1 Corintios 10:1-33
10 Beora túunaʼ, sukuʼuneʼex, in kʼáat ka a wojéelteʼexeʼ k-úuchben taataʼobeʼ tuláakloʼob yanchajoʼob yáanal le múuyaloʼ, tuláakloʼob kʼáatmáanoʼob ichil le kʼáaʼnáaboʼ,
2 tuláakloʼob tsʼaʼab u yokjaʼob yéetel le múuyaloʼ bey xan yéetel le kʼáaʼnáab utiaʼal ka u tsaypachtoʼob Moisesoʼ,
3 tuláakloʼob tu jaantoʼob le janal tu tsʼáaj Diosoʼ
4 yéetel tuláakloʼob tu yukʼoʼob le jaʼ tu tsʼáaj Diosoʼ. Lelaʼ tu beetoʼob tumen tuláakloʼob ku yukʼikoʼob kaʼach u jaʼil le nojoch tuunich tu tsʼáaj Diosoʼ, le tuunichaʼ Cristo le máax ku bin kaʼach tu yéeteloʼoboʼ.
5 Kex beyoʼ u maas yaʼabil tiʼ letiʼobeʼ maʼ kʼaʼamoʼob tumen Diosiʼ, le oʼolal kíimoʼob teʼ desiertooʼ.
6 Le baʼaloʼobaʼ úuchoʼob utiaʼal ka kaanbalnakoʼon, utiaʼal maʼ k-tsʼíiboltik baʼaloʼob kʼaastak jeʼex tu beetil letiʼobeʼ.
7 Mix k-adorartik beetbil diosoʼob jeʼex tu beetil jujuntúul tiʼ letiʼobeʼ; tumen jeʼex tsʼíibtaʼanilaʼ: «U kajnáaliloʼob le kaajoʼ kulajoʼob janal yéetel ukʼul, tsʼoʼoleʼ ka líikʼ u kiʼimakkúunt u yóoloʼob».
8 Mix k-lúubul tiʼ núupkʼeban* jeʼex úuchik u núupkʼebantal jujuntúul tiʼ letiʼobeʼ, ka kíim veintitrés mil u túulaloʼob chéen tiʼ junpʼéel kʼiin.
9 Mix k-túuntik u yóol Jéeoba jeʼex túuntaʼabik u yóol tumen jujuntúul máakoʼobeʼ, ka kíimoʼob úuchik u chiʼibloʼob tumen kaanoʼob.
10 Mix xan k-tutukchiʼex jeʼex úuchik u tutukchiʼ jujuntúul tiʼ letiʼobeʼ, ka kíimsaʼaboʼob tumen le máax ku xuʼulsajoʼ.
11 Bey túunoʼ, tuláakal le baʼaloʼobaʼ úuchtiʼob utiaʼal ka kaanbalnakoʼon, yéetel tsʼíibtaʼaboʼob utiaʼal ka k-kanáant maʼ u yúuchultoʼon beyoʼ, toʼon máaxoʼon kuxaʼanoʼon teʼ tu tsʼook kʼiiniloʼob le yóokʼol kaabaʼ.*
12 Le oʼolaleʼ le máax ku tuklik waʼalakbal maʼalobeʼ, u kanáant maʼ u lúubul.
13 Minaʼan uláakʼ túuntaj óolal taalak ta wóokʼoleʼex, chéen le túuntaj óolal suuk u yantal tiʼ le máakoʼoboʼ. Baʼaleʼ Dioseʼ chúukaʼan u yóol tiʼ baʼax ku yaʼalik, yéetel letiʼeʼ maʼ ken u chaʼa u túuntaʼal a wóoleʼex maas tiʼ le ku páajtal a muʼyajtikeʼexoʼ, baʼaxeʼ le táan u túuntaʼal a wóoleʼexoʼ yaan u tsʼáaik tuʼux a púutsʼleʼex utiaʼal ka páajchajak u chúukpajal a wóoleʼex a muʼyajteʼex.
14 Le oʼolaleʼ, in sukuʼuneʼex, náachkuntabaʼex tiʼ le adoración ku tsʼaʼabal tiʼ le beetbil diosoʼoboʼ.
15 Táan in tʼaan ta wéeteleʼex jeʼex in tʼaan yéetel máakoʼob yaan u naʼatoʼobeʼ; ileʼex wa jaaj le baʼax kin waʼalikaʼ wa maʼ.
16 Le copa ikil u tsʼaʼabal gracias, le baʼax oʼolal xan k-tsʼáaik gracias tiʼ Diosoʼ,* ¿maʼ wa letiʼe u kʼiʼikʼel Cristo ku taasiktoʼon utsiloʼ? Le waaj k-xetʼikoʼ, ¿maʼ wa letiʼe u wíinklil Cristo ku taasiktoʼon utsiloʼ?
17 Chéen junpʼéeliliʼ waaj yaan, toʼon túuneʼ kex yaʼaboʼoneʼ, tuláakloʼon k-jaantik le waaj jeʼeloʼ, tumen junpʼéeliliʼ wíinkliloʼon.
18 Ileʼex le u kajnáaliloʼob Israeloʼ:* Le máaxoʼob jaantik le kíimsbil baʼalcheʼob ku kʼuʼubloʼoboʼ, ¿maʼ wa táan u jaantkoʼob le baʼaxoʼob ku tsʼaʼabal teʼ altaroʼ?
19 ¿Baʼax túun in kʼáat in waʼal yéetel lelaʼ? ¿In kʼáat wa in waʼal yaan u biilal le baʼax ku kʼuʼubul tiʼ juntúul beetbil diosoʼ, wa yaan u biilal le beetbil diosoʼ?
20 Maʼ; baʼax in kʼáat in waʼaleʼ, le baʼax ku kʼuʼubul tumen le j-táanxel luʼumiloʼoboʼ tiʼ demonioʼob ku kʼubkoʼob, maʼ tiʼ Diosiʼ; tsʼoʼoleʼ teneʼ maʼ in kʼáat ka a jaanteʼex le baʼaxoʼob ku kʼuʼubul tiʼ le demonioʼoboʼ.
21 Maʼ tu páajtal a wukʼikeʼex le baʼax yaan tu copa Jéeoba wa táan a wukʼikeʼex le baʼax yaan tu copa le demonioʼoboʼ; maʼ tu páajtal a jaantkeʼex le baʼax yaan yóokʼol «u mesa Jéeoba» wa táan a jaantkeʼex le baʼax yaan yóokʼol u mesa le demonioʼoboʼ.
22 ¿Baʼax túun k-kaxtik? ¿Ka «pʼuʼujuk* Jéeoba» t-oʼolal? Toʼoneʼ maʼ maas muʼukʼaʼanoʼon tiʼ letiʼiʼ, ¿máasaʼ?
23 Tuláakal baʼal ku chaʼabal u beetaʼal tumen le leyoʼ, baʼaleʼ maʼ tuláakal baʼal ku taasik utsiliʼ. Tuláakal baʼal ku chaʼabal u beetaʼal tumen le leyoʼ, baʼaleʼ maʼ tuláakal baʼal ku líiʼsik u yóol máakiʼ.
24 Cada juntúul máakeʼ maʼ u seguer u kaxtik chéen u yutsil, baʼaxeʼ u yutsil u yéet máakil.
25 Jeʼel u páajtal u seguer a jaantkeʼex jeʼel baʼaxak ku koʼonol teʼ mercadooʼ,* baʼaleʼ maʼ a beetkeʼex kʼáatchiʼob tu yoʼolal, utiaʼal maʼ a chiʼichnakkúuntaʼaleʼex tumen a concienciaʼex;
26 tumen «Jéeoba tiaʼalintik le Luʼumoʼ bey xan le baʼaxoʼob chupmiloʼ».
27 Wa ka invitartaʼaleʼex janal tumen juntúul tiʼ le máaxoʼob maʼ tu creertikoʼob Dios, yéetel a kʼáateʼex bineʼ, jaanteʼex jeʼel baʼaxak ka tsʼaʼabak ta táaneʼexeʼ, baʼaleʼ maʼ a beetkeʼex kʼáatchiʼob tu yoʼolal, utiaʼal maʼ a chiʼichnakkúuntaʼaleʼex tumen a concienciaʼex.
28 Baʼaleʼ wa yaan máax ku yaʼalikteʼex: «Lelaʼ junpʼéel baʼal kʼubaʼan tiʼ beetbil diosoʼob», maʼ a jaantkeʼex utiaʼal maʼ a beetkeʼex u tʼóochpajal le máax aʼalteʼexoʼ mix a beetkeʼex u chiʼichnaktal mix máak tu yoʼolal u conciencia.
29 Maʼ táan in tʼaan tiʼ a concienciaiʼ, baʼaxeʼ tiʼ u conciencia le uláakʼ máakoʼ. Tumen ¿baʼaxten u conciencia juntúul máakeʼ unaj u juzgartik le baʼax ku chaʼabal in beetik tumen in concienciaoʼ?
30 Wa kin tsʼáaik gracias tiʼ Dios yoʼolal le baʼax kin jaantikoʼ, ¿baʼaxten túun ku yaʼalaʼalten baʼal yoʼolal le baʼax kin tsʼáaik gracias tiʼ Diosoʼ?
31 Le oʼolaleʼ wa táan a jaanleʼex, wa táan a wukʼuleʼex bey xan wa táan a beetkeʼex uláakʼ baʼaleʼ, beeteʼex tuláakal baʼal utiaʼal u nojbeʼenil Dios.
32 Kanáanteʼex maʼ a beetkeʼex u tʼóochpajal le judíoʼoboʼ, le griegoʼoboʼ mix u múuchʼulil Dios,
33 beeteʼex jeʼex teneʼ, tumen teneʼ táan in beetik u kiʼimaktal u yóol tuláakal máak yoʼolal tuláakal baʼal; maʼ táan in kaxtik chéen in wutsiliʼ, baʼaxeʼ u yutsil yaʼabkach máakoʼob, utiaʼal ka u salvartubaʼob.
Notas
^ Gr.: pornéwo. Le tʼaanaʼ ku meyaj utiaʼal u yúuchul tʼaan tiʼ le jejeláas núupchitaloʼob ku bin tu contra u ley Diosoʼ. Ilaʼak Tipʼ. 4.
^ Ilaʼak Tipʼ. 16.
^ Lit.: «Le u copail kiʼikiʼtʼaan ku meyajtoʼon utiaʼal k-kiʼikiʼtʼaanoʼ».
^ Wa: «luʼumkabil Israel».
^ Wa: «celosochajak».
^ Wa: «carnicería».
