Le baʼaxoʼob táan u yúuchul Ucraniaoʼ ku yeʼesikeʼ u nuuktakil le religiónoʼoboʼ ku apoyarkoʼob le guerraoʼ. Ilawil baʼax ku yaʼalik u nuuktakil le religiónoʼoboʼ:

•   «Jach k-apreciartik yéetel k-tsʼáaik u graciasil tiʼ tuláakal le máaxoʼob táan u defenderkoʼob Ucraniaoʼ […]. Mantatsʼ táan k-orar ta woʼolaleʼex, maʼ ken k-pʼateʼex ta juunaleʼex» (metropolitano Epifanio I de Kiev, The Jerusalem Post, 16 tiʼ marzo tiʼ 2022).

•   «Teʼ domingo máanikaʼ u nojchil le Iglesia ortodoxa yaan Rusiaoʼ tu tsʼáaj junpʼéel misa especial utiaʼal le soldadoʼob rusoʼoboʼ. Teʼeloʼ animartaʼaboʼob utiaʼal ka seguernak u defendertik u luʼumoʼob ‹jeʼex suukil u beetik Rusiaeʼ›. Tak beoraeʼ u noj kaajil Moscúeʼ láayliʼ táan u túuxtik soldadoʼob tu kaajil Ucraniaeʼ» (Reuters, 3 tiʼ abril tiʼ 2022).

 Le cristianoʼoboʼ, ¿unaj wa u apoyarkoʼob le guerraʼoboʼ? ¿Baʼax ku yaʼalik le Bibliaoʼ?

 Le Bibliaoʼ ku tsolikeʼ le máaxoʼob seguertik Jesúsoʼ maʼ unaj u táakpajloʼob tiʼ le guerraʼoboʼ.

•   «Oks a espada teʼ tuʼux ta jóoʼsoʼ, tumen tuláakal le máaxoʼob ku meyaj espada tiʼobeʼ bíin kíimsaʼakoʼob yéetel espada» (Mateo 26:52).

   Wa juntúul cristiano ku apoyartik wa ku bin teʼ guerraʼoboʼ, ¿táan wa u beetik le baʼax tu yaʼalaj Jesúsoʼ?

•   «Kin tsʼáaikteʼex junpʼéel túumben mandamiento: ka a paklan yaabiltabaʼex. Jeʼel bix tsʼoʼok in yaabiltikeʼexoʼ teʼex xaneʼ bey unaj a paklan yaabiltikabaʼexoʼ. Wa ka paklan yaabiltikabaʼexeʼ tuláakal máak ken u yojéelteʼ teʼexeʼ in discípuloʼex» (Juan 13:34, 35).

   Wa juntúul cristiano ku apoyartik le guerraoʼ, ¿táan wa u yeʼesik le yaabilaj tu yaʼalaj Jesús unaj u yeʼesik u discípuloʼoboʼ?

 Wa taak a wojéeltik u maasileʼ ilawil le xook ich español «El cristianismo y la guerra: ¿son compatibles?».

 Le máaxoʼob jach tu jaajil ku meyajtikoʼob Diosoʼ maʼ unaj u táakpajloʼob mix u apoyarkoʼob le guerraʼoboʼ. ¿Jeʼel wa u béeytal u beetik máak lelaʼ? Jeʼeleʼ. Le Bibliaoʼ u yaʼalmeʼ teʼ «tu tsʼook kʼiinoʼob[aʼ]» yaʼab máakoʼobeʼ maʼ ‹kun seguer u kankoʼob baʼateʼel› tumen taak u beetkoʼob le baʼax tu yaʼalaj Jesúsoʼ (Isaías 2:2, 4).

•   Utiaʼal a wojéeltik u maasileʼ ilawil baʼax ku yaʼalik U Pʼíich Tulumil Kanan ku kʼaabaʼtik «¿Bix u yilik Dios le baʼateltáambaloʼ?».

 Maʼ kun xáantaleʼ, Jéeoba, a ‹u Diosil le jeetsʼeliloʼ› yaan u luʼsik le guerraʼob yéetel le baʼaxoʼob beetik k-muʼyajoʼ, lelaʼ yaan u beetik yéetel u gobierno yaan teʼ kaʼanoʼ (Filipenses 4:9; Salmo 72:14).

•   Utiaʼal a wilik bix ken u beetileʼ chaʼant le video ¿Baʼax u Reino Dios?