Kéen a wuʼuy u yaʼalaʼal yaan ansiedad a tiʼ wa máaxeʼ maʼ xaaneʼ ku máan ta tuukul juntúul máak jach sajak, istikyaj u líikʼil sáamsamal wa juntúul máax ku sen tuukul tiʼ le baʼaxoʼob ku yúuchultiʼoʼ.

 U jaajileʼ jujuntúul máaxoʼob yaan ansiedad tiʼobeʼ bey u yuʼubikubaʼoboʼ. Yaan doctoroʼobeʼ tsʼoʼok u yilkoʼobeʼ yaan xiiboʼobeʼ jelaʼan bix u yeʼeskoʼob de ke chiʼichnakoʼob. Junpʼéel xook jóoʼsaʼabeʼ ku yaʼalikeʼ le xiiboʼoboʼ maases jeʼel u káaltaloʼob, u drogarkubaʼob wa u sen ukʼikoʼob tsʼaak utiaʼal maʼ u sen chiʼichnaktaloʼobeʼ. Le oʼolaleʼ wa juntúul máak ku sen káaltaleʼ maʼ xaaneʼ yaan ansiedad tiʼ. Yaan hora xaneʼ le xiiboʼoboʼ ku yeʼeskoʼob yaan ansiedad tiʼob tumen séeb u tsʼíikiloʼob yoʼolal jeʼel baʼaxakeʼ.

 U jaajileʼ maʼ tuláakal le xiiboʼob bey u beetkoʼoboʼ. Chéen baʼaleʼ teʼ kʼiinoʼobaʼ yaʼab máak ku sen tuukul tiʼ le problemas yaantiʼoʼ (2 Timoteo 3:1). Wa bey u yúuchultechoʼ, ¿jeʼel wa ta tʼaan u yáantkech le Bibliaoʼ?

 Le Bibliaoʼ jach jeʼel u yáantkech le kéen a wuʼuy chiʼichnakecheʼ. Ilawil óoxpʼéel baʼaloʼob ku yaʼalik:

1.  1. «Junpuliʼ maʼ a sen chiʼichnaktaleʼex yoʼolal u kʼiinil sáamal, tumen sáamaleʼ yaan xan u yantal baʼaloʼob jeʼel u beetik a chiʼichnaktaleʼexeʼ. Cada kʼiineʼ yaan yéetel le bukaʼaj chiʼichnakiloʼob ku taaskoʼ» (Mateo 6:34).

    Baʼax u kʼáat u yaʼale: Maas maʼalob maʼ a sen chiʼichnaktal yoʼolal baʼax ku taal u kʼiin. Yaan kʼiineʼ hasta mix tu yúuchul le baʼax ka sen tuklikoʼ. Kéen a tsʼáa cuentaeʼ maas maʼalob bix biniktech.

    Beet lelaʼ: Kʼaʼajs junpʼéel baʼax úuchtech tuʼux ta tuklaj maʼ maʼalob bix kun tsʼoʼokoliʼ pero ka tsʼoʼokeʼ maʼalob biniktech. Kéen tsʼoʼokkeʼ tuukulnen tiʼ le baʼax chiʼichnakkúuntikech beoraoʼ. Tukle: «¿Jach wa tu jaajil jeʼel u maastal le problema yaantenaʼ?».

2.  2. «Junpʼéel baʼal de fierroeʼ ku jóoʼsik u yej uláakʼ baʼal de fierro, juntúul máak xaneʼ ku kaanbal tiʼ u yéet máakil» (Proverbios 27:17).

    Baʼax u kʼáat u yaʼale: Le máaxoʼob yéetel k-bisikbaoʼ jeʼel u yáantkoʼon utiaʼal maʼ k-sen chiʼichnaktaleʼ. Chéen baʼaleʼ kʼaʼabéet k-chaʼik k-áantaʼal. K-amigoʼobeʼ jeʼel u yaʼalikoʼobtoʼon bey baʼaxoʼob tsʼoʼok u beetkoʼob utiaʼal maʼ u sen chiʼichnaktaloʼobeʼ yéetel jeʼel u yáantkoʼonoʼob utiaʼal maʼ k-chʼiikil tuukul chéen tiʼ le baʼaxoʼob ku yúuchultoʼonoʼ.

    Beet lelaʼ: Tuukulnen tiʼ máax jeʼel u yáantkecheʼ. Maʼ xaaneʼ juntúul a amigo tu máansaj le baʼax táan u yúuchultechoʼ. Kʼáattiʼ bey baʼaxoʼob áanteʼ.

3.  3. «Pʼateʼex tu kʼab Dios tuláakal le kuuch [wa problemas] chiʼichnakkúuntikeʼexoʼ, tumen letiʼeʼ jach taak u yáantkeʼex» (1 Pedro 5:7; nota).

    Baʼax u kʼáat u yaʼale: Dioseʼ jach taak u yáantkoʼon. Letiʼeʼ u kʼáat ka k-aʼaltiʼ jach bix k-uʼuyikba yéetel baʼaxoʼob ku yúuchultoʼon.

    Beet lelaʼ: Tsʼíibt le baʼaxoʼob chiʼichnakkúuntikechoʼ. Kéen tsʼoʼokkeʼ tsikbalt tiʼ Dios yéetel kʼáattiʼ ka u yáantech a wil bey baʼaxoʼob jeʼel u páajtal a beetkeʼ.

 Le Bibliaoʼ ku yaʼalik bey baʼaxoʼob jeʼel u páajtal u beetik máak wa yaan ansiedad tiʼeʼ. Chéen baʼaleʼ ku yaʼalik xaneʼ maʼ tun xáantaleʼ yaan u xuʼulul u chiʼichnaktal máak. ¿Bix kun úuchul lelaʼ?

 U Reino Dios kun luʼsik le baʼaxoʼob chiʼichnakkúuntikoʼonoʼ (Apocalipsis 21:4). Kéen kajlakoʼon yáanal u gobierno Dioseʼ maʼ ken k-muʼyaj kéen k-kʼaʼajs le baʼaxoʼob beet k-chiʼichnaktaloʼ (Isaías 65:17).

 Dioseʼ u kʼáat ka kuxlakech ich jeetsʼelil yéetel maʼ a chiʼichnaktal yoʼolal mix baʼal (Romanos 16:20). Bey u yeʼesik le baʼax ku yaʼalik le Bibliaoʼ: «Teneʼ in wojel baʼax ken in beet ta woʼolaleʼex, maʼ ken in taas kʼaas ta wóokʼoleʼex, baʼaxeʼ yaan in beetik u yantalteʼex jeetsʼelil, utiaʼal ka xiʼikteʼex maʼalobil yéetel utiaʼal ka béeychajak le baʼax ka páaʼtkeʼexoʼ» (Jeremías 29:11).