TERRY REYNOLDS | U KUXTAL JUJUNTÚUL TESTIGOʼOB
Jéeobaeʼ tsʼoʼok u yáantken utiaʼal in tsʼáaik táanil ichil in kuxtal
Le yaanten 14 añosoʼ, juntúul sukuʼun u kʼaabaʼ Cecileʼ tu síiajten junpʼéel Biblia, jach jatsʼuts tin wilil tumen letiʼe ku meyaj kaʼach tiʼ utiaʼal u xakʼalxookoʼ le oʼolal u tsʼíibtmaj notas tu jáal cada página.
Le sukuʼun Ceciloʼ jach kabal u yóol yéetel jach ku preocuparkuba tu yoʼolal u maasil. U ejemplo bey xan u ejemplo in maama yéetel le sukuʼunoʼob tiʼ le múuchʼuliloʼ tu yáantenoʼob utiaʼal in jach «tsʼíiboltik» in maas meyajtik Jéeoba (Filipenses 2:13). Paʼatik in jáan tsikbaltikteʼex baʼax úuchten.
In maamaeʼ jach tu tsʼáajten junpʼéel maʼalob ejemplo
Síijen tu añoil 1943, in papáʼobeʼ kajaʼanoʼob kaʼach tu kaajil Bundaberg, le kaajaʼ tiaʼan tu kaajil Queensland, Australiaeʼ. Le kaajaʼ jach kʼaj óolaʼan tumen ku paʼakʼal cañaiʼ. Le máakoʼoboʼ jach suuk u jóokʼloʼob xíimbal cada sábado. Junpʼéel u kʼiinil sábado tiʼ 1939, kaʼatúul precursoroʼobe tu tsikbaltoʼob tiʼ in papáʼob le baʼax ku yaʼalik le Bibliaoʼ. Le baʼax tu yuʼuboʼoboʼ jach kʼuch tu puksiʼikʼaloʼob, le oʼolal ka máan kʼiineʼ kʼuch u beetubaʼob u testigoʼob Jéeoba. Le oʼolal teen yéetel in kiik Jeaneʼ nojochchajoʼon ichil u kaajal Jéeoba. Le yaanten siete añosoʼ úuch junpʼéel baʼal tu beetaj u jach yaatal in wóol: accidentarnaj in papá tin wotocheʼ ka kíimi. Kex tumen tsʼoʼok u máan yaʼab añoseʼ láayliʼ kin kʼaʼajsikeʼ tumen letiʼeʼ jach meeyjil yéetel jach ku beetik k-cheʼej. ¡Jach kin tsʼíiboltik in kaʼa ilik utiaʼal in maas kʼaj óoltik! (Hechos 24:15).
In maamaeʼ jach jatsʼuts u modos. Maʼatech u kʼuuxil kéen k-aʼaltiʼ le baʼax uts t-tʼaan k-beetkoʼ bey xan le baʼax maʼ uts t-tʼaanoʼ. Pero wa junpʼéel baʼal yaan yil yéetel k-meyajtik Jéeobaeʼ leloʼ de porsí unaj k-beetik. In maamaeʼ suuk u yaʼaliktoʼoneʼ kéen chaʼabkoʼon teʼ xookoʼ maʼ unaj k-jeʼelel báaxal yéetel le paalaloʼob maʼ Testigoʼoboʼ. Tsʼoʼoleʼ maʼatech k-perdertik mix junpʼéel reunión (1 Corintios 15:33). Jach kin tsʼáaik u graciasil tiʼ in maama úuchik u líiʼskoʼon beyoʼ.
Le yaanten 14 añosoʼ.
Cada kéen béeyak tiʼeʼ ku beetik u precursora auxiliaril, kʼajaʼanteneʼ letiʼeʼ ku xíimbaltik 50 u pʼéelal najoʼob utiaʼal u pʼatik tiʼob le revista Le máax ku kananoʼ bey xan le revista ¡Aajkech! Kex tsʼoʼok u chʼíijil yéetel kʼojaʼaneʼ letiʼeʼ mantatsʼ tu yeʼesaj yaabilaj tiʼ tuláakal máak. Jach ku yeʼesik u yaabilaj tiʼ tuláakal, maases tiʼ toʼon u paalaloʼon. Jach t-yaabiltaj yéetel t-seguertaj u ejemplo. Yoʼolal leloʼ tu añoil 1958, le yaanten 14 añosoʼ tin kʼubaj in kuxtal tiʼ Jéeoba yéetel okjaʼanajen.
Jach áantaʼaben tumen in amigoʼob
Maʼ sen úuch tiʼ leloʼ okjaʼanaj Rudolf, juntúul sukuʼun Alemania u taal, kex 20 años yaan kaʼach tiʼ. Cada sábado de tempranoeʼ teen yéetel Rudolfeʼ suuk kaʼach k-predicar tiʼ le máakoʼob yaan ichil u cocheʼob táan u páaʼtik u láakʼtsiloʼob okaʼanoʼob maanoʼ.
Rudolfeʼ jach u tsʼaamaj u yóol predicar, yéetel mantatsʼ ku líiʼsik in wóol utiaʼal ka in beet in precursor auxiliaril kéen jóokʼken vacacionesoʼ. Juntéenjeakeʼ t-máansaj mes y medio táan k-predicar Gladstone, junpʼéel kaaj yaan 190 kilómetros teʼ tuʼux kajaʼanoʼonoʼ. Rudolfeʼ kin wilik bey juntúul in sukuʼuneʼ, jach jatsʼuts in wilik in biskinba tu yéetel bey xan k-múul beetik k-precursoril. Leloʼ tu beetaj in tsʼíiboltik in beetik in precursor regularil. Le oʼolal le yaanten 16 añosoʼ tin káajsaj in beetik. Teneʼ jach in kʼáat in meyajt Jéeoba tuláakal u kʼiiniloʼob in kuxtal.
Le yáax tuʼux túuxtaʼaben predicaroʼ Mackay, junpʼéel kaaj yaan jáal jaʼ, tu xamanil Bundaberg, naatsʼ teʼ tuʼux yaan le jatsʼuts arrecifeʼoboʼ wa le tuʼux kʼaj óolaʼan bey la Gran Barrera de Coral. Le ka máan junpʼéel año, le yáanten 17 añosoʼ tsʼaʼab in beet in precursor especialileʼ a ka túuxtaʼaben tu centroil Australia, junpʼéel kaaj chan nojoch pero maʼ yaʼab u kajnáaliloʼobiʼ. In compañeroeʼ juntúul sukuʼun yéeyaʼan utiaʼal u bin kaʼan, u kʼaabaʼeʼ Ben, jach u kʼaabaʼeʼ Bennett Brickell. b Letiʼeʼ 40 años ku bisikten yéetel úuch joʼopʼok u beetik u precursoril, jach junpʼéel nojoch privilegio tin wilil in múul predicar tu yéetel tumen letiʼeʼ kʼaj óolaʼan kaʼach bey «juntúul jach maʼalob precursoreʼ».
Tu añoil 1963 le táan in predicar tiʼ juntúul koʼolel sijnáal tiʼ u luʼumil Australiaoʼ.
K-predicar kaʼach Gulf Country, junpʼéel kaaj yaan tu xaman-chikʼinil Queensland, le kaajaʼ ku baʼpachtik u golfoil Carpentaria. Teʼeloʼ maʼ yaʼab máax kajaʼaniʼ, chéen teen yéetel Ben k-adorartik Jéeobaiʼ. Utiaʼal k-bin kaʼach tiʼ junpʼéel najeʼ yaʼab horas kʼaʼabéet k-viajar, tsʼoʼoleʼ le bejoʼoboʼ jach kʼaastakoʼob. Beneʼ jach uts tu tʼaan u tsikbaltikten u experienciaʼob le táan k-viajaroʼ. Por ejemploeʼ, tu tsikbaltajten bix u predicar le sukuʼunoʼob kex prohibirtaʼan teʼ Australia le táan le Segunda Guerra Mundialoʼ, letiʼobeʼ ku predicaroʼob kaʼach yéetel cocheʼob tsʼaʼan nukuch bocinaʼob tu yóokʼol. c
Teen (chúumuk) yéetel juntúul sukuʼun (x-noʼoj) táan k-tsʼáaik xook tiʼ juntúul máak tu luʼumil Australia.
Kéen tsʼoʼokok predicareʼ k-kaxtik tuʼux k-jeʼelel tu jáal le carreteraoʼ yéetel k-kaxtik xan siʼ utiaʼal k-beetik le cenaoʼ. d Utiaʼal k-weenleʼ k-jayik teepʼoʼob teʼ luʼumoʼ, uláakʼ nookʼoʼob yéetel almohadaʼob. Como jach éeʼjochʼeʼen yéetel jach náach yaniloʼon tiʼ le kaajoʼoboʼ jach jatsʼuts u yilaʼal u sáasilil le estrellaʼoboʼ, leloʼ ku beetik kaʼach in maas yaabiltik Jéeoba.
Jach peligroso u kʼastal u coche máak, maases wa jach náach yanil máak tiʼ le kaajoʼ. Juntéeneʼ káach u ejeil le coche ku meyajtoʼonoʼ tsʼoʼoleʼ jach táaj ooxol yéetel jach taʼaytak u xuʼupultoʼon jaʼ. Beneʼ tu kʼáataj tiʼ juntúul máak wa jeʼel u bisaʼal Cloncurry utiaʼal u manik u jeel le ejeoʼ. Tres días pʼáaten tin juunal in kanáant le cocheoʼ. Jujuntúul tiʼ le máaxoʼob ku máanoʼob yéetel u cocheʼoboʼ jach utsoʼob, hasta tu síijoʼobten jaʼ in wukʼe. Juntúul tiʼ letiʼobeʼ tu tsʼáajten junpʼéel libro jach láab, tu yaʼalajten: «Amigo ¡xok lelaʼ! Maʼ xaaneʼ jeʼel u yáantkecheʼ». ¡Jach jaʼakʼ in wóol ka tin wileʼ le librooʼ ku tʼaan tiʼ le sukuʼunoʼob bisaʼaboʼob teʼ campos de concentración nazioʼ!
Casi junpʼéel año táan in múul predicar yéetel Ben, le ka t-despedirtakbaeʼ letiʼeʼ tu yaʼalajten: «¡Amigo seguernak a tsʼáaik a wóoliʼ!». In wilik bix kiʼimakil u yóol Ben yéetel bukaʼaj u yaabiltmil Jéeobaeʼ jach tu yáanten utiaʼal in maas tsʼáaik in wóol in meyajt Jéeoba.
Kin bin tu escuelail Galaad, tsʼoʼoleʼ Taiwán
Ka máan wa jaypʼéel años táan in predicar Australiaeʼ tsʼaʼab in beet in superintendente tiʼ circuitoil. Leloʼ u kʼáat u yaʼaleʼ cada semanaeʼ yaan in xíimbaltik jejeláas congregaciónoʼob wa grupoʼob. Tin xíimbaltaj 4 circuitoʼob, ichiloʼobeʼ táakaʼan u congregacióniloʼob Queensland yéetel Nueva Gales del Sur. Tu añoil 1971, úuch junpʼéel baʼal jach jatsʼuts maʼ táan in páaʼtikiʼ, invitartaʼaben tiʼ le xook 51 tiʼ Galaad ku beetaʼal Nueva Yorkoʼ, lelaʼ junpʼéel xook ku beetaʼal tumen u testigoʼob Jéeoba utiaʼal u preparartaʼal le misioneroʼoboʼ. Jach tin disfrutartaj le 5 meses ku xáantal le xookoʼ, yaʼab jatsʼuts baʼaloʼob tin kanaj tiʼ le Bibliaoʼ, tiʼ in wéet xookoʼoboʼ bey xan tiʼ le instructoroʼoboʼ. Tuláakal leloʼ tu prepararten utiaʼal in túumben asignación: in beetik in misioneroil Taiwán.
Le ka binen tu Escuelail Galaadoʼ.
Tiʼ le xookoʼ nueve u túulaloʼonoʼ túuxtaʼaboʼon Taiwán, ichiloʼobeʼ tiaʼan sukuʼun Ian Browniʼ, letiʼeʼ Nueva Zelandail yéetel túuxtaʼab tin wéetel. Jach junpuliʼ mix baʼal k-ojel yoʼolal Taiwán, mix k-ojel tuʼux pʼáatliʼ le oʼolal anchaj k-kaxtik tiʼ junpʼéel mapa.
Jach jelaʼan bix u kuxtal le máakoʼob yanoʼob Taiwán tiʼ le máaxoʼob yanoʼob Queenslandoʼ. Le yáax baʼax difícilchajtoʼonoʼ letiʼe k-kanik chinooʼ. Por ejemploeʼ xáanchaj jach mix baʼal k-naʼatik tiʼ le reuniónoʼoboʼ, tsʼoʼoleʼ jach letiʼe baʼax kʼaʼabéettoʼon utiaʼal u muʼukʼaʼantal k-fejoʼ. Maʼ tu páajtal kaʼach mix k-tsikbal yéetel le sukuʼunoʼoboʼ. Le baʼaxoʼob áantoʼon utiaʼal maʼ u jach lúubul k-óoloʼ letiʼe xook tsʼaʼabtoʼon Galaadoʼ, k-xokik le Bibliaoʼ yéetel k-sen orar tiʼ Jéeoba. Tsʼoʼoleʼ kex maʼ tu páajtal k-jach tsikbal yéetel le sukuʼunoʼoboʼ, k-ilik bix u yaabiltmiloʼob Jéeoba bey xan bix u yeʼeskoʼobtoʼon yaabilajeʼ leloʼ jach tu líiʼsaj xan k-óol.
Kin kanik chino
Tuláakal le misioneroʼob ku túuxtaʼaloʼob Taiwánoʼ ku tsʼaʼabaltiʼob junpʼéel curso utiaʼal u kanikoʼob chino. Toʼoneʼ tsʼaʼabtoʼon le curso tumen juntúul kiik ku kʼaabaʼtik Kathleen Logan, e letiʼeʼ Australiail yéetel tu graduartuba tiʼ le xook 25 tiʼ Galaadoʼ. Jach t-tsʼáaj k-óol utiaʼal k-kanik le idiomaoʼ. Yéetel t-ilaj k-practicartik tu séebaʼanil le baʼax ku kaʼansaʼaltoʼonoʼ. Teen yéetel Ianeʼ t-kanaj junpʼéel presentación de memoria utiaʼal k-predicar tiʼ le máakoʼoboʼ, le táan k-bin teʼ territoriooʼ táan kaʼach k-paklan aʼalik máax kun yáax tʼaan, como teen u maas nojchileʼ tin waʼalaj tiʼ óotsil Ianeʼ letiʼ kun yáax tʼaan. Le ka tʼaanaj tiʼ junpʼéel najeʼ jóokʼ juntúul chino jach maʼalob bix u vestirmiluba, kex xaʼakʼaʼan inglés yéetel chino u tʼaan Ianeʼ jach maʼalob úuchik u yuʼubaʼal tumen le máakoʼ. Jach jaʼakʼ k-óol ka t-uʼuyaj u yaʼalik le máak ich inglés baʼax k-kʼáat k-tsikbalt tiʼoʼ. Xáanchaj táan k-tsikbal tu yéetel, tsʼoʼoleʼ tu tsʼookeʼ tu yaʼalajtoʼon maʼ u xuʼulul k-kanik le idiomaoʼ, le baʼax tu yaʼalaj toʼonoʼ jach tu yáantoʼon utiaʼal ka seguernak k-tsʼáaik k-óol k-kan le idiomaoʼ. Kʼaʼajten baʼax tu yaʼalajten in amigo Ben.
K-predicar kaʼach tu noj kaajil Taipéi. Como maʼ yaʼab sukuʼunoʼob teʼeloʼ maʼ jach predicartaʼan le territoriooʼ, leloʼ maʼ tu lúuʼsaj k-óoliʼ baʼaxeʼ t-maas tsʼáaj k-óol. Cada meseʼ u cientosil revistaʼob k-tʼoxik. U jaajileʼ le máakoʼoboʼ chéen ku chʼaʼikoʼob le revistaʼoboʼ tumen taak u yojéeltikoʼob máaxoʼoniʼ yéetel baʼax k-beetik, kex beyoʼ toʼoneʼ seguernaj k-tsikbaltik u Reino Dios utiaʼal k-kaxtik le máaxoʼob uts u puksiʼikʼaloʼoboʼ.
Tin kaxtaj máax yéetel kun tsʼoʼokol in beel
Teen yéetel Wen-hwa le táan k-predicar tu añoil 1974.
Tin kʼaj óoltaj Wen-hwa, juntúul kiik Taiwáni, letiʼeʼ jach u yaabiltmaj Jéeoba yéetel u kʼáat xan u yáant le máakoʼob u kʼaj óoltoʼob baʼax ku kaʼansik le Bibliaoʼ. Le oʼolal jach tu yáantoʼon utiaʼal k-kanik le idiomaoʼ. Yoʼolal bix u modoseʼ jach utschaj tin wich, le oʼolal tsʼoʼok in beel tu yéetel tu añoil 1974.
Wen-hwaeʼ jach tu yáantoʼon utiaʼal k-maas maʼalobkíintik bix k-predicar, letiʼeʼ tu kaʼansajtoʼon bix u tuukul le máakoʼoboʼ yéetel baʼax suuk u beetkoʼob, beyoʼ kéen predicarnakoʼoneʼ k-ojel baʼax ken aʼal tiʼ le máakoʼoboʼ tumen yaʼab tiʼ letiʼobeʼ budistaʼob wa taoístaʼob. Teʼ kaajoʼ jach suuk u adorartaʼal le kimenoʼoboʼ tsʼoʼoleʼ maʼ yaʼab máakoʼob xokik le Bibliaoʼ, hasta yaneʼ mix u kʼaj óoloʼobiʼ. Le oʼolal t-kaʼansaj tiʼ le máakoʼob Máax beetmil tuláakal baʼal, t-kaʼansaj tiʼobeʼ u kʼaabaʼeʼ Jéeoba yéetel yaʼab baʼaxoʼob eʼesik jach tu jaajil yaan. Por ejemploeʼ wa juntúul j-kolnáal wa j-chuk kay ku yaʼalik, «chéen yoʼolal le cháak ku kʼáaxal teʼ kaʼan k-janaloʼ» toʼoneʼ k-kʼáatiktiʼ: «¿Máax ta tʼaan beetik u kʼáaxal le cháakoʼ, yaan wa ta tʼaan juntúul Dios beetmil tuláakal baʼal yéetel ku náajmatik u adorartaʼal?».
Teen yéetel Wen-hwa tu añoil 1975.
Ka máan kʼiineʼ t-ilaj u yutsil le meyaj k-beetkoʼ tumen le máakoʼoboʼ káaj u kʼamkoʼob le baʼax k-predicartikoʼ. Jujuntúuloʼobeʼ anchaj u beetkoʼob nukuch kʼeexoʼob utiaʼal u pʼatkoʼob le maʼ jaajil kaʼansajoʼoboʼ. Baʼaleʼ yéetel u yáantaj le misioneroʼob bey xan le publicadoroʼoboʼ páajchaj u kʼexik u kuxtaloʼob (Juan 8:32). Yaʼab sukuʼunoʼob tsʼaʼab u beet u ancianoiloʼob wa u ministerialiloʼob. Yanchaj xan yaʼab sukuʼunoʼob yéetel kiikoʼob tu maas tsʼáaj u yóol u meyajtoʼob Jéeoba, yaneʼ hasta binoʼob áantaj tu Betelil Taiwán.
Tu añoil 1976, kex táan in beetik in misioneroileʼ invitartaʼaben utiaʼal ka táakpajken ichil Comité de Sucursal yaan Taiwánoʼ. Pero tu añoil 1981, invitartaʼaben yéetel Wen-hwa, in watan, utiaʼal xiʼikoʼon meyaj Betel. Máan yaʼab años tiaʼanen ichil le comitéoʼ. Tsʼoʼok maas tiʼ 60 años káajak in meyajtik Jéeoba de tiempo completo, maas tiʼ 50 añoseʼ tu luʼumil Taiwán. Ichil le bukaʼaj años jeʼeloʼ u maas yaʼabileʼ múul meyajnajen yéetel in x-kiʼichpan atan. In amigo Ian Browneʼ seguernaj u meyajtik Jéeoba tu kaajil Taiwán tak ka kíim tu añoil 2013.
Le táan in meyaj tu Sucursalil Taiwán tu añoil 1997.
Teen yéetel in wataneʼ k-beetik tuláakal le ku páajtal utiaʼal k-meyaj Betel, teʼ múuchʼulil tuʼux yanoʼonoʼ bey xan teʼ kʼaʼaytajoʼ. K-tsʼáaik u graciasil tiʼ Jéeoba ikil u tsʼáaiktoʼon u jatsʼuts privilegioil k-meyajtik. Desde tin paalileʼ Jéeobaeʼ tu tsʼáajten u tsʼíibolalil bey xan u muukʼil utiaʼal in maas meyajtik, yéetel bejlaʼeʼ kex tsʼoʼok u yantal k-edadeʼ láayliʼ táan u yáantkoʼon utiaʼal ka seguernak k-meyajtik yéetel tuláakal k-puksiʼikʼaleʼ.
a Le precursor especialoʼ juntúul máax jach u tsʼaamaj u yóol u meyajt Dios yéetel ku bin áantaj jeʼel tuʼuxak ka aʼalaʼaktiʼ tumen u sucursalil u testigoʼob Jéeobaeʼ.
b U tsikbalil u kuxtal Bennett Brickelleʼ jóokʼ tiʼ U Pʼiich Tulumil Kanan ich español 15 tiʼ febrero tiʼ 1974.
c Cocheʼob tsʼaʼan nukuch bocinaʼob tu yóokʼol utiaʼal u páajtal u yuʼubaʼal tak náach le baʼax ku kaʼansaʼal yoʼolal u Reino Diosoʼ.
d Utiaʼal a wojéeltik bix u yúuchul predicar tu kaajil Gulf Countryeʼ, chaʼant le video Predicación en lugares apartados: Australia.
e U tsikbalil u kuxtal Harvey yéetel Kathleen Loganeʼ jóokʼ tiʼ U Pʼiich Tulumil Kanan enero tiʼ 2021.