2 Juan 1:1-13
1 Teen, le ancianooʼ,* táan in tsʼíib tiʼ le koʼolel yéeyaʼanoʼ* bey xan tiʼ u paalal. Teneʼ jach tu jaajil in yaabiltmeʼex. Baʼaleʼ maʼ chéen teeniʼ; yaabiltaʼaneʼex xan tumen tuláakal le máaxoʼob tsʼoʼok u kʼuchul u kʼaj óoltoʼob le jaajoʼ.
2 Toʼoneʼ k-yaabiltmeʼex tu yoʼolal le jaajil kaʼansaj yaan ichil k-puksiʼikʼaleʼexoʼ; lelaʼ mantatsʼ tiʼ kun pʼáatliʼ.
3 Dios le Taata bey xan Jesucristo u Paaloʼ yaan u tsʼáaikoʼobtoʼon le jaajil kaʼansajoʼ yéetel yaan u yeʼeskoʼobtoʼon yaabilaj. Yaan xan u yeʼeskoʼobtoʼon nojoch utsil, chʼaʼ óotsilil, yéetel yaan u tsʼáaikoʼobtoʼon jeetsʼelil.
4 Jach kiʼimak in wóol tumen tsʼoʼok in wojéeltik yaan tiʼ a paalaloʼobeʼ táan u xíimbaloʼob tu bejil le jaajoʼ, jeʼex tu yaʼalaj le Taata ka beetaʼakoʼ.
5 Le oʼolaleʼ, koʼolel, beoraaʼ kin kʼáatiktech ka k-paklan yaabiltbaʼex (maʼ táan in tsʼíibtiktech junpʼéel túumben mandamientoiʼ, baʼaxeʼ láayliʼ letiʼe tsʼaʼabtoʼon desde tu káajbaloʼ).
6 Lelaʼ letiʼe baʼax u kʼáat u yaʼal le yaabilajoʼ: ka seguernak k-tsʼoʼokbesik u mandamiento le Taataoʼ. Jeʼex ta wuʼuyeʼex desde tu káajbaleʼ, lelaʼ letiʼe mandamientoaʼ: ka seguernak a paklan yaabiltikabaʼex ta baatsileʼex.
7 Tumen yaʼab máakoʼob ku tuusoʼob tsʼoʼok u chíikpajloʼob teʼ yóokʼol kaabaʼ; letiʼobeʼ maʼ tu kʼamkoʼob wa Jesucristoeʼ taal bey wíinikeʼ. Le máax beetik lelaʼ letiʼe máax ku tuusoʼ yéetel letiʼe anticristooʼ.*
8 Kanáantabaʼex utiaʼal maʼ u saʼatal u yich le meyaj t-beetoʼ, utiaʼal beyoʼ ka a kʼameʼex junpʼéel boʼol chúukaʼan.
9 Tuláakal máax ku jóokʼol tiʼ u kaʼansaj Cristo yéetel maʼ tu tsʼoʼokbesikeʼ, maʼ junmúuchʼ yanil yéetel Diosiʼ. Le máax ku tsʼoʼokbesik le kaʼansajaʼ, letiʼe máax junmúuchʼ yanil yéetel Dios bey xan yéetel u Paaloʼ.
10 Wa yaan máax ku taal ta wiknaleʼex baʼaleʼ maʼ tu taasik le kaʼansajaʼ, junpuliʼ maʼ a kʼamkeʼex ta wotocheʼex yéetel mix a saludartikeʼex.
11 Tumen le máax ku saludartik le máakaʼ ku táakpajal tiʼ le baʼaloʼob kʼaastak ku beetkoʼ.
12 Kex jach yaʼab baʼaloʼob in kʼáat in waʼalteʼexeʼ, maʼ in kʼáat in tsʼíibt tiʼ juʼuniʼ, baʼaxeʼ in kʼáat bin ta wiknaleʼex utiaʼal ka múul tsikbalnakoʼoneʼex, utiaʼal beyoʼ ka chúukpajak a kiʼimak óolaleʼex.
13 U paalal a kiik, le máax yéeyaʼaneʼ, ku túuxtikoʼobtech saludos.
Notas
^ Wa: «le nojoch máakoʼ».
^ Maʼ xaaneʼ, le tʼaan «koʼolel» teʼ versiculoaʼ u kʼáat u yaʼal junpʼéel múuchʼulil.
^ Wa: «le máax yaan tu contra Cristooʼ».
