U nuuktakiloʼob le gobierno bey xan le organizaciónoʼob internacionaloʼoboʼ maʼ béeyak u taaskoʼob jeetsʼeliliʼ. Teʼ kʼiinoʼobaʼ tsʼoʼok u maas yaʼabtal le guerraʼoboʼ, desde tsʼoʼokok le Segunda Guerra Mundialoʼ mix juntéen ilaʼak le baʼaxoʼob ku yúuchlaʼ. Kex 2,000 millones máakoʼob, u cuarta parteil tiʼ tuláakal le máaxoʼob kajaʼanoʼob tiʼ tuláakal yóokʼol kaaboʼ, jach ku afectartaʼaloʼob yoʼolal le baʼateloʼoboʼ.

 ¿Baʼaxten wíinikeʼ maʼ páajchajak u taasik jeetsʼeliliʼ? ¿Baʼax ku yaʼalik le Biblia yoʼolal leloʼ?

1.  1. Le máakoʼoboʼ tsʼoʼok u jach kʼastal u modosoʼob le oʼolal maʼ tu páajtal u yantaltiʼob jeetsʼelil. Le Bibliaoʼ u yaʼalmiliʼeʼ teʼ kʼiinoʼobaʼ ‹le máakoʼoboʼ yaan u kaxtikoʼob chéen u yutsiloʼob, yaan u yaabiltikoʼob taakʼin, yaan u creerkubaʼob, yaan u kaʼantal u yichoʼob, yaan u xúumpʼatkoʼob u amigoʼob, junpuliʼ maʼ ken u yóotoʼob u tsʼáaubaʼob de acuerdoil, maʼ ken u kan u controlartubaʼob, jach yaan u tsʼíiktaloʼob, yaan u tercotaloʼob yéetel yaan u taaskubaʼob jach nojbaʼalil› (2 Timoteo 3:2-4).

2.  2. Wíinikeʼ tak ka u muchʼuba yéetel u maasileʼ maʼ tu páajtal u yutskíintik le problemas yaantiʼoʼ, kʼaʼabéet u yáantaj Jéeoba a Dios tiʼ, le Máax beetmiloʼ. Le Bibliaoʼ ku yaʼalikeʼ «máakeʼ maʼ tu páajtal mix tak u yéeyik tuʼux kun xíimbal» (Jeremías 10:23).

3.  3. Le yóokʼol kaabaʼ táan u nuʼuktaʼal tumen Satanás, le Kʼaasilbaʼaloʼ, letiʼeʼ jach kʼasaʼan yéetel yaan u poder. Tsʼoʼoleʼ ‹táan u tusik tuláakal yóokʼol kaab› (Apocalipsis 12:9). Mientras ‹u túulisil yóokʼol kaab tiaʼan yáanal u páajtalil le Kʼaasilbaʼaloʼ› yaan u seguer u yantal problemas yéetel guerraʼob (1 Juan 5:19).

 Le Bibliaoʼ ku yaʼalikeʼ chéen Dios kun taasik jeetsʼelil, maʼ wíinikiʼ.

•   «Jéeobaeʼ ku yaʼalik: ‹Teneʼ in wojel baʼax ken in beet ta woʼolaleʼex, maʼ ken in taas kʼaas ta wóokʼoleʼex, baʼaxeʼ yaan in beetik u yantalteʼex jeetsʼelil, utiaʼal ka xiʼikteʼex maʼalobil yéetel utiaʼal ka béeychajak le baʼax ka páaʼtkeʼexoʼ›» (Jeremías 29:11).

 ¿Bix túun ken u cumplirtil Dios le promesaaʼ? Le Bibliaoʼ ku yaʼalik: «Le Dios túun ku tsʼáaik jeetsʼeliloʼ maʼ kun xáantaleʼ yaan u púuʼchaʼatik Satanás» (Romanos 16:20). Jéeobaeʼ yaan u beetik u yantal jeetsʼelil kéen u taas u gobierno way Luʼumeʼ, le gobiernoaʼ letiʼe ‹u Reino Dios› ku yaʼalik le Bibliaoʼ (Lucas 4:43). Jesucristo kun nuʼuktik le Reinooʼ, letiʼeʼ yaan u beetik u yantal jeetsʼelil tiʼ tuláakal máak (Isaías 9:6, 7).

•   Utiaʼal a wojéeltik u maasileʼ ilawil le xook «¿Baʼax ken u beet u Reino Dios?».