Tiʼ tuláakal yóokʼol kaabeʼ le máaxoʼob yaan páajtalil tiʼoboʼ, le científicoʼoboʼ yéetel le máaxoʼob yaʼab baʼaloʼob u yojloʼob yoʼolal le tecnologíaoʼ tsʼoʼok u yilkoʼobeʼ yaʼab baʼax jeʼel u páajtal u beetaʼal yéetel le inteligencia artificaloʼ (IA). a Pero preocupadoʼob xan tumen tsʼoʼok u tsʼáaikoʼob cuentaeʼ jeʼel u meyaj utiaʼal u beetaʼal baʼaloʼob kʼaastakeʼ.

•   «Le inteligencia artificialoʼ yaʼab baʼal jeʼel u páajtal u beetkeʼ yéetel jeʼel tak u maʼalobkíintik u kuxtal máakeʼ. Pero jeʼel xan u beetik u xuʼulul u respetartaʼal u derechos máakeʼ, u privacidad, u xuʼulul u confiar máak tiʼ le gobiernoʼoboʼ yéetel u yuʼubik máak maʼ seguro yanikiʼ» (Kamala Harris, vicepresidenta de Estados Unidos, 4 tiʼ mayo tiʼ 2023).

•   «Kex yéetel le inteligencia artificial (IA) yaʼab baʼaloʼob jeʼel u páajtal u beetaʼal utiaʼal u kanáantik u kuxtal máakeʼ pero jeʼel xan u beetik u tsaʼayal uláakʼ kʼojaʼaniloʼob tiʼeʼ» (Grupo internacional de médicos y profesionales de la salud dirigido por el doctor Frederik Federspiel, BMJ Global Health, 9 tiʼ mayo tiʼ 2023). b

•   «Teʼ kʼiinoʼobaʼ yéetel le inteligencia artificialoʼ jach séebaʼan jeʼel u kʼiʼitbesaʼal baʼaloʼob maʼ jaajtakeʼ. Maʼ xaaneʼ maʼ kun xáantaleʼ tiʼ yaʼab máakoʼob kun luʼsbil meyaj tumen tuláakal kun beetbil yéetel máquinas. Según jujuntúul máakoʼob yaʼab baʼal u yojloʼob yoʼolal tecnologíaeʼ yaan bin u kʼuchul u yoraileʼ le inteligencia artificialoʼ yaan u tsʼáaik en peligro u kuxtal wíinik» (The New York Times, 1 tiʼ mayo tiʼ 2023).

 Jeʼex kun máan le tiempooʼ yaan k-ilik bix kun meyaj tiʼ wíinik le inteligencia artificialoʼ. ¿Baʼax ku yaʼalik le Biblia yoʼolal leloʼ?

 Le Bibliaoʼ ku yaʼalik baʼaxten wíinikeʼ maʼ tu páajtal u garantizartik wa yaan u meyaj maʼalob tiʼ u maasil le baʼax tsʼoʼok u beetkoʼ.

1.  1. Kex wíinik ku beetik wa baʼax yéetel u tuukulil u kaxtik u yutsil u maasileʼ maʼ tu páajtal u yojéeltik le consecuencias ken u taasoʼ.

   •   «Yaan junpʼéel bej maʼalob u yilik máak, pero tu xuuleʼ ku bisik máak tiʼ kíimil» (Proverbios 14:12).

2.  2. Mix máak jeʼel u páajtal u controlartik bix kun usartbil le baʼax u beetmoʼ, wa yaan u meyaj utiaʼal u beetaʼal baʼax uts wa baʼax kʼaas.

   •   «Unaj in pʼatik [in meyaj] tiʼ le máax kun taal después tiʼ tenoʼ. Teneʼ maʼ in wojel wa yaan u yantal u naʼatiʼ mix wa yaan u pʼáatal j-maʼ naʼatiliʼ, chéen baʼaleʼ tu kʼab kun pʼáatal tuláakal le baʼaxoʼob tin tsʼáaj in wóol in kaxt way yóokʼol kaaboʼ, le baʼaxoʼob tin náajaltaj yéetel le naʼat yaantenoʼ» (Eclesiastés 2:18, 19).

 Tuláakal lelaʼ ku yeʼesiktoʼoneʼ jach kʼaʼabéet k-chaʼik k-nuʼuktaʼal tumen le Máax beetmiloʼonoʼ.

 Le Máax beetmiloʼonoʼ maʼ ten u chaʼa tiʼ mix máak mix tiʼ le tecnología ka u xuʼuls tiʼ le yóokʼol kaabaʼ mix tiʼ wíinik.

•   «Le luʼumaʼ yaan u pʼáatal utiaʼal mantatsʼ» (Eclesiastés 1:4).

•   «Le máaxoʼob ku beetkoʼob baʼax maʼaloboʼ yaan u pʼáatloʼob way luʼumeʼ, way kun kajtaloʼob utiaʼal mantatsʼeʼ» (Salmo 37:29).

 Teʼ Bibliaoʼ Dioseʼ ku tsʼáaiktoʼon le nuʼuktaj kʼaʼabéettoʼon utiaʼal ka kuxlakoʼon ich jeetsʼelil yéetel ka k-uʼuy seguro yaniloʼon. Utiaʼal a wojéeltik u maasil yoʼolal baʼax ku kaʼansik le Bibliaoʼ ilawil le xookoʼob «¿Baʼax jeʼel u yáantkoʼon utiaʼal ka xiʼiktoʼon utsileʼ?» yéetel «La esperanza real de un mañana mejor».