1 Corintios 11:1-34
11 Beeteʼex jeʼex in beetkoʼ, tumen teneʼ táan in beetik jeʼex Cristoeʼ.
2 Jach maʼalob baʼax ka beetkeʼex sukuʼuneʼex, tumen mantatsʼ ka kʼaʼajsikeneʼex yéetel mantatsʼ ka beetkeʼex le baʼaloʼob jach jeʼex úuchik in tsolikteʼexoʼ.
3 Baʼaleʼ in kʼáat ka a wojéelteʼexeʼ u pool le xiiboʼ Cristo, u pool le koʼoleloʼ letiʼe xiiboʼ, u pool Cristoeʼ Dios.
4 Tuláakal xiib ku orar wa ku profetizar u pixmaj u pooleʼ, ku taasik suʼtsilil tiʼ u pool;
5 baʼaleʼ tuláakal koʼolel ku orar wa ku profetizar maʼ u pixmaj u pooleʼ, ku taasik suʼtsilil tiʼ u pool; tumen wa maʼ tu pixik u pooleʼ láayliʼ bey jeʼex juntúul koʼolel kʼoliskúuntaʼaneʼ.*
6 Tumen wa le koʼolel maʼ tu pixik u pooloʼ, kʼoʼosok u pool. Baʼaleʼ wa suʼtsil u yilik le koʼolel ka kʼoʼosok wa ka kʼolistaʼakeʼ, u pix u pool.
7 Le xiiboʼ maʼ unaj u pixik u pooliʼ, tumen letiʼeʼ chíikaʼan tiʼ Dios yéetel ku yeʼesik u nojbeʼenil Dios; baʼaleʼ le koʼoleloʼ u nojbeʼenil le xiiboʼ.
8 Tumen le xiiboʼ maʼ chʼaʼab tiʼ u wíinklil le koʼoleloʼ, baʼaxeʼ letiʼe koʼolel chʼaʼab tiʼ u wíinklil le xiiboʼ;
9 tsʼoʼoleʼ le xiiboʼ maʼ beetaʼab tu yoʼolal le koʼoleloʼ, baʼaxeʼ letiʼe koʼolel beetaʼab tu yoʼolal le xiiboʼ.
10 Le oʼolal le koʼoleloʼ unaj u pixik u pool utiaʼal u yeʼesik tiʼ yaan yáanal u páajtalil u yíichameʼ, lelaʼ unaj xan u beetik tu yoʼolal le angeloʼoboʼ.
11 Tsʼoʼoleʼ tiʼ baʼaxoʼob yaan yil yéetel Yuumtsileʼ, le koʼoleloʼ kʼaʼabéet tiʼ le xiiboʼ, le xiib xanoʼ kʼaʼabéet tiʼ le koʼoleloʼ.
12 Tumen jeʼex le koʼolel taal tiʼ le xiiboʼ, le xiib xanoʼ tiʼ koʼolel ku síijil; baʼaleʼ tuláakal le baʼaloʼoboʼ tiʼ Dios u taaloʼob.
13 ¿Bix a wilkeʼex lelaʼ? Le koʼoleloʼ, ¿maʼalob wa ka orarnak tiʼ Dios kex maʼ u pixmaj u pooliʼ?
14 Le xiib xanoʼ, ¿maʼ wa a wojleʼex suʼtsil u yilaʼal u chaʼik u chowaktal u tsoʼotsel u pooliʼ?
15 Baʼaleʼ ¿maʼ wa a wojleʼexeʼ u chowaktal u tsoʼotsel u pool juntúul koʼoleleʼ ku taasik nojbeʼenil tiʼ? Tumen u tsoʼotsel u pooleʼ tsʼaʼan utiaʼal u pixik u pool.
16 Baʼaleʼ wa yaan máax u kʼáat baʼateltʼaan utiaʼal u yoksik ta tuukuleʼex yaanal baʼaleʼ, kʼaʼajakteʼexeʼ mix toʼon k-beetik yaanal baʼal tiʼ le kaʼansaʼantoʼonoʼ mix xan u múuchʼuliloʼob Dios.
17 Chéen baʼaleʼ, le tsolnuʼuk kin tsʼáaikteʼexoʼ maʼ utiaʼal in waʼalik jach maʼalob baʼax ka beetkeʼexiʼ, tumen ka muchʼkabaʼex utiaʼal baʼax kʼaas, maʼ utiaʼal baʼax utsiʼ.
18 Tumen yáaxeʼ, ken a muchʼabaʼex yéetel le múuchʼuliloʼ kin wuʼuyik u yaʼalaʼal yaan jatslantáambail ichileʼex; kin tuklikeʼ yaan baʼax jaaj tiʼ le baʼax ku yaʼalaʼaloʼ.
19 Tumen u jaajileʼ yaan u yantal sectaʼob ichileʼex, utiaʼal beyoʼ ka chíikpajak le máaxoʼob kʼamaʼanoʼob tumen Dios ichileʼexoʼ.
20 Le oʼolaleʼ, ken a muchʼabaʼex tiʼ junpʼéeliliʼ kúuchileʼ maʼ tu páajtal u jaantaʼal u ookʼin janal Yuumtsil jeʼex unajeʼ.
21 Tumen tu yorail u ookʼin janal Yuumtsileʼ, cada juntúul tiʼ teʼexeʼ tsʼoʼok u jaantik u yoʼoch tu bisoʼ; le oʼolal yaneʼ wiʼij, baʼaleʼ uláakʼeʼ kalaʼan.
22 ¿Minaʼan wa a wotocheʼex utiaʼal a jaanleʼex yéetel a wukʼuleʼex? ¿A kʼáateʼex wa a mixbaʼalkúunteʼex u múuchʼulil Dios yéetel a suʼlakkúunteʼex le máaxoʼob minaʼan mix baʼal tiʼoboʼ? ¿Baʼax túun ken in waʼalteʼex? ¿Yaan wa in waʼalik jach maʼalob baʼax ka beetkeʼex? Tiʼ lelaʼ maʼ ken in waʼal wa maʼalob baʼax ka beetkeʼex.
23 Tumen teneʼ tiʼ Yuumtsil tin kanaj le baʼax tin tsolajteʼexaʼ: Yuumtsil Jesuseʼ tu áakʼabil yaan u traicionartaʼaleʼ tu chʼaʼaj junpʼéel waaj,
24 ka tsʼoʼok túun u tsʼáaik gracias tiʼ Dioseʼ, tu xetʼajeʼ ka tu yaʼalaj: «Lelaʼ u kʼáat u yaʼal in wíinklil kun kʼubbil ta woʼolaleʼex. Maʼ u xuʼulul a beetkeʼex lelaʼ utiaʼal a kʼaʼajsikeneʼex».
25 Bey tu beetil xan yéetel le copa ka tsʼoʼok u jaanloʼoboʼ, letiʼeʼ tu yaʼalaj: «Le copaaʼ u kʼáat u yaʼal le túumben núuptʼaan ku beetaʼal yoʼolal in kʼiʼikʼel kun wekbil ta woʼolaleʼexoʼ. Ken a wukʼeʼex lelaʼ, beeteʼex mantatsʼ utiaʼal a kʼaʼajsikeneʼex».
26 Tumen jeʼel jaytéen ka a jaanteʼex le waaj yéetel ka a wukʼeʼex le vino yaan teʼ copaaʼ, táan a tsʼáaikeʼex kʼaj óoltbil le úuchik u kíimil Yuumtsiloʼ, tak ken kʼuchuk letiʼ.
27 Bey túunoʼ jeʼel máaxak ka u jaant le waaj yéetel ka u yukʼ u copa Yuumtsil kex maʼ tu náajmatikeʼ, táan u kʼebantal tu contra u wíinklil yéetel u kʼiʼikʼel Yuumtsil.
28 Yáax táanileʼ u xíixt u puksiʼikʼal utiaʼal u yilik wa ku náajmatik, ken tsʼoʼokkeʼ jeʼel u páajtal u jaantik le waaj yéetel u yukʼik le copaoʼ.
29 Tumen le máax ku jaantik yéetel ku yukʼikeʼ, ku jaantik yéetel ku yukʼik juicio tu contra wa maʼ tu naʼatik baʼax ku chíikbesik u wíinklil Yuumtsil.
30 Le oʼolal yaʼab tiʼ teʼexeʼ minaʼan u muukʼoʼob, kʼojaʼanoʼob yéetel yaʼabeʼ kimenoʼob.*
31 Baʼaleʼ wa ka k-xíixt k-puksiʼikʼal utiaʼal k-ilik jach máaxoʼoneʼ, maʼ táan k-juzgartaʼal.
32 Baʼaleʼ ken juzgartaʼakoʼoneʼ, ku tojkíintaʼal k-beel tumen Jéeoba utiaʼal maʼ k-xuʼulsaʼal paʼteʼ yéetel le yóokʼol kaabaʼ.
33 Le oʼolaleʼ, in sukuʼuneʼex, ken a muchʼabaʼex utiaʼal a jaantkeʼexeʼ paklan páaʼtabaʼex.
34 Baʼaleʼ wa yaan máax wiʼijeʼ janak tu yotoch, beyoʼ ken a muchʼabaʼexeʼ maʼ u yantal tuʼux a juzgartaʼaleʼex. Baʼaleʼ le uláakʼ baʼaloʼoboʼ yaan in wutskíintik ken xiʼiken ta wiknaleʼex.
