Tiʼ tuláakal yóokʼol kaabeʼ yaʼab máakoʼob ku yaʼalikubaʼob u discípuloʼob Cristoeʼ ku yoksikubaʼob tiʼ política. Yaan tiʼ letiʼobeʼ ku apoyarkoʼob junpʼéel partido wa juntúul candidato chéen utiaʼal ka kʼaj óoltaʼak u religiónoʼob wa le baʼaxoʼob ku creerkoʼoboʼ. Yaan xan políticoʼobeʼ ku yeʼeskoʼob bey jach utsoʼob yéetel jach maʼalob u kuxtaloʼob chéen utiaʼal ka apoyartaʼakoʼob tumen le religiónoʼoboʼ. Yaan xan jujuntúul u nuuktakil le religiónoʼoboʼ ku beetkubaʼob candidatoʼob tiʼ junpʼéel partido. Tiʼ jujunpʼéel luʼumiloʼobeʼ le políticoʼoboʼ ku yéeyikoʼob junpʼéel religión cristiana utiaʼal u representartaʼaloʼob.

 Techeʼ, ¿baʼax ka tuklik yoʼolal leloʼ? ¿Maʼalob wa ka u yoksuba tiʼ política juntúul u discípulo Cristo? ¿Baʼax tu beetaj Jesús? Letiʼeʼ tu yaʼalaj: «Teneʼ tsʼoʼok in weʼesikteʼex bix unaj a beetkeʼex. Jeʼex tsʼoʼok in weʼesikteʼexoʼ teʼex xaneʼ bey unaj a beetkeʼexoʼ» (Juan 13:15). Koʼoneʼex ilik wa tu yoksuba Jesús tiʼ baʼaloʼob yaan yil yéetel política.

 Maʼ. Jesúseʼ mix juntéen tu yoksuba tiʼ política.

 Jesúseʼ maʼ tu kaxtaj le páajtalil ku tsʼáaik le políticaoʼ. Le ka tu yaʼalaj Satanás u tsʼáaik tiʼ Jesús ‹tuláakal u gobiernoiloʼob yóokʼol kaabeʼ›, letiʼeʼ maʼ tu kʼamiʼ (Mateo 4:8-10). a Juntéenjeak xaneʼ le máakoʼoboʼ taakchaj u beetkoʼob reyil Jesús. Chéen baʼaleʼ letiʼeʼ «tumen u yojel jach taʼaytak u taal chʼaʼabil tumen le máakoʼob utiaʼal ka beetaʼak reyiloʼ, lukʼ teʼeloʼ ka bin tu kaʼatéen teʼ montaña utiaʼal ka yanak tu juunaloʼ» (Juan 6:15). Jesúseʼ maʼ tu yóotaj u beet baʼax u kʼáat le máakoʼoboʼ, mix juntéen tu yoksuba tiʼ política.

 Jesúseʼ maʼ tu apoyartaj mix junpʼéel gobiernoiʼ. Por ejemploeʼ tu kʼiiniloʼobeʼ le judíoʼoboʼ maʼ uts tu tʼaan u boʼotkoʼob impuestoʼob tiʼ le romanoʼoboʼ. Tsʼoʼoleʼ ku tuklikoʼobeʼ le bajux ku cobrartaʼal tiʼoboʼ maʼ letiʼe bukaʼaj unaj u boʼotkoʼoboʼ. Le ka tu kʼáatoʼob tiʼ Jesús baʼax ku tuklik yoʼolal u boʼotaʼal le impuestooʼ letiʼeʼ tu yaʼalaj: «Boʼoteʼex tiʼ César le baʼaxoʼob u tiaʼal Césaroʼ, chéen baʼaleʼ tiʼ Dioseʼ boʼoteʼex le baʼaxoʼob u tiaʼal Diosoʼ» (Marcos 12:13-17). Jeʼex k-ilkoʼ Jesúseʼ maʼ tu yoksuba tiʼ políticaiʼ pero tu yaʼaleʼ kʼaʼabéet u boʼotaʼal le impuestoʼob ku kʼáatik le autoridadoʼoboʼ. Tu kaʼansaj xaneʼ yaan u pʼiis u yuʼubal u tʼaan le autoridadoʼoboʼ tumen maʼ tu páajtal u tsʼaʼabal tiʼ le gobiernoʼob le adoración unaj k-tsʼáaik tiʼ Diosoʼ (Mateo 4:10; 22:37, 38).

 Jesúseʼ tʼaanaj tiʼ u Reino Dios, junpʼéel gobierno yaan teʼ kaʼanoʼ (Lucas 4:43). Jesúseʼ mix juntéen tu yoksuba tiʼ política tumen u yojleʼ chéen u Reino Dios kun beetik baʼax u kʼáat Dios utiaʼal le Luʼumaʼ, wíinikeʼ maʼ tu tsaʼayal u beete (Mateo 6:10). Letiʼ xaneʼ u yojleʼ Dioseʼ yaan u xuʼulsik tiʼ u gobierno wíinik yéetel chéen u gobierno Dios kun pʼáatal utiaʼal mantatsʼ (Daniel 2:44).

 Maʼ. U discípuloʼobeʼ tu yuʼuboʼob u tʼaan yéetel maʼ tu beetubaʼob parte tiʼ le yóokʼol kaabaʼ (Juan 15:19). Letiʼobeʼ maʼ xan tu yoksubaʼob tiʼ políticaiʼ (Juan 17:16; 18:36). Tu lugar u yoksikubaʼob tiʼ le baʼaloʼobaʼ tu kʼubaj u yóol u kaʼansoʼob le baʼaloʼob maʼalobtak ken u beet u Reino Diosoʼ (Mateo 28:18-20; Hechos 10:42).

 Le yáax cristianoʼoboʼ u yojloʼob maas kʼaʼabéet u yuʼubikoʼob u tʼaan Dios. Chéen baʼaleʼ u yojloʼob xaneʼ kʼaʼabéet u respetarkoʼob le autoridadoʼoboʼ (Hechos 5:29; 1 Pedro 2:13, 17). Le oʼolal tu beetoʼob baʼax ku yaʼalik le leyoʼoboʼ yéetel tu boʼotoʼob u impuestoʼob (Romanos 13:1, 7). Chéen baʼaleʼ kex maʼ tu yoksubaʼob tiʼ políticaeʼ tu jóoʼsoʼob u yutsil baʼax ku yaʼalik le leyoʼoboʼ bey xan tiʼ le áantajoʼob ku tsʼáaik le gobiernooʼ (Hechos 25:10, 11; Filipenses 1:7).

 Le Bibliaoʼ mix tuʼux ku yeʼesik wa Jesús yéetel u discípuloʼobeʼ tu yoksubaʼob tiʼ política. Le oʼolal u testigoʼob Jéeoba tiʼ tuláakal yóokʼol kaabeʼ maʼatech u yoksikubaʼob tiʼ baʼaloʼob yaan yil yéetel política. Jeʼex le yáax cristianoʼoboʼ letiʼobeʼ chʼiikiloʼob xan u kaʼansoʼob «le baʼaloʼob maʼalobtak ken u beet le Reino» jeʼex kaʼansaʼabiktiʼob tumen Jesúsoʼ (Mateo 24:14).