¿Baʼax ku yaʼalik le Biblia yoʼolal le nukuch terremotoʼoboʼ?
Cada añoeʼ u milesil terremotoʼob ku yantal, yanoʼobeʼ maʼatech u jach beetkoʼob loob, pero uláakʼoʼobeʼ ku kʼaskúuntikoʼob yaʼab baʼal. Le terremotoʼoboʼ ku beetkoʼob u muʼyaj bey xan u kíimil yaʼab máak. Yaan horaeʼ le nukuch terremotoʼoboʼ ku beetkoʼob u yantal tsunami’ob, leloʼ ku kíimsik xan yaʼab máak yéetel ku kʼaskúuntik yaʼab baʼaloʼob. ¿U yaʼalmaj wa le Biblia yaniliʼ u yantal nukuch terremotoʼoboʼ?
Teʼ xookaʼ yaan k-ilik:
¿Aʼalaʼan wa teʼ Biblia yaan u yantal nukuch terremotoʼoboʼ?
Teʼ Bibliaoʼ Jesúseʼ tʼaanaj tiʼ le terremotoʼoboʼ. Koʼox ilik bix úuchik u yaʼalik tiʼ óoxpʼéel libroʼob yaan teʼ Bibliaoʼ:
«Junpʼéel kaajeʼ yaan u baʼateʼel tu contra uláakʼ kaaj, junpʼéel reinoeʼ yaan u baʼateʼel tu contra uláakʼ reino, yaan u pʼáatal minaʼan baʼal jaantbil yéetel jejeláas tuʼux ken u tíituba le luʼumoʼ» (Mateo 24:7).
«Junpʼéel kaajeʼ yaan u baʼateʼel tu contra uláakʼ kaaj, junpʼéel reinoeʼ yaan u baʼateʼel tu contra uláakʼ reino, jejeláas tuʼux ken u tíituba le luʼumoʼ, yéetel yaan u pʼáatal minaʼan baʼal jaantbil» (Marcos 13:8).
«Yaan u sen tíitkuba le luʼumoʼ, tiʼ jejeláas tuʼuxoʼobeʼ yaan u yantal kʼaakʼas kʼojaʼaniloʼob yéetel yaan u pʼáatal minaʼan baʼal jaantbil» (Lucas 21:11).
K-ilik túuneʼ Jesúseʼ tu yaʼaleʼ yaan u yantal terremotoʼob jejeláas tuʼuxoʼob, tu yaʼalaj xaneʼ yaan u yantal guerraʼob, yaan u pʼáatal minaʼan baʼal jaantbil yéetel yaan u yantal kʼaakʼas kʼojaʼaniloʼob. Kéen k-il táan u yúuchul jejeláas tuʼuxoʼob le baʼaloʼobaʼ k-tsʼáaik cuenta kajaʼanoʼon tu «tsʼook kʼiinoʼob» wa jeʼex tu yaʼalil Jesúseʼ teʼ kʼiinoʼob «táan u taal u tsʼoʼokol tiʼ le yóokʼol kaabaʼ» (Mateo 24:3; 2 Timoteo 3:1). Jeʼex u yeʼesik le Bibliaoʼ wa k-jóoʼsik u cuentaileʼ yaan k-ilkeʼ u tsʼook kʼiinoʼobeʼ káaj tu añoil 1914 yéetel todavía maʼ tsʼoʼokkiʼ.
¿Baʼax ku yeʼesik le u yantal nukuch terremotoʼoboʼ?
Ku yeʼesikeʼ le profecíaʼob tu yaʼalaj Jesús yoʼolal le terremotoʼoboʼ táan u béeytal teʼ kʼiinoʼobaʼ. Desde 1914, tsʼoʼok u yantal maas tiʼ 1,950 terremotoʼob. Lelaʼ tsʼoʼok u beetik u kíimil maas tiʼ dos millones máakoʼob. a Koʼox ilik jujunpʼéel terremotoʼob tsʼoʼok u yantal teʼ tu tsʼook veinte añosaʼ.
Océano Índico (2004). Junpʼéel terremoto de 9.1 gradoseʼ tu beetaj u yantal junpʼéel tsunami kʼuch tiʼ jejeláas luʼumiloʼob. Lelaʼ tu beetaj u kíimil kex 225,000 máakoʼob.
China (2008). Junpʼéel terremoto de 7.9 gradoseʼ tu xuʼulsaj mejen kaajoʼob yéetel nukuch kaajoʼob. Ku tuklaʼaleʼ kíim kex 90,000 máakoʼob, kex 375,000 úuch loob tiʼob yéetel u millonesil máakoʼob tu perdertaj u yotochoʼob.
Haití (2010). Teʼ año jeʼeloʼ anchaj junpʼéel terremoto de 7.0 grados. Ka tsʼoʼokeʼ seguernaj u tíitkuba le luʼumoʼ pero maʼ jach chichiʼ. Yoʼolal leloʼ kíim maas tiʼ 300,000 máakoʼob yéetel maas tiʼ junpʼéel millón pʼáat minaʼan u yotochoʼob.
Japón (2011). Junpʼéel terremoto de 9.0 grados yéetel jejeláas tsunamiʼobeʼ tu kíimsoʼob kex 18,500 máakoʼob yéetel u milesileʼ anchaj u pʼatkoʼob u yotochoʼob. Tu beetaj xan u wáakʼal le planta nuclear yaan Fukushimaoʼ. Kex tsʼoʼok u máan 10 añoseʼ óoliʼ 40,000 máakoʼob kajaʼanoʼob naatsʼ teʼ tuʼux wáakʼ le plantaoʼ maʼ béeyak u suutoʼob tu yotochoʼob yoʼolal le radiación yaan teʼ lugaroʼ.
¿Baʼaxten unaj k-chʼaʼik en cuenta baʼaxoʼob u yaʼalmaj le Biblia yoʼolal le terremotoʼoboʼ?
Le baʼaxoʼob u yaʼalmaj le Biblia yoʼolal le terremotoʼoboʼ ku yeʼesik baʼax kun úuchul maʼ kun xáantal. Jesúseʼ tu yaʼalaj: «Kéen a wileʼex u yúuchul le baʼaloʼobaʼ ojéelteʼexeʼ naatsʼ yanik u Reino Dios» (Lucas 21:31).
Le Bibliaoʼ ku yaʼalikeʼ u Reino Dioseʼ junpʼéel gobierno tiaʼan teʼ kaʼanoʼ, u Reyileʼ Jesús. Jesúseʼ tu yaʼalaj tiʼ u discípuloʼob ka orarnakoʼob tu yoʼolal le Reinoaʼ (Mateo 6:10).
Le kéen káajak u gobernar le Reino way Luʼumoʼ Dioseʼ yaan u xuʼulsik tiʼ le nukuch loobiloʼoboʼ, ichileʼ táakaʼan le nukuch terremotoʼoboʼ (Isaías 32:18). Tsʼoʼoleʼ yaan xan u xuʼulsik tuláakal le muʼyajil tsʼoʼok u taasik le nukuch terremotoʼoboʼ (Isaías 65:17; Apocalipsis 21:3, 4). Wa taak a wojéeltik u maasileʼ ilawil le xook «¿Baʼax ken u beet u Reino Dios?».
a Le datosaʼ chʼaʼab ichil le información ku meyaj tiʼ le Global Significant Earthquake Database, letiʼobeʼ tiʼ ku chʼaʼikoʼob le información teʼ Centro Nacional de Datos Geofísicos yaan Estados Unidosoʼ.
Maʼ xaaneʼ jeʼel u yutstal xan ta wicheʼ
BAʼALOʼOB KʼAʼANAʼANTAK KU KAʼANSIK LE BIBLIAOʼ
Tu añoil 1914 káaj u gobernar u Reino Dios
Walajkiʼ 2,600 añosaʼ Jéeobaeʼ yaan baʼax tu tsʼáaj u wayakʼt juntúul rey. Ilawil bix u béeytal le baʼax tu wayakʼtoʼ.
BAʼALOʼOB KʼAʼANAʼANTAK KU KAʼANSIK LE BIBLIAOʼ
Tu añoil 1914 kʼexpaj yóokʼol kaab
Le baʼaxoʼob ku yúuchul yéetel le bix u modos le máakoʼoboʼ ku yeʼeskoʼobeʼ 1914 ka káaj u ‹tsʼook kʼiinoʼoboʼ›.
BAʼALOʼOB UNAJ A KANIK
¿Baʼax u Reino Dios?
Ka taal Jesús way Luʼumeʼ maases kaʼansajnaj yoʼolal u Reino Dios. Úuch joʼopʼok u kʼáataʼal ka taalak u Reino Dios.
