¡MAʼ U NÁAYAL A WÓOLEʼEX!
U beetaʼal loob tiʼ le políticoʼoboʼ | ¿Baʼax ku yaʼalik le Bibliaoʼ?
Tiʼ tuláakal yóokʼol kaabeʼ jach tsʼoʼok u yaʼabtal u beetaʼal loob tiʼ le políticoʼoboʼ.
Tu luʼumil Méxicoeʼ kíimsaʼab 39 candidatoʼob. Lelaʼ junpʼéel baʼal mix juntéen úuchuk. Pero maʼ chéen leloʼ yaʼab uláakʼ baʼaxoʼob úuch teʼ elecciónoʼob anchaj teʼ año 2023-2024.
Tu luʼumil Europaeʼ yaʼab bix tsʼoʼok u beetaʼal loob tiʼ le políticoʼoboʼ, jeʼex tu luʼumil eslovaquiaeʼ tu kʼiinil 15 tiʼ mayo tiʼ 2024, intentartaʼab u kíimsaʼal le primer ministrooʼ.
Tu luʼumil Estados Unidoseʼ le máakoʼoboʼ jach jakʼaʼan u yóoloʼob tumen tu kʼiinil 13 tiʼ julio tiʼ 2024, intentartaʼab u kíimsaʼal le expresidente Donald Trumpoʼ.
¿Baʼaxten ku sen beetaʼal loob tiʼ le políticoʼoboʼ? ¿Yaan wa u kʼuchul u kʼiinil u xuʼulul? ¿Baʼax ku yaʼalik le Bibliaoʼ?
Aʼalaʼaniliʼeʼ yaan u jatskuba le máakoʼoboʼ
Leʼ Bibliaoʼ ku yaʼalikeʼ tu «tsʼook kʼiinoʼobeʼ» yaan u kʼastal u modos le máakoʼoboʼ yéetel yaan u beetkoʼob loob tiʼ u maasil, tsʼoʼoleʼ maʼ ken u tsʼáaubaʼob de acuerdoil.
«Chéen baʼaleʼ ojéelteʼ tu tsʼook kʼiinoʼobeʼ yaan u yilaʼal yaayaj kʼiinoʼob yéetel istikyaj ken u máansil u kuxtal máak. Tumen le máakoʼoboʼ yaan u kaxtikoʼob chéen u yutsiloʼob [...] maʼ ken u tsʼáaʼob u diosboʼotikil mix baʼal, yaan u xúumpʼatkoʼob u amigoʼob, [...junpuliʼ maʼ ken u yóotoʼob u tsʼáaubaʼob de acuerdoil, [...] jach yaan u tsʼíiktaloʼob, [...] yaan u suutoʼob traicioneroil, yaan u tercotaloʼob, yaan u taaskubaʼob jach nojbaʼalil» (2 Timoteo 3:1-4).
Le Bibliaoʼ u yaʼalmaj xaneʼ teʼ kʼiinoʼobaʼ de porsi yaan u paklan baʼateʼel le máakoʼoboʼ (Lucas 21:9, nota). Pero yaan u kʼuchul u kʼiinil u xuʼulul.
Yaan u xuʼulul u beetaʼal loob yoʼolal política
Le Bibliaoʼ ku yaʼalikeʼ Dioseʼ yaan u lúuʼsik u gobierno wíinik yéetel letiʼ kun gobernar.
«U Diosil le kaʼanoʼ yaan u tsʼáaik junpʼéel reino [...]. Le reinoaʼ [...] yaan u xiixkúuntik yéetel yaan u xuʼulsik tiʼ tuláakal le [uláakʼ] reinoʼobaʼ, chéen letiʼ kun pʼáatal utiaʼal mantatsʼ» (Daniel 2:44).
Chéen u Reino Dios kun taasik jeetsʼelil tiʼ tuláakal yóokʼol kaab.
Jesucristo, le máax kun gobernar teʼ Reinoaʼ ku yaʼalaʼal tiʼ «u Príncipeil Jeetsʼelil». Yaan u beetik u yantal jeetsʼelil utiaʼal mantatsʼ (Isaías 9:6, 7).
Teʼ kʼiinoʼobaʼ le máaxoʼob apoyartik u Reino Diosoʼ tsʼoʼok u kankoʼob kuxtal ich jeetsʼelil. Le Bibliaoʼ ku yaʼalik: «U espadaʼobeʼ yaan u sutkoʼob u nuʼukulil u péeksaʼal luʼum, u lanzaʼobeʼ yaan u sutkoʼob u nuʼukulil podar. Maʼ ken u líiʼs u espada mix junpʼéel kaaj tu contra uláakʼ kaaj, mix kun seguer u kankoʼob baʼateʼel» (Isaías 2:3, 4).
Utiaʼal a wojéeltik u maasileʼ ilawil le xook «¿Baʼax ken u beet u Reino Dios?» bey xan le video ¿Baʼax u Reino Dios?