Kéen pʼáatak minaʼan meyaj tiʼ máakeʼ jeʼel u pʼáatal minaʼan taakʼin tiʼeʼ, u yantal problemaʼob ichil u familia yéetel u sen preocuparkuba. ¿Baʼax jeʼel u yáantkech wa ku yúuchultech lelaʼ? Ilawil jujunpʼéel baʼaxoʼob ku yaʼalik le Biblia jeʼel u yáantkechoʼ.

•   Tsikbalt tiʼ u maasil bix a wuʼuyikaba.

   Baʼax ku yaʼalik le Bibliaoʼ: «Juntúul jach maʼalob amigoeʼ ku yeʼesik yaabilaj tiʼ tuláakal súutukil» (Proverbios 17:17).

   Wa tsʼoʼok u pʼáatal minaʼantech meyajeʼ maʼ xaaneʼ jeʼel u lúubul a wóoleʼ, a tsʼíikileʼ, u pʼáatal maʼ ta kaxtik baʼax a beete wa hasta jeʼel a tuklik mix baʼal a biilaleʼ. Chéen baʼaleʼ wa ka tsikbaltik tiʼ a láakʼtsiloʼob yéetel tiʼ a amigoʼob jach bix a wuʼuyikabaeʼ letiʼobeʼ jeʼel u yáantkechoʼob utiaʼal ka xuʼuluk a sen preocuparkabaeʼ. Maʼ xaan xaneʼ hasta jeʼel u yáantkechoʼob a kaxt junpʼéel túumben meyajeʼ.

•   Maʼ a sen preocuparkaba.

   Baʼax ku yaʼalik le Bibliaoʼ: «Maʼ a sen chiʼichnaktaleʼex yoʼolal u kʼiinil sáamal, tumen sáamaleʼ yaan xan u yantal baʼaloʼob jeʼel u beetik a chiʼichnaktaleʼexeʼ» (Mateo 6:34).

   Le Bibliaoʼ ku yaʼalikeʼ maʼalob ka k-tukult con tiempo baʼaxoʼob ken k-beete (Proverbios 21:5). Chéen baʼaleʼ ku yaʼalik xaneʼ maʼ maʼalob ka k-sen preocupartba tu yoʼolal baʼaloʼob maʼ úuchkoʼobiʼ tumen yaan horaeʼ hasta maʼ tu yúuchloʼob.

   Le Bibliaoʼ ku yaʼalik baʼax jeʼel u yáantkoʼon wa k-uʼuyik jach estresadoʼoneʼ. Wa a kʼáat a wojéelt u maasileʼ, ilawil le xook «¿Bix jeʼel a controlartik le estrésoʼ?».

•   Maʼ a sen xuup.

   Baʼax ku yaʼalik le Bibliaoʼ: «Teneʼ tsʼoʼok in kanik bix jeʼel u kiʼimaktal in wóol [...] kex wa yaanten yaʼab baʼal wa kex chéen junpʼíit» (Filipenses 4:12).

   Ilawil a kuxtal chéen yéetel le baʼaxoʼob yaantech beoraoʼ. Maʼ xaaneʼ yaan u kʼaʼabéettal a wilik maʼ a sen xuʼuxupik taakʼin. Ilawil xan maʼ a pʼaxkaba wa maʼ jach kʼaʼabéetiʼ (Proverbios 22:7).

   Wa taak a wojéeltik u maasil yoʼolal bix jeʼel a kanáantik a taakʼineʼ, ilawil le xook «Bix jeʼel a kuxtal chéen yéetel junpʼíit taakʼineʼ».

•   Meyajnaktech maʼalob le tiempooʼ.

   Baʼax ku yaʼalik le Bibliaoʼ: «Maʼ u xuʼulul a weʼeskeʼex naʼatil [...] yéetel meyajnakteʼex maʼalob le tiempo pʼaatalteʼexoʼ» (Colosenses 4:5).

   Kex beora tsʼoʼok u pʼáatal minaʼantech junpʼéel hora utiaʼal a meyajeʼ meyajnaktech maʼalob le tiempo yaantechoʼ. Lelaʼ yaan u yáantkech utiaʼal a pʼáatal maas tranquiloil.

•   Ilawil a kʼamik jeʼel baʼaxak meyajeʼ.

   Baʼax ku yaʼalik le Bibliaoʼ: «Jeʼel baʼaxak meyajileʼ ku taasik utsil» (Proverbios 14:23).

   Ilawil a kʼamik jeʼel baʼaxak meyaj kex maʼ suukaʼan a beetik kaʼachiʼ. Maʼ a waʼalik wa maʼ ta kʼamik junpʼéel meyaj chéen tumen maʼ importante u yilaʼaliʼ wa tumen maʼ yaʼab u náajaliliʼ.

•   Maʼ a chaʼik u lúubul a wóol.

   Baʼax ku yaʼalik le Bibliaoʼ: «Paakʼalnen desde ken sáasak yéetel maʼ a jeʼelel tak ken tardechajak, tumen maʼ a wojel máakalmáak kun maʼalobtaliʼ» (Eclesiastés 11:6).

   Tsikbalt táan a kaxtik meyaj tiʼ a láakʼtsiloʼob, a wéet meyajoʼob kaʼachi, a vecinoʼob wa uláakʼ máaxoʼob a kʼaj óol. Ilawil wa yaan anuncioʼob tuʼux ku kaxtaʼal j-meyajoʼob wa xeen teʼ tuʼuxoʼob ku yoksik u solicitud máak utiaʼal u contratartaʼal meyajoʼ. Jeʼel xan u páajtal a wokol Internet utiaʼal a wilik wa yaan tuʼux ku kaxtaʼal j-meyajoʼobiʼ. Chéen baʼaleʼ maʼ u tuʼubultecheʼ le táan a kaxtik meyajoʼ maʼ xaaneʼ yaʼab u téenel kun antal a bin utiaʼal ka entrevistartaʼakech wa utiaʼal a bisik a juʼunoʼob.