Óoliʼ tres años xáanchaj le guerra tu luʼumil Españaoʼ yéetel tu beetaj u muʼyaj yaʼab máakoʼob. Kex in papá jach católico kaʼacheʼ jach lúub u yóol ka tu yilaj bix u yoksikuba le sacerdoteʼob teʼ guerraoʼ, le oʼolal maʼ tu yóotaj ka okjaʼanaken teen yéetel in sukuʼun teʼ Iglesia católicaoʼ.

 Tu añoil 1950, kaʼatúul u testigoʼob Jéeobaeʼ taaloʼob tu jool in wotoch. In papáeʼ tu yuʼubaj baʼax tu yaʼaloʼob ka tu yóotaj xook cada semana tu yéeteloʼob. Teʼ kʼiinoʼob jeʼeloʼ 14 años yáanten yéetel chéen tiʼ fútbol kin tuukul. In papáeʼ u kʼáat kaʼach ka in xok le publicaciónoʼob ku pʼaʼatal tiʼoʼ pero teneʼ maʼ in kʼáat in beetiʼ. Juntéenjeak táan in suut tin wotoch tsʼoʼok in báaxaleʼ, tin kʼáataj tiʼ in maama: «Maami, ¿way wa yaan tu kaʼatéen le máaxoʼob xokik le Bibliaoʼ?». Letiʼeʼ tu yaʼalaj: «Jaaj, tiaʼanoʼob teʼ yéetel a papáoʼ». Chéen pʼel tin wuʼuyileʼ ka lukʼen tin wotoch. Kex teen maʼ uts tin tʼaan in xokik le Bibliaoʼ, in papáeʼ seguernaj u xook.

 In papáeʼ jach tu yaabiltaj le baʼaxoʼob táan u kanikoʼ, le oʼolal tu añoil 1953, okjaʼanaji. Le ka tsʼoʼok u yokjaʼeʼ taakchaj in maas kaanbal ka júupen in beettiʼ preguntas, hasta tin kʼáataj junpʼéel Biblia. In papáeʼ tu kʼáataj ka tsʼaʼabakten xook tumen juntúul xiʼipal ku kʼaabaʼtik Máximo Murcia. Dos años káajak in xook ka okjaʼanajen teʼ río Jarama yaan tu lakʼinil Madridoʼ, teʼ kʼiinoʼoboʼ 19 años yaanten.

 Desde tu añoil 1950, káaj u difíciltal u yúuchul kʼaʼaytaj yéetel u muchʼkuba máak. Francisco Franco, le máax gobernartik Españaoʼ, u kʼáat kaʼach ka u beetuba católico tuláakal máak. Le oʼolal joʼopʼ u chʼaʼpachtaʼal le Testigoʼob tumen le policíaoʼ. Taʼakumbail k-muchʼikba tu yotoch le sukuʼunoʼoboʼ yéetel k-taʼakikba tiʼ le vecinoʼoboʼ utiaʼal maʼ u takikoʼob k-pool tiʼ le policíaoʼ. Le kéen jóokʼkoʼon kaʼach kʼaʼaytaj joonaj joonajileʼ k-yéeyik kaʼapʼéel wa óoxpʼéel naj, le kéen tsʼoʼokkeʼ k-bin tiʼ uláakʼ colonia. Kex yaʼab máaxoʼob uʼuyikoʼoneʼ, yaan máaxoʼobeʼ maʼ uts tu tʼaanoʼobiʼ.

 Kʼajaʼanteneʼ juntéenjeakeʼ tʼaanajoʼon yéetel juntúul sacerdote. Le ka tin tsolajtiʼ baʼax bijaʼanoʼon k-beeteʼ tu kʼáatajtoʼon: «¿Máax túun tsʼáatech permiso? Maʼ wa a wojleʼex jeʼel in takik a pooleʼex tiʼ le policíaoʼ». Tin waʼalajtiʼeʼ k-ojel de ke le jeʼeloʼ jeʼel u yúuchleʼ. Ka xan tin waʼalajtiʼ: «Wa Jesús óotaʼab kʼalbileʼ bey xan jeʼel u yúuchul tiʼ le máaxoʼob beetik le baʼax ku yaʼalikoʼ». Le sacerdoteoʼ jach tsʼíikilnaj yoʼolal le baʼax tin waʼalajtiʼoʼ ka ook u tʼan le policía tiʼ teléfonooʼ. Le ka tin wileʼ lakchaj in wáalkab.

 Teʼ kʼiin jeʼeloʼ maʼ yaʼab j-kʼaʼaytajoʼob yaan tu luʼumil Españaiʼ. Kex yaan máaxoʼob u pʼekmoʼonoʼob jeʼex le sacerdoteoʼ yaʼab tiʼ le máakoʼob taak u kaanbaloʼob tiʼ le Bibliaoʼ. Tu mesil febrero tiʼ 1956, le yaanten 19 añosoʼ, tsʼaʼab in beet in precursor especialil. a Óoliʼ tuláakal le precursoroʼob jeʼex tenoʼ táankelmoʼon kaʼachi, le oʼolaleʼ jach kʼaʼabéet k-kaʼansaʼal yéetel u líiʼsaʼal k-óol. U maʼalobileʼ yaan kaʼach misioneroʼob utiaʼal u yáantkoʼonoʼob. Teneʼ túuxtaʼaben yéetel uláakʼ precursor tu kaajil Alicante. Teʼeloʼ todavía maʼ káajak kaʼach u yúuchul kʼaʼaytajiʼ. Jach maʼalob úuchik u bintoʼon tumen ka máan wa jaypʼéel mesoʼobeʼ tsʼokaʼaniliʼ k-káajsik xook yéetel yaʼab máakoʼobeʼ yéetel tsʼoʼok k-pʼatik xan yaʼab publicaciónoʼob.

 Chéen baʼaleʼ maʼ xáanchaj ka tsʼaʼab cuenta táan k-kʼaʼaytajiʼ. Le policíaʼoboʼ tu machoʼonoʼob ka tu tokoʼob toʼon tuláakal le Bibliaʼob yaantoʼonoʼ. Treintitrés días kʼaʼaloʼon cárcel, ka tsʼoʼokeʼ bisaʼaboʼon tu kaajil Madrid yéetel tiʼ chaʼaboʼoniʼ. Chéen baʼaleʼ le baʼax úuchtoʼonaʼ mix baʼal tu tséel le bukaʼaj baʼaloʼob úuchtoʼon ka tsʼoʼokoʼ.

 Le ka tu tsʼáajten 21 añoseʼ tʼaʼanen utiaʼal in beetik in servicio militar. Aʼalaʼabten ka xiʼiken teʼ cuartel militar yaan tu kaajil Nadoroʼ. Le kaajaʼ kex tiaʼan tu luʼumil Marruecoseʼ gobernartaʼan kaʼach tumen España. Ka kʼucheneʼ tin waʼalaj tiʼ u nojchil le soldadoʼoboʼ maʼ tin okol ichil le ejércitooʼ yéetel maʼ ten in tak le uniformeoʼ. Le soldadoʼoboʼ tu bisenoʼob tu kaajil Melilla, tiʼ junpʼéel cárcel ku kʼaabaʼtik Rostrogordo. Teʼeloʼ tiʼ kin pʼáatal kaʼach hasta ken juzgartaʼakeniʼ.

 Le tiaʼanen teʼeloʼ u nojchil le soldadoʼoboʼ tu sen beetaj in muʼyaj utiaʼal ka in beet in servicio militar. Le soldadoʼoboʼ máan 20 minutos táan u pochʼkenoʼob, u jaʼajatsʼkenoʼob yéetel u kóochaʼkenoʼob hasta ka lúuben. Le capitán túunoʼ tu yáaʼchaʼataj in pool yéetel u botas tak ka joʼopʼu jóokʼol u kʼiʼikʼel in pool. Ka tsʼoʼokeʼ bisaʼaben tu oficina, letiʼ túuneʼ tu yawtajten: «¡Mix a chéen tuklik wa tsʼoʼok beyaʼ! ¡Sáamaleʼ yaan uláakʼ!». Ka tsʼoʼokeʼ tu yaʼalaj tiʼ le soldadoʼob ka u bisenoʼob kʼalbil tiʼ junpʼéel cuarto beetaʼan yáanal luʼum. Teʼ tuʼux tsʼaʼabenoʼ chʼuul yéetel éeʼjochʼeʼen. Teneʼ tin wuʼuyaj jach tsʼoʼokten beyoʼ.

 Todavía kʼajaʼanten le pekekbalen teʼ luʼum táan u jóokʼol u kʼiʼikʼel in pooloʼ. Chéen junpʼéel chan sábana yaanten tsʼoʼoleʼ mix máak kin wilik. Chéen chʼoʼob ku máanoʼob teʼ tuʼux yanen kaʼachoʼ. Le tiaʼanen teʼeloʼ maʼ xuʼul in sen kʼáatik tiʼ Jéeoba ka u tsʼáaten u muukʼil in aguantartik le baʼaxoʼob ku yúuchultenoʼ. b

 Tuláakʼ kʼiineʼ jóoʼsaʼaben utiaʼal in kaʼa jaʼajatsʼaʼal tumen le soldadoʼoboʼ. Le capitánoʼ chéen waʼalakbal u chaʼant in jaʼajatsʼaʼal. U jaajileʼ tin wuʼuyaj maʼ tun páajtal u seguer in aguantartik, le oʼolaleʼ teʼ áakʼaboʼ tin sen kʼáataj tiʼ Jéeoba ka u yáanten.

 Tu yóoxpʼéel kʼiinileʼ bisaʼaben tu kaʼatéen tu oficina le capitánoʼ. Le táan in bisaʼaloʼ jach sajakchajen le oʼolaleʼ joʼopʼ in sen orar tiʼ Jéeoba. Le ka kʼucheneʼ tiaʼan don Estebaniʼ, juntúul juez taal utiaʼal u káajsik le juiciooʼ.

 Le ka tu yilaj don Esteban vendartaʼan in pooleʼ tu kʼáatajten baʼax úuchten. Tu káajbaleʼ maʼ in kʼáat in waʼaltiʼ baʼax úuchteniʼ tumen saajken in kaʼa jaʼajatsʼaʼal pero tu tsʼookeʼ tin láaj aʼalajtiʼ. Le ka tu yojéeltaj baʼax beetaʼabteneʼ tu yaʼalajten: «Deporsi yaan u beetaʼal a juicio pero kin asegurartiktech mix máak ken u kaʼa jaʼajatsʼech».

 Jach béeychaj le baʼax tu yaʼalaj don Estebanoʼ tumen tiʼ le bukaʼaj tiempo anchajen teʼ cárceloʼ mix máak kaʼa jaʼajatsʼen. Tak bejlaʼa maʼ in wojel baʼaxten taal le juez teʼ kʼiinoʼ chéen baʼaleʼ in wojel táan u núukaʼal kaʼach in oración tumen Jéeoba. Tin tsʼáaj cuenta bix tu yáantilen Jéeoba le táan in muʼyajoʼ yéetel maʼ tu chaʼaj in probartaʼal maas tiʼ le ku páajtal in muʼyajtikoʼ (1 Corintios 10:13). Le oʼolaleʼ le ka kʼuch u kʼiinil in juzgartaʼaleʼ jach maʼ saajkeniʼ.

 Aʼalaʼab yaan in kʼaʼalal 19 años tsʼoʼoleʼ tsʼaʼabten uláakʼ 3 años tumen maʼ bin tin wuʼuyik tʼaan. Quince meses tin beetaj tu cárcelil Marruecos. Tsʼoʼoleʼ bisaʼaben tu cárcelil Ocaña, maʼ náach tiʼ Madrid, Españaiʼ. Le cárcel tuʼux bisaʼabenoʼ tin wilaj bey junpʼéel bendición ku taal tiʼ Jéeobaeʼ tumen jach maʼ chíikaʼan tiʼ le tuʼux yanen kaʼachoʼ. Teʼ cuarto tuʼux kʼaʼalenoʼ yaan junpʼéel camaiʼ yéetel sábanas. Ka máan kʼiineʼ tsʼaʼaben meyaj tiʼ contabilidad teʼ cárceloʼ. Pero kex beyoʼ yaan kʼiineʼ jach chéen tin juunal in wuʼuyikinba. Junpʼéel tiʼ le baʼaloʼob jach ku beetik u yaatal in wóol kaʼachoʼ letiʼe maʼ u páajtal in wantal yéetel le sukuʼunoʼoboʼ. Kex in papáʼob ku taal u yilenoʼob teʼ cárceloʼ láayliʼ tin juunal in wuʼuyikinbaeʼ.

 In papáʼobeʼ tu yaʼaloʼobteneʼ yaan uláakʼ sukuʼunoʼob maʼ tu yóotaj u beet u servicio militaroʼobiʼ. Le oʼolal tin kʼáataj tiʼ Jéeoba ka u túuxt kex juntúul tiʼ le sukuʼunoʼob teʼ cárcel tuʼux kʼalaʼanenoʼ. Jéeobaeʼ tu kaʼa núukaj le baʼax tin kʼáatajtiʼoʼ. Tsʼoʼok kaʼach u máan 4 años chéen tin juunal teʼ cárceloʼ. Maʼ úuch tiʼ leloʼ kʼuch teʼ tuʼux yanen óoxtúul sukuʼunoʼob jach espiritualoʼoboʼ, Alberto Contijoch, Francisco Díaz, yéetel Antonio Sánchez. Beoraaʼ yaan uláakʼ máax yéetel in xook bey xan in kʼaʼaytaj tiʼ u maasil máakoʼob kʼalaʼanoʼoboʼ.

 Kex aʼalaʼab yaan in kʼaʼalal 22 añoseʼ, chéen seis años y medio tin beetaj cárcel. Chaʼab in jóokʼol tu añoil 1964. Le ka chaʼabenoʼ kex chéen junpʼíit taakʼin yaanteneʼ tin boʼotaj junpʼéel taxi utiaʼal u bisken Madrid utiaʼal ka kʼuchken teʼ reuniónoʼ. Jach kiʼimakchaj in wóol úuchik in kaʼa antal yéetel le sukuʼunoʼoboʼ. Chéen baʼaleʼ in kʼáat in kaʼa séeb chʼaʼjoʼolt in beetik in precursoril. Kex le policíaʼob láayliʼ ku chʼaʼpachtikoʼoneʼ le máakoʼoboʼ uts tu tʼaan u yuʼubikoʼob baʼax ku yaʼalik le Bibliaoʼ, le oʼolaleʼ yaʼab meyaj yaan kaʼach utiaʼal beetbil.

 Teʼ kʼiinoʼoboʼ tin kʼaj óoltaj Mercedes, juntúul precursora especial jach humilde, jatsʼuts u modos yéetel uts tu tʼaan u kʼaʼaytaj. Toʼoneʼ káaj k-bisikba yéetel ka máan junpʼéel añoeʼ tsʼoʼok k-beel. Junpʼéel nojoch bendición tu tsʼáajten Jéeoba úuchik u tsʼoʼokol in beel yéetel Mercedes.

 Ka máan jujunpʼéel meses tsʼoʼokok k-beeleʼ invitartaʼaben utiaʼal in beetik in superintendenteil. Yoʼolal leloʼ páajchaj k-muchʼikba yéetel k-kʼaʼaytaj yéetel jejeláas sukuʼunoʼob cada semana. Tu luʼumil Españaeʼ táan kaʼach u yaʼabtal le múuchʼuliloʼoboʼ, le oʼolaleʼ kʼaʼabéet u yáantaʼal yéetel u líiʼsaʼal u yóol le sukuʼunoʼoboʼ. Teʼ kʼiinoʼoboʼ prohibirtaʼab u religión u testigoʼob Jéeoba, kex beyoʼ seguernaj u meyaj le sucursal tiʼ junpʼéel naj yaan kaʼach Barcelonaoʼ. Teneʼ anchajten u privilegioil in bin áantajiʼ.

 Tu añoil 1967, le gobierno yaan Españaoʼ tu chaʼaj k-kaʼa muchʼikba yéetel k-kʼaʼaytaj, yéetel tu añoil 1970, reconocertaʼab u testigoʼob Jéeoba bey religióneʼ. Yoʼolal leloʼ xuʼul k-chʼaʼpachtaʼal, béeychaj u yantal lugaroʼob utiaʼal k-muchʼikba yéetel u yantal junpʼéel sucursal.

 Tu añoil 1971, invitartaʼaboʼon meyaj tu túumben sucursalil Barcelona. Chéen baʼaleʼ junpʼéel año káajak k-meyajeʼ Mercedeseʼ pʼáat embarazadail ka síij chan k-hija Abigail. Toʼoneʼ anchaj k-pʼatik Betel ka anchajtoʼon junpʼéel túumben asignación: k-kanáantik chan k-hija.

 Ka chan nojochchaj Abigaileʼ le sucursaloʼ tu kʼáatajten wa jeʼel in meyaj tu kaʼatéen bey superintendente tiʼ circuitoeʼ. Toʼoneʼ orarnajoʼon tiʼ Jéeoba ka t-kʼáataj consejo tiʼ jujuntúul sukuʼunoʼob espiritualoʼob. Juntúul ancianoeʼ tu yaʼalajten: «Jesús wa táan a kaʼa invitartaʼaleʼ kʼaʼabéet a aceptartik». Le túumben asignaciónaʼ tu beetaj u jach kiʼimaktal k-óol. Tu káajbaleʼ k-xíimbaltik múuchʼuliloʼob naatsʼ teʼ tuʼux kajaʼanoʼonoʼ utiaʼal u páajtal u seguer k-kanáantik Abigail. Ka maas nojochchajeʼ béeychaj k-kʼubik k-óol utiaʼal k-maas meyajtik Jéeoba.

 Máan 23 años táan in beetik in superintendenteil tiʼ circuito. Jach t-disfrutartaj le meyajaʼ tumen yéetel le baʼaxoʼob tsʼoʼok u yúuchulten ichil in kuxtaloʼ béeychaj in líiʼsik u yóol le táankelmoʼoboʼ. Tsʼoʼok xan u yantalten u privilegioil in kaʼansaj teʼ escuelaʼob ku beetaʼal utiaʼal le ancianoʼoboʼ bey xan tiʼ uláakʼ escuelaʼob yaan ichil u kaajal Jéeobaoʼ. Yaan horaeʼ hasta tiʼ ku tsʼaʼabaltoʼon hospedaje tu Betelil Madrideʼ. Le sucursaloʼ chéen tres kilómetros yanil tiʼ le río Jarama tuʼux okjaʼanajen tu añoil 1955. Jach junpuliʼ maʼ tin tuklaj wa yaan in suut teʼ banda utiaʼal in wáantik uláakʼ sukuʼunoʼob yéetel kiikoʼob utiaʼal u maas meyajtikoʼob Jéeobaoʼ.

 Tu añoil 2013, kaʼa tsʼaʼaboʼon meyaj bey precursoroʼon especialoʼoneʼ. Kex maʼ chéen chʼaʼabil úuchik u xuʼulul in beetik in viajanteileʼ u jaajileʼ maas maʼalob tumen teʼ tu tsʼook añosaʼ tsʼoʼok in kʼojaʼantal. Por ejemploeʼ anchajten junpʼéel kʼojaʼanil tin puksiʼikʼaleʼ ka operartaʼaben. Teʼ súutukoʼoboʼ tin kʼáataj u yáantaj Jéeoba yéetel jeʼex suukileʼ letiʼeʼ tu núukaj in oración. In watan Mercedeseʼ jach tsʼoʼok u yáantken yéetel tsʼoʼok u máan 56 años joʼopʼok k-meyajtik Jéeoba. Jach maʼalob compañera tu tsʼáajten Jéeoba.

 Maʼ tu tuʼubulten le kʼiinoʼob kin kaʼansaj teʼ escuelaʼoboʼ. Le kéen in wil le sukuʼunoʼob táankelmoʼob bix kiʼimakil u yóoloʼoboʼ ku kʼaʼajalten bey in wuʼuyikinba ka káaj in meyajtik Jéeobaoʼ. Kex yaʼab baʼaloʼob difíciltak tsʼoʼok in aktáantikeʼ, yaʼab baʼaloʼob jatsʼutstak tsʼoʼok xan in disfrutartik ichil in kuxtal. Tak teʼ kʼiinoʼob táan in muʼyajoʼ yaʼab baʼaloʼob tin kanaj. Por ejemploeʼ tin kaneʼ maas maʼalob ka confiarnaken tiʼ Jéeoba maʼ tiʼ le baʼax kin tuklikoʼ. Jach kin tsʼáaik gracias tiʼ Jéeoba úuchik u tsʼáaikten u muukʼil utiaʼal u chúukpajal in wóol tak teʼ kʼiinoʼob jach táan in muʼyajoʼ (Filipenses 4:13).