Yaʼab máakoʼobeʼ jach preocupadoʼob tumen ku tuklikoʼobeʼ táan u kʼaskúuntaʼal tuláakal le baʼaxoʼob yaan way Luʼumoʼ. Jujuntúul máakoʼob kaʼanchajaʼan u xookoʼobeʼ ku yaʼalikoʼobeʼ le baʼax ku beetik wíinikoʼ táan u beetik u chʼéejel yaʼab tiʼ le baʼaxoʼob kuxaʼanoʼoboʼ, jeʼex le baʼalcheʼoboʼ yéetel le kʼáaxoʼ.

 ¿Yaan wa u maas kʼastal le Luʼumaʼ? ¿Yaan wa u kʼuchul u kʼiinil u yutstal tuláakal?

 Le máaxoʼob kaʼanchajaʼan u xookoʼoboʼ ku yaʼalikoʼobeʼ jeʼel u páajtal k-kanáantik le Luʼumaʼ yéetel k-disfrutartik tuláakal le baʼaxoʼob beetaʼanoʼoboʼ. Le científicoʼoboʼ ku yaʼalikoʼobeʼ utiaʼal u yutskíintaʼal le Luʼumaʼ yaʼab baʼaloʼob unaj u beetaʼal yéetel kʼaʼabéet u beetaʼal tu séebaʼanil. Ilawil baʼax kʼaʼabéet u beetaʼal:

•   Unaj k-kanáantik le kʼaaxoʼ, le ríoʼoboʼ, le mejen áalkab jaʼoboʼ yéetel le kʼáaʼnáaboʼ.

•   Maʼ unaj u meyajtoʼon fertilizanteʼob jeʼel u contaminarkoʼob le luʼum yéetel le iikʼoʼ.

•   Unaj u kanik máak bix u meyajtik le luʼumoʼ, unaj u kanáantaʼal xan maʼ u sen desperdiciartaʼa janal, maʼ u sen jaantaʼal bakʼ yéetel kay, tu lugareʼ maas maʼalob ka jaantaʼak verduras.

•   Unaj k-kʼaʼajsikeʼ maʼ kʼaʼabéettoʼon yaʼab baʼaloʼob utiaʼal k-kuxtal maʼalobiʼ.

 ¿Bix a wilik? ¿Jeʼel wa u kʼuchul u kʼiinil u múul meyaj le gobiernoʼob, le empresaʼob yéetel uláakʼ máakoʼob utiaʼal ka utskíintaʼak le Luʼumaʼ? ¿Wa mix bikʼin kun úuchul tumen u maas yaʼabil le máakoʼoboʼ chéen u yutsiloʼob ku kaxtikoʼob? (2 Timoteo 3:1-5).

 Le Bibliaoʼ ku yaʼaliktoʼoneʼ maʼ kun xáantaleʼ le Luʼumaʼ yaan u jach jatsʼutstal. Ku tsolik xan baʼaxten wíinikeʼ maʼ tsaʼayak u yutskíint le Luʼumaʼ. Tsʼoʼoleʼ ku yaʼalik xan baʼax unaj u beetaʼal utiaʼal u maʼalobtal tuláakal.

 ¿Baʼaxten wíinikeʼ maʼ tsaʼayak u yutskíint le Luʼumaʼ? Tumen Jéeoba a beetmil le Luʼumaʼ yéetel chéen tu tsʼáaj tiʼ wíinik utiaʼal u kanáante (Génesis 1:28; 2:15). Yéetel chéen jeʼel u bin utsil tiʼ máak wa ku beetik baʼax ku yaʼalik Dioseʼ (Proverbios 20:24). Chéen baʼaleʼ wíinikeʼ maʼ tu yuʼubaj u tʼaan Diosiʼ yéetel tu yéeyaj u beetik chéen baʼax uts tu tʼaan (Eclesiastés 7:29). Le oʼolaleʼ kex jeʼel baʼalak ka u yóot u beet máak utiaʼal u yutskíintik le Luʼumaʼ maʼ tu béeytal (Proverbios 21:30; Jeremías 10:23).

 Le baʼax ken u beet Diosoʼ. Letiʼeʼ maʼ ken u chaʼa u seguer u kʼaskúuntaʼal le Luʼum tumen wíinikoʼ (Apocalipsis 11:18). Dioseʼ maʼ ken u yaʼal tiʼ le gobiernoʼob mix tiʼ wíinik ka u jóoʼsoʼob túumben leyoʼob utiaʼal u kanáantaʼal le Luʼumaʼ. Letiʼeʼ yaan u túumbenkuntik tuláakal baʼal yéetel utiaʼal u beetkeʼ yaan u luʼsik tuláakal le gobiernoʼoboʼ (Apocalipsis 21:1). Dioseʼ ku yaʼalik: «¡Ilawile! Teneʼ táan in túumbenkuntik tuláakal baʼal» (Apocalipsis 21:5).

 Bix kun utskíintbil le Luʼumaʼ. Jéeobaeʼ yaan u xuʼulsik u gobierno wíinik yéetel tu lugareʼ yaan u tsʼáaik u gobierno. Jesucristo, u Reyil le Reinoaʼ yéetel yaan u gobernartik tuláakal le Luʼumaʼ (Daniel 2:44; Mateo 6:10).

 U Reino Dioseʼ yaan u kaʼansik tiʼ le máakoʼob ka kuxlakoʼob jeʼex uts tu tʼaan Dioseʼ. Le kéen kʼuchuk u naʼat máak baʼaxten unaj u kuxtal jeʼex u yaʼalik Dioseʼ yaan u beetik baʼax ku yaʼalik, yaan u kanik u bisuba maʼalob yéetel u maasil yéetel yaan u kanáantik le Luʼumaʼ (Isaías 11:9). Le Bibliaoʼ ku kaʼansikeʼ yáanal u gobierno Dioseʼ tuláakal máak kun yantal junpʼéel maʼalob kuxtal tiʼ yéetel mix máak ken u kʼaskúunt le Luʼumaʼ. U Reino Dioseʼ yaan u beetik lelaʼ:

•   Yaan u beetik u yantal janal tiʼ tuláakal máak (Salmo 72:16).

•   Yaan u yutskíintik le baʼaxoʼob tsʼoʼok u kʼaskúuntik wíinikoʼ (Isaías 35:1, 2, 6, 7).

•   Yaan u yilik maʼ u beetaʼal loob tiʼ máak tumen le baʼalcheʼoboʼ (Isaías 11:6-8; Oseas 2:18).

•   Yaan u yilik maʼ u kaʼa antal chak ikʼaloʼob, u tíitkuba le luʼumoʼ bey xan uláakʼ nukuch loobiloʼob (Marcos 4:37-41).

 U Reino Dioseʼ yaan u beetik tuláakal le jatsʼuts baʼaloʼob tsʼoʼok k-aʼalikaʼ. Wa taak a wojéeltik u maasileʼ ilawil le xook «¿Baʼax kʼiin kéen gobernarnak u Reino Dios way Luʼumeʼ?».