Apocalipsis 12:1-17
12 Ka túun chíikpaj junpʼéel nojoch chíikulal teʼ kaʼanoʼ: juntúul koʼolel u búukbesmuba yéetel le Kʼiinoʼ; yáanal u yookeʼ tiʼ yaan le Lunaoʼ, yéetel tu pooleʼ yaan junpʼéel corona beetaʼan yéetel doce estrellaʼob.
2 Le koʼoleloʼ embarazada, yéetel táan u yawat tu yoʼolal u kʼiʼinamil yéetel u muʼyajil u síijsik u paal.
3 Ka chíikpaj xan uláakʼ chíikulal teʼ kaʼanoʼ. ¡Ileʼex! Juntúul nojoch kaan chak bey kʼáakʼeʼ, yaan siete u pooloʼob, diez u baakoʼob, yéetel tu pooloʼobeʼ yaan siete coronaʼob;
4 tsʼoʼoleʼ yéetel u nejeʼ tu jíiltaj junpʼéel u yóoxjaatsil u estrellailoʼob kaʼan, ka tu puloʼob way Luʼumeʼ. Le nojoch kaanoʼ tiʼ pʼáat waʼatal tu táan le koʼolel jach taʼaytak u síijil u paaloʼ, utiaʼal beyoʼ ka u jaant u paal le koʼolel ken síijikoʼ.
5 Le koʼolel túunoʼ tu síijsaj juntúul u paal, juntúul chan xiib; le xiibaʼ yaan u nuʼuktik tuláakal kaajoʼob yéetel junpʼéel xóolteʼ de hierro. U paal le koʼoleloʼ jáanpaytaʼab utiaʼal bisbil yiknal Dios yéetel yiknal u trono.
6 Le koʼolel xanoʼ púutsʼ teʼ desiertooʼ; teʼeloʼ u preparartmaj Dios junpʼéel kúuchil utiaʼal ka tséentaʼak tu yáamil mil doscientos sesenta kʼiinoʼob.
7 Ka túun yanchaj junpʼéel baʼateltáambal teʼ kaʼanoʼ: Miguel yéetel u angeloʼobeʼ baʼatelnajoʼob tu contra le nojoch kaanoʼ, le nojoch kaan yéetel u angeloʼoboʼ baʼatelnajoʼob xan tu contraʼob,
8 baʼaleʼ le nojoch kaanoʼ maʼ tsaʼay tu yéeteloʼobiʼ,* yéetel mix tuʼux chaʼab u pʼáatloʼob teʼ kaʼanoʼ.
9 Bey túunoʼ puʼul way yóokʼol kaab le nojoch kaanoʼ, le úuchben kaanoʼ, le ku yaʼalaʼal Kʼaasilbaʼal* wa Satanás tiʼoʼ, le máax táan u tusik tuláakal yóokʼol kaaboʼ; puʼul way Luʼum paʼteʼ yéetel u angeloʼobeʼ.
10 Ka tin wuʼuyaj junpʼéel kʼaʼamkach tʼaan teʼ kaʼan táan u yaʼalik:
«¡Tsʼoʼok u kʼuchul u salvación, u páajtalil, u Reino k-Dios bey xan le páajtalil u tsʼaamaj tiʼ u Cristooʼ, tumen tsʼoʼok u puʼulul teʼ Luʼum u j-tak pool k-sukuʼunoʼob, le máax takik u pooloʼob de kʼiin yéetel de áakʼab tu táan k-Diosoʼ!
11 Letiʼobeʼ tu tsʼáanchaʼatoʼob tu yoʼolal u kʼiʼikʼel le Tamanoʼ, bey xan tu yoʼolal le tʼaan tu jaajkúuntoʼoboʼ; letiʼobeʼ maʼ tu chʼaʼajoʼob saajkil u luʼsaʼal u kuxtaloʼobiʼ,* mix tu yorail táan u aktáantkoʼob le kíimiloʼ.
12 Tu yoʼolal lelaʼ, ¡kiʼimakchajak a wóoleʼex, kaʼaneʼex, bey xan teʼex, u kajnáalileʼex kaʼan! ¡Óotsil tiʼ le Luʼumoʼ bey xan tiʼ le kʼáaʼnáaboʼ!, tumen le Kʼaasilbaʼaloʼ tsʼoʼok u yéemel ta wiknaleʼex yéetel jach pʼujaʼan tumen u yojel chéen junpʼíit kʼiin pʼaataltiʼ».
13 Le ka tu yilaj le nojoch kaan tsʼoʼok u puʼulul way Luʼumoʼ, tu chʼaʼpachtaj le koʼolel tsʼoʼok u síijil u xibil paaloʼ.
14 Baʼaleʼ tsʼaʼab tiʼ le koʼolel tu kaʼapʼéelal u xiikʼ le nojoch aguilaoʼ, utiaʼal beyoʼ ka páajchajak u bin xikʼnalil teʼ desiertooʼ, teʼ kúuchil tuʼux kun tséentbil tu yáamil junpʼéel jaʼab, kaʼapʼéel jaʼab yéetel táankuch jaʼab,* náach tiʼ le kaanoʼ.
15 Le kaan túunoʼ tu xéeaj yaʼab jaʼ tu paach le koʼolel utiaʼal u beetik u búululoʼ; le jaʼoʼ suunaj bey junpʼéel áalkab jaʼeʼ.
16 Baʼaleʼ le Luʼumoʼ taal u yáant le koʼoleloʼ; le Luʼum túunoʼ tu japaj u chiʼeʼ ka tu xúuchaj le áalkab jaʼ tu xéeaj kaʼach le nojoch kaanoʼ.
17 Ka sen pʼuʼuj le nojoch kaan tu contra le koʼoleloʼ, ka bin baʼateʼel tu contra u yalab u chʼiʼibal le koʼoleloʼ, le máaxoʼob tsʼoʼokbesik u tʼaan Dios yéetel kʼubéentaʼantiʼob u meeyjil u jaajkúuntikoʼob le baʼaxoʼob yaan yil yéetel Jesusoʼ.
Notas
^ Wa: «tsʼáanchaʼataʼabi».
^ Lit.: «Diablo», u kʼáat u yaʼaleʼ j-líiʼsaj tʼaan.
^ Lit.: «u almaʼob». Ilaʼak Tipʼ. 7A.
^ Lelaʼ u kʼáat u yaʼaleʼ óoxpʼéel jaʼab yéetel táanchumuk.
