Ku yaʼalaʼaleʼ máas tiʼ 5.000 millones máakoʼob ken u chaʼantoʼob le Copa Mundial de fútbol táan u beetik le FIFA teʼ añoaʼ, lelaʼ káaj 20 tiʼ noviembre yéetel yaan u tsʼoʼokol 18 tiʼ diciembre tiʼ 2022. Yaʼab máax tuklikeʼ le deporteʼob ku beetaʼal tuʼux ku táakpajal yaʼab naciónoʼoboʼ jach jeʼel u yáantaj utiaʼal u múul biskuba le máakoʼoboʼ, maʼ chéen utiaʼal ka u chaʼantoʼobiʼ.

•   «Le deporteoʼ yaantiʼ u páajtalil u kʼexik le yóokʼol kaabaʼ, ku péeksik máak u beet baʼaloʼob maʼalobtak, tsʼoʼoleʼ chéen jujunpʼéel baʼal jeʼex le deporte jeʼel u beetik u múul biskuba le máakoʼoboʼ» (Nelson Mandela, u expresidenteil Sudáfrica).

•   «Le fútboloʼ [...] ku tsʼáaik esperanza, ku tsʼáaik kiʼimak óolal, ku péeksik máak u yeʼes yaabilaj tiʼ u maasil kex jeʼel tuʼuxak u taaleʼ» (Gianni Infantino, u presidenteil FIFA). a

 ¿Yaan wa junpʼéel deporte jeʼex le fútbol jeʼel u beetik u múul biskuba le máakoʼob yéetel u yeʼeskoʼob yaabilajoʼ? ¿Yaan wa u kʼuchul u kʼiinil u múul biskuba le máakoʼob yéetel u yantal jeetsʼeliloʼ?

 Le mundial beetaʼab teʼ añoaʼ jach kʼexpaji. Le fútboloʼ tsʼoʼok u beetik u yantal baʼatelil ichil le máakoʼob bey xan ichil le políticoʼoboʼ, letiʼobeʼ ku baʼateloʼob yoʼolal le derecho yaan tiʼ cada máakoʼ, yoʼolal le racismooʼ bey xan yoʼolal le bix u yilaʼal le ayikʼaloʼob yéetel le óotsiloʼoboʼ.

 Kex beyoʼ, yaʼab máax tuklikeʼ le deporteʼob tuʼux ku táakpajal yaʼab naciónoʼoboʼ ku beetkoʼob u yantal kiʼimak óolal ichil le máakoʼoboʼ. Chéen baʼaleʼ le kiʼimak óolal ku yantal ichil le máakoʼobaʼ jach maʼ tu xáantal, tu lugar leloʼ ku pʼektikubaʼob. Le Bibliaoʼ u yaʼalmiliʼ bix le modos ken u yeʼes le máakoʼob teʼ «tu tsʼook kʼiinoʼob[aʼ]» (2 Timoteo 3:1-5).

 Le Bibliaoʼ u yaʼalmeʼ yaan u kʼuchul u kʼiinil u yantal jeetsʼelil yéetel u múul biskuba le máakoʼoboʼ. Ku yaʼalik xaneʼ tuláakal máakeʼ yaan u kuxtal yáanal u nuʼuktaj «u Reino Dios», lelaʼ junpʼéel gobierno yaan teʼ kaʼanoʼ (Lucas 4:43; Mateo 6:10).

 Jesucristo u Reyil u Reino Dios, letiʼ kun ilik ka yanak jeetsʼelil tiʼ tuláakal yóokʼol kaab. Le Bibliaoʼ ku yaʼalik:

•   «Tu kʼiinil táan u gobernareʼ yaan u yaʼabtal máaxoʼob beetik baʼax maʼalob, […] le jeetsʼeliloʼ mantatsʼ xan kun antal» (Salmo 72:7).

•   «Yaan u salvartik le óotsil táan u kʼáatik áantajoʼ […] Yaan u salvarkoʼob tiʼ le máaxoʼob beetik u muʼyajoʼob yéetel beetik loob tiʼoboʼ» (Salmo 72:12, 14).

 Le baʼaxoʼob tu kaʼansaj Jesúsoʼ tsʼoʼok u yáantik yaʼab máakoʼob teʼ kʼiinoʼobaʼ. Le u millonesil máakoʼobaʼ ku taaloʼob tiʼ 239 luʼumiloʼob yéetel jach tsʼoʼok u yáantaʼaloʼob utiaʼal ka xuʼuluk u pʼektikubaʼob. Utiaʼal a kanik u maasileʼ ilawil le u jaats xookoʼob ku kʼaabaʼtik «Maʼ a chaʼik u seguer le pʼektajiloʼ».