsʼaʼabten u privilegioil in nuʼuktik le dramaʼob grabartaʼab tu najil Betel utiaʼal le asambleaʼob kun yantal maas táanil ich señas británicooʼ.

 Teen yéetel in watan Stellaeʼ jach kiʼimakchaj k-óol úuchik múul k-meyaj Betel yéetel k-paalal. U jaajileʼ jach yaʼab meyaj yanchajtoʼon, yaʼab semanaʼob grabarnajoʼon yéetel ensayarnajoʼon. Yoʼolal leloʼ le actoroʼoboʼ jach kaʼanoʼob ¡Pero valernaj u penail! Tumen le sukuʼunoʼob kóokoʼoboʼ jach tu naʼatoʼob le baʼax kaʼansaʼaboʼ, hasta yaneʼ káaj u yokʼoloʼob.

 Tu añoil 2015 xaneʼ jóoʼsaʼab u videoil le revista Le Máax ku Kanano’ ich señas británico. Tsʼoʼoleʼ 2019, jóoʼsaʼab u Evangelioil Mateo láayliʼ tiʼ videoeʼ. Bejlaʼeʼ yaantoʼon le Tsʼíiboʼob ich Griegooʼ tsʼoʼoleʼ táan xan u beetaʼal le Tsʼíiboʼob ich Hebreooʼ. Le sukuʼunoʼob yéetel le kiikoʼob kóokoʼoboʼ seguro jach ku tsʼáaikoʼob u graciasil tiʼ Jéeoba yoʼolal le áantajoʼobaʼ.

 Tiaʼanoʼon ichil junpʼéel kaaj jach yaabiltaʼan tumen Jéeoba (Hechos 10:34, 35). Teen yéetel in familiaeʼ jach ku péek k-óol kéen k-il le tiempo, le muukʼ yéetel le taakʼin ku xupik u kaajal Jéeoba utiaʼal u yáantik le máaxoʼob kóokoʼob yéetel minaʼan u sáasiloʼoboʼ. a

 Jach valernaj u penail le bukaʼaj meyaj beetaʼaboʼ tumen bejlaʼeʼ yaʼab congregaciónoʼob yaan ich señas británico, tsʼoʼoleʼ jach kiʼimak in wóol tumen tin wilaj bix káajik (Zacarías 4:10). Claro tuláakal lelaʼ béeychaj yoʼolal u yáantaj Jéeoba tumen letiʼ nuʼuktik u káajal yéetel ku tsʼáaik le áantaj kʼaʼabéet utiaʼal u kʼaʼaytaʼal u Reino tiʼ tuláakal le máakoʼoboʼ.