Apocalipsis 17:1-18
17 Ka taal túun juntúul tiʼ le siete angeloʼob tsʼaʼan le siete tazaʼob tiʼoboʼ, ka tu yaʼalajten: «Koʼoten, ka in weʼestech le juicio kun taal tu yóokʼol le x-nuk koʼolel chéen bey u máanoʼ, le máax kulukbal yóokʼol yaʼab jaʼoboʼ,
2 le koʼolel núupkʼebanchaj yéetel u reyiloʼob yóokʼol kaab, yéetel tu káalkunsaj u kajnáaliloʼob Luʼum yéetel u vinoil u núupkʼebanoʼ».
3 Le ángel túunoʼ tu bisen tiʼ junpʼéel desierto yéetel u páajtalil le kiliʼich muukʼoʼ. Ka tin wilaj juntúul koʼolel kulukbal yóokʼol juntúul chak tsʼíitsʼik baʼalcheʼ chuup yéetel kʼaabaʼob utiaʼal u poʼochʼol Dios, yaan siete u pooloʼob yéetel diez u baakoʼob.
4 Le nookʼ u búukintmaj le koʼolelaʼ chak yéetel morado;* u jatsʼutskíintmuba xan yéetel oro, yéetel jatsʼuts tuunichoʼob, bey xan yéetel perlaʼob. U machmaj xan junpʼéel copa de oro chuup yéetel pʼekbeʼen baʼaloʼob bey xan yéetel u kʼóokʼol baʼaloʼobil u núupkʼeban.
5 Tu táanpoolaleʼ tsʼíibtaʼan junpʼéel kʼaabaʼ, junpʼéel baʼax maʼ ojéelaʼan baʼax u kʼáat u yaʼaliʼ: «Le Nojoch Babiloniaoʼ, u maama le koʼoleloʼob chéen bey u máanoʼoboʼ, u maama xan u pʼekbeʼen baʼaloʼobil yóokʼol kaab».
6 Tin wilaj xaneʼ le koʼolelaʼ kalaʼan yéetel u kʼiʼikʼel le j-kiliʼichoʼoboʼ bey xan yéetel u kʼiʼikʼel u j-jaajkunajoʼob Jesús.
Le ka tin wileʼ jach táaj jaʼakʼ in wóol.
7 Le ángel túunoʼ tu yaʼalajten: «¿Baʼaxten jaʼakʼ a wóol? Teen ken in waʼaltech baʼax u kʼáat u yaʼal le koʼoleloʼ bey xan baʼax u kʼáat u yaʼal le tsʼíitsʼik baʼalcheʼ kuchmil yaan siete u pooloʼob yéetel diez u baakoʼoboʼ:
8 Le tsʼíitsʼik baʼalcheʼ ta wiloʼ, yaan kaʼachi, pʼáat minaʼan, baʼaleʼ jach nukaʼaj jóokʼol tiʼ le taamkach chʼeʼenoʼ, ken tsʼoʼokok túuneʼ yaan u xuʼulsaʼal. Le u kajnáaliloʼob Luʼum —le maʼ tsʼíibtaʼan u kʼaabaʼob tu rolloil le kuxtal desde ka káaj u síijil wíinikoʼob way yóokʼol kaabeʼ—, yaan u jaʼakʼal u yóoloʼob le ken u yiloʼob le tsʼíitsʼik baʼalcheʼ yaan kaʼachoʼ pʼáat minaʼan, baʼaleʼ kex beyoʼ táan u yantal tu kaʼatéen.
9 »Teʼelaʼ, tiʼ ku kʼaʼabéettal u yantal naʼat tiʼ máakiʼ: Le siete pooloʼoboʼ u kʼáat u yaʼal siete puʼukoʼob tuʼux ku kutal le koʼoleloʼ.
10 Yaan xan siete reyoʼob: cinco u túulaleʼ tsʼoʼok u máanoʼob, juntúuleʼ way yaneʼ, le uláakʼ juntúuloʼ maʼ kʼuchkiʼ, baʼaleʼ le ken kʼuchkeʼ yaan u pʼáatal chéen junpʼíit kʼiin.
11 Le tsʼíitsʼik baʼalcheʼ yaan kaʼach yéetel pʼáat minaʼaneʼ, juntúul rey xan, letiʼ le u ochoiloʼ, baʼaleʼ tiʼ jóokʼ ichil le siete reyoʼoboʼ, yéetel yaan xan u xuʼulsaʼal.
12 »Le diez baakoʼob ta wilaj xanoʼ u kʼáat u yaʼal diez reyoʼob maʼ kʼuʼubuk u reinoʼobiʼ, baʼaleʼ ku tsʼaʼabal páajtalil tiʼob utiaʼal u reinaroʼob ichil junpʼéel hora yéetel le tsʼíitsʼik baʼalcheʼoʼ.
13 Le reyoʼobaʼ junpʼéeliliʼ u tuukuloʼob, le oʼolal ku tsʼáaik u muukʼoʼob yéetel u páajtaliloʼob tiʼ le tsʼíitsʼik baʼalcheʼoʼ.
14 Letiʼobeʼ yaan u baʼateloʼob tu contra le Tamanoʼ, baʼaleʼ yaan u tsʼáanchaʼataʼaloʼob tumen le Tamanoʼ, tumen letiʼeʼ u Yuumtsil yuumtsiloʼob yéetel u Rey le reyoʼoboʼ. Le máaxoʼob xan yanoʼob tu yéeteloʼ, le máaxoʼob tʼanaʼanoʼob, yéeyaʼanoʼob yéetel chúukaʼan u yóoloʼoboʼ, yaan xan u tsʼáanchaʼatikoʼob le reyoʼobaʼ».
15 Ka tu yaʼalaj xan ten: «Le jaʼob ta wilaj tuʼux kulukbal le koʼolel chéen bey u máanoʼ, u kʼáat u yaʼal yaʼab kaajoʼob, máakoʼob, luʼumoʼob yéetel jejeláas tʼaanoʼob.
16 Le diez baakoʼob yéetel le tsʼíitsʼik baʼalcheʼ ta wiloʼ, yaan u pʼektikoʼob le koʼolel chéen bey u máanoʼ; tsʼoʼoleʼ yaan u tokikoʼob tuláakal baʼax yaantiʼ, yaan u pʼatkoʼob x-maʼ nookʼil, yaan u jaantkoʼob u bakʼel, yéetel yaan u xuʼulskoʼob yéetel kʼáakʼ.
17 Tumen Dioseʼ tu tsʼáaj ichil u puksiʼikʼaloʼob ka u tsʼoʼokbesoʼob le baʼax u tukultmaj Letiʼoʼ; jach beyoʼ, u tsʼoʼokbesoʼob le junpʼéeliliʼ tuukul yaan tiʼ letiʼob, ikil u kʼubik u reinoʼob tiʼ le tsʼíitsʼik baʼalcheʼoʼ tak ken béeychajak le baʼaxoʼob u yaʼalmaj Diosoʼ.
18 Le koʼolel ta wiloʼ u kʼáat u yaʼal le nojoch kaaj ku reinar tu yóokʼol u reyiloʼob yóokʼol kaaboʼ».
Notas
^ Lit.: «púrpura». Le coloraʼ yaan yil yéetel ayikʼalil, tsikbeʼenil yéetel jalaʼachil.
