Síijen tu añoil 1941 tu kaajil Virrat (Finlandia). In papá, in maama, in wíitsʼinoʼob yéetel jujuntúul tiʼ in láakʼtsiloʼobeʼ kóokoʼob xan. Le oʼolal puro ich señas k-tsikbal.

 Binen xook tiʼ junpʼéel internado kex 240 kilómetros yaan tiʼ in wotoch. Teʼeloʼ jach prohibido u tʼaan máak ich señas. Teʼ kʼiinoʼob jeʼeloʼ teʼ tuʼux ku kaʼansaʼal le máaxoʼob kóokoʼob yaan Finlandiaoʼ maʼatech u tʼaan máak ich señas utiaʼal u kaʼansaʼal. Le oʼolal teʼ internadooʼ obligartaʼaboʼon kaanbal chéen ikil k-ilik bix u péeksik u chiʼ le maestrooʼ. Wa k-chuʼukul táan k-tʼaan ich señaseʼ k-jaʼatsʼal yéetel junpʼéel regla wa yéetel junpʼéel chʼilib tumen le maestrooʼ. Yaan horaeʼ ku xáantal chuup k-kʼab teʼ tuʼux k-jaʼatsʼaloʼ.

 In papáʼobeʼ suuk u beetik u paakʼaloʼob, teen xaneʼ taak in kanik le meyajoʼ. Le oʼolaleʼ binen in xok agricultura teʼ universidadoʼ. Ka tsʼoʼok in xook yéetel ka suunajen tin wotocheʼ tin wilaj yóokʼol le mesa le revista Le Máax ku Kananoʼ yéetel le revista ¡Aajkechoʼ! In papáeʼ tu yaʼalajteneʼ jach jatsʼuts baʼax ku kaʼansik le revistaʼoboʼ tumen teʼ Biblia chʼaʼanoʼ. Tu yaʼalaj xan teneʼ juntúul máak yéetel u yatan maʼ kóokoʼobeʼ ku taaloʼob u kaʼanstiʼob baʼax ku yaʼalik le Bibliaoʼ. Como kóok in papá yéetel in maamaeʼ ku tsʼíibtaʼaltiʼob tiʼ junpʼéel juʼun le baʼax ku kaʼansaʼaltiʼoboʼ, letiʼobeʼ láayliʼ bey xan u núukikoʼoboʼ.

 In papáeʼ tu tsolajteneʼ u Reino Dioseʼ yaan u sutik paraísoil le Luʼumaʼ yéetel yaan u kaʼa kuxkíintik le máaxoʼob tsʼoʼok u kíimloʼoboʼ. Le Testigoʼob kaʼansik in papá yéetel in maamaoʼ maʼ u yojloʼob señasiʼ. Le oʼolal tin tukleʼ chéen maʼ tu naʼataj in papá le baʼax kaʼansaʼabtiʼoʼ tumen letiʼobeʼ u kaʼansmoʼobteneʼ le máaxoʼob ku kíimloʼoboʼ yaan u binoʼob kaʼan.

 Le ka suunaj le Testigoʼob u xíimbaltoʼob in papá yéetel in maamaoʼ tin kʼáatajtiʼob yoʼolal le baʼax tu yaʼalajten in papáoʼ. Letiʼobeʼ tu yaʼaloʼobten: «Jaaj baʼax ku yaʼalik a papá», ka tu tsoloʼobten baʼax ku yaʼalik Juan 5:28, 29 teʼ tuʼux u yaʼalmaj Jesús bix kun kaʼa kuxkíintbil le kimenoʼoboʼ. Tu tsoloʼob xan teneʼ Dioseʼ yaan u luʼsik le baʼaloʼob kʼaastak yaan way yóokʼol kaabeʼ yéetel yaan u kuxtal máak utiaʼal mantatsʼ, mix máak kun kʼojaʼantal yéetel yaan u yantal jeetsʼelil (Salmo 37:10, 11; Daniel 2:44; Apocalipsis 21:1-4).

 Teneʼ taak kaʼach in kanik u maasil, le oʼolal káaj in xokik le Biblia yéetel Antero, juntúul u testigo Jéeoba maʼ kóokiʼ. Como maʼ u yojel señaseʼ teneʼ kin tsʼíibtik tiʼ junpʼéel juʼun u núukil le preguntaʼob ku taasik le librooʼ. Yaan hora xaneʼ Anteroeʼ ku tsʼíibtikten uláakʼ pregunta wa uláakʼ baʼax taak u kaʼansik. Cada semanaeʼ bey k-beetkoʼ, dos horas táan k-xook. ¡Anteroeʼ jach tu yáanten yéetel paciencia!

 Tu añoil 1960, binen tiʼ junpʼéel asamblea tu beetaj u testigoʼob Jéeoba. Le asambleaoʼ máansaʼab xan ich señas. Tu tardeil vierneseʼ anunciartaʼabeʼ sábado kun antal le okjaʼoʼ. Le oʼolaleʼ tuláakʼ kʼiineʼ tin bisaj u nookʼil in wokjaʼ yéetel in toalla. ¡Okjaʼanajen teʼ asambleaoʼ! a Maʼ úuch tiʼ leloʼ in papá, in maama yéetel in wíitsʼinoʼobeʼ okjaʼanajoʼob xan.

 Jach taak kaʼach in kaʼansik tiʼ u maasil máakoʼob kóokoʼob le baʼax tsʼoʼok in kanikoʼ. In wojleʼ wa kin kaʼansiktiʼob ich señaseʼ maas séeb jeʼel u kankoʼobeʼ, le oʼolal káaj in kaʼansik le máakoʼob kóokoʼob yanoʼob teʼ tuʼux kajaʼanenoʼ.

 Maʼ sen úuch tiʼ leloʼ binen kajtal tiʼ junpʼéel nojoch káaj ku kʼaabaʼtik Tampere, teʼeloʼ joonaj joonajil in bin in kʼáatik tiʼ le máakoʼob wa yaan máax kóok u kʼáaj óoloʼob. Bey káajik in tsʼáaik xook tiʼ yaʼab máakoʼoboʼ. Ka máan wa jaypʼéel añoseʼ anchaj maas tiʼ 10 publicadoroʼob tu kaajil Tampere.

 Tu añoil 1965, tin kʼaj óoltaj Maire, juntúul kiik jach uts u modos. Ka máan junpʼéel añoeʼ tsʼoʼok k-beel. Maire jach séeb úuchik u kanik señas yéetel t-máansaj maas tiʼ 50 años táan k-múul meyajtik Jéeoba, letiʼeʼ jach yaʼab bix tu yáantilen yéetel jach chúukpaj u yóol tiʼ teen.

 Ka máan dos años tsʼoʼokok k-beeleʼ síij k-hijo Marko. Como letiʼ sáasil u xikineʼ tu kanaj finlandés bey xan señas finlandesa. Markoeʼ 13 años yaantiʼ ka okjaʼanaji.

 Como yaʼab uláakʼ sukuʼunoʼob taaloʼob áantaj teʼ grupo ich señas yaan tu kaajil Tampereoʼ, tu añoil 1974, binoʼon áantaj tu kaajil Turku. Teʼeloʼ minaʼan mix juntúul u testigo Jéeoba kóokiʼ, le oʼolaleʼ joonaj joonajil k-bin kaxtik le máakoʼob kóokoʼoboʼ. Tu yáamil le tiempo anchajoʼon Turkuoʼ 12 tiʼ le máaxoʼob tin tsʼáaj xook tiʼoboʼ okjaʼanajoʼob.

 Tu añoil 1987, invitartaʼab k-hijo Marko utiaʼal u bin Betel. Toʼoneʼ t-chʼaʼtuklaj k-bin áantaj yaanal tuʼux tumen le grupo ich señas yaan Turkuoʼ jach maʼalob u bin tiʼ.

 Enero tiʼ 1992, viajarnajoʼon tu kaajil Tallin (Estonia) yéetel uláakʼ sukuʼun kóok utiaʼal k-kʼaʼaytaj. Teʼ kʼiinoʼob jeʼeloʼ tsʼoʼok u chaʼabal k-kʼaʼaytaj Europa del Este.

 Teʼeloʼ t-kʼaj óoltaj juntúul koʼolel Testigo yaan juntúul u sukuʼun kóok. Kex letiʼ maʼ tu yóotaj u kan u jaajileʼ tu yáantoʼon k-kaxt le máaxoʼob kóokoʼob kajaʼanoʼob teʼ kaajoʼ. Tu tsʼook áakʼab t-máansaj Tallineʼ le máakoʼ tu bisoʼon tiʼ junpʼéel reunión ku beetaʼal tumen junmúuchʼ máakoʼob kóokoʼob. Antes tiʼ u káajal le reuniónoʼ t-tsʼáaj revistaʼob yéetel libroʼob yokʼol junpʼéel mesa ichil le idioma estonio yéetel rusooʼ. Le máaxoʼob taaloʼob teʼ reuniónoʼ tu bisoʼob 100 libroʼob yéetel 200 revistaʼob, 70 u túulaloʼob xaneʼ tu tsʼáajoʼob u direcciónoʼob utiaʼal ka xiʼikoʼob kaʼansbil. Bey káajik u yúuchul kʼaʼaytaj ich señas tu luʼumil Estonia teʼ áakʼab jeʼeloʼ.

 Teen yéetel Maireeʼ káaj k-maas viajar Estonia utiaʼal k-kʼaʼaytaj. T-chʼaʼtuklaj xan k-menoskintik u horasil k-meyaj utiaʼal ka páajchajak k-beetik precursor regularil. Le oʼolal tu añoil 1995, t-chʼaʼtuklaj k-bin kajtal naatsʼ tiʼ u kaajil Helsinki beyoʼ maas chéen chʼaʼabil ken k-chʼaʼ le ferry ku bin Tallinoʼ. Jach maʼalob úuchik u bintoʼon teʼ kʼaʼaytaj tu luʼumil Estoniaoʼ.

 T-ilaj k-kaʼansik le bukaʼaj máakoʼob ku páajtaloʼ, 16 tiʼ le máaxoʼob t-tsʼáaj xook tiʼoboʼ okjaʼanajoʼob. Ichiloʼobeʼ yaan juntúul kiik yéetel u yíitsʼiniʼ, letiʼobeʼ kóokoʼob yéetel maʼ sáasil u paakatoʼobiʼ. Utiaʼal in tsʼáaik xook tiʼob ich señaseʼ kin machik u kʼaboʼob.

 Maʼ chéen chʼaʼabil u tsʼaʼabal xook tiʼ le máaxoʼob kóokoʼoboʼ. Teʼ kʼiinoʼob jeʼeloʼ minaʼantoʼon mix junpʼéel publicación ich señas. Le oʼolal tin kʼosaj jujunpʼéel tiʼ le jatsʼuts dibujoʼob yaan ichil le publicaciónoʼob utiaʼal in tsʼáaik xook tiʼ le máakoʼoboʼ.

 U sucursalil Finlandiaeʼ tu yaʼalajten ka in xíimbalt le países bálticos utiaʼal in wáantaj ich señasiʼ. Le oʼolaleʼ yaʼab u téenel binen Letonia yéetel Lituania utiaʼal in wáantik u testigoʼob Jéeoba u kaxtoʼob le máakoʼob kóokoʼoboʼ. Tiʼ cada luʼumeʼ maʼ igual le señas ku beetkoʼoboʼ. Yoʼolal leloʼ anchaj in kanik le señas ku beetaʼal Estonia, Letonia yéetel Lituaniaoʼ, tin kanaj xan junpʼíit señas ich ruso.

 Ocho años táan k-viajar Estonia yéetel tiʼ uláakʼ países bálticosoʼ. Pero xuʼul k-viajar tumen tiʼ Maireeʼ tsaʼay párkinson.

 Tu añoil 1997, formartaʼab junpʼéel u equipoil traducción ich señas tu sucursalil Finlandia. Como kajaʼanoʼon naatsʼeʼ páajchaj k-áantaj utiaʼal u beetaʼal jujunpʼéel publicaciónoʼob ich señas. Béeychaj k-múul meyaj xan yéetel k-hijo Marko. Ka máan kʼiineʼ letiʼ yéetel Kirsi, in wilibeʼ, páajchaj u kaʼanskoʼob uláakʼ equipoʼob ich señas tiʼ uláakʼ luʼumoʼob. Cada wa baʼax kʼiineʼ láayliʼ kin wáantik le equipo ich señas yaan tu sucursalil Finlandiaoʼ.

 Tsʼoʼoleʼ le sucursaloʼ tu yaʼalaj ka tsʼaʼabak cursos tiʼ le publicadoroʼob sáasil u xiknoʼob utiaʼal ka páajchajak u kankoʼob señasoʼ. Yoʼolal leloʼ tsʼoʼok u maas yaʼabtal le publicadoroʼob ku apoyarkoʼob le grupoʼob yéetel le múuchʼuliloʼob ich señasoʼ. Le sukuʼunoʼobaʼ jach yaʼab bix u yáantajoʼob teʼ kʼaʼaytajoʼ bey xan teʼ múuchʼuliloʼoboʼ.

 Tu añoil 2004, teen yéetel Maireeʼ áantajnajoʼon utiaʼal ka yanak le yáax múuchʼulil ich señas finlandés yaan Helsinkioʼ. Chéen ichil tres añoseʼ nojochchaj le múuchʼuliloʼ yéetel anchaj yaʼab precursoroʼobiʼ. Le sukuʼunoʼoboʼ jach u tsʼaamaj u yóoloʼobiʼ.

 Ka tsʼoʼok leloʼ t-chʼaʼtuklaj k-bin kajtal teʼ tuʼux maas kʼaʼabéet áantajoʼ. Tu añoil 2008, binoʼon kajtal Tampere, suunajoʼon teʼ grupo ich señas teʼ tuʼux anchajoʼon walajki 34 añosoʼ. Ka máan junpʼéel añoeʼ suunaj múuchʼulil, lelaʼ letiʼe u kaʼapʼéel múuchʼulil ich señas anchaj tu lu’umil Finlandiaoʼ.

 Chéen baʼaleʼ Maireeʼ maas kʼojaʼanchaji, tu añoil 2016, kíimi. Teneʼ jach tin tsʼáaj in wóol in kanáante. Kex jach taak in wilik bejlaʼeʼ in wojleʼ yaan u kʼuchul u kʼiinil in kaʼa ilik teʼ túumben luʼumoʼ, junpʼéel jatsʼuts luʼum tuʼux mix máak kun kʼojaʼantal (Isaías 33:24; Apocalipsis 21:4).

 Tsʼoʼok u máan 60 años desde káajak in kaʼansik le máaxoʼob kóokoʼoboʼ yéetel láayliʼ kin wuʼuyik jach taak in kaʼanskoʼobeʼ. Le tsʼíibolal yaantenoʼ bey jeʼex junpʼéel kʼáakʼ ku tóochʼbal ichil in puksiʼikʼaleʼ.